八月 AUGUST






八月卅一日 星期六:  上班兩個月零五日

終於都到o左要走o既最後一天喇...我自己都唔知應該懷著d咩o野o既心情去返工...開心?唔捨得??興趣,甩難...真的可說是百感交集!PS:有見到我日記o既'同事仔',唔好氣餒呀!我初初做o個時都係遇過挫折喇...(講真,遇到挫折是免不了的~) 至於被其他同事仔快過自己開單,也沒什麼大不了呢.因為今日佢開單,聽日可能係妳呢,係咪?做好自己本份 + 去多d公海撈客就一定有'意外收獲'o架喇~

今晚為了同康康大人慶祝廿歲生日,就決定搞個'打邊爐'...最勁係我地班友成七點半先開始買材料(食物)...好彩最後都買到咋!(不過份量又好似多得滯~)由於食物太多o既關係,零晨開始玩賭肉丸,唔係贏肉丸返屋企,而係即場食返d丸丸!(既刺激,又唔浪費食物)基於有雙炒同三炒o既關係,最後有人輸到五十幾粒丸丸呢...不過都冇人食...=P

八月卅日 星期五:  上班兩個月零四日

今日夜晚即刻去o左牛池灣參加觀塘循道衛理社區中心的惜別晚會... 雖則是惜別會,但我們都是以開開心心的心情渡過的...因為新的一個'名稱'將會代替,其他一切都沒有改變的...最開心係我獲頒贈嘉許狀呀嘛~=)

以前細過初初玩ICQ時,我曾經試過刻意尋找一些同我(同年)同月同日生日的人來認識...但縱然給我找到,也不能維持聯絡/溝通...甚至日後失去聯絡呢!但是,人生往往就是這樣可愛...以前刻意去搵,搵到都冇聯絡;現在沒有著意去找,卻給我發現一個在我們的BOB的社團��... 世事真神奇~

八月廿九日 星期四:  上班兩個月零三日

今晚突萌生一個念頭...作為我暫別地產行業的最後一個'重要決定'...這會是個什麼鬼主意?哈哈...說不得說不得,因我不想讓我的同事看到而失了這份'驚喜'...=P

臨近零晨...收到義工社團BOB的一個電話,這電話把我從'雙眼已合',正欲找周公的我喚醒,原來係主席Gigi打來提醒我明晚的頒獎禮...這把本來已忘掉了此事的我憶起有這麼的一回事呢...hehee~

前日早上返工又開例會,會上聽到區域經理的一番說話...內容是'人要懂得四個"受"字.人們起初面對逆境時會感到'難受',而接著便是'忍受'著這突如其來的問題.慢慢的,人們便會'接受'這逐漸改變的環境...到最後,人便會從這問題/困境的局面適應下來,從而'享受'起來!'我覺得呢段說話好有意思... 不知大家看畢這天的日記是否與我有著同樣感受呢?^o^

八月廿八日 星期三:  上班兩個月零二日

今日又有同事生日,去o左買燒肉+蛋糕...兩樣都好好味~(原來太古附近買o野都好貴o架!) 不過真係要講o下個蛋糕,我地係o係美心買o架,叫做'芒果脆'~佢不但有大大粒o既芒果肉,更有奇脆o既朱古力!一個字形容---正!~

你話呀...事情往往都係咁o架...我已經決定o左走,點知繼前日有數分之外,今日又被我知道我又有機會再分數喇... 哈哈~真係有d唔捨得咁快走添... 話晒都有錢收o架喎...=P(不過法法喇,要讀書呀嘛...不過有時都會諗返同事所講o既說話:"讀咁多書做咩呢?咪又係為o左第日搵多d錢!既然我而家可以搵到的話,讀書豈不是沒有用處?" 講真,若非我唔係要達成心願+時勢所迫,我都想快d做o野賺錢幫補o下家計...)

八月廿七日 星期二:  上班兩個月零一日

今日返城大見到好多我識得o既人,由中初中至高中o既同學都一一被我撞到...雖然見到咁多我識o既人,不過我自己都唔知應唔應該開心呢...~.~ 下午上去揀科,竟被我搵到econ.忽然間又有返位,即刻第一時間飛身去報,好彩最後都報到--->開心~令我重燃今年GPA過3.5o既信心(<~~~哈哈~講o下笑) 話時話,我今年o個個mentor又叫Ron.,佢好好人,乜o野都講晒我地知,今年我實冇死喇~哈哈~

嘩嘩嘩...原來我有個同事係超級歌詞庫o既版主o黎o架!真係失覺,失覺晒... 從我識/上到網到現在,我一直都係靠超級歌詞庫搵歌詞喇,我相信好多人都同我一樣,認為佢係香港最勁最多o既歌詞庫喇...忽然間覺得好威添~叨到佢d光...=P

八月廿六日 星期一:  上班兩個月!

今日本來好頹廢o架... 因為經理放o左假... 起初心想連update都唔做... 但係食完飯之後,覺得整日無所事事係一年好慘o既事,加下良心過意不去,最後都有做update. 但係竟然被我一個下午就做了平時花了整天才能完成的工作,還有兩個開盤的'意外收獲'呢!其中一個重係願意簽放盤&放租紙呢...不過可惜,這對我已沒相干了.唯有送給同事,好讓他不用罰錢...=)

八月廿五日 星期日:  上班一個月零第三十天

今日返工早段有d唔開心,因為只睇得一次樓.(而我本來係約o左三個客o架!)不過我下午就收到一個喜訊---我又有數分~~即又有錢收.今次重收o左幾千蚊佣呢~~就係咁樣,為o左收佣...我又決定留多幾日,等收到錢先走... 難得我老細唔趕我走,我當然唔走喇...hehee~

夜晚同知己傾了一個長途電話,可以把心底話一一說出,真痛快!!上網開ICQ時收到一個game好好玩,呢隻game我係好鍾意o架... 大家得閒可以去試o下喇~~~

八月廿四日 星期六:  上班一個月零第廿九天

嘩嘩... 經過成晚'開心'之後,我最後返到屋企係零晨3點幾,沖完涼已經成四點...今日十早重要七點返工,計計埋埋我只係訓得三個幾鍾咋... 辛苦~

今日返工作出了一個決定---辭職.我知道咁會令好多人失望,不過我諗都有人會因我呢個決定而高興喇...不過點都好,我都係好唔捨得大家,話晒都做o左成兩個月,同成班同事已經熟絡o左...希望日後重可以同大家保持聯絡喇~~

話說今日返工見到Ms.Lau(我預科的Econ先生~),起初Ms.Lau都見唔到我,不過我向佢揮手之後,佢竟見到+認得我喇... 之後又傾o左一陣,最搞o野係我好自然地俾o左張卡片佢...哈哈~痴o左線~

八月廿三日 星期五:  上班一個月零第廿八天

今日一早返City, 諗住去報course, 點知部電腦話要去到成下午4:30先開始...=( 之後去o左canteen食早餐,好味得o黎又幾抵喎~

下午去了游水,一次過游o左兩個來回50米池... 即刻扯晒氣~不過呢個都算係我o既'個人紀錄'喇... 不過睇見Ellen姐怒游...一路游,不停游...最後佢話游o左成36個直池(都係50米),真係佩服佩服~.~

今晚可算是近期玩得較瘋狂的一晚呢...我同康康,敏姐姐,納爺,阿茄一齊上祐哥哥屋企食飯,估唔到祐哥哥整o野食都有一手喎~食完飯就開始玩啤牌...一路玩,一路飲(檸樂+ Tequila)...咁就玩到成兩點幾,最後重要飛的返屋企喇...真係難忘+開心的一晚~(coz'我好少會咁豪o架嘛~) PS: Eric, 我地枝Tequila已告飲完喇~不過其實都已蒸發得返半枝...但係呢半枝o野竟然可以整醉人... 再一次証明o左飲醉o左o既人係swing架,不過飲醉o左o既人會唔會'回復自我'呢?我就唔知喇... 至於酒後吐真言... 哈哈~我諗應該係語無倫次喇... hehee~ 好彩我冇飲醉咋~~~~=P 講真,我真係好開心,而開心o既原因唔係因為有人飲醉.而係成班人再唔係好似細過咁隨街走...反而我覺得去到一個'聚腳點',大家成班又食又玩,重可以吹水,咁樣好似玩得大過d...我就好鍾意呢隻玩法喇!!~~^^~~

八月廿二日 星期四:  上班一個月零第廿七天

今日早上返工去某單位簽放租紙,點知俾我簽到獨家放盤!呢個都唔止,昨晚我又忽然間搵到個客,睇完樓再加上今日迫一迫佢,又好似幾實喎...哈哈~~~ 不過,本來係值得開心o既事,我今時今日卻一點也不興奮,反而有點唔忿氣... 因為...唉,而家重唔講得住,不過我而家可以講少少hints俾大家聽,就係今日我不停諗起的一句話:'Why do we always find the best bargain when we are leaving !' 唔知大家睇到呢句說話有冇d頭緒呢?? (待續)

今日下午打電話俾朋友傾偈,點知傾傾o下竟然被人問我係咪鍾意某某人... 霎時間真的是呆了,就連答'是'或'否',也沒有... 不過我昨日已經講過喇...唔想亦唔會多講...>.<

八月廿一日 星期三:  上班一個月零第廿六天

今日同幾個朋友傾開感情o野,有的又有新男/女朋友,有的就同多年的男/女朋友鬧分手... 講真,我有時會暗自慶幸我沒有以上的煩惱,因為我一直都冇女朋友... 寂寞時也會偶然想起朋友所提及的'喜訊'及'悲劇',心終是想嘗嘗拍拖的滋味,不過終不能隨便搵個女仔做女朋友就算o架嘛!... 我知道我鍾意o既人佢唔會鍾意我...但係我知道自從上次見完佢之後,我都開始覺得我唔係真係咁鍾意佢...心�媔}始愈o黎愈模糊... 都唔知黠好... 算喇,都係繼續做'單身寡人'好!乜都唔洗理之餘,又自由自在...(<-- 又開始自我欺騙中...)

八月廿日 星期二:  上班一個月零第廿五天

今日有d唔開心... 返o左咁耐,繼上次打電話俾人鬧之外, 今次係第二次唔開心... 不過今次我諗我會唔開心好耐... 因為我唔見o左一枝原子筆.佢唔係一枝原子筆,不過基本上佢的而且碓只係一枝原子筆,問題在於佢係有紀念價值喇!!呢枝原子筆係我第一個補習老師送俾我作為小學升中學的禮物呢... 重有刻名架...點知到了今時今日,我最終都係唔見 o左... 呢件事令我諗返起多年前我唔o左朋友送給我的手表... 唉... 都係o個句,點解我愈珍惜某樣o野,就會愈快遺失它呢... 希望我珍惜o既人唔會咁易失去喇!

八月十九日 星期一:  上班一個月零第廿四天

             <尋歌啟事>

近日返工放工,電視也少看了...但縱然少看了,我也常看到柏麗灣的廣告...大家唔好誤會,以為我而家做呢行就只留意返相關新聞.我提及這個廣告的原因是因為我被這廣告的英文歌吸引,我知道這是一首頗出名的舊歌,但是我偏偏又說到嘴邊,卻說不出歌名... 若大家知道呢首歌的歌名,煩請告訴我~好讓我知道~~~~謝謝~~~~

八月十八日 星期日:  上班一個月零第廿三天

前晚搭地鐵趕返旺角時,見到有個BB仔好得意... (基本上所有BB仔都得意~)不過呢個好可愛o羅...好好玩~我同佢揮手,佢就學我,想同我揮返手,不過由於佢太細過o既關係,佢只係識得將手開同合...我逗得佢好開心,重笑埋添...(由我從銅鑼灣搭到旺角為止,佢只對過我笑過咋,而且只有兩大次!)不過其實都唔知係我逗佢,定係係佢逗我開心呢...=P

夜晚去友人網頁睇到一遍文章...我好鍾意文章中的一句享受一個人華麗的孤獨感,大家得閒可以入去睇睇呢...=)

八月十七日 星期六:  上班一個月零第廿二天

今日成日都嗅到'酒香味',忽然間諗起古語有云:'齒夾留香'!講真,我知道唔係人人都鍾意飲酒,不過若然俾我揀,我會揀酒味都唔揀煙味.一來,細過被煙頭灼傷;二來,我就算唔介意煙霧迷漫,我自己個鼻都受唔到,一定被燻死...>.< 講返'酒後留味'先,其實都係全拜昨晚演唱會所賜... 因為昨晚我真係'開懷暢飲'呢~~

今日又去御皇臺拉客,下午開始到夜晚...好彩最後都睇o左三轉...有一個重係要用晒英文sell佢架!幸好我講得佢明... 不過自我o係樓下拉到呢個'英文客'開始,所有行家同事至會場工作人員都好似好驚嘆,有d重有羨慕o既眼神呢...hehee~ 個客睇完重話要睇禮頓山(Leigton Hill)大單位!可惜個客有租約,要去到年底先得...

夜晚放工聽住MD搭車,聽聽o下聽到一首歌,歌名係'記得'... 即刻諗起前幾日我有朋友仔搵呢首歌...相信各位睇到呢到都重唔知呢首歌係邊個唱,係咪??哈哈... 其實搭車聽到呢隻歌我好開心o羅,一來係我聽返自己親自挑選o既歌;二來係我有d鍾意o既歌係冇人/好少人聽架...(呢隻'記得'就係其中一隻~~) 不過而家竟然有人認同我o既'品味',係咪值得高興呢...=)

日記...已經差不多寫(打)了近三年多了... 若然連手寫的也計算在內,我看也有六,七年的日記呢!話說回來,縱然寫了這麼長的時間... 我(直至今日為止)仍然覺得我寫這個日記寫得好'不專業'... 經常用都不用書面語,甚至中英夾雜也有... 相反,我有些朋友同學寫的只有數月,他們所寫遍遍也像買回來的書本一樣,書面語不用說,最重要是他們所表達的東西都能令人讀得清楚,看得明白...前陣子我也嘗試這樣只用書面語寫日記,但最後事實告訴我這只是'東施效頻'...哈哈(苦笑~) 以下這就是我其中一位朋友所寫(打)的日記,有空的話可以進去看看,比較比較我與他描述昨晚的情況...=)

八月十六日 星期五:  上班一個月零第廿一天

今日返工竟然係我老闆生日~~~有蛋糕食~~~

放o左第一時間搭車去銅鑼灣會合阿堅,即刻去睇mini-concert... 上到上面感覺完全唔同, 起初以為係一個普通mini-concert,點知原來係live show,加上唔係坐晒o係到睇o個隻,我同阿堅係企住o黎睇架!雖則企足個幾鍾,不過完全唔tired,而係開心...一來可以見到自己鍾意o既歌手,二來今晚呢個係Hennessy V.S.O.P. 贊助o架...成晚任飲唔洗錢,我同我個frd不停咁飲,好似人地出酒,我地出命咁飲...=P 真係好好feel o羅,今晚重見到李蕙敏,Rosemary,戴辛尉...等等~最開心係即席叫人幫我同朋友仔同'偶像'合照...heeheee~~~~ 今晚真係又食(飲)又拎喇~ coz'重拎返枝酒版作紀念品!!~~^^~~

睇完演唱會即刻又走返旺角同呢另一班朋友食飯...食完飯去o左花虛吹水傾偈,點知傾傾 o下被我地見到流星,雖則只得幾粒...不過佢地移動得太慢了... 勉勉強強都叫做流星雨喇!(PS:記得報紙講過話呢幾日有流星雨,唔知今晚睇到呢d係咪叫'貨尾'呢...呵呵~)

八月十五日 星期四:  上班一個月零第廿天

今日出街時整爛了心愛我波鞋... 我買了還不到一年呢!就已經爛了,雖然只係爛了少許...T_T <~~今日行程係祕密~~> 恕不能公開...=P

八月十四日 星期三:  上班一個月零第十九天

今日去了浸大開員工月會,見到大老闆施生... 原來佢真人好高喇,重高過我地區域經理...=P 另一件開心事係我同同事o既客又有返'起色',哈哈~

今日下午我又去了飲茶,基本上我對上半年都冇去過飲茶...(因為已經享受唔起呢d'奢侈品')不過自從返o左工呢個多月o既日子�堙A我已經飲o左幾次茶喇...開始覺得自己愈o黎愈鍾意去飲茶... 哈哈~

話說今日要去BU開會,約o左d同事o係九龍塘站等... 點知被我撞到以前一個中學同學... 哈哈~大家一齊o寒喧幾句...唔知點解見到以前d同學,不過而家大家都係唔刊係著校服,感覺好,好... 好難形容... 我幾年前成日憧憬住這一刻的來臨,但經過今日o既見面,我發覺原來係冇特別感覺o架咋...

呢幾日成日被d同事話我'左擁右抱',又話我有兩個'女朋友'... 搞到我都唔知點好!查實我只係同三個年齡相近o既同事行得埋d,玩埋熟d先一齊玩咋嘛... 不過其他同事就話我'拍拖',有女... 雖則事實上有三個同事中有兩個女同事,不過我唔係只同佢地兩個一齊玩喎,重有另外一個男同事o架嘛!!其實我都諗過有冇需要避忌o下呢,不過冇所謂喇... 因為過再過多兩星期,一切都已不再重要了...... 講真,做男人邊個唔想享齊人之福喎,有我當然想喇!不過事實上我冇呀嘛,偏偏我聽到的只有'嘲笑'&'譏諷'聲,由中學時代到現在也是一樣,點解每次都係咁喇,有女朋友我一定會講o架喎.....

八月十三日 星期二:  上班一個月零第十八天

今日下午食完lunch去o左'開心街'玩,竟然被我見到Beatmania The Final,最重要係只係$3/4 songs,真係超超超超...超抵!!不過由於時間關係,我只係玩得一鋪...唔得!以後一定要日日玩~~~=P

八月十二日 星期一:  上班一個月零第十七天

由於前幾日都去做一手樓o既關係,我d卡片已經派得七七八八喇...所以,今日我好開心,又有新卡片!!基本上我d卡片都好新... 因為我都係呢幾日先開始有卡片,不過今次呢d卡片係唔同o既!我o既職銜再唔係'按揭經紀',而係'物業顧問'~~~ 好開心好開心~~~

夜晚陪朋友去o左花虛傾偈+飲o野,傾傾o下個朋友突然喊起上o黎...雖則我平時成日話想睇人喊o個時o既樣,但係o個一剎那我都忽然間呆o左同不知所措... 安慰o既說話又唔太識講,叫佢唔好喊又好似令到佢唔可以盡情發洩... 最後唯有睇住佢喊,靜靜咁睇住佢一路喊,一路喊...直至佢喊到無眼淚冇止... 其實睇住朋友傷心而自己又咩都做唔到係好痛苦架!幸好最後佢喊完都識笑返,之後就送佢返屋企...~.~

八月十一日 星期日:  上班一個月零第十六天

今日去了一手樓盤--御皇臺拉客... 成日足足八個幾鍾,好彩都同o左4個客睇樓,都不枉我行足成日!

夜晚同朋友即興去o左食飯,本來話o係附近食o架,點知講講o下最尾去o左尖咀食'Dan Ryan',即上次我話好好味o個間!基本上我只係掛住佢d蒜溶飽~hehee~ 講返食o野,話說我個朋友話一定要食spaghetti + chicken cream soup (意大利粉 + 忌廉雞湯),點知冇佢想要o既湯... 最後好彩都介紹o左o岩佢飲o既new wngland clam chowder(周打蜆湯),但係反而睇漏o左叫o左寬麵俾佢...=P

食飽飽之後友人提議去海傍行o下... 去到坐低又傾o左一陣偈,之後又鬥估中環廣場(Central Plaza) 熄燈先最後係咩野顏色o既燈...(咁都可以信一大輪?!)最後係我估o岩中o左~~哈哈~~ 最搞笑係臨熄燈先(即子夜十二點先)有個賣花o既女人坎過o黎叫我買花,重不過停咁'說'('遊說'o個'說'呀!)我地買花... 佢'讚美'o既說話真係好好笑...我記得其中一句係: '小姐妳簡直成個古典美人咁靚!' 我地事後都認為古時d人都係肥婆,又點會靚呢?況且我個frd左睇右睇點睇都唔會似'古典'呀...(我講得咁直,唔好意思喎~) 不過最後我都睇在佢出到'同情'呢招(話想快d賣晒,可以同d仔女食o野喎),加上又可以滿足 o下我同女人講價o既樂趣,重要俾我講贏o左,用廿蚊就買到兩束花... 不過其實講贏或輸都冇所謂,我只享受同佢'講價'o個一剎那~~~ 不過俾我講贏對佢o黎講都係一件好事喇,因為佢根本得返兩束,俾晒我咪可以即刻收工陪仔女o羅,係咪?hehee~

八月十日 星期六:  上班一個月零第十五天

接受事實後第三天,心情矛盾到極的一天!

今日去o左City U登記...下午有友人問我決定去登記與否,心想我還有得選擇嗎?再唔讀就冇架喇... 唉,如果大前日冇offer的話,我諗我可能會開心d, 可以一心一意等second round 睇o下有冇位入LU... 而家搞成咁, 我真係唔知點, 心諗有時返工可能又係一條出路, 反正而家我已經有牌喇... 再加上我d老細,同事都對我好好, 而家先叫做熟絡o左就走, 我又唔太想... 所以我而家心情好矛盾,好矛盾...真係他媽的矛盾呀!!邊個可以教我點做呀... 我覺得我做邊個決擇,他朝我都一定會後悔呢...

八月九日 星期五:  上班一個月零第十四天

唉... 昨晚話去唱K,點知一唱就唱到成點幾兩點,返到熙企沖完涼都成3點... 搞到我今日成日都打哈欠!下午還打了瞌睡呢!!現在還覺得很疲倦... 都唔知昨晚決定去唱K係好定壞呢...=P

YEAH,今日收到陶吉吉最新一碟MP3,好好好好好開心!!!特此謝過'老牛'~.~

八月八日 星期四:  上班一個月零第十三天

今日夜晚本來約了同學仔食飯,點知同學仔最後都話唔o黎得...唯有即刻另約朋友,幸好最後都約到,不過唔係去食飯,而係去唱K... 總算有一個開心快樂而'飽滿'o既晚上...^o^

八月七日 星期三:  上班一個月零第十二天

今日係會考放榜,即都係高考放榜... 算喇,結果始終都係強差人意... 意志消沈o既我決定接受事實...~.~

今日玩o左個測驗,你是否色盲呢?發覺就算玩o岩晒都係得71.6分, 咁係咪即係証明o左人根本係有' 潛在色盲' 呢?

八月六日 星期二:  上班一個月零第十一天

嘩嘩...繼昨天有'遲到危機'後,今日又有一個更大的危機...簡直一日一驚心,唔知呢兩日 o既'危機'係咪我聽日放榜o既序幕? 講返今日,我下午同個同事一齊去睇盤(即preview),點知去到其中一個單位時,我個同事竟然開唔到門,其實開唔到門只屬平常事,最驚係佢竟然拎唔返條鎖匙出o黎,卡住門...心想大獲!唔通我呢份工就係去到今日就停止?!唔通重要賠幾百元開鎖費...愈諗愈驚之下,我作出o左一個決定--決定打電話返公司求救!經過廿多分鐘的來回,最後我地牌係靠一支WD-40搞掂返...真係有驚無險呢!而另一件事係,我今日放工又太疲倦,竟搭車去到近荔枝角才落車...好慘~~但同一件事証明o左,我開始知道我身體已經去到極限,我需要休息呢!!

八月五日 星期一:  上班一個月零第十天

嘩嘩...今日出現遲到危機!!話說今日搭車途中打瞌睡,點知忽然間醒了見到鋪頭號數重係65-67,心想有點不對路,細心一看又覺得一切都不太熟面口,一問司機才發現已搭到去西灣河...嚇得我即刻落車搭車返去,因為當時已昤9:19分,離遲到時間只得十分鍾...點知趕到返去發覺重未有人開門(當時係9:25分)...最後我等到有人開門,我即刻打卡都已經9:38分,唔知咁算唔算遲到呢...=P

今日同個同事一齊去preview(睇盤/樓),我每睇一間就問佢問題...好似考試咁(我考佢),問到佢唔識感覺我好似識好多o野咁...=P 不過事實上我同一時間check返自己,對於自己兩星期前努力背讀o既盤已經開始忘記,再加上現在已掉往第二間分行,再背得熟的盤(單位)也冇用武之地呢!可惜可惜... 講返又講呀,估唔到我返o左短短一個月工,竟然開始識得同我年紀差唔多o既同事,重要係幾個喎... 雖則我前排諗過'同大人一齊都唔錯呀',不過而家既可以同d大人一齊,又可以同一班同年o既同事玩,這算不算是兩全其美呢...^o^

夜晚睇友人o既網頁,見到有一句'係咪慘痛的歌都是特別好聽的?'這句話令我諗起我以前聽到一個朋友的一段話:'我個哥有次同女朋友分手,剛我我買了蘇永康<情來自有康>(96年舊碟),我當時不知道哥哥不開心,但過了一陣,看見哥哥忽然間流出兩道淚水,就知道發生了什麼...' 講返,我好贊同'慘痛的歌都是特別好聽'呢個話!當然,聽歌一刻的心情也很重要,但大多數時間'悲歌'的感染力是十分之大呢... 我自問我自己體驗過喇!不信大家可以去試試喇,心情唔好再去聽d悲歌一定可以令你/妳更down...尤以感情問題效果更顯著!

八月四日 星期日:  上班一個月零第九天

今日去了葵涌廣場睇珀麗灣示範單位,覺得而家d新樓好細... 同時覺得自己住緊o既舊式洋樓好大...=P

八月三日 星期六:  上班一個月零第九天

<續昨天旅行>由於有朋友要今日返工,所以決定一清早便離開,返到旺角便照原定計劃去飲茶~~~哈哈,已經好耐冇去飲茶喇!!難得搵到一間平價酒樓,而我一直都想同朋友仔去飲茶...所以最後就有了這決定---飲茶!講真,食就一定比以往飲茶食得少,不過話晒都係飲早茶,唔係當午餐,所以基本上都好夠食~~~喂喂,各位朋友仔,有幾會同你地一齊去飲茶呀...如果你地可以咁早起身的話...=P

本來諗住得閒拎張poster俾朋友,點知竟然有意外收獲...又可以去飲o野~~~^v^~~~ 傾o左一陣偈,吹o左一陣水,好開心...唯獨我叫錯o左杯Margarita,杯邊竟然整滿晒鹽...唔鍾意飲...>.< 講時講...我覺得呢期有少少抵唔順... 日日都係返工... 好似完全冇玩過咁... 加上呢幾日剛剛出o左量, 咪成日諗住'豪一次'o羅...不過剛同好友傾完偈,我而家又覺得我好似'豪'得太多...差唔多一個星期就'豪'一次...再係咁,好快就玩晒d錢...=P

八月二日 星期五:  上班一個月零第八天

今日終於都要去考試喇...心情當然有些少緊張,學術性考試的就考得多(校內&公開試),不過對於其他類型的考試,我只是第二次報考,(對上的是小學時考的皇家音樂考試)幸好最後都沒有辜負大家對我o既期望...順利地獲得地產營業員資格~~~哈哈,從今開始,我就是一個真真正正的地產經紀喇~~呵呵~~

所謂好事一浪接一浪...今日除o左考試及格外,還同班好朋友一齊去大嶼山貝澳玩~book了一間屋,BBQ + 過o左一晚夜... 起初,乜都由我地第一批入去o既人做晒所有o野,心�堣ㄛO味兒,基本上我係好嬲o羅... 因為當我打電話俾遲o黎o既人,竟然被人發'脾四'!!心想做得咁辛苦...單是搭車都已經成三,四十元,竟然重要受氣?!幸好後來我地(我)都冇弄成吵架收場o既局面... BBQ後我地就一直留在舒服的冷氣房打麻雀,玩啤牌...真係唔玩唔覺,原來我打牌真係打得好渣,一圈都唔夠我已經輸了$1.7(以一番一毫計算),幸好夠運俾我食返鋪自摸'正花'混么九,之後都保持贏錢的優勢,哈哈~^o^~...如是者,一直玩到近五時,我地先摸黑走到貝澳沙灘行,睇住黑漆漆的海,加上一道道的雷光電閃,又幾得意喎...(事後先知道原來已縣掛了一號風球) BTW, 我地行沙灘時見到一隻蟹,估唔到打橫行我蟹都行得好快呢!

八月一日 星期四:  上班一個月零第七天

昨晚睇報紙時見到一款名字很特別的雞尾酒...名叫'泥老舞',我想了很久都不了解這名未的意思,最後一看原來這款雞尾酒是在國內一個bar tender 調製的!講到呢到,唔知大家明唔明這名字的意思呢...hehee~ (hint: 用國語讀酒名)

今日返工幾經辛苦先搵到一個客人去睇樓,同個客睇完之後o個客終於都有興趣...點知又出現了盤子...天啊!點解要咁玩呀...唔通真係俾我親自開一張單都唔得??(雖則我過o左聽日先有牌,如果我聽日考試合格的話~)








         <---back  我的資料  簽個大名啦 !