Kisah Bahasa Banjar:

Dibunguli Maling

NANG ngaran candu banar lawan main bal, Palui bilang kada kawa tatinggal apabila ada partandingan nang disiarakan ulih televisi. Dalas basangu guring, digawinya apabila partandingan tadi disiarakan dinihari atawa subuh.

Matan semalam siang Palui sudah barancana handak manonton Liga Inggris nang disiarakan dinihari. Apalagi nang cagar main klub kasayangannya New Castle ada bintang paling dikatujuinya si Alan Shearer. Pamain paling larang haraga tranfernya jar urang. Haraga inya tu kawa gasan manukari babarapa ikung pamain kita, itu kesah si Surawin nang sama-sama katuju sual bola. Musuhnya pulang klub Wimbledon nang ada pamain hirang gundul.

= “Pasti rami, rugi amun kada manonton,” ujar Palui bapadah lawan kakawalannya.

Maraga itu, limbah Isya Palui badadas naik ka ranjang, basangu guring. Rancananya inya bangun kira-kira pukul satangah tiga dinihari supaya kada tatinggal siaran main bal tadi.

Bininya lawan kakanakan rupanya sungsung jua guringan maraga kauyuhan hari Minggu siang babarasih rumput di halaman. Makanya rumah Palui malam itu pina ranai, sungsung batutup lawang.

Kira-kira pukul satangah tiga dinihari, Palui tabangun. Limbah babasuh muha wan bakukumur, inya ka dapur maulah kupi lalu bacari kukutupan gasan kawal manonton TV. Siap barataan diandak di mija halus, mulai inya malikit ruku lalu-ai duduk di muka TV mahidupinya mamakai remot.

Nang kaluar di TV-nya gambar samut, Palui manggarunum.

= “Ini pasti kakanakan maubah-ubah satilan TV, makanya pina kada manangkap siaran”.

Dipicik-piciknya remot, tapi samunyaan kadada nang takana siaran. Barataan samut bahabis nang kaluar. Panasaran, Palui maambil ka buku patunjuk, dibacanya cara-caranya. Lalu dicubanya baasa matan pamulaan, tagal kada jua ada hasilnya. Palui basasarik mambangunakan urang sarumahan.

= “Ding...., siapa nang maubah TV sampai kada kawa manangkap siaran!” ujar Palui manakuni bininya.

- “Kadada abahnya-ai. Kakanakan si anang wan aluh saisukan sasiangan mandangani aku di tanah babarasih halaman,” bininya manyahuti sambil mausap-usap mata marga bangun bakakajutan.

Marasa kadada jalan lagi gasan maakali supaya kawa manonton TV, Palui hancap turun ka rumah si Iyan kawalnya nang kawa mambaiki TV.

= “Aku turun manginyau Iyan. Paling inya balum guring, biasanya sambil manonton main bal inya bababaik TV urang, ujar Palui bapadah lawan bininya.

Kada lawas datang Palui lawan Iyan. Langsung Iyan mamariksa TV ampun Palui. Limbah mambuka tudung balakang TV, Iyan takajut wan rasa kada parcaya.

+ “Lui.... mudil kaya apa garang TV ikam ini?” Iyan batakun.

= “Kada bamudil-mudil, kaya ampun urang jua ai,” sahut Palui sambil rasa hiran kanapa garang Iyan jadi batakun kaya itu.

+ “Ini lain TV nang kaya ampun urang. Daripada mambaiki, baik manukar nang hanyar. Ini tatinggal karungkung haja, sualnya masinnya kadada. Nang ada tabung gasan malihat gambar haja. Ini pasti ada nang mambungkar,” Iyan manjalasakan wan Palui.

= “Masya Allah, ini pasti ada nang kada biris,” ujar Palui sambil hancap mamariksa ka lawang-lawang lawan lelungkang.

= “Ini pang.........,” ucap Palui limbah malihat ada lalungkang nang tabuka.

+ “Iya pas. Malingnya nang mancuntan masin TV ikam bukah liwat lelungkang itu,” Iyan umpat manjinguk ka lelungkang nang tabuka tadi.

= “Kana aku sakali ini, dibunguli maling sampai kada kawa manonton siaran bola......” ujar Palui manggarunum.

Rupanya waktu bubuhan Palui guringan, ada maling nang masuk lalu mancuntan masin TV ampun Palui.[sug/tamaz]