მგლები ძალუმად ყმუიან

[25/12]  საქართველოს ჰოკეის პირველობაზე, წლის ბოლო მატჩში, ლიდერმა "რუხმა მგლებმა" ბარაქიანად ძლიეს ბოლო ადგილზე მყოფი "ცეცხლოვანი ჯვაროსნები" და უახლოესი მდევარი, "ყინულის რაინდები" ხუთი ქულით ჩამოიტოვეს, შეჯიბრების მეოთხე მონაწილის, ბაკურიანის "მიმინოს" გამო კი სპორტის სასახლესთან გაბერილ კარავში გაიგონებთ, თამაშს აღარ აპირებს და ამიტომ მეორე წრეში სამი წაგება ჩაეთვლებაო.

ახალი წლის მოახლოებისა და აცივების კვალად გუნდები ცოტათი გაიცხრილნენ, მაგრამ მათსავე წრეში მოვარჯიშე მოზარდები აიმეტეს და კაცურ მარაქაში გარიეს ორ-ორი ბავშვი. ახალბედები მესამე სამეულებში თამაშობდნენ, მაგრამ როგორც გამარჯვებულთა გოულმა, "კოსტა" სანიკიძემ შენიშნა, მათ ცვლაზე თვალ-ყური ფხიზლად უნდა გეჭიროს, თორემ გოლი არ აგცდება.

ყინულს შემოჯარული ფანობა მალიმალ აგულიანებდა ნორჩ ლუკა დავითაშვილს. კაცურ ჰოკეიში პირადი ანგარიში გახსნა მისმა ტოლმა ნოდარ იაკობიშვილმა. 12 წუთში კარიერის პირველი ჰეთ-თრიკი შეასრულა "მგლების" მოთამაშე მწურთნელმა მამუკა შერგილაშვილმა, ვისაც აქამდე სამჯერ გაეტანა თითო შაიბა, და "ჯვაროსნებმა" ბოლო 11 დღეში მეორე თამაშიც წააგეს.

მეკარეებმა ივარგეს

"სახალხო ბანკის" თანამშრომელი მამუკა სიცხიანი (38 გრადუსი) თამაშობდა, მაგრამ თავიდანვე ორი შორი დარტყმით გააბითურა პატრიკ ფრეიზერი, ვინც წინა დღით მოლხენის მიუხედავად, მაინც ჩინებულ ფორმაში იყო.

კანადელმა 0:1-ზე და პირველი შესვენების წინ აუღო რომა ლუთიძეს, 0:2-ზე შერგილაშვილს, 1:5-ზე ილია დავიდოვი კარის შემოვლაზე აოტნა, 1:6-ზე ლუკას უფროს ძმას, მიშა დავითაშვილს მაგრად დაუდგა, ნაკლებობაზე კი გარი ელიბეკოვის ახლოდან დარტყმულიც მოიგერია.

კოლეგას არ ჩამორჩა სანიკიძე: 2:0-ზე ზედიზედ აუღო დემურ გურგენიძესა და ზურა ნადირაშვილს; მეორე პერიოდის დასაწყისში და 6:1-ზე აოტნა პირისპირ დარჩენილი გურგენიძე და ერთხელაც ნადირაშვილი.

დარტყმებს მკერდი მიუშვირა

მეტოქეებს კაცი თითოჯერ გაუძევა მსაჯმა, ფედერაციის პრეზიდენტმა დენის დავიდოვმა. ჯვაროსანთა მეტობაზე შერგილაშვილმა ორ დარტყმას მკერდი მიუშვირა, ნადირაშვილმა კი შაიბა ვერ აუწია წაქცეულ სანიკიძეს.

მგლების მეტობაზე ელიბეკოვმა დააწვინა ფრეიზერი, მაგრამ ცარიელ კარს ააცდინა. სათამაშო ხუთი წამი რომ რჩებოდა, ხუთით (!) ჩამორჩენილმა ჯვაროსნებმა გამოიხმეს მეკარე და ყინულზე მეოთხე სკეიტერიც შეუშვეს, მაგრამ მაქედან არა გამოუვიდათ რა.

გამარჯვებულმა მგლებმა თავისი კარის წინ მოიყარეს თავი და ყმუილი გააბეს. გუნდმა ორი წრის ჯამში პირველი ადგილი დაიკავა და ოდინდელი ლოგიკით ჩემპიონია, მაგრამ ჩვენს დროში გამარჯვებული პლეი-ოფში ვლინდება ხოლმე და ეგებ გვიჯობდეს, რომ შინაც ახლავე დავიდგინოთ სეზონის დამაგვირგვინებელი მატჩის ტრადიცია.

ერთადერთი მარგი გამოსავალი

ბოლოს, ბაკურიანის გამოც. 45 წლის წინ სწორედ რომ მანდ დაირწა ქართული ჰოკეის აკვანი. დაბას ქვეყანაში ერთადერთი ნაღდი (60 X 30) საციგურაო აქვს და კოლორიტული კლუბიცა ჰყავს. იანვრის ბოლოდან მანდვე გეგმავს შეკრებას ოთხივე ქართული გუნდი, რათა ნაკრები შექმნას, მაგრამ ვაგლახ, რომ სუბიექტურ მიზეზთა გამო, "მინინოს" მეორე წრეში ვალად სამი თამაში დაუგროვდა.

ჰოკეი XXI საუკუნეში ჩვენში მესამედ დაინერგა. წინა ორი მცდელობისგან განსხვავებით (სსრკ ხალხთა სპარტაკიადა და ოქროს შაიბა), ამჯერად მიზანთა მიზანი უფრო ამაღლებულია: საქართველო საერთაშორისო ფედერაციაში (იიჰფ) უნდა ჩაეწეროს და 2009 წელს მსოფლიო პირველობის ბოლო ჯგუფშიც ჩაებას.

ამისთვის თურმე აუცილებელია, რომ 4-გუნდა ჩემპიონატი გავმართოთ. ამასაც რომ თავი გავანებოთ, ესა თუ ის სპორტი ქვეყანაში რეალურად მაშინღა არსებობს, თუ თამაშები იმართება. მერე კიდევ, ახლად ფეხ-ადგმულ სახეობაში ყველანი ერთურთის ახლობლები არიან და ეჩოთირებათ "ესტეკა"-ზე (გინდაც პრეზიდიუმზე) წაგებათა მისჯა.

ასე რომ, გარეშე, ნეიტრალური გადმოსახედიდან, რჩება ერთადერთი, ყოველმხრივ მარგი გამოსავალი: მიმინომ გაცდენილი თამაშები ნაახალწლევს უნდა გამართოს!
 

24 დეკემბერი

მგლები - ჯვაროსნები 7:2 (2:1 3:0 2:1)

1 >> 1:0 შერგილაშვილი 4 (2.30) 2:0 შერგილაშვილი 5 (3.18 ლუთიძე) 2:1 ნადირაშვილი 2 (9.24) * ჯარ: -

2 >> 3:1 შერგილაშვილი 6 (11.35) 4:1 ლუთიძე 5 (13.10 შერგილაშვილი) 5:1 იაკობიშვილი 1 (14.04) * ჯარ: ი.დავიდოვი (17.23 ღობეზე) -

3 >> 6:1 ი.დავიდოვი 4 (21.01 მ.დავითაშვილი) 6:2 ცაგარეიშვილი 3 (29.33 ნადირაშვილი) 7:2 მ.დავითაშვილი 7 (29.47) * ჯარ: - გურგენიძე (26.36 ღობეზე)

დარ 39:24 (16:7 10:9 13:8) მეტ 1:1 * რეფ: დენის დავიდოვი

რუხი მგლები: 71 ილია დავიდოვი, 12 გარი ელიბეკოვი, 21 მამუკა შერგილაშვილი - 29 მიშა დავითაშვილი, 7 რომა ლუთიძე - 4 ნიკოლოზ ბახტაძე, 97 ნოდარ იაკობიშვილი, ზუკა მერკვილაძე / 86 კონსტანტინე სანიკიძე

ცეცხლოვანი ჯვაროსნები: 4 დემურ გურგენიძე, 23 ლაშა ცაგარეიშვილი, 6 ალექსანდრე ლუტიძე - 7 ზურა ნადირაშვილი, 77 დათო გოგელიძე, არკადი არუშანოვი - 10 მიშა ვედიაპინი, ლუკა დავითაშვილი, 11 ზუკა გურგენიძე / 2 პატრიკ ფრეიზერი

მ-წ: ძირითადში 3-0, ოვერტაიმში 2-1

ქულა (გოლს პლუს პასი)

დენის დავიდოვი (რაინ) 15(9-6), პაატა კავკასიძე (რაინ) 12(5-7), მამუკა შერგილაშვილი (მგლ) 11(6-5)

მიშა დავითაშვილი (მგლ) 9(7-2), გოჩა ჯეირანაშვილი (მიმ) 9(4-5)

რომა ლუთიძე (მგლ) 7(5-2), ვახტანგ გოგიჩაიშვილი (მიმ) 7(4-3)

ილია დავიდოვი (მგლ) 6(4-2), ირაკლი ნატროშვილი (რაინ) 5(4-1)

ირაკლი დავითაია (რაინ) და ლაშა ცაგარეიშვილი (ჯვარ) 4(3-1)

ამირან გეფერიძე (მიმ) 3(3-0); გარი ელიბეკოვი (მგლ), დემურ გურგენიძე (ჯვარ) და ზურა ნადირაშვილი (ჯვარ) 3(2-1)

მგლები თუ ჯვაროსნები?

[23/12]  ამაღამ, ათ საათზე, სპორტის სასახლესთან გაბერილ კარავში, ყინულის მოედანზე, საქართველოს პირველობის მორიგი მატჩია: ლიდერი "რუხი მგლები" ხვდება უქულო "ცეცხლოვან ჯვაროსნებს", რის შემდეგაც ორი წრის გასასრულებლად ბაკურიანის "მიმინოს" მოუწევს თბილისის სამივე გუნდთან თითოჯერ თამაში.

XXI საუკუნეში ყინულის ჰოკეი ჩვენში მესამედ დანერგა ქართველ ყვანჯოსანთა მეორე თაობის წევრმა, დენის დავიდოვმა. წლეულს, გაზაფხულზე, მოეწყო უკრაინული ტურნე, ივნისში კი ბიჭები ოთხ გუნდად გადანაწილდნენ და პირველობაც გააჩაღეს, ოღონდაც რაკი ასპარეზი კანონიკურზე სამჯერ მცირე აქვთ, სამი სკეიტერით სამის წინააღმდეგ თამაშობენ და პერიოდებიც ათ წუთს გრძელდება.

ზაფხულსა და შემოდგომაზე ოთხ-ოთხი მატჩი მოეწყო. ჯვაროსნებს კარში კანადელი პატრიკ ფრეიზერი კი უყენიათ, მაგრამ მაინც ბოლო ადგილზე არიან, ხოლო ყვითელი ფორმით მოთამაშე მგლები ყველაზე სტაბილური გუნდია - აქამდე გამართული ოთხი მატჩიდან სამი მოუგია და ერთშიც ოვერტაიმში დამარცხებულა. პირველ წრეში, ორი თვის წინ, მგლებმა 6:2 ძლიეს ჯვაროსნები და ამაღამ, რაგინდარა სპორტში გამოსადეგი ლოგიკით, წაგებული რევანშს უნდა დაეშუროს.

ქულა (გოლს პლუს პასი)

დენის დავიდოვი (რაინ) 15(9-6), პაატა კავკასიძე (რაინ) 12(5-7), გოჩა ჯეირანაშვილი (მიმ) 9(4-5)

მიშა დავითაშვილი (მგლ) 7(6-1), ვახტანგ გოგიჩაიშვილი (მიმ) 7(4-3), მამუკა შერგილაშვილი (მგლ) 7(3-4)

ირაკლი ნატროშვილი (რაინ) და რომა ლუთიძე (მგლ) 5(4-1); ილია დავიდოვი (მგლ) 5(3-2)

ირაკლი დავითაია (რაინ) 4(3-1), ამირან გეფერიძე (მიმ) 3(3-0); ლაშა ცაგარეიშვილი (ჯვარ) და გარი ელიბეკოვი (მგლ) 3(2-1)

დიდი ყინული დახატავთ

[16/12]  ოთხი კვირის შემდეგ რომ განახლდა ჰოკეის შინაური პირველობა, "ყინულის რაინდებმა" ჯერ-არნახული სხვაობით ძლიეს "ცეცხლოვანი ჯვაროსნები", მაგრამ სპორტის სასახლესთან დადგმულ კარავში შეკრებილი საზოგადოება სანახაობით მაინც კმაყოფილი დარჩა, რადგან ბიჭები თამაშიდან თამაშამდე ხვეწენ ოსტატობას და დამწყებთა კვალობაზე, უკვე რიგიანად სრიალებენ და ყვანჯობენ.

კარავში ჰოკეი პარასკევობით, ღამის ათზე იწყება. მატჩები მიზეზთა გამო რომ გადაიდო, გუნდებს თამაშთა განსხვავებული რაოდენობა აქვთ, მაგრამ ვიდრე ბაკურიანში, იანვრის ბოლოს დაიწყებოდეს საერთო შეკრება, საბურთალოში ორი წრე ნაღდად ჩამთავრდება და კიდევ ოთხჯერ ვიხილავთ სეირს, რომელსაც თავისი მუშტარი უკვე ჰყავს.

პირველობის ოთხი მონაწილიდან სამი თბილისისაა და მეოთხის, ბაკურიანის წევრთა ნაწილიც აქაურია. ვინც უქმობს, იმ საღამოს მსაჯისა და სამდივნოს ფუნქციებს კისრულობს. თამაშზე იკრიბებიან მოყვანჯეთა ახლობლები და ზოგადად, ჰოკეის მოყვარული პუბლიკა.

ჰოდა, ყველა ერთხმად აღნიშნავს, რომ ჩვენში მესამედ დანერგილი თამაში ბოლო ნახევარ წელში ასფურცელასავით იზარდა, მაგრამ წისვლა უფრო თვალ-საჩინო იქნებოდა, დედა-ქალაქში ერთი ნაღდი, დიდი, 60-მეტრა ყინული რომ გვქონდეს.

125 წამი შათაუთამდე

თუმც კარავში ბიჭებს გასაქანი აკლიათ და სამით სამზეღა თამაშობენ, მაინც ყველაფერი ძაან ფერადია: ყინული თეთრად ლაპლაპებს; გუნდებს ლამაზი ფორმები აცვიათ; მოთამაშეებს ზურგზე ნომრები და გვარები აწერიათ; ისმის ციგურათა შხუილი, ყვანჯთა კანუნი, ღობეზე მოთამაშეთა ჯახანი და შაიბის ბრაგუნი.

შოუ ასპარეზის გაყინვით იწყება; სრულდება ჰიმნი; გუნდები ერთმანეთს ესალმებიან; განწყობის შესაქმნელად წრეში იყრიან თავს და ყვანჯებს ერთად დაკრავენ ყინულს. თავად თამაში ძაან სწრაფია და პაუზებიც ცოტაა. მარცხი ვის არა წყინს, მაგრამ რაკი ყველანი მეგობრები არიან, წაგებული მოგებულს მილოცვას არ ამადლის.

ივნისში, სეზონის სულ პირველ მატჩში, რაინდებმა 4:1 ძლიეს ჯვაროსნები. ამჯერად პირველთა ცნობილი გოული კოტე ბახუტაშვილი ჩვენი პირველობის ისტორიაში პირველ შათაუთთან ძაან ახლო იყო, მაგრამ ბოლომდე 125 წამით ადრე მაინც გაუშვა ერთადერთი შაიბა.

გაზრდილი კვალში უდგას

კოლეგაზე ბევრად მეტი ჯაფა ადგა კანადელ პატრიკ ფრეიზერს, ვინც ბოლომდე 12 წამით ადრე სასწაულად აუღო რაინდების მოთამაშე-მწურთნელსა და ფედერაციის პრეზიდენტს, დასში უხუცეს დენის დავიდოვს, ბოლოსწინა წამზე კი წაქცეულმაც იხსნა კარი.

გამარჯვებულთაგან კარიერის პირველი ორი შაიბა გაიტანა 30 წლის სანდრო ვაშაკიძემ, ვინც ციგურებზე აპრილშიღა შედგა, და ერთიც, ნორჩმა ნიკა მახვილაძემ, ვისაც დიდებში ჰქონდა დებიუტი.

რვა მატჩის შემდეგ მექულეთა დოღს 9 გოლითა და 6 პასით (სულ 15) ლიდერობს ბატონი დენისი, მას კი კვალში 12 ქულით (5გ 7პ) მისივე ნათესავი და გაზრდილი, ყოფილი ფეხბურთელი, ჯერაც 14 წლის პაატა კავკასიძე უდგას.

14 დეკემბერი

რაინდები - ჯვაროსნები 8:1 (2:0 3:0 3:1)

1 >> 1:0 კავკასიძე 4 (0.46) 2:0 ვაშაკიძე 1 (6.45 ბიწაძე)

2 >> 3:0 მახვილაძე 1 (13.25) 4:0 დავითაია 3 (15.04 კავკასიძე დავიდოვი) 5:0 დავიდოვი 8 (15.40)

3 >> 6:0 ვაშაკიძე 2 (24.17 მახვილაძე) 7:0 კავკასიძე 5 (24.27 დავითაია) 8:0 დავიდოვი 9 (25.24) 8:1 გურგენიძე 2 (27.55) * ჯარ: - ნადირაშვილი (20.27 ზურგში)

დარ 46:14 (12:5 19:4 15:5) მეტ 1:0 * რეფ: ილია დავიდოვი

ყინულის რაინდები: 7 ირაკლი დავითაია, 10 დენის დავიდოვი, 11 პაატა კავკასიძე - 4 გუგა არჩვაძე, 6 ჯაბა ჩალათაშვილი, 84 ბესო მიქაბერიძე - 66 გიორგი ბიწაძე, 77 სანდრო ვაშაკიძე, 71 ნიკა მახვილაძე / 20 კოტე ბახუტაშვილი

ცეცხლოვანი ჯვაროსნები: 4 დემურ გურგენიძე, 23 ლაშა ცაგარეიშვილი, 26 სერგეი ტიხონოვი - 6 ალექსანდრე ლუტიძე, 11 გენადი კოსიცკი, 7 ზურა ნადირაშვილი - 10 მიშა ვედიაპინი, 77 დათო გოგელიძე, არკადი არუშანოვი / 2 პატრიკ ფრეიზერი

მ-წ: ძირითადში 3-0, ოვერტაიმში 2-1

დენისი და მისი ჯარი

[13/12]  ვინც "ოლიმპში" ნჰლ-ის ამბებს კითხულობს, ერთხელ მაინც გაიფიქრებდა, ჰოკეი ჩვენში დანერგილი რად არ უნდა იყოსო. ჰოდა, ახლა ამ ხალხის გასახარად ვიტყვით, რომ ამაღამ, ათ საათზე, სპორტის სასახლის წინ გამართულ კარავში საქართველოს პირველობის მორიგი მატჩია: დენისის "რაინდები" ებმიან პატრიკის "ჯვაროსნებს" და ამ ჯახზე, მოყვანჯეთა თემის წევრთა გარდა, ეშხიანი თამაშის ხილვის ნებისმიერ მოსურნესაც შეესვლება.

დენისი და პატრიკი ტოლები, 35 წელს გადაცილებულები არიან. პირველი, როგორც თავადვე ამბობს, მამით რუსია, დედით უკრაინელი, დაბადებით კი ყაზახი, მაგრამ სხვა ყველაფრივ, ესე იგი იერით, ენით, აღზრდითა და გაგებით აქაურია და რაც ექვსი წლის წინ ქართული ჰოკეის აღორძინებას შეეჭიდა, ფრიად წარმატებას მიაღწია.

პატრიკი კანადელია, მაგრამ ქართველი ცოლი ჰყავს და ამდენად, უკვე სანახევროდ ჩვენებურია. კაცი ზაფხულში შინ მიბრუნდა, მაგრამ მერე ისევ აქეთკენ გამოუწია გულმა და ძმობილს მხარში დაუდგა როგორც ბავშვთა მწურთნელად, ისე ჯვაროსანთა მეკარედ - გოული ჩვენთან დეფიციტია, ხოლო მის გარეშე თამაში ვერ ჩატარდება.

დენისი და მისი ძმა, ილია ამ ოცი წლის წინაც თამაშობდნენ "პირველ მერცხალში", რომელიც, ბერიშვილის "სპორტის ენციკლოპედიის" მიხედვით, ქართული ჰოკეის ისტორიის მეორე პერიოდში არსებობდა. იმავე გუნდიდანაა თვით ტრეწიაკის აღზრდილი კოტე ბახუტაშვილი, ვისაც ცეესკასა და ყაზანში უთამაშია, პირველი პერიოდი კი 1960-იან წლებშივე დასრულებულა.

მსოფლიოზე 2009 წლიდან!

ჰოკეი ჩვენში მეორედ 1990 წელს შეწყდა, დენისმა კი ფედერაცია 2004 წლის ოქტომბერში დაარეგისტრირა. მას აქეთ ალალ ენთუზიაზმზე დაფუძნებული თემი განუხრელად იზრდება და რიცხოვანებით უკვე ას სულს გადაცდა, მაგრამ თბილისში ნაღდი, 60-მეტრა საციგურაო რომ არა აქვს, ჯერჯერობით მხოლოდ "სამით სამზე" თამაშობს.

ამ წესებით პერიოდი ათ წუთს გრძელდება, გაძევება კი ერთ-წუთიანია. მოედანზე არარა ხაზი გავლებული არაა და ამდენად, ოფსაიდი და აისინგი არ მოქმედებს. რაინდებისა და ჯვაროსნების გარდა, გვყავს ჩემპიონატის ლიდერი მგლები, რომელთაც მამუკა ყოჩობთ, და მიმინო, ვისი სახელითაც ნაკრებმა მაისში უკრაინაში (დნეპრო-პეტროვსკი) იასპარეზა.

მიმინო ბაკურიანისაა და შინ დიდ მოედანზე ყვანჯობს. დენისმა შეგირდები გუნდებად ისე დაყო, რომ შეჯიბრება საინტერესო გამოსულიყო. ოთხივე წრე ამზადებს საბუთებს და გაისად კლუბად გაფორმდება. მერე ფედერაციაც გააგზავნის მიმართვას იიჰფ-ში და 2009 წლიდან მსოფლიო პირველობის ბოლო, მესამე ჯგუფში ჩავებმებით.

ვაკის პარკის ბოლოში?

იქ გაისად ითამაშებენ მასპინძელი ლუქსემბურგი, თურქეთი, ჩრდილოეთი კორეა, სამხრეთი აფრიკა, მონღოლეთი და ბოსნია - სომხეთი - საბერძნეთის შესარჩევის გამარჯვებული. ამათ ალბათ ყველას აქვთ ნაღდი მოედანი, ჩვენები კი იანვარში ბაკურიანში შეიკრიბებიან, გაზაფხულზე ისევ უკრაინაში წავლენ, მერე ეგებ წიუმენშიც გაილაღონ და დიდ ჰოკეიში დახელოვნდნენ.

კარვის საციგურაოს სიგრძე 30 მეტრია, სიგანე 20, გადახურვა, განათება და მაცივარი კი საუკეთესო აქვს. ერთმანეთს მიჯრით რომ მივადგათ სამი ასეთი მოედანი, ერთი ნაღდი გამოგვივა, მაგრამ მზეჭაბუკის მიდამოში არაა ამოტოლა ადგილი. სამაგიეროდ, ვაკის პარკის ბოლოში, მომცრო ლოკომოტივამდე არმისული, ყოფილა სამაგისო ტერიტორია და თურმე ექვს თვეში (!) შეიძლება ათასი მაყურებლის დამტევი ჰოკეის სტადიონის გამართვა.

ეგ საგაისოდ, ჯერჯერობით კი ბიჭები იმას ჯერდებიან, რაც გააჩნიათ. მერე ორგანიზაციაც რომ სანიმუშო აქვთ: ოქმებს ისე გულდაგულ ადგენენ, რომ ჭადრაკის გარდა, საქართველოში ალბათ ვერცერთი სპორტი ვერ შეედრებათ! ერთი კია, კარვის მესამედი მოქმედი, მაგრამ უმუშტრო კაფის ნაცვლად გასახდელსა და სან-კვანძს რომ ეჭიროს, ყოველ-მხრივ უკეთესი იქნებოდა.

აი, ამ საღამოსაც, მანდილოსნებს გუნდების ნაცვლად ვეაჯებით, რომ ჰოკეის საცქერლად დაწყებამდე 15 წუთით ადრეღა მივიდნენ, რათა მოასპარეზეებმა სამოსის გამოცვლა ყინულთანვე მოასწრონ!
 

საქართველოს პირველობა

რაინდები - ჯვაროსნები 4:1 (0:1 0:0 4:0)

დ.დავიდოვი 21.46, ჯ.ჩალათაშვილი 22.07, ნატროშვილი 26.48 27.23 - ნადირაშვილი 8.32 / დარ 24:16, ჯარ (წთ) 2:1 * 2/06

მიმინო - ჯვაროსნები 4:1 (1:0 2:0 1:1)

გოგიჩაიშვილი 3.34მ, გეფერიძე 13.54 16.08, გჩ.ჯეირანაშვილი 23.39 - ცაგარეიშვილი 28.28 / დარ 41:15, ჯარ 3:3 * 9/06

მგლები - მიმინო 6:5 (4:2 2:3 0:0)

ი.დავიდოვი 0.20 18.46, შერგილაშვილი 2.01, დავითაშვილი 6.12, ბახტაძე 7.35, სამადაშვილი 15.57 - ოგანეზიანი 2.50, გჩ.ჯეირანაშვილი 5.12 17.57, გოგიჩაიშვილი 15.33, გეფერიძე 16.36 / დარ 20:24, ჯარ 3:1 * 16/06

რაინდები - მგლები 7:6 (3:2 2:4 1:0 ოტ)

დ.დავიდოვი 0.03 0.58 1.21 14.00 17.33 21.10 * ოტ: კავკასიძე 33.02 - შერგილაშვილი 2.01, დავითაშვილი 2.34 16.00, აბაშიძე 13.26 18.21, ლუთიძე 19.35 / დარ 31:38, ჯარ 2:3 * 30/06

მიმინო - რაინდები 5:3 (1:2 1:0 3:1)

გჩ.ჯეირანაშვილი 4.44მ, გოგიჩაიშვილი 14.57 23.58, ოგანეზოვი 23.25 28.04 - ნატროშვილი 0.48 21.03, ჯ.ჩალათაშვილი 3.54 / დარ 21:13, ჯარ 1:3 * 12/10

მგლები - ჯვაროსნები 6:2 (3:0 3:1 0:1)

დავითაშვილი 3.52 9.37, ელიბეკოვი 7.31მ, უსანეთაშვილი 15.48, შერგილაშვილი 18.03, ლუთიძე 18.52 - გურგენიძე 10.22, ცაგარეიშვილი 21.59 / დარ 46:38, ჯარ 1:2 * 19/10

ჯვაროსნები - მიმინო 3:0 (1:0 2:0) შეწყდა!

ცაგარეიშვილი 1.23, ლუტიძე 12.17, კოსიცკი 15.06 / დარ 16:11, ჯარ 1:0 * 26/10 (გადათამაშდება)

მგლები - რაინდები 5:4 (1:3 3:0 1:1)

ლუთიძე 3.30მ 10.42, დავითაშვილი 11.21, ელიბეკოვი 16.08, ი.დავიდოვი 23.22 - დავითაია 0.39 1.19, კავკასიძე 8.00 23.33 / დარ 21:17, ჯარ 6:6 * 16/11

ქულა: მ-წ ძირითადში 3-0, ოვერტაიმში 2-1

ქართული გუნდები
[C კაპიტანი, A კაპიტნის თანაშემწე, G მეკარე]

ბაკურიანის მიმინო

99 C ბაჩო ოგანეზიანი, 77 გიორგი ჯეირანაშვილი, 10 მიხეილ ხუციშვილი, 66 ამირან გეფერიძე, 55 ვახტანგ გოგიჩაიშვილი, 13 გოჩა ჯეირანაშვილი, 85 გოგა გოგოლაძე, 4 შალვა ოგანეზოვი, 88 ლაშა მეტრეველი, 22 ილია ბანდური, 8 სერგო აკოფიანი, 33 ლევან ზედგენიძე / 20 G კახა ამბროლავა

რუხი მგლები

21 C მამუკა შერგილაშვილი, 71 ილია დავიდოვი, 29 A მიშა დავითაშვილი, 9 ზურა სამადაშვილი, 7 რომა ლუთიძე, 77 გიორგი კუხალეიშვილი, 4 ნიკოლოზ ბახტაძე, 13 ირაკლი უსანეთაშვილი, 97 გიორგი აბაშიძე, 12 გარი ელიბეკოვი, ლაშა ბოღლოციშვილი / 86 G კოტე სანიკიძე

ყინულის რაინდები

13 C ირაკლი ნატროშვილი, 10 დენის დავიდოვი, 11 პაატა კავკასიძე, 4 გუგა არჩვაძე, 6 ჯაბა ჩალათაშვილი, 84 ბესო მიქაბერიძე, 77 A ალექსანდრე ვაშაკიძე, 66 გიორგი ბიწაძე, 18 გიორგი ჩალათაშვილი, ირაკლი ჯავახია, 7 ირაკლი დავითაია / 20 G კოტე ბახუტაშვილი

ცეცხლოვანი ჯვაროსნები

23 C ლაშა ცაგარეიშვილი, 26 სერგეი ტიხონოვი, 4 დემურ გურგენიძე, 7 ზურა ნადირაშვილი, 6 ალექსანდრე ლუტიძე, 8 სოსო შუბაშვილი, 10 მიშა ვედიაპინი, 77 A დათო გოგელიძე, 13 ნუგზარ ჯანჯალაშვილი, 11 გენადი კოსიცკი, ირაკლი კანდელაკი / 2 G პატრიკ ფრეიზერი