謎之．老鼠橫行之卷！！一之章！

話說我屋企，除左我之外件件都改造人黎（改造人之卷以後暫定於卷之二或卷之三推出），屋企窗門長期處於緊閉狀態而除左我之外好似無人覺得辛苦咁．而屋企由我出世起，一直都有養開貓．老母本來一直都好唔鐘意貓，勁憎照顧貓，又要清貓屎，又要買貓糧（無養貓既人士，貓糧好貴架），一直想丟．後黎裝修廁所（只係小修，將本來充滿蟑螂，無錯，係充滿．只要唔係日頭入去既話，入親去都至少有兩三隻等緊你．而且又爛又污糟．現在好多了，同新屋既一樣咁乾淨），老母就以裝修為名，丟左佢出街，跟住仲無再俾佢番黎．由於本來貓兄已經被縛於一米乘一米再乘一米既一平方米地方活動，總算有Ｄ貓味軒制住Ｄ老鼠，但由於佢既離開，令我異常傷感．傷感之餘，老鼠亦開始瘋狂遷入兼橫行．跟住老鼠就一直有咬爛我張被，貴Headphone（唔好話Headphone唔多值錢，我覺得貴就得，OK？），大量零食，CD，兩雙新拖鞋（各咬一半），好多塞住房門口，令房門閂唔埋既垃圾，同埋好多我心愛既書，仲有…



謎之．老鼠橫行之卷！！二之章！

上回講到老鼠狂咬爛野，今回就遘述下災情．老鼠每每響我出街後擒上我床咬被（可能凍，上床襟被要用口咬黎襟．但佢牙又利，所以至咬爛我張被）．有時又會開我筒新既，未拆既品客薯片食，仲識咬爛響臺上面Ｄ麥記茄汁撈黎食，勁識嘆（我鐘意淡味Ｄ，食「啊V盡路」，可能鼠輩們喜歡濃味D）．另外佢地交通異常繁忙，夜晚每每三分鐘就有一至兩隻老鼠於門框跑過．有時，我坐響度用電腦，佢地玩就狂追逐．玩得癲起上黎仲會跑到撞親人（人=我）．先一野全力撞埋我隻腳度（跟住我隻腳就有Ｄ毛「神神」既feel），再好迷茫咁望多我兩眼，至慢慢地，施施然地走左去，情境異常有趣．所以話，第時有人去你屋企，你千祈唔好話「唔駛怕羞，當自己屋企咁就得架啦」，唔係因住佢會好似我家之鼠輩們咁當正自己屋企．而我間房係響正兩個老鼠「逗」中間，處於老鼠村中間既交通命脈＋主要三大糧食供應處之一．令交通異常發達．而話說大嫂兄佢呢（我阿哥條女搬埋黎同大佬住），有次食飯喎，響遠處既冷巷見到老鼠路過竟然驚到喊．你話如果想醫好佢，我同佢交換房一晚！正！！！包佢以後唔驚！（不過我極唔想同我大佬訓）



謎之．老鼠橫行之卷！！終之章！

話說俺家係密封的，無開窗門個喎（大家都有不死身，除左我），之前養開貓就無老鼠啦．咁後黎鼠輩們又邊度黎呢？據老母兄報導，鼠輩們係由馬桶撲出黎既！佢話話說有次佢如廁時，突然有毛「神神」又有少少濕淋淋既野揩到佢屎忽．跟住佢望下啦，原來有隻老鼠由馬桶爺裡面撲出黎！我心諗覺得勁恐怖，但覺得有三大疑點．一，無屋企人在場睇到做到証，咁恐怖既野，實大嗌啦，咁應該有人過去睇到有老鼠，可以做証至係．二，隻野點入屎渠既呢?屎渠應該無路入個喎．屎渠，原則上應該密封的，唔會就會好臭．三，無其他人試過類似情況．但佢又唔似講大話，而屋企又密封，無理由擒牆入黎喎…hmm…