Kisah Bahasa Banjar:

Artis Kucing

DI KAMPUNGNNYA, Palui tamasuk nang banyak akal, banyak baulah idabul gasan kabaikan kaya mangapalai gutungruyung, pangajian kakanakan, latihan pramuka, karang taruna sampai gawian RT-nya.Makanya dua talu hari haja Palui kadada di kampung maka bubuhannya hawai banar.Karna banyak kabisaan itulah maka minggu tadi Palui dikiyau Pambakal, dibawai bamusyawarah wan tatuha lainnya gasan manyusun rancana mancari dana untuk mambangun balai PKK di kampungnya. Palui wan bubuhan kakawalannya dapat tugas maadakan malam amal hiburan.

+ Kami mandukung usul ikam Lui ai, kita maadakan partunjukkan sandiwara wan ba adu balulucuan, ujar Garbus.

- Kami sanggup mambantu wan sakaligus jadi pamainnya, sahut Tulamak wan Tuhirang.

Palui sibuk baulah kisahnya, lalu maatur siapa nang cagar main, kaya itu jua siapa-siapa nang tukang ulah panggung, parlangakapan wan sakaligus manjual karcisnya.Samunyaan sudah biris, dua talu kali balatih lalu ditatapakan malam mainnya. Kisahnya adalah manuju kaluarga sakinah, tapi untuk mancapainya banyak halangan, rintangan dan gudaan.

Pamainnya kakawalan Palui samunyaan harat pandir, suaranya lantang, patuh wan suruhan sutradara.Nang jadi sutradara dan sakaligus jadi pamain intinya adalah Palui saurang.

Imbah acara pambukaan lalu langsung partujukan sandiwara, ruang rumah kaluarga yang pada mulanya rukun, ruhui rahayu tapi ahirnya saling mancurigai lalu tajadilah partangkaran laki bini, Palui sebagai suami wan Imah sebagai bininya.Bahual muntung, saling manuduh, lalu kada lawas imbah partangkaran itu maluncatkan kucing bini ka atas panggung lalu disusul ulih kucing laki, lalu saling basasahan di atas panggung wadah Palui main.

+ Naaahhh......lihat kucing itu, biarpun inya binatang tapi inya bisa bamasraan, basasayangan ujar Palui manunjuk kakucing nang negong.....ngeong....... bararayuan.Mustinya manusia kaya kita ini labih pintar dari kucing ujarnya pulang.

Nang bini tadiam kada kawa manjawab karna inyalah nang mamulai manuduh Palui kada jujur ada gandak salawas maujek. Kada lawas mandangar kucing bararayuan handak batitindihan, maluncat pulang kucing laki lainnya lalu langsung manyarang mangarukut kucing nang bararayuan tadi.

Panuntun taimbai tatawaan sambil baampikan malihat partunjukan Palui nang disalingi kucing bararayuan.Lalu kada lawas maluncat pulang kucing laki lainnya, langsung manyarang kucing nang bararayuan tadi rupanya kucing itu barabut bini.

+ Nah......lihati ujar artis si Imah, kada kawa rukun kalu, hanya gara-gara sepele, kaya ikam ujarnya.Lalu panuntun baampik pulang karna Palui dibalas ulih bininya.

= Cuba itihi bahimat, kucing itu barabut bini, kada barabut laki.Kaya itu jua lalakian kada salah, nang salah bibiniannya karna hakun dirabutakan urang ujar Palui mambalas.Mandangar Palui mambalas maka panuntun tatawaan pulang, lik satu satu ujarnya.

Kada lawas partunjukkan tuntung panuntun basurakan karna marasa puas.Lalu Pambakal wan panitia balai PKK mamaraki Palui, manyalami karna sandiwaranya suksis wan hasilnya banyak banar.

- Tarimakasihlah Lui, bubuhan ikam ini harat banar karna kawa maatur kucing main di panggung, kawa manyuruh bararayuan wan manyuruh kucing bakalahi ujar Pambakal sambil tatawa.

= Sabujurnya itu samasakali kadada dalam teks , hanya kabibisaan mangaitakan dalam kisahnya ujar Palui.

- Artinya kucing haja kawa diatur apalagi manusia ujar Pambakal sambil manyalami bubuhan Panakawan Palui.[emhati/aan]