|
Lo CRÒC es solidari amb los albaneses de Kosova e denóncia
l’agressivitat dels dirigents sèrbis. Lo poder sèrbi es una mena de regim nazi miniatura qu’a semenat de tròp la terror e la guèrra dins los Balcans. Sembla donc que de recórrer a la fòrça siá vengut lo sol mejan de salvar los albaneses de Kosova. Ça que la lo CRÒC fa pas brica fisança a l’Otan, qu’obesís als interèsses plan dobtoses dels Estats Units. D’efièch, avèm vist lo resultat desastrós dels metòdes de l’Otan en Iraq : las victimas son estadas bèl primièr de civils innocents. Serà çò meteis en Serbia? D’autre latz, l’Otan es una poténcia cinica e ipocrita que sosten l’Estat turc. Ara Ankara fa als curds exactament çò que Belgrad fa als albaneses. Lo CRÒC sosten los combatents albaneses e curds, tan coma los democratas sèrbis e turcs. Lo CRÒC demanda que se reconosca lo drech a l’autodeterminacion pels albaneses de Kosova, tan coma per totes los pòbles minorizats: occitans, bascos, bretons, curds, escoceses... Las questions etnicas se pòdon resòlver sonque s’òm las tracta seriosament e equitablament, en reconoissent a totes los pòbles los meteisses dreches democratics, e mai lo drech a l’independéncia. Aplicar totes los dreches, aquò’s la sola basa d’una patz solida e duradissa. Kosova = nom albanés; Kosovo = nom sèrbi |
|