Kisah Bahasa Banjar:

Parang Ajaib

DI KAMPUNG Palui, giliran jaga malam masih tatap dijalanakan. Tiap malam ada saragu nang kana giliran, batugas manjaga kaamanan di lingkungannya. Biasanya bakumpul di Pos Kamling, ada haja nang digawi. Sakalumpuk badum, ada kalumpuk lain nang baadu kesah, ada pulang nang bapatroli kuliling RW.

Bubuhan lalakian di lingkungan ngitu bila kadada gawian lawan mata balum mangantuk, umpat baramian di Pos Kamling batangah malaman. Bilang kada sing ranaian Pos Kamling di wadah Palui.

Malam itu takana giliran bubuhan Palui nang kada lain takumpul Garbus, Tulamak lawan Tuhirang. Bubuhannya limbah muyak badum lalu mangabuau sampai liwat tangah malam. Kira-kira parak pukul dua malam, bubuhannya tulak bapatroli kuliling kampung. Sualnya jam-jam kaya itu urang nyaman-nyamannya guring nang kasampatan itu biasanya dipakai ulih maling gasan bauperasi.

- “Lui, bawa parang ikam, siapa tahu kalau pina ada maling nekat, tapaksa kita kaluarakan jurus bangkui,” ujar Garbus maingatakan Palui.

+ “Siap, beres kumandan!” sahut Palui bagaya nang kaya bubuhan polisi manyahuti perintah kumandannya.

Bubuhannya bakuliling bahihipan, senter sana senter sini supaya malihat kalu pina ada urang nang manyulaya gawi.

Waktu sampai di parak rumah mintuha Palui, talihat ada urang pina mancurigaakan di padang sabat. Bubuhannya basisiap, bajingkit mamaraki. Palui nang paling paiyanya, sualnya rumah mintuhanya pina nang jadi sasaran urang tadi. Urang nang dicurigai tadi pina asyik banar ada nang dicari di padang sabat, jadi kada malihat Palui sudah ada di balakangnya.

+ “Angkat tangan, jangan bergerak!” Palui bakuciak sambil manudung urang tadi.

= “Ampun pak..... ulun jangan ditembak. Ulun handak manangkap ayam nang tahambur marga disasahi musang,” ujar urang tadi.

+ “Bah.... ikamkah nang, kukira maling handak manggawi rumah abah,” ujar Palui sambil tatawa imbah tahu urang nang tadi ading bininya.

Limbah bulik ka Pos Kamling, Garbus batakun wan Palui,

- “Lui, kanapa garang si Anang tadi pina katakutanan banar lawan baucap jangan ditembak waktu ikam todong”.

+ “Ha.....ha......ha......! Tahulah ikam, aku tadi tacabut parang ajaib, makanya inya katakutanan banar,” Palui manjalasakan sambil tatawa gahak-gahak.

Bubuhannya kada paham, nangapa maksud Palui, parang ajaib. Tulamak tapaksa manggasak batakun pulang,

= “Parang ajaib nangapa? Maka nang ikam bawa parang nang ada di Pos Kamling kita .....”.

- “Bujurai ....., itulah parang ajaibnya. Sualnya waktu kucabut badadas handak manodong si Anang tadi, rupanya nang tacabut hulunya haja. Parangnya tatinggal di kumpang. Jadi si Anang mangira inya ditodong lawan pestol,” ujar Palui manjalasakan.

Mandarau bubuhannya tatawaan mandangar panjalasan Palui. [sug/tamaz]