六月 JUNE
 







六月卅日 星期一    

今日借o左部dc俾渣古同學仔,本來我都可以跟佢入愉景灣影相o架,不過可惜我下午約o左老媽,所以唯有放棄影相.不過教渣古同學仔影相o既時候,佢朋友竟然話我影d雲雲相靚~開心~

中午食飯後教了人點用電話send SMS.嘩,原來用Sony Ericssion send message都好麻煩喇!幸好搞o左一陣都終於教曉人地~ 唔知第日我再食飯o既時候會唔會有好o野食呢...like 咖哩角~~XDXD

下午搭地鐵會老媽時,見到有一家三口入o黎,於是讓座好等佢地全家都可以坐埋一齊,就係咁換來一句小女孩的"多謝哥哥"~~ 但係估唔到o既係當我落車o既時候竟然聽到句:"拜拜哥哥~" 剎那間覺得讓座是絕對o岩o既決定~~^^~~

下午經過銅鑼灣利園山道,見到有間樓上鋪的天台好正.除o左一般盆栽外,重有全套drum set + guitar,而且擺位都好搶眼... 只可惜相機已借了人,不過通常都係咁o架喇,冇相機o係身就成日搵到d特別o野,有相機跟身就成日睇唔到或者無靈感~.~




六月廿九日 星期日    老爺子,生日快樂!

今日又係一早被電話叫醒,而今次係康爺,話要提早打波的時間,改為九點三.得此消息後康爺與我便用會議功課逐一打俾其他友人... 逐一打電話俾其他人o既時候,聽住佢地每個人第一把聲都係一把"朦朧睡醒的低沉聲音",十分搞笑~~

本來約好十點打波,點知一個電話就提早成個鍾.咁都算喇,由於我係住得最遠的一個,於是又早d出門口.點知九點幾去到籃球場o既時候,一個我識得o既人都冇!之後打俾康爺,竟然先施施然落樓... 而等到最後大部人都到齊o既時候,已經過o左十點好耐,再加上最大伯3問題係負責帶波o既人竟然重未出現,完全係無奈!!洗乜咁早叫我提早到達呢?最後咪又係成十點幾先玩... >.< 雖然就好無辜咁等o左好耐,不過幸好今日出o黎打波都有得著,就係我地打到好口渴o既時候,於是決定打賭,輸的一方要請贏我一方飲o野~~ 當然,我咁樣講大家都應該知道邊個贏到喇... 我同康爺果然可以創造出1+1=5 o既力量,而且重係三炒呢!(幾時有話過打波炒人地蛋係要計三炒o架?!)~~呵呵~~

就係咁,我地得到冰極檸檬茶作獎品.雖然呢排出o左好多新口味飲品,不過冰極檸檬茶係第一次試咋.雖然佢同雪碧ICE一樣有涼快感覺,但係感覺上雪碧勁d,可能係今次冰極檸檬茶唔夠凍喇,不過我自己就鍾意佢多dd~~(話晒都係贏返o黎o架喎...=P) 此外,經過Circle K,又試o左新o既雪糕,今次係紅豆味,原來OK d雪糕都幾滑喎~~ 有時賣口乖吹兩句水都有著數,真係要多謝阿姐送多一個圈俾我喇,hehee~~

清楚的楷哥哥&朦朧的納爺楷哥哥與受害人~>.<~

 

 

 

 

 

 

 

 

 

 打完波我地一行人又去做我地好耐都冇做o既o野喇--飲下午茶^^ 難得六個人都o係齊到,於是又叫到一大圍點心,一路傾偈吹水一路開餐,勁開心~~ 不過呢次埋單都有d驚人,六個人飲下午茶竟然都飲到好貴... 可能我地真係叫得太多點心喇... XDXD

由於要等飲下午茶,我地唯有等待.與友人傾偈時講起佢o既"近況",發現o左一樣驚人o既事,原來佢本人試過四人同台食飯,但佢地各人都有著多重身份,四人既好朋友的身份;亦有著男女朋友的身份;而且亦都有前度男女朋友的身份.四個人,合共有多個十個不同的身份.坐隔離的是現任女友,坐對面的是前度女友,而打對角的是好朋友但亦是現任女友的前男友兼且前度女友的現任男友,關係亂過亂世住人,就連關係圖亦可能解釋唔到,活像一個百分百感覺的真人現實版~.~

傍晚與老媽子買了褲褲,重一次買兩條添... 真有夠豪~ 本來諗住買o黎for去旅行用o架,不過而家都冇得去,都唔知點解要買,重要一買買兩條喎!可能感覺上著得好舒服喇~ 買完褲老豆打電話o黎話重未食飯好肚餓,於是就好好好早咁食我地o既晚飯.但係最估唔到o既係兩餐都係o係同一間茶樓食... 換言之,今日成日都o係係呢間茶樓搞掂晒食食問題,呵~




六月廿八日 星期六    突變~!>.<

今日一早八點都未到就有電話打o黎搵我,而搵我o既人竟然係大BB,而且重只係叫我買早餐俾佢食!呢個簡直係疲勞大轟炸!失控o既我當然鬧佢... 不過BB始終係BB,仍然唔知道我係發緊嬲,幸得我媽拉住我先回復理性.去到柴灣買完麥記早餐俾大BB後(我諗重慘過服侍女友),見到一幕難得一見的兄弟情.話說買早餐時拎住張送薯餅卷去買,於是諗住多o左個薯餅就可以歸入我口...XDXD 點知上到去大BB屋企後,大BB除o左一手拎過麥仔早餐後,隨即一手拎住個薯餅,一邊大叫住剛出門的細BB,一邊走出門口... 原來大BB係拎住多o左o既薯餅俾細路食,見到呢幕我先記起原來呢個薯餅就係本來將入我口o既薯餅~ 不過算喇,難得見到大BB對細BB咁好~~ 不過呢刻令我諗返起以前細過我同我細路o既一d回憶,不過已經多年都無再發生lu... 唔知幾時先可以再有好似今日大細BB o既事情發生呢?

點解... 點解次次挑起我條癮就遇到阻滯?點解每當燃燒o左我o既興趣,就總會有冷水照頭淋落o黎,將股衝勁淋熄... =( 唉,其實今次我係可以選擇唔洗放棄,不過為o左他人著想,兼且唔想他日自責內疚,最後理智戰勝了慾望... 所以又冇得去旅行lu... 其實都可以遲d去喇,不過事後又好貴,感覺上好唔抵,唯有又打消呢個念頭喇.

其實下午我嘗試過再搵人去旅行,起初又擔心夾唔岩人... 不過我實在太想去旅行喇,而身邊好友一係就有事在身不能離港,一係就已經去完旅行回港.唉,點算好喇... 我又唔想一個人去旅行喇... 天呀!搵個我熟o既朋友仔陪我去旅行喇~.~

由於唔洗趕去報名,下午同康爺,納爺同趙爺一齊去長沙灣玩~ 由長沙灣到太子,我地o既平均作戰時間就越低,甚至創出30秒內死亡.哈哈~

傍晚同友人去食甜品解肚餓(?!)傾開去旅行,康爺舉出另有人又係因一句「想去」而去了旅行.諗深一層,點解我無喇喇咁急要去旅行呢?同埋點解呢排諗親玩親o既o野都係咁即興呢?第一時間就令我諗起兩個字--任性!其實都"認真"o左好耐喇... 覺得有時任性o下都係應喇,可能又因為覺得自己年紀都唔細喇,玩o下手下年就再冇任何任性o既藉口喇... 所以我呢排先咁「任性」呢... 不過,問題係我總係講就講到好「任性」,而行動上的「任性」就真往往唔太順利喇 ~.~

夜晚又收到一個電話,雖然今次都係一個令一激動的電話,但係呢次絕對係一次興奮的激動.最重要係呢個人又重燃起我去旅行的意念(雖則只係得一瞬,因為佢好快又要飛去加拿大...),不過佢絕對係一個好o既人選!Welcome Back, Daves~~~~ 你再返到o黎一定要出o黎飲o野呀!^o^




六月廿七日 星期五    

唉... 終於都冇得睇六樓後座喇!T_T 本來約o左BB女睇o架喇,後尾再搵埋康爺.諗住就算其中一個唔得,我重可以同另一個去睇喇.(這是我的最壞打算) 點知,最後我竟然兩邊都唔得,最後搞到冇得睇,好慘呀~~~ 而家唯有等出碟喇,不過到時都可能已經無o左呢份衝勁去睇 ~.~

今日與阿牛食飯.之後跟o左佢朋友去銀行中心搵旅行資料.原來阿牛呢位朋友好勁o架,我覺得佢係旅行專家,乜都知... 就連一望CI就知道係華航,重話佢有乜o野危機~~ 其他地方又講得出有d咩o野玩... 好勁~

嘩嘩... 真係唔睇唔知,原來而家去旅行都唔係好貴o架.可能而家重未到暑假,所以就平d喇.再加上見到阿牛佢地講到咁開心又去話一定要去,心諗其實出外走走都不失為一個好選擇.所以就決定去一去旅行行開o下... 希望可以身心都舒服d喇~ (諗起可以去旅行同影相就會開心返,呵呵~)

經過噚日o既'無槍掣'訓練,今日同BB女打高達時,用強人用劍技出玩竹7好過癮,呵呵~ 四隻都係用劍KO佢o架~!只可惜都係第四關就死(係我錯!)... 係喎,無帶妳去食好好味o既豆腐花呢!

傍晚,考慮緊去邊到o既時候開始諗緊自己係太過急進呢.(可能被趙大爺影響呢...=P) 不過最後就決定買o左一個叉電器package,但係返到屋企先記得無拎返張發票,而且又冇保用証... 唉,呢個就係太過急進o既後果.另一單急進就係借SD card出事,我竟然問朋友仔借卡... 雖然我聽到佢話只係用張細ram卡o個刻我真好開心,不過我又真係太癲喇,竟然打佢張卡o既主意 >.< (不過點都好,就此道歉兼謝過~) 而家諗諗o下搞到我都唔知好唔好再考慮去旅行...>.<




六月廿六日 星期四    忙碌的一天

天文台剛推出呢個服務.查番自己出世果日既天氣.幾得意架.快D試下啦~

今日一早又起身,走去同細路女補習,出門口時諗住個天係藍色,所以就冇帶傘子喇.點知去到衛利街就開始落雨,而o個到又冇瓦摭頭喎... 咁就搞到成身濕晒.T_T 雖然我自己就唔係好主張臨考之前再補習o架喇,因為我驚問親細路女都唔識從而打擊佢o既信心.而事實上又真係做親都唔識... 不過唯一慶幸就係佢d公式都背得好熟,都算唔錯.希望佢今次考得好好地喇!

下午走o左入柴灣補大BB,今日係最後一次同佢補喇,因為佢聽日已經要考英文.感覺上今日補佢好似補得有d進步,因為以前見佢發脾氣我就完全無符,不過今日我鬧完佢(其實燧同佢講道理,不過我諗佢應該覺得我鬧緊佢喇)之後,再講多幾句說話竟然可以令佢再笑返... 心諗都總好過睇住佢"嬲爆爆"咁走喇~.~ 不過最後都被佢拿來發洩,不停咁拎對面屋企個波o黎踢我... >.< 不過就係咁我就見到對面樓一個得兩歲o既BB仔,(好得意o架~) 最後個BB仔重對我揮手講拜拜呢... ^^~

補完又要即刻趕返CityU返學.點知搭地鐵時可能太倦喇,竟然搭過站都唔知... 哈哈,好耐都未試過搭過站~ 上堂前"發生好似做戲o既一幕",令我成堂都o係到諗... XDXD 同康爺終於交o左名單俾阿sir,亦即是正式組隊的開始.最開心o既係今次個written report係任我地o既喜好而做o架... 唔知幾時先可以開始做"資料搜查"呢?=P

上完堂強帶已食徘飯o既康爺出食飯,不過當我地點完菜先被我地發現o左原來有$12 o既抵食推介,唉~ 之後去o左打史上最難打o既一鋪高達... 難打o既唔係部機lv.高又或者係我同康爺o既問題,而係我用o左個壞掣 >.< 不過最後都竟然捱到尾二o個關,玩o左成半個鍾都算係咁喇~~




六月廿五日 星期三    

呵呵,今日又一早去游水喇~不過噚晚我係訓得唔太好,成日訓o下醒o下咁... anyway,掙扎一輪後起身就變得精神,因為最難捱都係起身o個一剎那~ 同樣要早起的友人,打電話morning call佢o既時候聽到訓未醒o既聲音,感覺好得意!除o左好似聽到另一個"自己"(起身時的掙扎)外,重有一種好特別o既感覺... 好似做o左阿爸阿媽咁.因為通常都係我被阿爸,阿媽甚至婆婆叫醒,而今日叫人起身竟然有呢種感覺.

好o野!今日終於游多個BB女喇~head住半個咁多喇~ 總共游o左十一個堂,我覺得個已經係我暫時o既極限,因為我游到最後一個堂o既時候,我游到一半已追到游蛙式o既BB女,但係之後竟然反被追過頭喇,這是從未發生過.最重要係上水之後我感覺到右手同右腳瀕臨抽筋邊緣...>.< 唉,講到尾我係用自由式游,而佢係用蛙式.不過都有一樣o野值得慶幸o既,就係我已經記返點樣先可以游得最快...=) 夜晚發覺右手手臂曬黑o左~

難得納爺搵我,當然即刻應約喇~ 玩o左兩鋪高達,雖然都爆唔到,不過同納爺玩就一定玩得遠...^^ (而且納爺係位係鬆掣o架,所以算喇~)

某年今日之六月廿五




六月廿四日 星期二    

從友人ICQ中的info睇到下面這個,雖然好似好舊同睇過好幾次,但都忍唔住要貼一貼~
點為知愛一個人 :

愛一個人係要了解, 但係亦要開解
要道歉, 亦都要道謝
要認錯, 亦都要改錯
要體貼, 亦都要體諒
要接受, 亦都要忍受
要寬容, 但唔係鬆容
要支持, 而唔係支配
要慰問, 但唔會質問
今日本來約o左友人睇戲,點知morning call o既時候聽到佢把聲重死過我,我都唔忍心再叫佢出去喇(鬼叫佢噚晚去"玩"得咁夜咩~~=P)... 不過講到尾牌係我唔好喇,由於下午要補習的關係,搞到我所有活動都要改做一早或夜晚先可以進行.人地肯一早出o黎陪我已經好好o架喇... 算罷喇~.~ 捱埋呢個星期,我就可以搵返我失去o既"下午時間"喇~~ ^o^

下午見到有媽咪推住架BB車,不過最吸引我注意o既係BB車車頂裝備了電風扇.這不是一買回來便有的,是人手自行裝配上去的.當然,雨天過後,夏天必定炎熱.然而作為家長的能夠細心如此,反而對自己又沒有此裝備,又再証明父母是多麼的偉大.說到底,這位安睡在BB車的小朋友真幸福~~ 不過細過一向比大過幸福o架喇!

傍晚與友人閒談時說到將來... 諗諗o下原來身邊好多朋友都有一套計劃,如大多數都計劃未來幾年內要結婚,有的就要幾年內要賺夠某某數目,更甚的還要置業呢!雖然我同我身邊d朋友一日比一日大係一個不淨的事實,但係要諗到咁遠且有一個俱體的計劃,縱使我都有為將來想了無數次,我又的確無一個完整的計劃.可能我始終對後市/太長線的未來沒多大信心,因為太長遠始終只給我一個模糊的景象.反而對於短線的未來我卻大有把握~~^^~~




六月廿三日 星期一    

連續兩星期都日日出街有節目,其實已經令我連續兩次都身上出現乾塘o既情況(即無錢),加上噚晚應承阿媽早訓... 所以今日好早就醒o左,不過之後繼續o係床到掙扎,直到成十一點幾先起身.由於呢幾日下午都要去補習,所以今日都係諗住留o係屋企算喇.

夜晚朋友仔問我上星五同我一齊去赤柱的是我女朋友嗎.答案係唔係!佢只係我最好o既異性朋友罷了.(千其唔好俾"阿bi"睇到呀,唔係我會被人殺死o架... =P) 不過講開又講,真係要多謝Ellen o個日做o左我個model,俾我不停咁影呢... 呵呵~ 重記得我地為o左影一間餐廳,我地竟然要隔住一條街去影,重來回咁走o黎走去,都唔知走o左幾多轉呢... 當然重記得有人為o左阻止途人擋住鏡頭而尖叫...=P

夜晚同大象傾偈,原來剛從澳門回來.這正是我與另一批友人計劃想到的地方呢!(只可惜遲遲還未實行~.~) 原來都有好多人以澳門為旅遊點呢.唔通真係受SARS影響,大家都只係去近而短途的地方嗎?

唔知係咪我唔識o野定係自從有dc o既發明就興周圍去呢?今晚除o左知道大象去o左我計劃將去的澳門外,原來阿魚亦都有入赤柱玩呢!重搞笑係原來佢同我都係周一日,同一時間到達赤柱,只可惜係大家去o既地方次序有d唔同,所以就緣慳一面喇.再一天証明無緣即是無緣,就算係同時同地都無緣碰頭見面~.~




六月廿二日 星期日    

為o左整好前日去赤柱o既相同網頁,足足搞到我今日凌晨五點先有得訓... 啊!好tired呀~大家慢慢欣賞喇~~=P

今日一早被康爺同趙大爺徵召出街,但最後搞到下午先出到去... 行行o下街講起睇戲,其實好想睇六樓後座喇,快d搵人陪我去睇呀!!不過講起六樓,大家又再講起私竇,不過今次講得好真,計劃晒咁滯.(就連租金分配都計算好~) 雖然前排我都有講過私竇,不過今次組私竇o既人同上一次o既理想人選不同.可能因為係上次只係我空想而已,而今次就諗得認真d,所以連人選都諗得踏實d... 不過始終都係o個個問題,幾時先再唔係空想或空講,而且認真起來呢?我真係好期待這一天的來臨,相信亦會十分有趣的~~~有趣係因為我知道若然真係有私竇的出現,我肯定一定有意見分歧同吵架,更甚的是可能有人會走同加入呢.不過我還是想親身體驗一下這感覺~~~

大好了,納爺今晚竟然帶出一個積極的消息--佢返工喇~~ 為o左慶祝呢件大事,竟連今晚阿媽下廚都走出去食飯.當然,又浪費了阿媽的一番苦心了~~

有時覺得自己太急進喇.今日下午先講完私竇,夜晚食飯已經不過講同計算細節.可能係有趙大爺同樣支持o既關係喇,搞到我地認為自己可以就下意識地認為其他人都贊成,完成無顧慮到其他人o既感受同意見.其實我自己真係無乜所謂,可能因為自己都受六樓後座套戲影響(未睇已經咁大影響~),加上一直嚮往與友人同住.不過實際上可能未正式入住已經有好多問題如水電煤及其他雜費等...




六月廿一日 星期六    自編自演

有駕駛執照o既朋友一定要睇~

今日補習後竟然被要求加堂,下星期竟要星期一至星期四都補習,催谷大BB o既表現,希望能夠o係今次終期試考得好好地.但願如此喇~ 講起考試,本來諗住細路女要考typing,咪拿拿臨拎返個keyboard,諗住借俾佢作練習之用.點知噚晚知道原來佢已經考o左喇... 晒o左我一番心機,不過點都好... 我希望o既係佢數學做得小小心心,考得好好地~ 咁先証明到我o既教學方法係成功.加油努力呀!我對妳有好大期望o架~^^~

下午應康爺要求,返o左學校幫手做馬.見到康爺的一隊令我諗起互相補足,互相配合.當然,康爺依然扮演佢盡量少做o既"重要角色"~~哈哈,所以今次o既script就交俾佢做喇.(其實係我從後叫佢組員屈佢做o架~~呵~!) 講返今次個interview先,原來今次係要錄音喇,而我都係噚晚先知... 但係見一早已經拍晒心口話幫康爺,無得推之下唯有硬著頭皮去做喇.第一次錄音-- 失敗.原因係因為我對住自己份犒講,所以講得太快.第二次錄-- 收貨.因為汲取了第一次的經驗,兼且我開始漸漸進入投入,而且我亦都無句句睇犒講咁死,所以我諗我講得幾好.唯一怕就怕最後講得太假... 哈哈~希望過到骨喇! 補返樣o野先,由於訪問問題o既答案係我幫康爺寫o既,所以佢地有一set.但係佢地情急之下竟然拎俾一位老師作訪問(即訪問問題連我d答案一齊俾佢),但係位阿sir就連我括弧入面d字都讀埋出o黎.真係激死... 其實括弧入面d o野係唔洗講o架嘛,一般o既script都係咁o架喇,咁都唔知...~.~

夜晚同阿牛一齊食飯,(真係有機會用康爺張大家樂代用卷呢,呵呵~) 食飯前又見佢吸引到好多觀眾... 吸引係因為佢又打機,佢打機又真係幾注目喇.因為佢係勁人,總有d一般人玩唔到o既畫面出現.而今次就係佢一人分二人玩TC3,好搞o野呀!佢成日都雙手拎槍拉下,好似人地吳宇森X周潤發凌空入指彈咁型,好有西部牛仔feel喇~~ 最搞o野係俾我見到佢有99,999,999呢個分.原來係佢個frd玩出o黎o架... 不過見佢可以同時左右手都玩到咁緊同爆機,都咪話唔英呀~ 好期待同你入去元朗"掃場"喇~~=P




六月廿日 星期五    赤柱hi-tea

下午同Ellen走入赤柱.其實最主要目的係想去影相,所以藉hi-tea為名,入人地d靚靚Cafe影相.但估唔到有人未落車已經喊肚餓,落車之後唯有即接去餐廳先.入到去就去o左朋友仔極力推薦的餐廳食tea,起初以為好似朋友仔講咁每一個tea set係有成三碟咁多.不過原來每一set得one dish + one drink. But anyway, everything is very good and delicious, except my cappuccino! It's just like a glass of water with colour... >.<"

食飽飽就開始周圍去喇.由於月頭已經去過,所以今次決定唔行商鋪o個邊,改行球場那一條路線.好景不常,估唔到我支腳架就o係呢個旅途中段就跛腳,甩o左其中一節出o黎,而今次我整o左好耐都整唔返... 幸好頭先o係馬路對面影相o個陣無跛,唔係唔單止我支腳架報銷,竟連我部dc都會報廢呢~

有時都覺得自己幾影響人,最記得就係以前好友PY唔太鍾意音樂Hi-Fi o個d,但係幾我薰陶,佢最後都有買Hi-Fi同Discman.而家又有另一個人受我感染喇.Ellen見我今日影得咁開心,又話開始鍾意影相,想買返部dc呢... 嗯,遲d可以搵埋阿魚一齊買呢,到時可能重可以有折扣呢...^)^

去完沙灘臨走前諗住帶Ellen行o下商鋪o個條街,點知六點過少少,大部份商店就已經關了門.(~恐怖~令我諗起Eric o係Adelaide 遠郊o既生活~) 唯有去行惠康喇.無錯,大家係無睇錯,而我亦都無打錯,我地的而且確入o左去惠康.因為呢間惠康唔係一般o既惠康,而係外牆同內�堻ㄕn靚o既惠康.可能當時o既我已經玩晒d電,無得再用部相機.

終於都開始我地今日o既回程喇.本來諗住搭回程車時可以訓o左陣休息一o下,點知開車o個個司機哥哥手車太勁喇(勁搖咁,不過又唔係開得快喎)... 搞到我地都坐到面青口唇白,好似病o左咁... 唉,或者我地都係有"暈巴浪"喇~!

  • Stanley赤柱之旅




    六月十九日 星期四    

    早上十二時半@友人家:又有得去人地屋企喇~~以近年呢d新樓o黎講,今日去o左一個好好好... 好大o既單位.因為係相連戶,即打處兩間屋.雖然細過九肚山d獨立式house,不過已經好大,而且都幾靚呀~~ 唯一有d美中不足就係d房太細,就連主人套房都係.不過無法喇,一開始都話過喇,呢個係新樓o既通病.講返先,如果無記錯的話,今日係我第一次入少女o既閨房.起初都諗住會見到好多估唔到o既o野,點知最後都係得一個字o黎形容--亂(<~~妳自己話o架XDXD) 亂只係在於書桌呢.最後,我終於明白到點解妳仔多數都遲到o既原因喇,就係因為化妝這個玩意,今日我"有幸"親身體驗到...=P

    嘩,已經係第二日一早起身去游水喇,感覺好健康,呵呵~~ 今次去o左一個我一直想去o既地方游--青衣.原來青衣o個池最深都係得1.93米,咁我當然唔會再有任何顧慮,可以盡情咁去游喇~^^~ 同埋一樣o野,就係青衣呢個泳池無咁多人,所以以後就一於去青衣游喇.BTW, 若然聽日去得成赤柱就係連續第三日喇,好期待去赤柱玩...^o^

    已經係第二日同同一個人去游水喇.其實無化妝同化o左妝都唔係有好大分別喇,反而唔化重有一份自然美呢... (~我覺得~) 唯一缺憾就係見到黑眼圈... =P

    夜晚返學聽到阿sir播o既一首歌,歌聲就不敢恭維喇,不過歌詞講及現今男女,十分抵死.節錄o左其中幾句:

    女人說謊保證是天衣無縫 男人說謊終究是百密一疏
    女人懂得演戲是一種天賦 男人永遠敗在經驗不足
    女人認為愛情是一種付出 男人總是把它當作一種征服
    

    資料來源:大碟<我是誰>中第六首歌:男女之間

    除o左精景歌詞外,阿sir今晚上堂講過講到加菲貓,言語間好似話做人似加菲就唔好.本來就無事,不過呢句話偏偏俾月頭先做完心理測驗o既我,而且我重要測到係加菲呢! 講真,雖然我個結果係加菲,不過我都覺得加菲唔錯喇,食又食得好,住又住得唔錯喎.雖然平時就懶d,不過若認真做o野起o黎都唔錯喇...係咪 =)

    夜晚食一種叫"菱角"o既糖水,雖然d菱角有d硬,但係咬落幾似馬蹄咁爽.加上啖糖水好清,好甜~好飲~

    收到一個url,係gameo黎o架... 反映出現今香港市民對政府的感覺~.~

    哎呀,本來預定話星期日去打波,點知夜晚聽電視台話可能會落返雨... 可惡!幸好呢幾日我都有出街玩個夠本~~ 講時講,一時就無節目,一時就多到撞晒... 夜晚有人約我星期日去行山o架,點知又撞正打波,不過而家可能兩樣都冇得玩喇~因為天氣問題~




    六月十八日 星期三    

    好o野!今日果然係好天,一早就去o左九龍公園游水.雖然我噚晚又成四點先訓,不過今日游完水特別精神.(當然我都o係張床掙扎o左好耐先起身...=P) 尤其係尾段走o左出去曬太陽,好舒服... 完全愛上夏日呢~.~ 所以決定要趁有太陽就要去沙灘玩~YEAH~

    可能係唔夠訓,亦都可能係太耐無掂水喇!(今年第一次落水) 搞到成日覺得總會抽筋咁,加上泳鏡成日入水,搞到游幾步就停,好似唔識游咁... ~.~ 諗諗o下以前初中時代因每年的swimming gala而有得游水.o個時見好多人都唔識游,點知今日去到泳池見到個個都識o架,而且重去晒大人池呢!

    游完水就收到電話喇,原來係被邀到九龍灣喇.又好,橫掂又有時間,兼且有飯食~呵呵~ 大定估o下我去o左邊到食?開估喇... 就係去o左大漁豐收,第一次去食呢間o野,不過覺得幾好味.當然個價錢都好好喇...=P 記起去食飯時出現一個笑話.話說我地一入門口,就見鄧生同一個正正收緊銀包出緊門口o既人講話"兩位呀".我都覺得奇怪o架喇,明明人地係放緊d錢落銀包,點解邪氐會同佢講人數呀.唔通佢知道出緊門口呢位就係經理?話口未完,o個男人即刻講話"我唔係呢到o既人"就走o左... 呵呵~~ 當場呆o左,無o野講.若果俾著o個個人係你,你又會點呢?^^ 後來先知原來鄧生已經係連續第二日"認錯人"喇.講返先,食完lunch之後有甜品,起初以為係vanilla雪糕,點知一食先知原來係豆腐雪糕,好味!~yummy~

    食完飯去CityU車埋康爺出旺角,本想興致勃勃想買初o既我地,但忽然間去到又無o左呢股衝動喎,唯有作罷喇.有時真係學康爺話齋,心情真係好重要,一無o左就做乜都無意義咁.同康爺睇初期間見佢想買衫送人,但係睇o既多,買就無.最後問佢點解只睇不買時,原來佢要搵一件o岩自己而可以送人o既衫,以便人地唔要可以自己要返~~ 哈哈~~ 唔怪之得一件揀唔到喇...=)

    夜晚收到一個好得意o既movie,叫Matrix Cow~EnJoY~^^~




    六月十七日 星期二    

    早上九時許: 一早起身,本來約好友人去游泳,但電話不能接通.最可惜係今日竟然出太陽!而我就唯有睇住太陽的出現,白白咁浪費o左一個早上.

    開心~ 早起果然有好處.因為今日終於俾我搵到黃大煒隻"你把我灌醉".咁當然要多謝鄧生個login 同pw 喇~^^~

    諗返噚智落樓開會o既時候,被鄰居話我細路夜返屋企.我當場呆o左一呆,心�堮t點笑了出來.事後心諗我細路之所以被話夜返係因為佢o係一般人角度就係算夜;而我呢,我當然一係唔出,一出就夜過我細路喇.但係我呢d唔係正常人時間呀嘛,加上我一向早出晚歸,所以咪從未有人夜晚撞過我o羅,呵呵~~ 我o係鄰居眼中重可能係乖乖仔呢... =P

    今日近正午時份被要求提早補習,不過可以一坐"密斗"(小型貨車)的滋味,唔錯唔錯~ 咁同大BB一早補習,發現原來我一直都被佢呃(HELP~~竟然被個細路仔呃~>.<~),今日補習都係遇到好大阻力,叫極都唔聽之下咪又要哄佢同佢玩喇... 點知一唔小心將佢從梳化拉落地毯上,頭落地先... 當然,咪又搞喊佢o羅~唉~失敗!

    陪個uncle食飯,順便打探石澳路線,點知聽埋有大浪灣o係附近.見今日咁天氣晴朗,諗諗o下忽然間又想搞d BBQ同去o個到游水,更加癩o既就係去o個到過夜睇日出(因為我聽過有朋友去o左鳳凰山睇日出)~~其實都係為o左俾我去影o下o野而諗o既藉口~~ 唔知搵唔搵到人一齊做d咁癲o既o野呢...^o^

    今日下午約了友人o係旺角拎o野,點知途中又約o左另一友人.咁都ok喇,因為係我約o架嘛.但係又被我撞到另一個朋友,近日真係出親街都撞到人喎~~當然,"相識滿天下"係我一直都嚮往喇,不過竟然在不知不覺中發生...=)

    開心~ 今日終於都見返我個'漫畫供應商',即意咋著我又可以一次過補睇返呢半年miss o左o既漫畫喇!今日其實重問另一友人借o左本書"Men are from Mars. Women are from Venus",雖然呢本書我好耐好耐之前已經聽過,不過我當然冇買到喇... 而家有得借o黎睇~開心




    六月十六日 星期一    恨... 力有不逮

    凌晨睇見友人日記的一些文章--城市在夜裡低吟.
    雖然寫o既唔係全部都好有理,不過都可以俾大家反思反思~

    【喜歡你,溝通中】:
    『面對愛情,我是愚昧的。
    如果喜歡也等於一種愛戀,那麼,喜歡人也是愚蠢。
    用著以為喜歡你的方式對你,然後用著以為可以不沮喪的方式對待自己付出的心情,循環不斷下,還是禁不起一而再再而三重複的疲累。原來堅持太久,還是會累,只是心裡告訴著自己依然要相信,相信對你的那一切直覺與執念,終究在腦子內與疲累拉扯著,影響了心情。
    這是我可以表現的方式,那些你所感受到的我對你的好。』

    Sorry呀 TaTa! 完全照抄晒妳日記d o野,不過實在覺得太好喇... 就此謝過~

    整理相片及上載上網的同時,竟然被我見到句:"民以食為天,君以食為樂!"
    真係估唔到原來我都寫過句咁o既說話...~.~ 今次加o左幾張相,d 日本餅乾係我以前細過成日食o架,不過而家大過已經無乜機會食喇... 雖然我到而家都唔知佢係咩o野牌子,但係佢d威化真係好好味~~ 最重要我知道邊到有得買已經好足夠~~ =P

    三級快餐... =.=
    下午睇飲食newsgroup竟然見到呢個三級快餐.唉,今時今日竟然可以寫得咁露骨... 真係世風日下.

    唉,不好了!伯伯的病情出現惡化跡象,把本應難搞的問題加深... 眾人只感雪上加霜,再見署光的機會更加緲茫.得悉消息後,眾人鎖緊在眼內的雨水再次落下... 眼見各人都努力尋求各種方法作不同的嘗試.有時真係好恨自己,一向認為人面廣的我,反而到了這緊張關頭我卻甚麼都做不到,有感能力不濟.我想現在的我只有繼續扮演堅強的角色好了.縱然心中有說不出的無奈及悲痛,我都只好繼續捱下去.因為很多親人都面臨崩潰的邊緣,說不好若有甚麼事情發生,總要有人去抽空應付一般日常事務.

    夜晚代表屋企去開業主立案法團,本來諗住只係去附和一番.誰知開會不一會就發生口角,差點還動起武來,但已經出現罵戰,粗口滿天飛!(天呀,我已經係場中年齡最細的一個,這就是所謂大人的世界嗎?)其實開會咁耐... 聽到好多都係因中西方文化不同而產生誤會,所以才弄成這段小插曲.當然,有些事不關已也拿成作話題,變成吵架的事端是種無聊的行為.(但偏偏又在開會時發生 =.=') 不過算吧,問題應該好快會解決~~ 唯一聽到而對已身有直接得益的是大廈正考慮裝置"大獲剷"(即衛星電視),日後可能又多一個電視台作選擇呢~!




    六月十五日 星期日    

    下午有人打o黎,講o左好耐我都誌唔到佢,之後佢俾多一個hint話"我返o左o黎" 我都估唔到... 到最後佢俾多一個hint我話:"借漫畫俾我"我亦都估唔到... Sorry呀 Ian哥,不過我都即時提供o左好多有TC3 o既地方俾你聽喇~ Anywayz, Welcome Back again~!!

    今日本來係去荃灣遊歷o架,點知最後去到又落雨綿綿... 搞到我地只好在地鐵站附近幾個商場玩,不過咁都被我o係金星撞到朋友.發覺我地以前打開機班朋友(包括我在內)都有一個共同動作,就係搖頭.唔知係咪成日諗住第一同簽名甚至掃版,所以一打得唔好就狂搖頭... 不過講真,其實你地已經好勁o架喇.就好似今日咁,我已經見到後面有兩個睇o既人多次表演出驚訝佩服o既樣貌.不過講真,睇到呢d咁o既樣又真係好自豪喇... ^o^ 是日見到荃灣金星TC3簽名 "Pa!", hohoo~ 我睇到都唔知應該好嬲定好笑~

    今日雖然又出o左街,不過今日出得好內疚... 因為其實今日屋企出現o左d大事,不過有見噚晚已經約實o左朋友,所以先出去.不過心入面一直諗,自己係咪好冷血,親人有事都重可以開開心心咁出街.當我見到從未喊過o既老父忽然頹然跪地痛哭真係好震撼,接著是我媽... 見到屋企人都逐個喊晒而我依然照舊,好似若無其事咁... 可能我o既眼淚一早已流乾,又或者我對於生離死別已經太過麻木喇... 講真,大我一輩o既親人中我最鍾意就係我伯伯,希望你身體健康,意志堅強,我地會支持你喇!




    六月十四日 星期六    

    凌晨同友人傾偈,講開巴士... 回想起以前細過都好迷其中一條巴士路線.細細個就一定要阿婆抱住出去睇呢o架巴士,一日都唔知睇o左幾多次,每逢一有巴士經過就知係佢喇!直至小五一直都有日日去睇... 記得重試過有一次為o左搭晒全程而特登去搭來回兩程巴士呢!

    凌晨為o左去澳門o既事情商討o左一陣,由於突發事情的出現.搞到不少人有怨言... 正當不知如何是好時,最後都叫做講掂數如期出動.當然,其實我都有好幾個想法,但係要令全世界開心(或令大部份o既人都開心)就當然要犧牲自己一o下喇.講真,搞活動就要預o左希突發事情同埋諸多麻煩o架喇,唔係點會一向都冇人搞呢?(而我就係享受如何擺平呢d突發事情的一刻~)不過點都好喇... 最重要係希望聽日o個天生性,天氣晴朗~咁我地先可以去得成!~上主保佑~

    當諗住安撫了眾人的疑慮後就可以順利出發外遊,點知原來始終都安撫唔到個天!今日起身已經掛起黃雨同雷電警告.唉... 點解要打波先要o黎落雨呢?(廣告)

    今朝睇電視到有棋靈王(棋魂)做.由此我唔識玩圍棋,所以一直都冇睇呢套漫畫.不過今日睇落又有興趣喇.唔知有冇人有呢套書而又可以借我呢?再唔係網上transfer/ download都無所謂喇 ^.* 講開漫畫,康爺竟以"踏雪"o黎呃我,話係身同腳o既顏色都唔同o既貓,但事實上係馬而唔係貓.雖然我睇漫畫未必比你多,但我都識唔少o架... =P

    下午同康爺來回太子同旺角好多次,為的只係陪康爺睇鞋,不過睇在佢有份振興香港經濟就算喇!同佢一齊睇o左好多間波鞋同衫o既鋪,搞到我都想買返一兩件添...=)

    為o左等齊人,又去o左打機消磨時間.今次除o左超越了我玩o既Beatmania The Final o既紀錄外,重開始愛上o左玩The house of the daed,呢隻game同康爺都玩得幾夾.講多樣,多得趙爺,納爺同康爺帶住我玩神劍伏魔錄,唔係我都唔知原來我可以玩到咁遠...=P

    可以媲美wallpaper~係咪好靚呢...=)
    見重有時間同朋友行去九龍公園o既祕道,o個景就唔錯,而今次影o左幾張相都覺得唔錯.估唔到同一時間竟然有朋友都o係呢頭附近,本來我都有提議過去o個到o架,不過可惜時間唔容許...

    夜晚食飯時講o左一個得意o既問題.就問話若然你去應徵沙灘拯溺員,咁話說著黑色或深藍色o既泳衣遇溺係無人會救,咁著咩o野色o既泳衣o既人一定要救喇?
    答案係:三點'式'(Bikini)~LOL~

    近日已有兩班frd話介紹女仔我識,不過暫時都係講住先... 不過咁就已經令我心情有d複雜!開心係因為原來都有一大班人關心我(or 玩我~).而除o左開心之外,煩惱都有.因為我覺得呢d o野唔可以咁刻意,搞到好似大人去相睇咁.始終我認為呢d o野係要講緣份喇.講講o下又令我諗返起以前中學時代去ball o既時候,自己要走去搵女仔跳舞o既情境.其實話就話係介紹女仔我識,不過佢地又係咪清楚知道我鍾意邊類型o既人呢?呢個問題o既答案就連我都唔知,因為答案都好似不斷更新呢~.~ 點都好喇,多謝所有人o既關心~~




    六月十三日 星期五    

    今日聽同學仔講終於出晒GPA,睇o左之後終於可以鬆口氣~~"~.~"~~ 真係嚇死,好彩而家都唔係好低~ 不過呢個GPA分數已經足以令我同轉系o既目標拉遠... 反之,其他同學仔今次o既GPA都幾好,唔通真係我o既問題... 定係我上堂講錯o左一句半句而令到個tutor唔'妥'我,搞到我有科可以突破新低點呢...>.< 不過算喇,就算而家做乜講乜都無用喇,都已經塵埃落定無得上數喇.

    下午陪友人去試鏡,估唔到我身邊都有朋友被邀去試鏡~.~ 起初以為係呃人o既o野,不過去到見到間公司都幫好多熟悉o既報章雜誌拍o野,就連TVB o個 Cover Girl選舉都有份.不過講到尾,最重要都係上去試鏡o既人d質數真係...唔錯唔錯 ~^^~ (除o左我個frd...=P)

    原來無理由出街都可以出o左成個下午... 當然,人係一個好重要o既因素,睇o下同邊個喇~本來諗住同朋友走入赤杜"hi-tea",點知因落雨而取消.無o野做咪唯有行商場喇,不過今日玩具'反'斗城開倉都無乜o野行,唯一得意o既就係有隻好大好大o既長頸鹿... 有時真係服o左妳地d女仔.男朋友唔陪妳地買衫又話佢衰,家o下陪妳買衫又話我係變態... 哈哈~ 以後唔好叫我出去呀~! =P

    無聊之下同友人又去o左睇示範單位,不過今次唔係我主動話要去睇樓o架!好彩我一向都有留意財經兼地產,就算有"行家"走o黎撩我都可以即時應對o下... 不過講時講,睇樓真係好正,尤其係見到d大單位,又可以睇o下而家時下o既室內設計(interior design),又可以評頭品足o下d地方見唔見洗.不過發現o左今次睇o既示範單位有一個錯誤,就係次序問題.我地一出電梯就去到一個成1800呎o既最大單位,之後就越睇越細... 搞到最後睇返d約1000呎o既單位時好似好細咁.(不過其實成千呎單位已經係好大... ~.~") 可能呢個就係發展商想客買大單位o既策略喇.

    睇完樓買完衫就去食左敦食"好好味o既蛋蛋",之後吹o左一陣水.發現呢間o野入面有個伙記係特別惡o架... 所以上次康爺俾人鬧係佢唔好彩~

    夜晚收到友人的一個遊戲,考反應同速度o架,好玩~




    六月十二日 星期四    

    嘩嘩... 原來小學o既常識科故幾麻煩喇,成日要搵d乜乜植物相片.咁由於我地搵唔到相片,唯有剪o左佢本常識書d相喇,點知又唔知係咩o野花... 其實一般公園d花係乜o野花呢?答案就係海棠花.但係對花無什認識o既我就搵o左好耐喇,最後好彩被我記得字典有,咁先可以對住d花o黎認返咋~~

    唉... BB仔始終都係Bb仔.今日同大BB補習o既時候,佢竟然因無得睇乜乜卡通片而發嬲,不停咁鬧三色台.完全陷入失控狀態.試o左好多舍方法去哄佢,點知都唔得... 正當想放棄o既時候諗起俾佢做"一樣o野"就會令佢開心返,點知真係俾佢做"o個樣o野"就搞掂.大家估o下"o個樣o野"係乜?^.* 答案保證係難以置信o架~

    今日傍晚補完習趕去CityU返學,因為心血來潮take o左個OOD... 點知由白區(White zone--即又一城)入CityU o既時候,竟然被我撞到人,撞到大象都ok喇,因為佢係o係CityU讀;(不過大象哥好似換o左髮型喎~)但係我竟然又撞到唔係o係CityU讀o既Claudia姐姐.原來佢o係個頭返工,City 條subway係佢必經之路喇~ 咁講法,第日咪逢星期四咪可以撞到佢~第日搵埋佢地食飯都得喎... 若然佢地可以等到我九點幾放學o既...=P

    夜晚與一眾友人食飯,其實今次係刻意出o黎食飯相眾... 目的就係為o左商討星期六o既出行而準備.商討之際大家都o係到嘻嘻哈哈講笑,笑聲不絕.唯獨笑聲只係維持了短短的兩個多小時... 因為酒樓忽然間話會收o野,不過我地都即刻拎晒d食物返o黎慢慢食...呵呵~




    六月十一日 星期三    

    今日約o左朋友早到,去到機鋪忽然間有人從後熊抱,真係被突如其來的一抱嚇親~ 睇真d,原來係友人正在打機,見到我竟然連機都唔打去"叫"我,真係...~.~

    今日約了友人睇戲.噚晚都講到似層層,甚至今日一早打電話提佢,最後始終都係遲到... 搞到睇戲就泡湯~(重諗住今次可以將妳從遲到blacklist中除名呢~) 好彩我一早就諗定好著,去打保齡.就係咁我又終於自年頭玩過保齡之後又可以再玩過.不過今次真係玩保齡,而唔係打保齡.因為我同友人的分數加埋都唔夠上次我排第一的多,真係羞死人~!好彩我噚晚無搵朋友仔去咋 >.< 不過都好,被我發現o左一樣o野.而家AMF做緊promotion,只要俾$130就可以同時帶8個人去任打保齡一個鍾(for one lane).不過其實八個人就真係多得滯,若然以四個計,每人平均都係$32.5任打一個鍾,咁都唔錯喇~ 下次一於就咁玩~!

    玩完保齡之後去o左打機,同友人合作兩鋪加上自己打的一鋪,共打了九關.平均每鋪都打唔過第三關... 點解,點解我今日咁o架... 康爺,救我呀!

    今日下午去補細路女,自從眼發炎之後都無同佢補習喇.好耐無見佢,竟然連驗都測埋,好彩我平時教得快d,所以佢今次測驗都考得幾好~~ 其實教咁上o下大o既人先好(警告:我唔係孿童魔呀!),太細過真係好難教,可能重未知道讀唔好書有乜o野壞處喇.

    夜晚有友人睇過我d"禁相"之後就嚷著要去影相... 哈哈~ 有時有d o野係可遇不可求o架!咁易就有得影就好喇~呵呵~




    六月十日 星期二    

    ~靚靚~

     

     

     

     

     

     

     

     

     

     

     

     

      ~舒服~ 赤柱灣岸

     

     

     

     

     

     

     

     

      象哥,生日快樂喎~ 其實噚晚已經send o左呢個msg俾你o架喇,不過你偏偏又訓o左... Anyway, 玩得開心d~!

    忽然間諗起前日陪康鉀佢地食飯時講o既一句話.點解有婆媳糾紛呢?原來答案好簡單,因為佢地兩個都係女人!點喇,大家係咪重係唔太明呢... 其實大家只要細心咁諗一諗就知答案,因為佢地都"爭仔"(爭埋同一個男仔)o羅!~LOL~

    前幾日睇戲o既其中一句對白,終於被人搵到~ 就係:"You live because you love, not (to) be loved." 多謝朋友仔~

    從朋友仔網頁睇到一個關於卡通o既test:What cartoon character are you? (with pics)

    you are Garfield
    You are Garfield! You are a joker, crazy, smart and definately like
    to have fun, but you may take it to the
    extremes. Even so, you know what you are
    doing, and you are always in control of your
    life. People don't always see things your way,
    but that doesn't mean that you should always do
    what you think is right. Try to remember that
    your feline spirit may hurt you as well as
    others.

    Yo... Let's find out what Matrix person are you? Again, here's my result... but I don't want to be Neo...~.~ You are Neo
    You are Neo, from "The Matrix." You
    display a perfect fusion of heroism and
    compassion.

    Last test~ What kind of kiss are you? dominant
    You have a dominant kiss- you take charge and make
    sure your partner can feel it! Done artfully,
    it can be very satisfactory if he/she is into
    you playing the dominant role MEORW!

    睇朋友仔網頁搵到個有好多得意遊戲
    o既link~

    自從考完試之後,一齊食飯玩開o個班同學仔已經未再聯絡,忽然間好似變o左陌生人咁.本來諗住今日搵o下佢地... 點知個個都好似好忙咁.夜晚睇返其中一個同學o既日記先知原來呢幾日發生o左大事.唉... 真係估唔到短短幾日原來都可以發生咁多事~不過通常情侶都係經歷過d o野先會更加好.希望倫哥快d好返喇~

    太得閒而無靈感... 往往唔得閒就諗到大把o野寫,當返到屋企對住部電腦又腦袋一遍空白.可惡!無奈之際唯有瀏覽日記.睇睇o下發覺有一遍文章寫得好好.好唔係因為佢諗到而我諗唔到,其實諗我諗過唔止成萬次.最大o既問題係佢寫到而我寫唔到.把文章連結了,特此謝過~

    近排可能時間多o左,所以開始睇戲.諗諗o下近排除o左兩o左兩套新戲之外,重有睇電視播返d戲.加料感情線(The Family Man)就係我近排唔係入戲院睇而我睇過最深刻o既戲.點解深刻,因為一來套戲係我最鍾意o既演員尼古拉斯基治(Nicholas Cage)主演.二來就係呢套戲又係講當人面對兩難o既情況會點揀,同被揀與被放棄的選擇有什麼分別及分別出現怎樣的結局.都幾好睇喇~ 最後,當我寫呢段o野o既時候,被我發現原來自1995年(When Cage won the Best Actor of the year)之後,我差唔多每一套佢o既戲都有睇.當然,我唔係因為佢係什麼影帝先睇佢o既戲.只不過係無獨有偶我第一次睇完佢o既戲而最印象深刻o既就係佢套得獎作--兩棵絕望的心(Leaving Las Vegas),所以呢套亦都係我親自買o既碟之一.




    六月九日 星期一    天.地.人

    天公做美! 噚日一早見到天朗氣清,老媽子就決定如期出街,趁星期日散到赤柱移o下.於是就搵埋老爸,搭973入南區.途中o係黃竹坑見到兩隊小童棒球隊正在比賽,難得無落雨,竟當然要去做返d戶外活動喇(比賽).而更難得的是給我看到有多隊著整齊服裝的小朋友正在比賽.之後又經過淺水灣29號,見到華懋新落成o既新樓,淺水灣129號,呎價重推到去$30,000!!最後終於都到o左赤柱廣場落車,開始一家人四圍行.

    由於我未去過赤柱廣場,於是有帶備相機o既我就開始忘我影相.可能係太過入神o既關係,竟是有人走到我隔離仍全不知情,重要一轉身就見到佢好似前排麥記Miss打側頭o黎望住我.驚訝之餘我只識得呆笑,好一會先見到佢原來同同學一齊o黎.短短兩句交談後已見二人離去.而渾噩o既我無把握呢個黃金機會,拉攏咱們三人去影返張相.當清醒過來已見兩人已走得老遠喇.真係估唔到,呢到都會撞到同學仔呢!(可能平時我出沒o既地方太唔健康,所以到而家先撞到人... =P) 由於天雨關係,當我行到半路,發現有裝修得靚靚o既餐廳時就落雨,搞到我只可以急忙地影得幾張相... 重諗住可以影d相俾朋友仔睇添~

    羨慕~^^~ 妒忌~>.<~

     

     

     

     

     

     

     

     

     

    地理位置 由於站立在有利位置,被我影到幾張吹波波o既相.其實起初只係想試o下影d 透明o既肥皂泡.點知影影o下見到對情侶玩得咁開心,霎時間又唔知有種羨慕o既感覺.這麼簡單吹吹肥皂泡的兒童玩意就能令他們過了愉快的一刻.相反時下有無數之多的情侶都是靠物質滿足來維持關係,多麼可悲呢!幸好我o既拍攝活動無阻礙他們兩... =) (點解我知道無阻佢地?因為我之後又見到d唔應該見o既o野o羅,重影埋相添...Hohooo =P)

    近兩日都過得頗為充實.基本上除o左新界區未去之外,其他都被我經過晒喇~ 先有噚日去o左南區o既赤柱淺水灣,之後又有噚晚o既上環到尖咀星光行,再由加連威老道到油麻地.跟住又有今日o既澳海城至長沙灣.除o左南區要搭車次外,其餘o既地方我都係以腳代步o架.所以呢幾日都算行o左好多路... 咁當然喇,我唔係齋行路而行喇... 途中上環行到中環係為搭船過海會朋友們;而去澳海城就係為睇戲;去長沙灣就係為見証阿牛"洗版"破紀錄.今日見阿牛洗版先發現o左樣o野.原來大多數遊戲都係以半個鍾為一般爆機時間.噚日o既神劍伏魔錄係,今日的TC3又係.

    人性盡顯! 估唔到game都會有寓意心長~.~ 話說噚晚同康爺一行人去打機,見佢地四人又合作打機,每到緊張關頭都會用"絕招",幾經辛苦先排除萬難爆機.正當大家企起身離開座位時,畫面竟然轉向一個bonus game呢個字.四人即走回座位.點知今次再沒有出現共同對抗的敵人,而只有他們四人.因此困獸鬥一觸即發.哈哈... 這刻竟突然o黎過人性大考驗.有人為o左拔起地上的刀,有的只為了韱滅畫面的"最後敵人"而戰... 唉~ 事實是多麼的殘酷!真係中o左句:"可以共患難,而唔可以共富貴."

    今日去食完飯就去睇戲.由於而家中學生放緊夏令時間,當我去到戲院買飛o個陣,正中間位置已售出,唯有退而求其次的左手邊位.點知後面班學生仔就全場o係到'嘈嘈閉'.咁都算喇... 最受不了的是其中有一個,不停的說出劇情.搞到我每一個shot都知道下一刻會有d咩o野出現,乜o野癮都冇晒喇!真係唔明d人睇完都重要入戲院做乜.




    六月八日 星期日    

    陸戰型吉姆 ~~指o下我地喇~~

    哈哈... 原來我都可以將無可能整到有可能.前日加上噚日我終於都完成o左我屋企最後一盒模型-- 陸戰型吉姆.估唔到無砌圖o既輔助下,加上又係配件不全的問題,我都可以砌到隻o野,不過就無o左把機槍,冇咁型.縱然又整爛o左兩個接駁位,最尾我都順利砌晒,開心~

    凌晨諗住同康爺&納爺打牌耍樂一番,點知因當機問題而遲遲上唔返網,搞o左成半個鍾,最後連康爺都走埋... 及後先知原來佢地改o左玩第二樣o野--傾電話.於是又一大伙兒去傾電話.講真,一向對於講"長電話"都冇興趣o既我,起初真係有d悶... 不過後尾講講o下,又開始聽到趙大爺o既理論,大家就一齊咁上o左一堂.發現o左原來想拍拖或追一個人而唔想開口可以用非一般o既方法.而是次理論大約好似帶給一個普通人進入如夢幻般的仙境,而當他/她習慣了仙境的新生活後,便將一切打回原狀... 第一個感覺就令我聯想到一個壞人送毒品俾人食,當那人食到成為'道友'就唔再俾佢,等佢掉返轉頭搵拆家.到時就可以輕易o黎一個反容為主.高招高招~~呵呵~~




    六月七日 星期六    老爸,生日快樂!!

    收到友人的一個url,幾正o架!係講若果你o係RPG game入面,你會係咩o野呢? 哈哈~我o既結果如下:

     

    Hippo的個人資料

    攻擊
    60
    防禦
    77
    敏捷
    77
    耐力
    56
    意志
    91
    智商
    91
    種族
    精靈
    職業
    劍士
    屬性
    暗

    給好耐無見過面o既所有朋友~~

    今日一早就死入去柴灣補習,本來諗住搭地鐵順便訓返陣喇,點知訓唔著,之後重要同大BB嘈,真係慘~ 下午同康爺走o左去尖咀玩TC3,不過估唔到我竟然係玩得咁渣... 之後走o左去尖東,發現我以前玩開地庫o個間機鋪已經變成示範單位,唯有轉到另一個地方喇... 點知又被人挑機.本只想安守本份咁打電腦,好彩都錄得三勝一負,而且係輸地形--太空.人地俾$16蚊而我地俾$4,唯有安慰自己抵返喇~

    好耐之前我睇過o既flash毀滅者I,原來已經出o左第二集,有追過開o既可以一齊追~ 毀滅者II~

    傍晚睇星期六檔案,今次講o既題目係學童求學時期沉迷打機(電腦).兩位被訪者異口同聲話想打機打叻d,甚至想以打機作搵食.講真,我覺得打機勁無用o架喎!一係唔做,做就要做到最好;玩(打機)都係一樣,一係唔玩(打),一玩(打)就要打到世界第一咁先至真係有成就.重唔係短時間喎... 因為短時間o既勝利都係無o野o架喎~~ 好似我今日夠有贏高達喇,不過最尾咪又係輸.而第一我都試過好多次喇!不過我就唔係長時間喇... 不過我有個frd就係全球身一喇~~雖然只係TC3,不過已經好足夠喇.全球第一喎,真係每樣範疇得一個咋喎... 試問大家有冇o野敢誇口講自己係全球第一呀?我就唔敢喇... 因為我知我無... =P

    今日係我老頭子生日,生日快樂!偏偏就有兩位朋友搵我...下午阿牛搵我出街食飯,咁當然要推喇.縱然我係好好...好想睇佢爆TC3,一展全球第一o既威名.夜晚食完飯返o黎,Felix哥哥又搵我去食宵夜.同樣地,我又係以同一理由推o左.SORRY 呀兩位~!阿爸又大一歲喇~唔知佢有乜感覺呢?




    六月六日 星期五    計劃失敗

    凌晨有友人icq我... 不過見到佢個名我竟然諗o左好耐好耐都記唔起佢係邊個,就連我睇埋info都唔知.直到要我睇返history先記得返... 哈哈~真係有d失憶添~~ 不過咁又係,實在太耐冇傾過喇.不過得知友人今年會返港都戥佢開心,而最開心就當然係佢男朋友喇~我諗~

    計劃失敗唔係單單講一個,而係講多個!唉... 前晚我訓唔著,其實又係身體勁疲憊,不過精神上又勁好,於是就諗到好多o野... 最直接簡單就當然係計劃o下我康復後o既活動行程喇.話晒都小休o左成兩個星期,差d就悶到發荒喇.難得有精神,於是咪訓o左o係床到諗o左一陣,plan好o左幾個行程... 竟連後備行程都諗埋.點知,今日一個返工同返學而打消了去澳門的大計.不過我都預o左喇,話晒都咁緊迫先話去.咁見友人話海灘好,而且諗住去有友人想去,於是又計劃去海灘喇,點知問友人幫手車我地入去又出現盆子.之後聽友人話星期六去淺水灣,不過時間又唔多配合... 幸好,噚日補習o既時候已經搞掂o左,應該可以去得成(若然我真係去得的話).計計o下,前晚諗o左咁多樣o野,無一樣o野係叫做o係我預算/計之內... 可惜可惜.唯一有返d安慰就係我諗住會見一個人,而最後真係被我o係街撞到~~ 當然,我唔係一個咁容易放棄o既人,噚晚亦有友人叫我今日出去玩,可惜時間上約o左另一友人,唯有放棄o左康爺~~sorry~~ 唔好咁,聽日又見喇~!

    計畫除o左長遠o既,其實重有好多即興,例如,我一直都想去唱K同周圍行o下... 但係往往d時間配合唔到,搞到開始有"二揀一"o既情況出現.o係兩難o既情況下,有時就會得失o左d人.此外,計劃失敗的原因就要數到天氣的錯喇.夏季來臨,亦即是雨季來臨... 就好似今日咁,若果成日都落雨,我亦都會冇乜心情出街.(完全跟老爸一模一樣!)

    今日約了朋友仔睇戲,為o左驚買唔到飛我計劃早d去買,順便去搵lecturer.點知去到剛剛lunch hour break,重要休成個幾鍾... ~.~ 不過都好彩最後都搵到阿sir~

    成年無見過o既人,見返o既第一個感覺係-- 靚!今日去睇o既戲就係我前排話過想睇o既戲--何必偏偏玩謝我.講真,呢類戲一開頭好凌亂,一時講o下現在,一時講過去,一時講將來... 不過套戲最後十五分鍾簡直係高潮,主角一切諗住o既o野竟然完全係兩回事,原來一切只係假象.戲中有一句對白是這樣的:"因你愛,故你在;而並非誰愛你" 英文版本係正d同易明d o架!只可惜我記憶力不濟,唔記得.其實句說話係講,係你自己點睇自己,而唔係因為人地點睇你而影響自己的決定.

    本來諗住今日拎部相機出去同朋友仔影o下相,不過又驚佢唔肯,加上一早又落大雨,所以最後都決定唔帶佢出街.但係都唔知應該話好彩定唔好彩... 原因係因為下午當我同朋友仔去城軒食tea o既時候真係落大雨,但係身在高處o既我地又見到閃電,況且原來朋友仔係想影相o架.有帶相機可能會被雨水沾濕,不過亦都可能影到閃電的一瞬同朋友仔的合照~~ 但我知道第日總有機會o既,我相信會,呵呵...=P

    其實睇完戲本想諗住去Pacific Coffee 歎返杯o野同傾o下偈,點知去到無晒梳化,[估唔到兩間咁大o既面積都搵唔到位...=(] 輾轉先去到CityU 城軒.雖然因為要避雨先逗留o左成個鍾,不過飲o野期間都一直有傾有講,冇dead air. 而同朋友傾偈絕對係我所o響往o既事情喇~~之前我幾驚無o野講呀~.~ 送走了友人,Felix哥哥話就放工,唯有等埋佢.點知原來佢又約叫o左Claudia姐姐等埋佢,之後重走添... 不過點都好,總算開開心心的過了一天!

    夜晚收到友人的一個小學版百萬富翁,大家唔好見小學就睇小佢呀,有難度o架... 我都玩唔掂呀~>.<~




    六月五日 星期四    康復原因...

    今日睇對眼已經好白,冇乜紅筋,應該已經好得八八九九o架喇.不過諗深一層,其實我對眼點解呢幾日好得咁快呢... 就係因為我呢幾日好似平日咁,可以出返街,望多d o野,加上我又捱返夜... 其實我都知捱夜唔好,不過我覺得做返平時o既我先會好得快d,同埋成日合埋眼休息都唔係一個辦法,所以我決定遲d我會去沙灘曬o下先~~呢個就係我呢幾日對眼好得咁快o既原因.奇人用奇法~~^.*

    噚晚收到同學的一個url,講一段玩DDR的片段.亦都係因為DDR需要大量身體動作,所以我以前咩o野音樂遊戲都敢玩,唯獨DDR... 因為就係怕有呢d恐怖鏡頭出現~~DDR韓國版之成人禮~~LOL

    凌晨收到舊同學的一個提問,問曰:"點解你要將d相分開成咁多個account呢?" 唉... 其實我係唔夠位存放咁多相喇,因為要將所有相都放晒落同一個account到,咁就會要好多位,而呢d'位'係要買o架!因此我先要用咁多個email account,開咁多個photo album. 咁解答埋點解你個frd可以存放咁多張相喇... 因為佢係上年八月就開始存放相片,而當時重未有收費呢個措施喇,所以我一開始都有個乜都有o既大相薄.但係好可惜,由於世界係冇免費午餐o架,所以上年十二初就開始收費喇... 有頭髮那個想做禿子呢?

    中午整理噚日影d相o既時候,竟然唔小心delete o左噚日特登影o黎玩combine(扮晒segment)o既相.本來想整個270度o既相,而家泡湯lu...~.~

    下午同大BB補習,講講o下輾轉講到做警察,之後佢竟然話做警察係因為可以入浩園,剎那間我真係呆o左.估唔到佢竟然為o左入浩園而話想做警察,唔通呢排太多人因工殉職,所以就連細路都特別留意浩園呢個字?不過浩園只不過係為o左記念(補償)因工而殉職o既工務員而設喇.而大BB竟然為o左呢死(入浩園)先想做警察,真係有d諷刺... 需知道生命係比任何o野都重要呢!




    六月四日 星期三    康復~!

    左眼康復度 80%,不過右眼前兩日受感染,但都已開始康復,康復度約60% 基本上可以話全面康復o架喇.太好喇,我終於都唔洗再過埋齋戒,早訓等呢d生活... 最慘係見到人地食好o野,而我就只係得個睇字.總括o黎講,呢幾日都算慘喇,(不過o係人唔舒服病o左都係咁o架喇...~.~) 而且我又變得軟弱晒-- 對眼紅晒,好似成日喊完咁.當然,成日流眼水,眼睛有穢物等都令我好頭痛,次次訓醒都要用紙巾整理一番先得.點都好,大家放假千其唔好學我咁,玩o既同時都要顧o下身體喇... 唔係真係有排你受呢~~祝大家安康,尤其係成日話一放假就病o既人~~

    o係友人網頁睇到塔羅牌占卜,好得意~而且個flash整得太正喇~~

    今日又同友人行街,其實又係舊地重遊,只不過係行返噚日o既鞋鋪.不過今次被佢搵多一間有佢想要o既鞋,但係被我一句說話就令佢完全猶豫...~.~ 最後重搞到去另一間買,不過之後佢又話呢間唔好,又懷疑呢間d鞋係假.唉,買對鞋都搞到咁傷神... 慘~ 不過點都好喇,佢終於都買到佢要買o既鞋喇.哈哈~~夏天出街都唔錯,加上對眼已慢慢好返... 睇到o既o野都好似都靚d,正如友人的日記所講,眼睛吃了冰淇淋呢~~ 不過唔洗去沙灘都食到...=P

    自己影o既月亮~ 由於今晚要去銅鑼灣食飯,所以傍晚一個人走去銅鑼灣影相.前排成日諗一個人去影相可能會好悶,好悶... 因為一個人做乜o野都好快就覺得悶.但係今日一個人由E-house影到去遊艇會,自己可能從未咁行過,行行o下又見到好多新地方,好得意~~ 得到前人o既經驗,影月亮其實未必一定要夜晚影,好似相中傍晚呢段時候都唔錯o架!呢次就係我第一次影到新月~冇走樣o架~ 橫掂康爺又唔鍾意成日周圍去喇.經過今日一行,第日我可以一個人自己去影相喇,話晒都自由d~~^^~~

    晚上一家人聚首一堂食飯做節.竟然被姑媽話我廋o左一個碼... 唔通小病可以減肥?始終大家都可能太耐冇見,記錯o左我o既身形.講起一家人,今次一定要提o下爺爺,估唔到次次食飯後我都負責攙扶佢老人家,今晚竟然堅決地要自己行,可能人老o左就更加想証明自己係得o架喇,所以硬要自己行喇.不過唔好講笑,佢老人家成九十幾歲,今次自己行竟可健步如飛,行得重快過d五,六十歲o既人,最重要o既係佢行得一d都唔吃力呢.睇到爺爺可以行得咁快,咁精神奕奕,真係開心~~




    六月三日 星期二    

    睇唔睇到右手有瑕疵呢?~好得意喔~ 噚晚用o左我半晚時間,對眼o係朦朦朧朧o既情況終於砌o左呢隻綠勇士海洋版~其實砌呢盒模型都好艱難喇.因為佢d配件唔係完整o羅,當然我砌到隻手o既時間竟然被我發展唔見o左右手o既接駁位,搞到我有d心灰意冷... 幸好當我砌完發現重有d剩餘物資,就係咁我就整返隻右手喇砌完呢盒,我唔敢再誇口話我可以冇模型圖而砌得出陸戰型吉姆喇...~.~

    下午同友人行旺角,都唔知行o左幾多個圈喇... 次數之多竟然可以被我地多次撞返我地o係街見過o既人(eg."致命麻雀").~~開心~~ 見友人買o左條迷彩裙之後又後悔,但係又唔捨得買多條自己o既心頭好,o個種矛盾o既心情完全表露晒出o黎.不過我覺得兩者無乜分別,只係一條較另一條鮮色少少咋嘛,而且買對涼鞋又係因為顏色問題而遲遲唔買... 可能女仔就係咁唯美主義喇!

    下午同大BB補習,原來細路仔都鍾意睇少女卡通片.今日就睇到佢睇一套叫<小天使唐唐>而睇得入迷,重識得怕羞呢,呵呵~~佢一定鍾意o左個女主角喇~~ 之後佢又話佢下年可以上網,重話佢個表姐讀小六一定會搵到我呢個網頁呢!(講呢番詰o既時候佢隻手指重指住我個額頭,幾咁囂張~~~>.<) 不過可惜佢都唔明白,我個網頁係私人o架,又點會咁易搵得到呢...=P




    六月二日 星期一    逃避街頭推銷員的辦法一

    今日無聊在街上行行,點知行到去聯合廣場之前一個燈位,有一大埋推銷員企o係到,有男有女,搞到條街好似好熱鬧咁.其實除o左呢到見到推銷員之後,近皆旺商場,登打士街都有好多呢d推銷員,就連柴灣都有... 講真,佢地搵食我唔怪佢地,不過佢地家o下搞到好似怨鬼纏身咁,不停的追,簡直係不做不休(做係指做問卷).好得死煩.其實,要避開佢地成為佢地o既目標好簡單,只要拎住個電話扮傾緊偈就得架喇~~ 佢地絕對唔敢走過o黎,咁就可以避開佢地o既追截.萬試萬靈~~




    六月一日 星期日     

    夜晚收到友人的一個url,係斟可樂遊戲,好得意o架~

    再收到一個短o既movie,愛貓之人必睇~超級爆笑既貓貓~~~

    傍晚去了以前o既老師屋企幫手收拾,收拾後與之談了一會,順道聽聽中學的運作 & 近況.此外,重聽到老師近年所發生的事情.嘩... 真係唔聽唔知,細聽之下原來這幾年他真的發生了許多事,多到我足足聽了個幾鍾都好似未講晒咁!不過始終不如意事居多,幸好其中一件事令到佢睇到人性醜惡o既另一面,從而令他學會了寶貴的一課.話雖如此,這代價也頗大,且見得老師也為此憂心了好一段日子,真係戥佢有d擔心.望他老人家身體安康喇~











             <---back 我的資料  簽個大名啦 !