三月 March










三月卅一日 星期一    我愛的人與他的愛人

今日終於拎返我部Hi-Fi,(又出街喇~)話說近日日日都留o係屋企,實在太悶喇... 而家拎返部機可以整理一o下我好耐冇錄過o既MD... 總好過日日睇VCD,而且<橙路>已經睇完了.呢套又係一套冇結局的戲,不過有時冇結局可能好過有結局,而<橙路>就係其中之一喇.

如果你報了A-level而又撞正大學校內考試或其他重要日子,大家又會如何取捨呢?講到尾大家都係為了爭取更好的學位,為著將來而奮鬥.但係咁樣有可能令到自己兩頭唔到岸,最後更發現失去更多!戥各位要考A-level而同時又要返大學讀書o既人婉惜.

上星期同BB仔補習時,見到佢要做毛筆練習功課... 忽然間見到我以前十分抗拒的毛筆字練習,多年沒有接觸的我竟然想一試手執毛筆的感覺.如是者,我便以教BB仔寫字的理由,藉機重拾這遺忘多年的感覺...寫寫o下又想用多d毛筆字呢,(因為我以前少寫毛筆字,所以先搞到而家寫d字唔靚)呵呵~

今天晚上與兩位好朋友暢談,與其中一位就談及我愛的人;而同一時間,與另一位則談及他的愛人.同時與兩位身在外地的好友談及愛情,但一個是以講者的身份,而另一個是以聆聽者的身份... 感覺好得意~




三月卅日 星期日    

近日非典型肺炎襲港,加上聽日家人談及月前某政府高層曾到黃大仙代香港求了支下下籤,(註:有說黃大仙是專為人醫病) 不禁令我聯想起兩者是否有關係呢?(好邪呀~.~)

今日下午陪老媽子去了又一城百佳,(又係一星期去足六日!) 去到順便睇o下我一直想買的飲料,發覺原來要整一杯Sex on the beach 的成本都好高喇.粗略估計要調製一杯的成本價約$40(假設一次過成功調製的話),而平時去酒吧飲一杯的都係$50至$60元不等.所以其實直接去飲都係貴幾蚊,而且重係隨時隨地都有得飲喎...XDXD

To 婆仔: 是誰說我拿不到Anchor的!我現在正在看呢...呵呵~ (又說會竭力阻止我=P)




三月廿九日 星期六    戴口罩的感覺

由於今日要出街,發覺戴口罩的人明顯多了.而我今日的目的地又是柴灣,要經歷足足十八個地鐵站的"長途行程".為了令老媽安心,我只好加入戴口罩行列.但這絕不是好受的... 由太子到柴灣這四十五分鍾車程,我感受到什麼是呼吸困難,空氣阻隔等.下車後更流鼻水呢!心想:"不戴還是比戴的好!"

今日同BB仔補習發覺一件得意o既事,原來細路仔對佢有興趣的事物(尤以新的東西!)就會好有心機.就例如今日我教佢份數,由於小學剛剛教份數,所以佢特別俾心機學,亦學得好快.因此今日我進度尚算滿意.

夜晚睇電視,觀看到一個特輯是關於近日大家經常提及的肺炎.節目中訪問到威院8A的醫生,他以"美以大戰"來形容今次的肺炎(他說:他和美軍也是同樣地穿著生化衣.) 但可怕的是他們所面對的敵人並不是明刀明槍,而是看不見的!在這危難關頭醫生們仍努力于懈,真的十分佩服他們的專業精神.在此對他們作出深深的敬意.

夜晚出街同友人吹水,發覺"半生熟"的朋友係好難搵一樣o野去代表佢o架.不過初相識及好熟就較為易d.另外,傾談期間友人爆o左句:"現今d青少年,發育就早o左,但係個腦就蠢o左!" 是為今晚的金句~

凌晨食返今晚餐飯食剩的炸魚塊,竟然還是鬆脆的!而且重係好好味,開心~~ 老媽弄的果然非同凡享.所以我始終覺得,女仔乜都冇唔緊要,最起碼都一定要識整返兩味~~XDXD




三月廿八日 星期五    

今日填了大學的一份問卷,不過我覺得其中一題"好得意",就係"你是否覺得近來睡得不太好?"... 近排都冇乜訓,又何來睡得不太好呢?或者可以咁講:晚晚都要捱到凌晨,咁夜先訓又何來訓唔著呢...

今日下午終於宣布所以學校(包括大學)都全面停課... 但係當全世界都停課,所有學生都唔洗返學.不過我相信絕對有人趁呢段時間出街玩(包括我在內,呵呵~我係講我要去補習喇)... 而且,全面停課亦可能令託兒服務的大量增加,雙親工作的子女將無人照顧.全面停課雖然解除學童在學校被感染非典型肺炎外,也間接製造了其他問題.所以我覺得全面停課其實都只不過係"唔係辦法中的辦法"罷了.




三月廿七日 星期四    沒有口罩的日子?

近日非典型肺炎肆虐香港,戴口罩的人數日益增加.今日看見有些"商人"在街邊擺檔售賣口罩,試圖重中獲利.更可怕的是,今日我正準備入閘搭地鐵的時候,在八達通入閘機的感應器上竟然有啖.幸好我沒有中招... 但已令我不禁想起,有些人可能惡意傳播細菌,好讓他們發一筆不義之財!這是多麼可恥的行為呢.




三月廿六日 星期三    

∼沒有精神的一天∼

今日的心情好像我今日下午所遇的的一件事情一樣:我天下午我途經模型店.進了去,看見我一直想買的模型,而售價亦是我近日所見中最廉宜的.(標售八十元正,但我心目中最理想的價錢是七十多元) 事實上這價錢比我心目中的價位只不過是多了數元,而我也不太在乎這區區數元.(正所謂千金難買心頭好!) 但是,我最後亦沒有購入這"心頭好".為什麼呢?正正就是今日的心情... 心是想幹的,但偏偏我沒有做到.心裡不停地罵著自己~可惡!




三月廿五日 星期二    

凌晨上載了一批攝於近日的相,這可是我近期的至愛呢!XDXD

很大程度上,人在危急關頭都會有激發潛能的可能.但在未確定潛能會否激發之前,我反而更想休息... 呵呵~ 如是者,我又趁著這休息的機會,收拾一下我久未開啟的抽屜.不經不覺,原來以往的我一直都有寫信的.除了同學和朋友外,net-friend及筆友也有一定數目.粗略估計大約廿多封呢.雖然內容都是簡單的問候及閒話,但今天的我亦非常佩服當天的自己,能夠這麼有恆心拿起紙筆寫信.現在的我只有間中寫寫電郵,這可能年紀大了的我煩惱也較多,所以再沒有寫信的毅力了...~.~

晚上收到一個url,內�媮縣帣{今80%香港男和女的問題.大家看看自己有著多少樣"問題",LOL~

夜晚睇newsgroup玩了一個心理測驗,又可以了解自己多一點.我的結果是ESFP: "Extra Special Friendly Person".我覺得超準喇~




三月廿四日 星期一    

今日約了同學睇戲.不過我地並唔係睇近期上影的"紐約風雲"或"鋼琴戰曲",而是睇一套名為"I am Sam"的電影.因為我們是為了交功課才相約看戲的.說時說兩三人佔用一個tutor room去睇戲的感覺真係好正.既可用頭射睇戲,又可配以靚靚音響欣賞,學校的資源真不錯呀!=P

今天是同學present的日子,但同學竟然因手提電腦壞了而決定放棄用powerpoint作presentation,唯有用口述報告.聽到這等決定的我覺得好像向現實低頭一樣,立即勸其找覓另一個沒人的tutor room,好讓她們有得用電腦作presentaion. 事實上,手提電腦壞了加上學校所有電腦都外借的確是一個令人洩氣.但未到最後一刻(阿sir未入o黎之前),我都覺得唔應該放棄... 可能我試過同樣(應該更遭)的事件吧!

唔知點解,今日難得地收到好多個url, 當中有一個係專嚇人的網頁(即當大家集中精神時就跳出一些驚嚇的鬼瞼~) 可惜,可能係我太好彩喇,(次次)都沒有嚇到我!因為我每次都不會專心看一些我不太興趣的東西... 不專心這毛病竟反而救了我!呵呵~ 同一時間,今日下午見同學present自己的網頁時,發現了原來有好多人都未睇過d網上flash moive/ url.事關當有人播放某個"小兵的故事"時,大伙兒就好像發現新大陸般細心觀看... 可能我睇得太多喇,所以無乜興趣再睇~

今日我發現原來香港都有好多人都好想徵友呢,上堂時無聊入了這個"結交朋友"的地方... 一看之下見到有好多"會員"呢!真係要佩服有咁多人都咁勇敢,不過唔知實際結識到真朋友的又有幾多個呢? 總括發現,原來香港的女孩子亦有若干人等喝酒的(相對於吸煙而言).

近日的心情就好像以下的歌一樣...

<墮落天堂> 

詞:馬嵩惟 曲:小安 主唱:張學友 

Saturday的晚上 想不想瘋一瘋狂 
先把面具戴上 再把渴望上膛 
來到十八號房 想不想盡情搖晃 
先飲兩杯黃湯 再來填滿欲望 
想要High的念頭 有誰能阻擋 
管他音樂棒不棒 You gotta have fun 
今晚過癮不只這樣 今夜喝酒不只淺嚐 
曖昧氣氛還在醞釀 情緒早已上場 

Saturday的晚上 想不想瘋一瘋狂 
先把面具戴上 再把渴望上膛 
來到十八號房 想不想盡情搖晃 
先飲兩杯黃湯 再來填滿欲望 
管他荒唐不荒唐 野獸本性怎麼隱藏 
先脫下妳的偽裝 隨著節奏解放 

Nothing's right and nothing's wrong, 
just say it what you want 
先乾烈酒再兩觴 在這墮落天堂 
就讓音樂稱王So come on come on 




三月廿三日 星期日    

星期日留在家�堛漣痝熊M選擇做功課,但不是我的功課,而是幫我媽"製作"一個powerpoint,一整已是一個下午了!也好,正所謂溫故而知新.今日整一個powerpoint又學識(返)一d基本知識 + 學多了幾種新技巧.好等我他日做preentation時有得表現一下~

昨晚被友人挑癮(釁)一番後,心裡突然想再到某某遠處玩樂攝影... 可能是近期的工作量太沉重,想休息休息的關係吧;但更可能是期望像上回一樣,"撞到一些美好的事情"呢!




三月廿二日 星期六    

話說今日補習時一不小心整親BB仔,搞到佢即刻扁晒嘴,紅晒眼咁... 搞o左好一陣子佢都依然唔睬返我,心知不妙的我死哄死纏仍無功而還.最後要搞到我陪佢玩先搞返掂~不過都晒o左好多時間.唉!原來哄返一個細路仔已經係咁辛苦,若然要哄返一個大人咪重更加慘... 真係"佩服"身邊有男/女朋友的朋友喇~!

像平日一樣要去補習的我,回家途中又同, 細BB仔一齊搭地鐵,開始覺得我不但係一個補習老師,而且重身兼褓姆一職呢!~.~ 地鐵中見到細BB撞到同學o既人d行為好得意,o個種又怕羞但又想上前相認o既心情,簡直同大人一樣... (當然,佢用返細路仔o既方法表達) 睇到佢o個種忐忑不安o既表情,真係極為"可愛"~

同樣o係地鐵車卡內,見到大,細BB吵架,繼而動武,重大鬧車箱,剎那間搞到坐o係隔離o既我都好尷尬呢!事實上兄弟吵架經常都見,不過在我短短的三十五分鍾車程,除了見到"兄弟相殘"外,重見到兄弟和好~所以話兒童的世界真是變得好快,嬲又快;笑返重快!如果可以好似細路仔咁,乜都可以忘記得咁快就好喇!

夜晚開完會同班義工朋友去食飯(途中重踢o左一陣毽,開心~),偏偏在人海汒汒中,我竟然與另一班朋友相遇,好彩~ 其實,我一直好渴望在街上與友人相遇的感覺(唔係刻意安排相遇喔!),之後再一起到某某地方飲杯o野,談天說地一番~咁先係我心目中享受人生o既其中一種呢!




三月廿一日 星期五    要來的始終要來...

今日本來要去拎我部Hi-Fi去整,但係下午我再次盡最後搶救時,竟然可以成功地退返隻MD出o黎~~ 心情興奮的我立即駁返d音響線,點知要o黎o既始終要o黎... 當我想放返隻MD碟入去Hi-Fi時,部機竟然全冇反應.唉~如是者,今日始終都係要到Sony客戶服務中心一趟.咁又損失了數百元了...>.< 所以呢,有些事情要來的始要來,怎也逃不了的!倒不如靜靜思考怎樣應付吧~




三月廿日 星期四     勁追<橙路>

由於今日返學的時間較少,所以我有足夠的時間狂追<橙路>.其實我唔太鍾意睇卡通片o架,不過<橙路>呢套絕對係其中一個例外!因為實在太好睇喇...=) 亦可能係因為我細過睇o左咁多次都睇唔到個結局,所以想睇埋佢喇~.~

夜晚同友人宵夜,傾談中發覺友人越趨成熟.之前去了Cyber City挑機(這是我第一次o係Cyber City這等大場挑機),重要挑SF3,哈哈~我地重要贏埋!後來又去了"德樂"玩高達,今次我第二關就有評級,而且重係C級,好o野~只可惜我地二人連玩兩鋪都係過唔到第三關...>.<




三月十九日 星期三    

好o野,今日有友人借我前排講過話想睇o既o野-- 橙路~ 剛好今天完成了今個星期最難o既工作,呢兩日可以慢慢欣賞喇~ 一睇返橙路,最令我印象深刻的是阿圓阪她所吹的色士風,超正!已經一氣看了十話了!講起又講,十歲前覺得<橙路>絕對係我心目中最完美的愛情片;廿歲前則認為桂正和的是最美好的.不知踏入廿一歲後的我,會否再找到另一套"愛情代表作",或基至親身去體驗一下呢!=P

勁!真係勁... 原來邪邪真係有一絕o架~唔怪得吸引到同學仔o既"支持".果真不枉我跟佢買,今日贏馬~贏返一餐飯返o黎,呵呵~~~^^




三月十八日 星期二    

凌晨諗住今日又要長途跋涉去柴灣,咪去錄隻MD慢慢聽喇.點知唔搞機尤自可,一搞就不得了... 我隻MD竟然卡住了部MD Hi-Fi,而家重整唔返隻碟出o黎.真係激死,聽日長途旅程冇普落之餘重要搵多日拎部機去整... 唉,可惡!不過塞翁失馬,由於Hi-Fi壞了,我只好用discman聽歌,用返部discman就當然要搵返個headphone喇!當我用返個靚headphone從聽友人給我的CD時,d音質簡直係前所未有的靚聲~~~超正~~~ 令在下剎那間都放棄溫習,享受憂鬱的爵士樂.在此多謝祐哥哥的正碟!^O^

今日補習又同細BB玩(重要被死纏要玩騎膊馬!),搞到要一邊睇住大BB,一邊要陪細BB玩... 唉,原來而家幫人補習都要"自我增值"呢...>.<

昨天發生了一件好得意o既事情,話說下午我與同學們在五樓某班房等上堂.點知有一位實Q哥哥同一位姐姐入o黎,然後問我地係咪上緊堂.起初我地都以為係FMO d工作人員來修理的,點知當佢地知道我地未上堂就即係變臉,之後就好似警察查牌咁講:"學生証唔該!" 哈哈,真係估唔到堂堂大學搞到好似D場咁要"查牌"...~.~

今日mega-sale到見到一對我曾睇中o既 And1 波鞋,重要係特價發售!縱然我在會場徘徊了多次,不過最後我都係決定唔買... 我實在唔想又好似最近對timberland咁,買o左又唔著.加上我已經冇咁多錢去"嘗試"新o野.

今日下午上完堂諗完趕去食午餐,點知中途被人來電邀我去幫手影相... 今次影o既對象係我近排熱愛非常的高達!雖然咁樣一影就搞到我冇得吃午餐,但係心裡一直興奮.因為難得友人對我有信心,叫我代為影相!不知今天的攝影如何呢?真的十分期待今天的作品呢!

夜晚收到一個朋友o既 msg,搞到我要"delete"晒所有佢曾寫過的留言.唉,何必呢,有時人(無論男女)真係好敏感呢!




三月十七日 星期一    又愛又恨

終於記回昨晚看電影<小親親>時想起的"說話"!就係今日的標題-- 又愛又恨.電影中的情節是講述一個專說女人不是的電台唱片,與一個寫作才女由互相針對到互相欣賞的愛情故事.但何為又愛又恨呢?就是一個專說女人不是的電台節目,本應是惹來女性極度反感的,但劇情除了寫出所有女性都反感外,還描述她們十分喜愛收聽此節目.難道女孩子們是愛被罵的嗎?我知道答案當然不是,這只不過是心理的一種~不過又發又恨的感覺又真是十分美妙的!

今日下午同lecturer食飯,本來同lecturer食飯係傾project的... 但係後來竟演變成大家談天說地吹吹水.我覺得有時同o下d lecturer食飯都唔錯,除o左傾功課外,重可以傾o下 d時事,問o下問題等等~~ 最後大家當然係舒服o既氣氛下度過喇~

無聊一講:相信大家都知道眼影(eye shadow)是什麼,不過原來眼影都有好多種"玩法".記住多年前的明星已用眼影了,不過只是單調地(單色)塗了便算.但創意無限的化妝師又怎會容許停滯不前呢?於是乎又出現兩種和多種顏色的配搭(橫塗法)基至smoky eyes,但現在已有另一種新的塗法-- 直塗法.起初我覺得直塗法是不可能的,(接受不了)但近日又覺得順眼多了~~真的佩服化妝師的膽識及創意!




三月十六日 星期日    

凌晨時份忽然記起我星期五是影了一輯相的... 於是乎就利用這段時間去整理兼且上載上網,有興趣的朋友可以去看看我星期五到了那��~~ (若同學仔見此,請提我send返d相俾妳~)

今天去了打波,但未打波之前約了友人"作戰".誰知友人遲到,而沒耐性的我最終選擇與陌生人"合作",但竟然遇到"挑機".幸好在陌生人作魚餌下,在下亦不負眾望,成功偷襲取勝,令戰果增至4戰全勝,呵呵~

下午同送友人回家時,談論到人的優點.大家都認為發現不同人的優點是不難的.而我一直覺得自己除了能看出別人優點的同時,更懂得欣賞別人的優點(這並不是一般人會做的).同樣地,友人卻除了看出別人的優點,而且更懂得加以利用...=P

晚上看了電影<小親親>.觀看中途想起了一些"說話"的,但一剎那後又記不起來了... >.< 所以話靈感只得一瞬,若不好好抓緊便會失去.機會也是,感情也是.




三月十五日 星期六    罪過罪過

話說今日補習已經遲到(唉,又遲~),之後休息時間又長o左喎... 最重要係人地阿媽原來係o係屋企架... 哈哈~斷正~

下午返到屋企,又要過著"對住電腦o既日子"(做功課搵料)... 整整o下老媽子竟然幫我按摩,之後就走到沙發享受私人按摩,呵呵~還舒服得睡了呢~~

晚上走了出街食飯,不過原來平o野都係冇質數保證的!以後都係唔好貿然去試新o野~

好o野,聽日奐可以去做運動(打波)!!不過最好的是可以與一班我喜歡的朋友在一齊.

近日又"再次染上了"不良嗜好,再次喜歡打機.不過現在的我不是愛上音樂機,而是高達DX (多得某某姓黎的人帶壞我...=P),哈哈... 現在的我可說是十分沈迷,幸好現在的消費還可接受~~ 否則我一定唔玩~~XDXD (聽日我一定要爆機!)




三月十四日 星期五    有驚無險

今日可算是有驚無險,先有開會時間撞到正一正,同一時間傾兩個presentation,搞到我都唔知去那一邊開會先好.之後又被lecturer"邀請"見面,搞到我好驚~.~ 幸好最後有一班同學仔一齊搵阿sir,咁先避免被阿sir訓話咋!好彩,好彩...^o^




三月十三日 星期四    享受生活 

夜晚收到朋友的一個搞笑message,如下:
關於「三國」的笑話一則!!
話說我有一位朋友,買了幾張演唱會票,決定
送一張給我一位叫「關文長」的朋友, 於是通
過傳呼台通知:那張票留給關文長先生。誰知
傳呼台的傳呼小姐一時聽錯,將「關文長」聽
成「關雲長」,結果朋友的中文傳呼機上顯示
出以下七個叫人笑絕的七個字:張飛劉備關雲長。
讀了聽了這麼多年《三國》故事,想不到桃園三
結義的「劉關張」名字竟然可以出現如此巧妙的
配搭。妙哉!妙哉!

雖然今日都要返學上tutor,而且重要去補習,不過我覺得今日先係我近莉勞碌辛勤後最享受生活的一天!上完堂就跟同學仔去了南山村"探險",在那裡吃過午飯後便到九龍塘一帶的公園進發.只可惜當我到達這些期望已久的公園時,它們並沒有給我預期的興奮,只草草影了兩,三張相就算~~ 其後同同學仔行返去旺角,行到"累累"時,便到了仙跡岩"飲飲" + 傾偈.好開心!因為我係我享受傾偈的,尤其係我有興趣的話題!不過我卻發現有很多很多的內心取向(即"底牌")給看穿了...>.< 後來重有人想做埋呢個"雞仔媒人"呢!=P

下午走了到柴灣"工作",工作後可以與天真無邪的BB仔玩,實在是十分輕鬆呢!晚上會合一眾友人,雖然在晚餐地點上出現不滿,幸好這只是短暫的!大家最後依然開開心心地度過... (大部份,因我知道有些危機正在醞釀中,但不關我事,扮作不知好了~~=P) 食飽飽後便到附近"凱聲"運動一番.雖則今次在高達作戰中錯選了陸戰型高達,但今次我不但能打破宿命 -- 英勇地過了第十二版,還順利贏出接著的最後一版,爆機!最開心的是我第一次有"評級"的,是D,不是E!強呀~~




三月十二日 星期三     

昨晚由於要趕交今天的論文,於是乎又挑燈至夜闌... 搞到我今日竟然遲到,最後要返我個同學仔叫醒我返學呢!~.~ 昨晚問另一位同學如何撰寫論文時,她的首個回應卻是想給我一記耳光呢,多激動~

WANTED

兼職男友

職責: 一般男友工作
薪金: 被壓至零了~

<--- 這是用dreamweaver做的~!好玩~~~ 唔知同學仔睇完呢個又覺得點呢...hohoo~

下午捱不了,決定要約見醫生.原來大學睇醫生真的是這麼便宜呢... 只花了十三大元.拿了藥便飛奔趕往補習.今日教o係係細路女,始終都覺得讀中學係識諗好多,所以教得特別容易.加上小妮子又較專心,因此縱使我帶病仕教,亦教得非常舒服~

由於近日十分忙碌,在下至今才有機會一睹上星期借下的心理學書.但由於我服了藥而藥力發作的關係,開始渴睡... 朦朧中記得有一句很好的說話:

愛情主義

托爾斯泰說: 把戀愛當成遙不可及的精神主義者, 與只貪圖感官享樂的肉體主義者, 都同樣忽略了愛的真諦. 雖然兩者的行為相反, 但錯誤卻是相同的.

夜晚看友人的網頁時連結了到一個名為五星個性的網頁,是測星座的.資料詳盡兼且好好睇!!大家有玩開星座絕對唔可以錯過呢...=)




三月十一日 星期二     

凌晨12:35--02:20 --> 看了電影.我知我再一次白白浪費了我的工作時間,同時也犧牲了我的睡眠時間.但今晚所看的,是一套我從沒看過而看後絕不後悔的電影---<想見你> (由許志安及何超儀主演)
此片不是什麼賣座電影.相反,此片只是上影不到一星期便再沒有公影的"爛片".面對此"爛片",為何我還願意花時間看畢它呢?因為,此片正合本人我的胃口-- 這是一套文藝片.
<想見你>一片並不是一般的商業片;它也沒有什麼影帝影后級人馬參與演出.但這類類似<少年十五,十六時>及<香港製造>的片類,鐵定不是一套大賺的電影.電影的內容我不便多提,因為說了就令各位對此片不再有新鮮感.不過值得一提的是此片有很多內心戲,細膩地顯示出盲人對(愛)情的內心感受如為夢想努力實踐,因己身缺憾產生自卑而婉拒愛意... 總結:喜歡看<香港製造>的朋友一定不可錯過此片~

今日收到個url,又係一d整蠱mov...XDXD

今日由於時間配合,終於都可以同康爺&邪邪o黎個三人聚餐,齊齊吃飯外還可以到沙發吹水,輕鬆一番~

夜晚收到友人的郵件,內�奡ㄓ峔k女50大想對方知道的事.看畢簡直覺得是異想天開之說,各有各的期望,而且有些是很苛刻的.唉!拍拖拍成咁,何必呢?




三月十日 星期一     人生充滿遺憾?

今日一早被友人們"力邀"到觀塘飲茶,去到原來只得三人出現... 不過都係o個句,多有多玩,少有少玩.正如祐哥哥話齋,三個人飲茶,樣樣都可以平均分呢!^^ 有茶飲自自然然會談笑一番,(極度享受此等頹廢生活!真是爽壞了呢!) 談及日前遊歷的一幕,真的如友人說的,有如小說般的情節一樣.遺憾的是我們二人都沒有"進一步行動",把整個故事就此加上一點點的"省略號",如今只得在腦海中的回憶繼續這故事... 不過主角的模樣都已慢慢模糊起來 >.< 唯有希望始友人說般"有緣能相聚"~~所以今日的主要話錯就是"誰的過錯"!(是你呀,"有人"!)

今日上堂又能再次親身體會什麼是"拖時間"(即吹水).由於今天有一堂沒有presentation,本想可以早點下課,好讓我為上堂的presentation作準備,誰知我們偉大的老師竟然可以"捱"足成堂,但交的全不是與本科有關的,真萬害呢!這令我想起去年十二月下旬的流浮山一日遊的導遊哥哥的看家本領.(導遊哥哥有此工作需要的關係,才會有此本領;但我們的老師呢?他也有此需要嗎... 呵呵~)

今日下午有presentation,但係在我present的一刻,我才知道我們犯下彌天大禍-- 我們竟然答錯問題!!但時間已不能讓我作出任何補救了... 到介紹本人認為最簡單的個人網頁時,我又沒有把充份地把我網頁的特式介紹... 遺憾再次出現.最後再加上我組員的一番"安慰"(友人說:"若我們沒有犯下這兩大錯誤,那我們的presentation也是沒什麼大問題的!"),這刻感覺到原來人生是充滿遺憾的... 哈哈~苦笑中~

夜晚搵資料無意中看到有版友提及<橙路>一劇/漫畫的結局.漫畫我還沒看過,而這套動畫我已看過三遍了,但從沒有一次能完完整整看畢這故事... 所以一直都不知道結局是怎樣!這故事雖然是漫畫,但絕對是我有生以來第一次知道什麼是愛情故事!給版友這麼一提,真的很想重新欣賞這套<橙路>呢... =) (再一次.遺憾)

哈哈... 夜晚我發現了一個有趣的東西,原來我讀書返學只是副業罷了.辦公室助理才是我的正業.我竟然"被委派"去幹一些辦公室的工作如影印,列印等等... 就連我星期五休息的日子也要特地返學校幫手影印+列印!(我自己也不會花時間去做這些呢!可惡~)




三月九日 星期日     亮起警號!

話說近日我都"捱"至深夜先訓... 除了搞到精神不振外,還害得身子漸漸虛弱,就算普通出街都常感頭暈眼花... 這絕對是身體對我發出的警號!若我再繼續長此下去,我一定會好快"玩完"(X_X)所以從今天起要過返d真係"正常人o既生活",好好調理返個身體先得~

下午準備聽日presentation的powerpoint,整整o下background時,一時心癮用了我昨天所影的相落去... 可以達到"影以至用"的效果,哈哈~@_@

原來求人又真係唔易o架喎... 不過點都好,今日真係要多謝Ellen妹妹幫我搞掂埋我d功課,所以杯o野當然係我請喇~~不過妳記住妳講過重欠我好多杯雪糕喎,哈哈~~^^

忽然間又想做一樣o野,就係... (唔知大家睇唔睇到呢?=P)

_______________
l              \____     
l               ____0    
l______________/     0
                    l__0_l
                     \__/      
                      TT
	            T




三月八日 星期六     香港西區半日遊

話說今日下午補完習後,與友人一起從上環行到中環.我們不是"求其"行過就算,而是行晒成區先到第二區... 呵呵~我地一路行,一路影,玩得不亦樂乎~~~(寫到此時有友人相約,在"利誘"在下唯有即趕出去... 遲d繼續~21:44 08-03-03~)

話說今日所經過的地方十分之多,有港澳碼頭,(頓時諗起去旅行!!)上環大笪地,帝后華庭,荷里活道公園,蘭桂芳(可惜是日間到達此地~.~),St.John Cathedral ,香港動植物公園,蔗打花園&天星碼頭.其實我們去過多處到方,很多都沒大印象... 不過我相信我們最有印象的絕是"一雙年輕人"~~~hehee~~~ 敝喇,今日咁就出o左成日街,唔通真係被我個同學仔講中,我係一個好得閒o既人?!=P

連結:今日香港西區半日遊之部份相片




三月七日 星期五     考順仔?

今日一口氣訓返十個鍾,不過唔知係咪訓得太耐呢,起身時竟然有點腰痛>.<

下午陪母親大人去街,縱橫了葵芳至石硤尾等地方.途中見到好多細酒板仔(興奮~),又與媽吃了$1個的迷你砵仔糕,呵呵~而且更影了不少相... 趁住pbase重生之時,一於又再"煲爆"佢先...XDXD (今次影了不少有特色的相,希望可以在一, 兩日內上載供各位欣賞~)

順帶一提,pbase而家限制o左每個相薄只有鉉廿張的上載限額,因此小弟已經開多了多個account(好彩我有好多個e-mail acc.~~=P) 不過這樣又令我增加不少"工序",如我的相薄將會改做多個連結~~

昨晚訓唔著聽收音機,竟然聽到一首好耐都冇聽但好好聽o既歌,呢首歌曾幾何時係我經常聽o既歌o黎o架!只可惜由於我有太多鍾意o既歌,加上又不停有新歌o既出現,漸漸又忘記o左"佢".不過每一次聽返呢首歌就有一種好... 唔知點講o既感覺.總之一句講晒,不可不聽!

勇氣 作詞 作曲 主唱:張震嶽

需要一點勇氣 來對妳說對不起
他一直在妳的心中 我還愛上妳
知道這樣不行 偏偏繼續下去
怎麼會有結果 是我想太多
沒有方向看不清 在徘徊 我知道我一定 走不開
漫長的路 寂寞的夜 在心裡面 哭泣的夜

妳明白嗎 只想在妳的身邊
我沒有勇氣 沒有力氣 真的無法離妳而去
妳明白嗎 只想在妳的身邊 妳身邊 說愛妳

需要一點勇氣 來面對現在的心情
也許時間依舊 很快就忘記
知道這樣不行 偏偏繼續下去
怎麼會有結果 是我想太多
沒有方向看不清 在徘徊 我知道我一定 走不開
漫長的路 寂寞的夜 在心裡面 哭泣的夜




三月六日 星期四      ~新的開始~

話明新的開始,當然要沖喜一o下喇!第一件事係...pbase已經"重生"喇.雖然我個acc.已經爆o左,但係我已經開多一個新acc.... 即係又可以同大家分享我d相喇,呵呵~不過而家acc. limit已經大大縮細,but who cares! Since there is unlimited signin for new account!^^

原來近兩日會展都有展覽喇... 不過係珠寶展,都男人o既我就冇乜興趣喇,不過有得去會展又真係唔錯喇~ 因為我係plan 過聽日去香港區影相(esp.灣仔)... 不過又驚落雨~.~




三月五日 星期三       一切也完結!

凌晨收到一個長達35分鍾的IQ測驗,由於在下寫今天的記時已是凌晨四時了(唉~又係4am!!),所以還沒有測試測試... 希望明天有時間一做這測驗吧!

為何今天的主題是"一切也完結"呢?因為今天我終於完成了今學期我認為最難的PSA presentation,由於時間"異常充足",今天最後我們仍要努力至最後一刻(prresentation前10分鍾)才把一切準備好! 然而,時間緊迫下當然有錯,而且係一些"大錯".不過怎樣也好,正如今日的題號一樣-- 一切也完結,隨它去吧!但願我一切的煩惱也完結吧...呵呵~~

今日下午同同學仔閒談時,竟聽到有同學仔話我係"好得閒o既人".唔通係因為我去了很多不同的地方影相就係好得閒呢? 嗯... 其實,我每到一個地方都係經過詳細安排計算o既!就以柴灣公園為例,雖然我家住九龍,但我差不多每隔一天就要到柴灣"工作".因此我才為到柴灣公園影相喇... 此外,我選擇影相所以我犧牲了我其他"活動"機會如參加聚會見面... 等等.說真的,我近日可說是忙得不可開交,所以聽到這句"得閒",頓時令我有點失控呢!~.~

傍晚補習後,被學童家長詢問其女兒的進度如何... 剎那間的我對答如流,自己就恍如真的是一名教師一樣的講解.(內容是絕對保密的!) 我好歹也教了多個月,但從來也沒有這種感覺的... 這感覺挻好的,但願我能一直接教這名學童吧!(這也為了我的錢包著想=P)

夜晚同友人其進晚餐,正當點菜時,友人又以平為理由而放棄棉花冰,不過及後又猶豫了一會,使我心中都有些忐忑不安.到底我沒有改為套餐這決定是否正確呢?? 吃飽正當無聊之際,我們又做回"例行公事"-- 做運動!!從而做出今日的一個驚人紀錄.話說我與友人大玩高達DX時,竟然遇上"敵之援軍加入"(即挑機),但係最後我竟以2:0的紀錄擊退外敵.是次是我第一次玩高達時挑機的,而現在我的得勝率是100%,實在太好了.當然,沒有友人的幫助,縱有千千萬萬的我也不能勝出的...=P




三月四日 星期二        忙碌的一天

今日係我第一次留o係城大咁耐o架!由早上十一時起,一直至下午四時仍在學校打滾... 之後又趕去柴灣"賺錢".晚上七時許又返回學校繼續我未完成的presentation... 咁就整到成十一時才回家!(不過我重未吃晚飯呢~~) 難得咁夜,便一於搵埋Felix哥哥一齊食宵夜,順便聚一聚. 不過這並不代表工作就此完結,因為力求完美,(基本上都未完成~.~)我仍然要奮鬥至深夜... 希望我d黑眼圈冇大到喇~

大家有冇偏吃的習慣呢?話說我有個朋友(邪邪),佢係唔多食蔬菜類o架!(包括菌類即各種茹茹)不過可愛o既佢竟然話佢"唔食植物",呢句說話超正... 因為我地一向都唔食植物(eg.樹)o架喇,係咪...=P




三月三日 星期一         Give Me A Break!!

受夠了!我的精神崩潰了... 連日來的工作而令我等到深夜才睡,我實在抵受不了!
受夠了!我的心智崩潰了... 連日來的準備而令我已經心力交瘁,我實在抵受不了!
受夠了!我的情緒崩潰了... 連日來的煩惱而令我無法集中工作,我實在抵受不了!
受不了,受不了... Give Me A Break!! 神呀!請讓我叉叉電,回回氣才再進入戰場撕殺吧!




三月二日 星期日  

好,為了個人利益又好,為了唔想嘈住其他人都好... 從上月起我已冇加midi落去"點綴"日記喇,而以後我都唔會再咁做... 直至另行通知~~ 因為有時聽歌再加上聽midi係好煩架~.~

凌晨接納朋友的意見,決定改過d text colour,以襯我今個月o既background!為了做出最住的視覺效果俾自己及讀者,我又搜尋了一個關於調較html色彩o既網頁,希望對有個人鐮頁的各位有用喇! 順帶一提:今個月o個background係我o係屋企附近影o既相o黎o架... 影的那刻是有紅霞的!但在網頁下就不太明顯了... 希望大家也鍾意我這張相喇!

今日終於可以有機會一嚐我好耐都未食過"紅啡戔"喇~~ o個rib d味道同以前o個d一模一樣,唯一有d可惜係我又點錯了BBQ combo... T_T 下次...下次,我一定會點BBQ rib!

近兩日突然好想把心一橫去飲個通快!就算唔飲個通快,我亦想買晒我所要o既"材料",好讓我可以閒時調杯特飲來"自娛"一番~~ 好!一於就這樣決定.日內一定會一口氣地買晒我最喜愛飲料的"材料",等我可以再次豪飲!只可惜,我最好o既"酒伴"都唔o係我身邊,縱然有我最喜愛的特飲,都只能獨自欣賞~.~

    話說前排阿sir上lecture話過人要有四仔,分別為:
  • 屋仔
  • 車仔
  • 老婆仔/老公仔
  • 仔仔
聽完之前覺得幾o岩喎(當然亦都好搞笑喇~)... 不過我連一仔都冇~~~呵~!




三月一日 星期六     

為了今日的義工,夜晚搵"僵屍先生",最後都要搞到成四點先訓... 但係今日一早就起身,去了黃竹坑幫手.我同我o個組組員扮聖誕老人, 白雪公主 & 超人,同埋我地又有份整電話繩,大伙兒總算玩得融融合合... 不過話就話我係今日o既組長,不過我一直都唔覺得我有盡過咩o野責任咁(sorry~).我始終都係覺得自己係適合做後勤o個d...玩即時應變先係最正o架,呵呵~

夜晚收到朋友仔一個url,原來係一個好搞笑o既網頁.大家都快d去睇喇~~~

傍晚去了荔枝角,由起點行返旺角,途中又徘徊了長沙灣數次... 來來回回去到旺角一間連鎖餐廳食飯.待大家一起"呃完"餐飯後,我地就一路行,一路講笑... 其中以納爺o既"一擊必殺"(兩指震動)及其"法號"最為驚人~~~ 簡直令我地捧腹大笑!

凌晨再收到一個url,今次係分析各人生日的不同性格呢!我諗好奇o既你一定會睇,right?^^











         <---back 我的資料  簽個大名啦 !