Il-Golf Kellu Jkun

taħt il-Verdala

Għad irid jilqa' rjus kbar

dan il-ġojjell tan-negozju Malti;

għad irid jara stikek itajru n-nar,

u blalen itiru fis-sema qishom għasafar,

u niżlin qishom trofej tal-kaċċa jfittxu dar.

Għad jiġu mill-bogħod biex jifluh mill-viċin

dan il-pannu fin;

għad trid titbissem ix-xemx

fuq dan l-investiment prim.

Din hi l-kickstart li riedet l-ekonomija;

dan hu l-ispark li ħtieġet il-magna marradija,

il-jumpstart li riedet il-batterija.

Il-golf kellu jkun għalina,

l-isport nazzjonali Malti,

bil-pass sod u l-iskoss f'salt,

bi 18-il toqba, jew 27,

imxerrdin 'l hawn u 'l hemm fl-art.

Dan hu n-nifs ġdid li ried is-settur privat;

din hi d-direzzjoni.

Il-golf kellu jkun għalina.

U ftit irjus kbar.

Adrian Grima

(18.10.99)  

Għall-Ewwel Paġna  |  Back to the First Page