| ROCK Y POP CON RAIGAÑOS |
| Como Rock y Pop con raigaños atalantamos a
aquellos grupos qu'usen davezu instrumentos tradicionales de la mena la
gaita, magar que nun son abondos angüañu, tamién hai qu'esclariar que
fonon dellos los que quedanon pel camín. Tolos grupos d'esta esbilla
cancien n'asturián y tan abondo comprometíos cola custión
nacional. |
| AVIENTU: Son cinco rapazos del conceyu
Riosa, que tienen yá asoleyaos dende 1994, en tan curtiu espaciu de tiempu
tres discos; el primero ye "Tirate abaxo!" de 1995, el segundo ye "¿Y
agora qué?" de 1997 y acben de sacar un nuevu trabayu nomáu "Glayíu
dende'l fondu". Quiciabes son los fíos musicales de "Dixebra" (yá
qu'inclusive graben cola mesma compañía de discos, l'avilesina
"L'Aguañaz"), magüer que tienen un son abondo más pop. |
|
|
| DESVÁN: Grupu de pop que ta acabante de
ganar el concursu de maquetes de Cadena100. Metémoslu equí porque amiesta
a esi soníu pop delles pingarates de música folk, sigún dicen ellos,
presta-yos asgaya la música que fae xente como Mike Oldfield y
Capercaillie, naguando por algamar daqué asina cola de so.
|
| DIXEBRA: Grupu de Rock Radikal Astur
amiestu de "Kortatu" con pingarataes de "Llan de Cubel", ún de los más
veteranos del panorama musical astur, dende 1986 lleven furrulando
perende. Llideráu pol yá míticu Xulio Elipe "Xune", esti avilesu qu'entamó
plumiando na nuesa llingua na revista del colexu "San Fernando" a fines de
los 70, y que siguió esconsoñando concencies nes ondes de la COPE-Avilés
col so programa "Albintestate", al que-y siguiríen dellos más. Ye ún de
los adelantraos del movimientu de rexurdimientu l'asturianu, yá que cola
so música aportó a fasteres de la sociedá en les que nun caltriaría'l folk
asturián. Esta inclina dica la música celta nótase sobrotou nel so primer
trabayu ("Grieska", 1990 -Fonoastur-); nel qu'amiesten el rock más cañeru,
col ska, el punk, y Dios sabrá que más. Cola introduición de la gaita
asturiana, un discu que convirtió en braeros himnos nacionales a cancios
como "Rapaza Nacionaliega". Los siguientes trabayos, yá cola so propia
compañía "L'Aguañaz", son: "Asturies o trabayes" (1993), "Apúntate a la
llista" (1995), "Dieron en duru" (1997) y "Glaya un País" (2000), quiciás
el meyor fasta agora, con un soníu más maduru y unes lletres menos
evidentes, cuntando con collaboradores del renome de Anabel Santiago,
Fermín Muguruza, Xosé Ambás, Xéliba, Fe de Ratas... |
|
|
| NUBERU. El grupu entreguín de Chus Pedro
Suárez y Manolo Peñayos, primeru col nome de "Camaretá", entamaron a
canciar na dómina de la Transición a la democracia. Ye un grupu que
significó y significa asgaya na nuesa hestoria, que llogró axuntar la
vindicación de la llingua y de les llibertaes democrátiques a la calidá
artística y l'amestanza con pautes musicales vives na tradición ástur. La
música de so foi ensin dulda la meyor campaña de dignificación de la
llingua asturiana, a lo qu'aidó en gran midida los testos poéticos de
Manuel Asur. Chus pedro, voz del grupu, collabora nel primer trabayu
discográficu de los hermanos Tejedor, poniendo-y voz a "Chalaneru". D'esa
collaboración colos avilesinos vino una amistá y fondera almiración de
Phil Cunningham, col que yá entamó Chus Pedro un discu de cancios
asturianos onde van collaborar músicos escoceses. |
| TELA, xente de La Pola L.lena, grupu de
rock suversivu y cañeru que ta, dende hai un tiempu, tirando palo folki
(metieron gaita y vigulín). Sacaron una maqueta titulada "KontraKultura".
Naguamos por tener más noticies d'ellos. |
