June2002

　　　　　　　　　　　　　　　　　　七月　JULY

七月三十日　星期二:　　上班第一個月零五日

開心！聽到一個好消息，知道有兩位朋友終於行埋拍拖！幾經辛苦終於撮合到佢地...真係戥佢地開心~

七月二十九日　星期一:　　上班第一個月零四日

昨晚約o左個同學仔食飯，不過竟然大家o係到'互sell對方'，即我sell佢買樓，佢sell我買保險...哈哈，真係好驚咁搞法... 不過，算喇，這種事我一早就已經知道會發生，只不過是時間問題罷了...

七月二十八日　星期日:　　上班第一個月零三日

昨晚睇友人日記時見到一句'指桑罵槐'，搞到我好驚，驚佢誤會了我前兩天所說的話，幸好經過我打去了解及解釋一番後... 才稍為放心一些呢...嘻嘻~~

七月二十七日　星期六:　　上班第一個月零二日

今日放工去o左開會... 本來返完工已經好疲倦o架喇，不過去到開會竟然愈開愈起勁？！我重做o左d好似冇可能o既添呢！

返o左成個月工，我發覺o左有d好處喇！我而家可以以我公司名義向相熟報販借漫畫雜誌... 我昨天先借o左<神兵外傳>呢~~~hehee~~~

七月二十六日　星期五:　　上班第一個月零一日

我今日返工好勁呀！！全日共去了睇四次樓，(即每次去睇幾個單位)唔係自己一個人睇，而係帶客上去睇，實在太過興奮喇...感覺就好似全部都係我o既客人...不過點都好，我覺得我一日一日咁返工，簡直同一個有牌o既經記一樣，最重要係我相信好快又有佣收喇...嘻嘻~~~

<隨心一寫>

難得今日有空上網，加上不太疲倦，便上網看看友人的日記，看到友人有個留言版，又忍不住代友人'回答'o左好多個留言，做埋版主呢...hehee(唔好意思喎，Mary~)　除了去友人的留言版搗亂外，我亦看了友人的日記，看到友人提及煩惱,憂慮等問題，我好認同佢以下一句說話：各人都有佢o既煩惱/問題！　我地只係'我睇你好，你睇得好'喇！有幾多人又真係知道對方/他人所背負o既煩惱同責任呢？但知道又如何...作為旁人又唔係所有o野都可以幫到手... 有時只可眼白白咁睇住朋友擔憂，煩惱！不過，言歸正傳，其實我想講o既係，有時睇到有d人o既煩惱係好無謂，根本就唔係咩野煩惱/問題，只係佢不停咁轉牛角尖... 例如，我識得有個朋友成日冇錢洗，又話悶，不過又唔返工，連工都唔搵喎...鬼咩，唔努力搵工又點會有錢喇？唔好唔記得而家香港有幾多人失業呀，係成24萬以上(7%)o架！唔通d錢會o係個天上面跌落o黎咩... 有d又有工做，不過佢搵幾多就洗幾多，有d重洗突添！！你地話咁樣將來又會點呢？？唉... 有時做人真係應該積極同睇'遠視'少少...

>網主共勉之<

七月二十五日　星期四:　　上班第一個月！！

今日又有假放，雖然係放假，不過今日我都過得好充實！一起身就去o左同朋友仔食飯，唱K唱到成4點．之後又去o左九龍灣打波，一打就打到成六點半，然後再帶著疲倦的身軀去牛頭角開會，最後搞到成十點幾先返到屋企食飯...點喇，睇完我今日o既'行程'，係咪覺得好充實呢？？

講開又講呀，今日唱K途中竟然有人提議玩骰盅，我真係估唔到會係o係呢個時候，同大家玩呢樣o野，不過我又真係好鬼鍾意玩呢d'賞罰遊戲'，既刺激，又緊張，最重要係可以搞到d氣氛好好！！只可惜我只係飲得半杯水，康康佢地罰飲成幾杯就好喇~~=P

有一件事要講，雖則好似只係件普通o野，不過對我來說是一個好重要的消息，所以決定要趁現在同大家講一講，好讓大家都知道有呢個好地方~　我想講的是前兩天我去了酒吧飲酒的地方... 我自問對飲酒就'好'o架，不過我對飲酒就睇成兩種：一種就係去'隊酒'，即係成大班人去酒吧玩骰盅，玩'懲罰性遊戲'~ 第二種就係同少數知己去酒吧吹水，訴苦，聚舊等等．對於前者我會選擇較嘈o既地方；不過我今次係講後者，因為而家去搵一個好feel而又唔太嘈o既'清吧'係好難！我已經搵o左好耐都搵唔到...不過踏破鐵鞋無覓處，得來全不費功夫！因我前日就係去返我第一次去飲shooters的酒吧--- 袋鼠吧(Kangaroo Pub)<有相於'我的相片'內> 呢間酒吧真係唔錯o架！一來唔係好似旺角太子o個d酒吧咁雜咁嘈，而且佢又靜又平，至少唔會屈你nuts錢喇~~ 各位有玩/飲開一,兩杯o既朋友，若然第日想去一個可以傾偈而且又好feel的地方，我覺得袋鼠吧真係算唔錯喇 ~~喂喂，睇o下第日有冇機會同你/妳一齊去傾偈呀~~

昨天搭車經過銅鑼灣，發現我以前去飲過酒的另一間酒吧Hot Shot已經不在了，現在只是空鋪一間，有d傷心，請大家為佢默哀一分鍾...話晒呢間都係我第一與唯一一次飲醉的地方...T_T

七月二十四日　星期三:　　上班第廿九天

唔經唔覺，又已經到o左月尾，難得我還有少少時候，我已經整好o左下月o既日記back ground, 不過只係好'求其'，敬請各讀者見諒~(其實應該用呢d時間去讀書架，因為下月頭就考試喇！)

今日去參加模擬考試，成績只得六十多分...幸好這只是考E牌的模擬試，而我將會參加的是S牌...hehee~所以我都好滿足喇~

好嬲呀好嬲呀！！聽日難得有假去唱K，點知今晚忽然間喉嚨痛...好慘呀~~HELP~~希望聽日一起身就冇事喇...唔係聽日就真係去卡拉OK齋坐...一定會好灰...>.<

七月二十三日　星期二:　　上班第廿八天

今日去o左上地產'雞精'班，由於我之前上過三日的'正常班'，覺得今日呢個'濃縮班'真係好快，可以將三日縮成一日...只可惜我全部都已經聽過，有d悶...於是乎我自己o係到做mock paper, 做做o下愈o黎愈對自己有信心，我一定可以一次過考到個地產營業員牌照！！

夜晚去o左Dan Ryan' 食晚飯，難得o黎呢d地方，本來我好想鋸扒o架，不過又被我見到另一個我好想食o既焗芝士肉醬闊麵(Lasagna)，再加我又唔係太餓(可能已餓過飢！)又平d，所以最後都揀食Lasagna！幾好味喎，佢又有d好食o既蒜溶飽~Eric,你返到o黎一定要去試下喇！！

食完晚飯去o左飲o野 (<---好耐都冇做過呢樣o野喇！) 真係唔飲唔覺，飲開我而家又好想飲，雖則我今晚都只係飲得一杯'sex on the beach'，不過已經飲起我條'癮'，各方好友，你地呢期有得去'飲'，記得叫埋我呀！！因為我唔想等到年底先有得再飲...T_T

七月二十二日　星期一:　　上班第廿七天

今日update 緊舊客被我發現o左幾個有潛力o既客，咁就成為o左我o既新客...hehee~開心~ btw, 今日有得食免費下午茶，事關有個業主好好人話惠勞我地~

七月二十一日　星期日:　　上班第廿六天

今日夜晚同'康康'&'阿茄'去行街，後尾我又去o左7-11買o野飲．講開又講，Fanta近排推出o左幾款新口味，我就最鍾意什果賓治味... 前排我去o左好多間7-11都係唯獨冇呢隻味，大家就可知呢隻味係幾受歡迎喇...大家有興趣而機會就買支試下喇~~~~~

七月二十日　星期六:　　上班第廿五天

今日返工都好地地o架... 點知臨放工前打電話update緊client record時，傾傾o下被人 'cut線'，其實被人cut線就好平常，不過佢收線前講o左句說話我就好唔開心...佢竟然話: "我冇做足功課，冇去格價..." 因為我已經好努力咁sell緊，最重要係我好肯定我所講o既係事實，再加上我昨天先去完擎天半島睇示範單位(見下)！！佢地做緊d咩野價我又點會唔知呢... 咁香港d一手樓真係做唔到呢個價錢呀嘛！！>.<<<<<<

七月十九日　星期五:　　上班第廿四天

好對唔住呀！今日約o左人睇戲遲到，要同學仔等，都係我估計錯誤，所以遲o左...(算喇，唔好再為我o既錯搵藉口喇！) 講返套戲，<烈血追風>呢套戲冇<奪面雙雄>(Face Off)或<兩棵絕望的心>(Leaving Las Vegas <--本人最喜歡的電影)咁好睇，不過至少有一個值得誇獎之處，就是描寫人生o既感情描寫得好好，基本上尼古拉斯基治(Nicolas Cage)d戲都好玩感情，但係今日呢套戲(尤其係最尾o個十幾分鍾！)竟然可以令多年都唔喊o既我有d感動，眼睛感覺到有d濕潤，差少許就流出眼淚呢！　睇完戲去佐敦'澳洲牛奶公司'食o野，好好味，無論我何年何日何時去食，我都覺得佢地d食物好好，我相信未來都一定可以維持高水準o既美食呢！講開又講，話說我去'澳洲'食o野o既時候，同學仔話唔食，就算我點講都唔食...但若果我話當我遲到道歉而請，妳會唔會食呢...=P(當事人見到請答覆~)

下午諗住去游水，點知個朋友臨時唔游得...可惡！幸好佢都o係最後關頭通知我下午5點開始游泳進行清理，重陪我5點至6點呢段時間，我地重以'區生區太'o既名義一齊去睇'擎天半島'o既示範單位，順便偷o下師，hehee...=P

六點正去到九龍公園泳池門口...不過已經有好多人排隊，幸好都唔係等o左好耐就入到去．計計o下已有成年冇去游過水喇...今日一游真係感覺不錯，好爽~~~好舒服~~~所以我決定下次我再有假放的話一定去游水...除非o個日我又去打波喇，否則我一定去游！有冇人去呀？？有o既約埋一齊去呀~~~^o^

七月十八日　星期四:　　上班第廿三天

開心o既一日，雖然今日只是平靜地渡過... 但勝在夠安穩，今日只係睇過一轉樓咋！另一個開心的原因係我聽日又放假，我聽日一定要游水！！同埋我終於又去睇戲喇！！！重係睇我期望已久的<烈血追風>(Windtalkers)，現在心情勁靚~~~~~~

話說今晚返到家裏，吃過晚飯後就上網，順便開埋ICQ玩，誰不知一開ICQ就收到一個舊同學的url, 叫我試試玩測驗，看看我對他的熟悉度有多高...心想:不妙了，已有近四年不見的朋友，加上又少聯絡，我想的將會是得零分或是最低分人...但，事實往往出人意表，我竟然擊敗其他已玩的人，以九十二分這接近完美的分數取得第一，呵呵~真意想不到，但同一時間証明了我對往事'念念不忘'！(亦有可能係我今日太好運喇~~XDXD)

七月十七日　星期三:　　上班第廿二天

今日難得又唔洗用錢，連下午餐lunch都有人請，因為今日我地其中一個經理升職...所以有免費午餐，hehee~~~

今日自己同第二間行的agent+買家去驗樓，唔錯唔錯...又一個新體驗！不過唯一唔好就係今次去o既單位太熱，搞到我成身汗..>.<

七月十六日　星期二:　　上班第廿一天

今日又放假(放得密呢！)諗住去做義工喇，點知今日又係落雨...回想上次做義工時又係落雨，重搞到我一身濕晒添！真係... 最討厭落雨！！

今日做義工o個時覺得表演唔太好... 尤其是d連接其他部份o既時候，有dead air 情況出現... 做完義工開會講話遲d搞camp... YEAH!!勁開心，終於又有得去camp, 有得玩，又有得抖o下．開完會諗住去睇戲，因為真係好好好好...好耐冇睇過戲，勁想睇！點知去到戲院門口又見到所有戲都開晒場，重係成十幾分鍾o個d尷尬時間，唯有轉移目標，去左唱ｋ，今次唱Ｋ竟然有人話我唱得似王傑，(唔通似佢咁老+滄桑？！)不過都好，COZ"我係鍾意佢d歌喇~~^^~~

七月十五日　星期一:　　上班第廿天

話說今日臨近放工o既時候，有個同事話唔得閒...咁我有多一次帶客睇樓o既機會，最後我又o黎o左一次'全康怡遊'，一行就去到成夜晚八點喇，不過好開始對睇樓o既程序愈o黎愈熟喇~~太好了~~

七月十四日　星期日:　　上班第十九天

今日可算是返工以來最唔開心的一日了！話說本來我只是像平日般打電話update紀錄，點知下午被其中一個住戶打電話狂犬狂插狂鬥...雖說做得呢行就預o左會有呢d情況，但原本來臨的一刻始終是很難受的！！這又令我想起好多事情即使你有了心理準備，但來臨的一剎始終不同的...

七月十三日　星期六:　　上班第十八天

話說今日有位同事太忙，便把其中一個客人交給我與另一邊樓花組的同事一起處理，又一次嘗到帶客睇樓的滋味，再加上填寫Form4，感覺愈o黎愈似真的經紀一樣！！不過，有一件事我令我更為驚訝...就是另一位同事也是沒有牌照的(只是按揭經紀，即MB)，這即是我們二人都同時犯了法！！(冇牌經營/提供地產資訊)最高可罰款五十萬及入獄兩年呢！上述只是瞎說而已，需知道真作假時假亦真！各位用腦諗諗喇...=P

今晚我媽忽然話出街去食自助餐，心裏不禁一陣興奮，因為這已經近兩個多星期的第三次食自助餐了！！價錢當然係超值，而且這間味道都有一定的水準，最後由我來作東，話晒都係第一次賺真真正正返工，再加上我曾話過請我阿爹食飯作生日慶祝~~今晚的自助餐係我我近幾次中吃得最飽飽的一次，但唯一美中不足的是比較辣了些，不可以和康康佢地一齊品嚐品嚐...=P

七月十二日　星期五:　　上班第十七天

難得一日放假，不過我又出o左街，重去到成下午先返屋企，搞到我隻腳傷上加傷...>.< 返到屋企諗住讀o下書，(話晒下月頭都要考地產牌)點知睇睇o下竟然訓著o左...可能係太舒服o既關係，因為開o左冷氣先訓著架！

七月九日　星期二:　　上班第十四天

今日又出o左去拎鎖匙，(即又有佣分)如果做到得成呢單買賣，咁就可以收多好多架喇...=P

話說今晚放工去牛頭角開會，點知一推開門就令全場嘩然一驚，我只係著o左恤衫西褲咋嘛，連西裝都未著喇！話到底我而家都係返緊工架...而且重係專業o黎架嘛...=P

七月八日　星期一:　　上班第十三天

今日夜晚去了食宵夜自助餐(元禾)，又發現一個新地方食自助餐，而且個價錢都唔錯，第日又有多一個選擇喇！

要o黎o既始終都要o黎，我部電腦又壞o左喇...(actually,我幾日前已經睇到電腦有異樣！)不過，橫掂而家返緊工，即我已經冇乜機會掂部機，就唁多理佢喇...點知，今日一早就有電話打o黎話部pc壞o左喇... 好呀，而家睇下d人點整返好部電腦！我就冇所謂喇，最多就唔dl歌！check mail, update日記呢d我都可以o係公司都做，所以大家可以放心keep reading my journal...XDXD

七月六日　星期六:　　上班第十一天

今日第一次收到佣金，你地估o下收到幾多呀？話就話收$300, 實收就收o左$30.雖然只係收得10%, 不過我只係開一開門，咁就已經有佣收喇，都算唔錯喇~

七月五日　星期五:　　上班第十日

終於都到了放榜的日子了！不過我的心情已沒上年的那樣緊張，可能已經不是第一次了... 但是，我仍然收到很多很多朋友的慰問(電話問侯)　縱然都有一些喜訊，但聽到的大多是壞消息... 我的成績怎樣？嗯... 好過上年喇！不過都係這句，比預期的差了少許...而這絲毫的差距又令我入讀大學的機會更加緲亡...>.<

七月四日　星期四:　　上班第九日

今日終於都放隻喇... 不過我決定o左做義工，因為我應承o左人呀嘛...做人要講口齒o架嘛！

今日已經係星期四喇，聽日就係放榜o既大日子喇，祝各位聽日收到成績單開開心心喇！而對我o黎講，除了放榜，明天亦都係我做呢份工第一次接受測驗o既日子，希望我都能一一順利應付喇！--- 打於早上11:56

七月三日　星期三:　　上班第八日

今日好開心喇，coz'我打打電話竟然被我搵到客，佢不停咁問我問題&市價等等，(好彩有同事即刻救我，教我解答)後來客人重話遲一兩日會落o黎搵我添...^o^

話說今晚約o左d朋友出黎食飯，玩聚會...點知我地食食o下又同兩個'廚師仔'傾偈，佢地幾個又幾好玩喎～！好傾又好玩，正！！最正係我重可以呃到$16蚊...呵呵~~~

七月二日　星期二:　　上班第七日

嘩嘩嘩... 今日放工時竟然落雨，唔住shower, 而係heavy rain!!! 幸好我個manager有開車上班，所以放工有免費車接送(好大膽呀！！叫我老細車我... 後來我都有d唔好意思.)...anyways,又可以慳返一程車費...=P

自從返工後，我已經不停咁尋找'平價午餐'，不過最平都係得大家樂... 重要係得個'一哥焗豬扒飯'叫平d，所以我已經連續食o左幾日喇．不過，今日終於有第二款平價飯食喇！！重要係我鍾意o既鴛鴦炒飯...hehee~不過好似唔夠食...定係我o個個特別少d呢???

七月一日　星期一:

難得今日係紅假，(回歸五週年)我都要返工...不過冇辦法喇，這就是返工上班，賺取金錢的代價...

昨晚放工返家後睇返世界盃錄影帶，冠軍戰喎...縱然唔可以即刻睇，但我都重好想盡早睇返架嘛...嗯，巴西即係巴西，呢場果然好睇...而且巴西的確係高一班！(可能係兩班或以上呢...=P) 今晚放工去'大象'o個邊拎埋餅季軍戰睇先~

YEAH！終於我今日又有新工作做喇...就係打電話，我現在還可以更改與加入資料呢！！話雖如此，查實我打第一個電話的時候是懷著戰戰兢兢的心情呢！說到底也要跟一個陌生人對話呢...

哈哈... 好好笑，亦都好開心...話說我今日放工後去了等'康康'收工，誰不知我竟然同'康康'd同事做起生意來... 哈哈，我太識搵客喇...(沾沾自喜中~~~) 唔知真係做到的話有幾多佣收呢...XDXD

　　　　　　　　　<---back　　我的資料　　簽個大名啦 !