Kisah Bahasa Banjar:

Manyatrum Maling

SUDAH baminggu-minggu ini bubuhan Palui wan kakawalannya nang bakumpul di gardu kada kaya biasanya main catur, dumino atawa bahalma tapi hanya bapapanderan haja.Biasanya bila main itu pasti bataruh duit atawa paling kada bagantungan butul di talinga.Daripada kaasyikan main sampai batangah malam hanyar ampihan, bilang habang talinga kana tali nilon bagantung butul.

Bubuhannya kada main itu karna sama-sama sudah singkip kada saling duitan lagi disamping ada nang mausul supaya ampihan haja batataruhan karna tamasuk judi.

+ Aku akur haja kita ampihan bataruhan karna sudah parak bulan puasa ujar Garbus.

- Ikam itu pandernya haja pina paharatnya mahadang bulan puasa tapi nyatanya paling-paling umpat puasa pamulaan bulan, panangahan wan pahabisannya ujar Tulamak.

+ Sabubungulnya aku sahut Garbus tahu haja bahwa bulan puasa ini bulan ba-amal, bulan ampunan Tuhan makanya kita jangan katinggalan mumpung datangnya satahun sakali.

= Aku sapandapat wan Garbus karna urusan pahala wan urusan dosa itu Tuhanlah nang mahitungnnya jar Palui.

- Nah..... bung Palui sudah sampai kajiannya ujar Tulamak.

Kada lawas imbah inya bahual mamanderakan cagar datangnya bulan puasa, kadangaran suara urang kukuriak :

+ Maliinngg.....maliinngg.....maliinngg......

Mandangar kuriakan maling maling itu maka Garbus bagagas kaluar gardu lalu langsung mancatuk loncing saling nyaringan, sampai tabangunan bubuhan warga RT-nya.

- Ada apa, ada apa ? ujarnya.

+ Itu nah ada maling di gang subalah parak sungai. Ayu lakasi kita baluk supaya malingnya takurung lalu kita tangkap kita hukumakan ujar Garbus.

= Jangan main hakim saurangan, kaina bila dapat kita julung ka pulisi ujar Palui.

- Itu nah..... malingnya kadangaran bacabur ka sungai ujar Tulamak sambil manyintar-nyintar garambuak banyunya.

= Wah, kalu inya bacabur ka sungai, paling lawas lima manit kawa banyalam dalam banyu,makanya kita hadangi haja ujar Palui.

Tapi sampai satangah jam bubuhannya mancari’i balum tatamu jua, lalu Palui dapat akal.

= Baiknya kita satrum haja, supaya Garbus ma ambil tali listrik di gardu lalu langsung cucukakan kasatrumnya ujar Palui sambil banyaring suaranya.Tapi sambil basuara nyaring tadi Palui bakijip matanya mambari kode wan Garbus.

= Garbus paham kode kijipan Palui lalu manyahut : beres bos setrum okey ujarnya.

Mandangar suara strum okey, lalu mancangul malingnya naik ka tabing sambil baucap : ampun...ampun...aku manyarah ujar maling.

= Nah tangkap, ikat tangannya bawa ka gardu ujar Palui.

Malihat maling manyarah angkat tangan, Garbus mangalakak tatawa karna akal Palui hebat banar.Tadi bujur haja tali listriknya dicaburakan ka sungai tapi inya hanya pura-pura mancucukakan kasatrumnya.Mandangar di satrum lalu maling itu mancangul naik rupanya takutan jua mati ujar Garbus. emhati/zaf