LA MINERIA ASTURIANA

Nun acabo d'atalantar esto de la non rentabilidá de la minería asturiana.

¿Qué ye, qu'el carbón asturianu sal más caro que'l de sudáfrica?, ¿que val más mercalo fuera qu'estrayelo? ¿Eso son los conceutos de rentabilidá en macroeconomía?

A lo meyor ye asina, pero entós ¿Qué facemos col aceite español? ye munchu más barato'l griegu... ¿y la pesca?, ye munchu más rentable merca-yoslo a los marroquís... pola diferencia económica podríen tar los pescadores cobrando un sueldu ensin tener que trabayar...

Porqué facer coches n'Europa si son enforma más baratos los asiáticos, ¿y los ordenadores? trayelos de Taiwan, son más baratos... ¿Y la carne?, acasu nun sal munchu más barato trayelo d'Arxentina.... ¿y les naranxes? ¿y el vinu? ¿Pero qué ye rentable?.... Cualisquier presona con unos conocimietos mínimos d'economía sabe perfechamente que la rentabilidá nun se mide asina, que la non rentabilidá nun depende de que sala más barato mercalo fuera que producilo dientru.... y si fuera asina, ¿porqué l'Estáu español solo aplica esi peculiar sentíu de la rentabilidá cola minería asturiana y non col restu los seutores productivos?.... nun ye solo la pesca, la agricultura, la teunoloxía... ¿Falamos d'Iberia? ¿Falamos de TVE? ...

¿A que vién eso de repetir de contino que la minería asturiana nun ye rentable?

Pos basicamente a comencer al Pueblu Asturianu de la inutilidá de resistir, a intentar metemos el complexu de vivir de la caridá del Estáu (Papá Estado dicen ellos), y a preparamos pa la pior derrota, la idiolóxica...

Lo que ta pasando cola minería asturiana ye una custión d'estratexa socio-política. El problema de la minería asturiana ye que l'Estáu español tien marcaes unes direutrices europees que contemplen ente otres coses l'amenorgamientu de la población asturiana a 500.000 habitantes. Son direutrices que yá van apaeciendo nos medios de comunicación "asturianos" y que ca pocu mos recuerden los "inteleutuales" españoles: Hai qu'emigrar.

N'esta bella provincia costera, sobramos los asturianos/es, estorbamos-yos

L'Asturies que quier l'Estáu español nun ye una Asturies industrial, ye una Asturies de xubilaos y de camareros, ye una Asturies "simpática", onde los nativos, "los indios", falamos daqué raro (curiáu, solo daqué), echamos tan peculiarmente esa bebida vasca (porque d'equí a pocu la sidre va ser vasco) y andamos con esos zapatos de maera.....

Non, el problema de la minería asturiana nun ye económicu, ye políticu, ye'l resultáu d'una situación colonial na que los asturianos/es non solo nun somos dueños de la tierra que pisamos, sinon que tampocu nun podemos decidir sobro'l nuesu futuru...

Siempres hai dos cares de la moneda, pa los españoles l'Asturies d'anguañu pue que nun seya "rentable", p'Asturies, lo que nun mos ye rentable ye España.

Data: Sabadu, 17 Xineru 1998 08:54:34 +0100
De: Marcos Abel Fernandez andecha@asturies.org
So: LA MINERIA ASTURIANA.
A: astur-list: astur-list@etsiig.uniovi.es