Kisah Bahasa Banjar:

Kapal Tarbang DC-10

BIARPUN Palui sudah puluhan tahun badiam di kuta, sudah babarapa kali bulang bulik Banjarmasin-Surabaya bakapal laut atawa baparahu bugis tapi sampai wayahini balum tarasani bakapal tarbang.Jangankan babuat manjapai haja balum biasa.Padahal sudah babarapa kali inya umpat ka bandara tapi karna kada bulih masuk lapangan maka balum kawa jua manjapai.Supaya jangan kapuhunan maka inya biasa mamaksa diri manjapai kapal tarbang AURI nang diulah monumen di simpangan Landasan Ulin itu.

= Sayang banar kapal tarbang itu dibiarakan haja, jaka sengnya itu diulah ember atawa balik minyak pasti kuat wan larang haraganya.Bubuhan papadaanku matan Nagara biasa manakunakan apakah kapal tarbang nang kada tapakai itu handak dijual, maka bubuhanku tadi hakun manukarinya, ujar Palui bakisah wan Garbus.

+ Monumen kapal tarbang itu tamasuk banda sajarah jadi kada cagar dijual urang sahut Garbus.

= Aku marasa hiran banar, aku nang sudah lawas baniat handak naik kapal tarbang kada kabul-kabulnya tapi julakku nang badiam di Pangkalan Bun itu samalam datang kasini manumpang kapal tarbang DC-10 ujar Palui.

+ Waahhh..... mana mungkin sahut Garbus.Kapal tarbang DC-10 itu pesawat jet,awaknya ganal banar kada mungkin turun di Pangkalan Bun ujar Garbus mangaramputakan.

= Kalu ikam kada parcaya, kaina kukiyauakn julakku nang hanyar datang itu, sidin lagi sambahyang di kamar ujar Palui. Nah....... itu sidin datang, cuba ikam takuni bujur kada sidin datang kasini manumpang pasawat DC-10.

+ Uuiii julak, sanang banar ulun batamuan sampiyan ujar Garbus sambil basalaman.Ujar Palui sampiyan datang tadi bapasawat DC-10, bujurlah ?

- Tampulu duit cukup tarasani jua naik pasawat tarbang,tadi manumpang DC-10, ininah tiketnya ujar julaknya Palui.

= Naaahhhh...... bujur kalu, aku kada bakaramput wani basumpah ujar Palui.

+ Kaya apa ganalnya pasawat DC-10 itu, banyak kalu panumpangnya sampai ratusan ikung ujar Garbus mahimati.

- Pasawatnya kada ganal banar wan panumpangnya pas-pasan ujar sidin.

+ Pas-pasan kaya apa ?

- Ya pas-pasan sapuluh itu pang ujar sidin.

= Nah..... pahamlah ikam Bus ujar Palui.

+ Balum paham, kada mungkin DC-10 isinya pas-pasan sapuluh ikung haja sahut Garbus.

= Maksud sidin naik kapal tarbang DC-10 itu, kada lain pesawat DC-10 (baca : di-isi sapuluh) nang tarabang kada jauh pada pucuk nyiur ujar Palui sambil takurihing manyirit ka-anu mamarinanya.

+ Ayu ja aku kalah Lui ai, kaina kupikirakan ma-angsulnya ujar Garbus bulik kada saling padahan. emhati