Workshops għal Kittieba Nisa
Ispirati minn Fotografija Kontroversjali
Inizjamed, bi sħab mal-British Council, se torganizza sensiela ta’ erba’ workshops fil-kitba kreattiva ghan-nisa fil-Kavallier ta’ San Ġakbu, il-Belt Valletta. Il-workshops se jsiru nhar ta’ Tnejn, bejn is-6.30pm u t-8.00pm, u jibdew minn nhar it-Tnejn, 27 ta’ Mejju, 2002. Ir-raba’ u l-aħħar sessjoni ssir fis-17 ta’ Ġunju.
Dawn
il-workshops se jippruvaw jgħaqqdu flimkien l-arti tal-poeżija
ma’ dik tal-fotografija. Ir-ritratti li se jintużaw biex jispiraw
lill-kittieba huma tal-fotografa kontroversjali Ingliża Sarah Lucas.
Uħud mill-workshops se jiffukaw l-aktar fuq l-arti u t-teknika
tal-fotografija waqt li f’oħrajn se jkun hemm enfasi fuq il-kitba
nfisha. Il-workshops se jħeġġu lill-parteċipanti nisa
biex jiddiskutu r-ritratti tal-fotografa tagħha nfisha, biex jiktbu
r-reazzjonijiet tagħhom u mbagħad jipproċessaw il-kitba tagħhom
fi ħdan il-grupp.
Fid-29
ta’ Ġunju, 2002, il-British Council se jniedu wirja ta’ dawn
ir-ritratti provokattivi ta’ Sarah Lucas fiċ-Ċentru
tal-Kreattività tal-Kavallier ta’ San Ġakbu.
Sarah
Lucas twieldet Londra fl-1962, u studjat fil-London College of Printing,
and Goldsmiths College, London. Lucas taħdem b’għadd ta’
materjali u mezzi differenti, fosthom il-fotografija, l-iskultura, u
l-installazzjoni. Skond il-kritika ta’ l-arti Lara Grieve, Lucas hija
magħrufa bħala “t-tifla l-imqarba” ta’ l-arti Brittanika.
Din ir-reputazzjoni ġejja, fost l-oħrajn, mill-pożizzjoni
aggressiva f’għadd ta’ ritratti tagħha nfisha meħudin
mill-1990 ‘l hawn.
Fix-xogħol
artistiku tagħha Lucas spiss tikkonfronta lill-udjenza tagħha.
Tikkonfronta t-tradizzjoni ta’ l-istorja ta’ l-arti li fiha l-mara
tidher bħala s-seduttriċi jew bħala l-Muża, u
fir-ritratti tilbes ilbies li jilbsuh kemm in-nisa u kemm l-irġiel, bħall-jeans
u t-T-Shirt. Dawn ix-xbihat iġegħluk tistaqsi l-mistoqsijiet
dwar ir-rwol u l-apparenza ta’ l-artisti moderni. Minflok l-isterjotip
ta’ l-individwu uniku qed jippoża fl-ambjent kreattiv ta’
l-istudio tiegħu, Lucas tippreżenta lilha nfisha bħala
persuna normali f’ambjent tas-soltu.
Uħud
mill-wirjiet riċenti ta’ Sarah Lucas kienu, “The Old In Out”,
Barbara Gladstone Gallery, New York (1998), “Real Life: New British
Art”, Tochigi, Prefectural Museum of Fine Arts, il-Ġappun (1999), u
“The Fag Show”, Sadie Coles HQ, Londra (2000), u Napli (2001).
Minħabba
n-natura tal-workshops, il-grupp ma jistax ikun kbir biex jiffunzjoni
tajjeb. Dawk in-nisa li huma interessati li jieħdu sehem għandhom
jiktbu lill-organizzaturi minnufih (Clare Azzopardi - clareazz@maltanet.net
jew Karen Vella - karin@maltanet.net).
Min jieħu sehem m’għandux bżonn ta’ esperjenza.
Il-workshops se jkunu bil-Malti u huma miftuħin għal nisa minn
18-il sena ‘l fuq.
Attivitajiet Oħra
Minbarra
dawn il-workshops, fix-xhur li ġejjin Inizjamed se tkun qed
torganizza għadd ta’ attivitajiet oħra. Fis-7 ta’ Ġunju,
l-attivist ambjentali Belġjan Eric Van Monckhoven se jkun il-kelliem
ewlieni f’forum pubbliku ġo Bay Street dwar l-użu mill-ġdid
ta’ materjal mormi u r-rabtiet bejn l-ambjentaliżmu u l-inizjattivi
kulturali. Dan il-forum huwa parti minn proġett ta’ Inizjamed
bl-isem ta’ “Ri-Kreazzjoni” li qed isir bil-kollaborazzjoni
tal-programm “Żgħażagħ” ta’ l-UE u Bay Street.
Bejn
il-15 u t-21 ta’ Lulju, Menna Elfyn (fir-ritratt), kittieba ewlenija
minn Wales, se tkun Malta biex tagħmel sensiela ta’ workshops u tieħu
sehem f’forum pubbliku ma’ NGOs lokali u taqra x-xogħlijiet tagħha
fil-pubbliku. Iż-żjara tagħha qed tiġi organizzata
minn Inizjamed bi sħab mal-British Council.
U
fl-aħħar ġimgħa ta’ Awwissu, il-kittieb Miro Villar
(fir-ritratt) u l-kritika Rosa Salgueiro Salgueiro mir-reġjun
tal-Galizja fi Spanja se jkunu Malta biex jagħtu workshops ta’
kitba u jieħdu sehem f’attivitajiet artistiċi ma’ awturi u
artisti Maltin f’Bay Street u fil-Birgu. Din l-inizjattiva qed issir
bl-għajnuna tas-Segretarjat Parlamentari fil-Ministeru ta’
l-Edukazzjoni u Bay Street.
Għal
aktar tagħrif dwar il-workshops ta’ kitba għan-nisa li se
jibdew nhar it-Tnejn li ġej u attivitajiet oħrajn organizzati
minn Inizjamed, ċempel 21 388995 jew 21 376941, jew ibgħat
fax lil 21 373272. Tista’ wkoll tibgħat email lil inizjamed@maltaforum.org jew
iżżur il-website http://inizjamed.cjb.net
Clare
Azzopardi
L-20 ta’ Mejju, 2002
