Andecha Astur solicita la supresión del términu "rexón" cuandu se fai referencia a Asturies nel ámbetu llegal, parllamentariu o alministrativu.
 

 

 Solicitamos públicamente al Presidente del Principado y al Presidente de la Xunta Xeneral qu'entame colos trámites precisos pa suprimir el términu "rexón" cuandu se fai referencia a Asturies nel ámbetu llegal, parllamentariu o alministrativu. La xida nun ye otra que la falta d'afayamientu d'esta espresión nes dimposiciones vixentes, darréu que rien marcaos tintes precostitucionales, na llinia dafechu cola terminoloxía d'aquelli "Conseyu Rexonal d'Asturies", qu'hai esautamente 20 años, foi istituyíu, sigún el propiu decretu que lu regulaba, comu "muérganu de gobiernu de la rexón,quedando nel so casu reservada la tradicional denomación e Xunta Xeneral del Principado pa cuandu s'aprebe l'Estatutu d'Autonomía al amparu la Costitución".

Pel llau d'Andecha Astur, nun queremos plantegar nesti intre los nuesos criterios sobro la tema, si bien reconocemos que l'afirmación del Sr. Marqués de que "Asturies ye una nación" pue y tien de marcar l'aniciu d'un alderique seriu nel sen de la clas política y un camín a siguir polos dirixentes de les formaciones polítiques mayoritaries. Pero, sobro tou, queremos solliñar que designando Asturies comu "rexón", los políticos, nel exerciciu de les sos funciones tan desvirtuando incluso les dimposiciones qu'ellos mesmos aprebaren.

Nestos 20 años caberos pocu o ná s'avanzó nel procesu de costruición d'un braeru estatus xurídicu-políticu p'Asturies, que cunte col refrendu direutu de los asturianos/es y que supere'l marcu d'una mera descentralización alministrativa. L'usu y abusu subliminal del términu "rexón", en referencia a Asturies, vien a corroborar esto cabero, por más que los partíos "rexonales" anecien n'amosamos lo contrario col so impresentable "Estatutu d'Autonomía", y el so non menos refugable proyeutu de modificación del mesmu. Un exemplu bien nidiu de tou ello podemos atopalu estos díes cola xida del alderique sobro orientación política del Gobiernu del Principado, que dio en llamase nin mas nin menos que "Alderique sobro l'estáu de la Rexón".

L'emplegu del términu "rexón" polos dirixentes políticos del arcu istitucional asturianu, ensin cuasique esceiciones, descubre dos rialidaes cuasique escaecíes: que cuasique toos ellos vienen de la dómina precostitucional de la transición, y que, per ende, son incapaces de dotar a Asturies de les sos braeres señes d'identidá político-xurídiques.

Comprendemos qu'en términos coloquiales o xeográficos puea ser desplicable l'usu del términu "rexón" pa designar a Asturies, pero en mou dalu ye almisible nos ámbetos llegales, parllamentarios y alministrativos.
 

Ello asina, solicitamos al Sr. Marqués lo que vien darréu:
 

- Que la denomación de "Direición Rexonal" seya sustituyía pola de "Direición Central" o "Direición Xeneral" en toles Conseyeríes.

- Que se suprima la pallabra "rexonal" pa denomar a los estremaos organismos públicos en xeneral: Axencia Rexonal d'Emplegu, Comisión Rexonal de Mocedá, Axencia Rexonal de Formación, Axencia Rexonal de Consumu, Conseyu Rexonal de Mediu Ambiente, Conseyu Rexonal de Caza, Cientru Rexonal de Belles Artes, Sociedá Rexonal de Turismu, etc. Sustituyendola en tolos casos por "Asturiana" o "Nacional", de tala miente que, y comu exemplu, l'Axencia Rexonal d'Emplegu pase a denomase Axencia Asturiana d'Emplegu o Axencia Nacional d'Emplegu.

- Que se modifiquen los numberosos decretos que contemplen la espresión "rexón" y los sos derivaos nel articuláu de los mesmos. Sustituyendola por "Asturies", "asturiana" o "nacional", sigún convenga al testu en custión.

Al Sr. Sánchez, Presidente de la Xunta Xeneral, solicitamos-y:
 

- Que promueva la modificación d'aquelles lleis vixenes nes qu'apaeza'l términu "rexón". Del centenar llargu de lleis ellaboraes pola Xunta Xeneral, la pallabra "rexón" fai referencia a Asturies en non menos de la tercer parti de les mesmes.

- Que remembre a los diputaos que l'emplegu d'esti términu pa denomar a Asturies pertenez a la dómina precostitucional y sitúase al marxe de la normativa por ellos mesmos aprebada.