Dempuèi un an e mièg un collectiu, aplegant onze associacions engatjadas per la cultura Occitana que se sompartissián l'utilisacion de locals en l'espaci Sant Çubran, a dobèrt un dialòg amb la comuna de Tolosa.

Mai enlà dels problemas d'intendéncia, se tratava pel collectiu de determinar e endralhar una vertadièra politica culturala Occitana per Tolosa.

Aqueste dialòg bastideire fusquèc l' escasença d' evidenciar qu'aquesta politica deu anar fòrça mai luènh que la preservacion o la mesa en valor del nòstre patrimòni cultural mas s'inscriure subretot dins la modernitat, l'accion e la creacion.

Conscient de l' importància d'aquest enjòc, de la vitalitat d'aquesta cultura, e de las espèras que suscita, aquest collectiu a pres la decision de s'estructurar e de s'alargar.

Atal las vint e una associacions signatàrias del comunicat aqueste an decidit lo 20 de Julh de 1998 de crear "CONVERGÉNCIA OCCITANA".

Aquesta estructura de sinergia permetrà a las associacions concernidas de se dotar dels mejans a la nautor dels prètz-faits de complir.

Un dels primièrs objectius en acòrdi amb lo municipi de Tolosa serà la creacion d'un "OSTAL D'OCCITÀNIA", casa comuna e centre nerviós d'aquesta dinamica nòva.

A l'opausat dels provincialismes e regionalismes reductors e passeistas, aquest eveniment istoric es una virada per l'elaboracion d'una politica internacionala a la nautor de la vocacion de la civilisacion Occitana, e d'una CAPITALA tala coma TOLOSA!

"CONVERGÉNCIA OCCITANA es constituïda de :

Calandreta Miègjorn - Pirenèus, Calandreta Costa - Pavada, Centre de Formacion de las Calandretas, Centre Internacional d'Istòria de las scienças Occitanas, Caireforc Cultural Naut Bernat, Casal Català, Escambiar, Flamba Catara, Fondacion Occitània, Institut d'Estudis Occitans (IEO) Nacional, IEO Musica, IEO Miègjorn-Pirenèus, IEO 31, Jogl'Art, Mediterranèa, Associacion Mondinas, Musica Trans'òc, Ràdio Occitània, Tolosa Brasil País d'òc, Transmediadòc.

Contacte: Transmediadòc 7 carrièra Marie Magné, 31300 Tolosa.
Tel/Fax: 05 61 59 27 71 - E-mail : transmediadoc@worldnet.fr