PARTIT OCCITAN Comitat d'Albigés

B.P. 28 - 81370 Sant Sulpici la Punta

tel: 05.63.40.09.33 / fax: 05.63.40.02.90

   Sant Sulpici lo 29 d'octobre de 1999

comunicat de premsa:

Tchetchenia: segon que lo vòstre agressor serà ric e poderós o paure e flac ...

Fa ara mai d'un mes que l'agression russa en Tchechenia se perseguís amb un acarniment sostengut e una ferocitat indicibla. Fa ara mai d'un mes que l'aviacion russa delarga de contunh sas bombas subre la populacion civila de la pichona republica caucasiana. Una populacion civila que sap pas pus ara ont anar se refugiar. Los mòrts e los nafrats se comptan per milierats dins una indiferéncia generala en Occident. Una indiferéncia politicament entretenguda en França e en Euròpa.

Tchechenia èra ja estada agressada en 1996 per son ancian partenari. Pr'aquò lo país s'èra democraticament e a la vista de totes, dotat d'un Parlament e d'un govèrnament. La Republica tchechèna aviá alara causit de se desseparar de la Republica federativa de Russia. Tocant a la democracia, lo drech dels pòbles a dispausar de se a pas de sens que quand son los pòbles concernìts que decidisson eles-meteisses de lor destinada. Foguèt lo cas en Tchechenia ont s'engimbrèt l'organisacion d'eleccions liuras. Atanben cap autre pòble de la planeta n'es autorisat de li contestar lo drech a la sobeiranetat. Plan mai encara! Se l'Organisacion de las Nacions Unidas (ONU) emplenava normalament son ròtle, auriá per dever de far respectar aqueste drech coma tempta d'o far al Timòr oriental.

Malurosament per Tchechenia, son agressor dispausa d'un sèti al Conselh de Securitat de l'ONU alara qu'lndonesia ten pas mai de drech de vetò a l'ONU que de bomba atomica. Alavètz, çò que se vei s'amaga pas! La justícia es pas la meteissa segon que lo vòstre agressor es poderós o desprovesit. Atanben se justícia poguèt en partida èsser accordada als pòbles timorés e albanés de Cosovia qu'èran oprimits per de "pichons", lo "grands", eles, se son endevenguts per refusar tota existéncia a cèrtes autres pòbles. N'es lo cas de la nacion curda que son agressor seculari servís de basa militària als estasunians. Ne va tanben del pacifique pòble tibetan qu'a pas res a esperar de l'equitat dels "grands". Aquestes an plan tròp de se parar de lor susceptible aligat chinés. D'alhors, Senhers Chirac e Jospin, coma lairons en fièra,venon de vendre lor silenci subre la violacion dels dreches umans al Tibet contra la crompa per Pequin de qualques avions.

Alavètz, res de nòu jos la copa del cèl. L'Umanitat a gaire evoluida e los Estats terroristas (auèi, los que possedisson l'arma atomica) contunhan de se despartir lo monde segon lors interesses pròpris. Tal coma o fasián autres còps los impèris: sens se trachar, nimai se socitar mendrament d'una etica quina que siague. A l'ora ont coma cadun sap, lo monde es vengut un "vilatge planetari", es ara ora que las nacions que lo compausa se balhèsson de règlas universalas de fonccionament democratique e tanben los mejans de far respectar aquestas règlas. Per aquò far, I'ONU deu èsser reformada en prigondor subre las basas de la morala, de la justícia e de la solidaritat. Es vengut lo temps de crear una Amassada Planetària ont cada nacion valgue una votz quina que sia son importància demografica o economica. D'ont mai que la tòca primièra d'aquesta ONU renovelada seriá d'edictar un còdi etique e moral qu'enclüiriá còpsec lo desarmament atomique universal.

Dins l'espèra, de milherats de tchechènas se morisson jos las bombas russas dins una indiferéncia complícia. Indiferéncia entretenguda en França pels partits politiques jacobins.

Complici d'una Russia dangeirosament instabla, lo monde sancèr denega als tchechènas lo drech d'èsser... tchechènas.

© Partit Occitan 1999