|
|
|
||||||||||
|
|
|
|
|
|
|
|
|
|
|
||
 
 
Rotgaut al jere dal Friûl ma jerial furlan? Dal sigûr nol jere compagn di un furlan di cinccent agns dopo o di un dal dì di vuê, dutcâs nancje nô (che al sedi un ben o un mâl) no sin compagns dai nestris vons ma chest nol à di fânus pensâ che o no sin furlans nô o no lu jerin lôr. La int che e jere in chê volte tal Friûl no jere no plui celtiche o romane o langobarde, si ben un miscliç, là che si butave ancje une prime component sclave che po dopo varès vût ancjemò plui impuartance: il messedament etnic e lenghistic sot dai langobarts e je storie sigure e il condurâ di divisions e varietâts tal dirit juridic tai secui daspò al è il spieli salacôr di partignince a ideis politichis e no a popui difarents (di fat ognidun al veve di declarâsi lui, nol nasseve sot di une leç o di une altre). I furlans a jerin daûr a formâsi propit ta chei timps: O savin po che il Friûl teritori lu an disegnât pe prime volte cun cunfins politics propit i langobarts e che, al mancul te clas alte, chê di Rotgaut, il sintîsi e il volê sei alc di difarent e unic a jerin fuartonons. Ca a finissin lis peraulis di ce che al è stât. Ognidun, tal so, al à di pensâ, di scoltâ, di decidi se Rotgaut al è nome une des fantasimis di une storie aromai smamide o se impen al gjolt la gran fortune dai erois, chê di no murî, di vivi par simpri tal spirt di dut un popul: il cûr, il sacrifici, il scombati une grande bataie pe comunitât a son valôrs ancje di vuê, tun moment là che i sorestants furlans (magari cussì no, rivoc parfet de int furlane) no an fuarce, no an sintiment di popul, no an cjâf, no son pastôrs ni cjans ma pioris (cualchi volte adireture lôfs), a an memorie curte e sgrifis lungjis, a son masse siôrs di bêçs, masse puars di pinsîr. Rotgaut te sô ete al insegnât a no jessi sotan di nissun e di nuie, nus tocje cumò a nô di volê imparâ e di volê fâ. |