SEPTEMBER2003

　　　　　　　　　　　　　　　　　　　　　　　　　　九月　SEPTEMBER

上個月聽Live Concert中有極大回響o既其中一首歌就係呢首．好聽、有感通、有意境美呀~！所以大家一定要聽一聽~^^~


<普通朋友>

曲、詞、唱：陶吉吉

等待　我隨時隨地在等待　做你感情上的依賴 
我沒有任何的疑問　這是愛 
我猜　你早就想要說明白 
我覺得自己好失敗　從天堂掉落到深淵 
多無奈　我願意改變（what can I do?） 
重新再來一遍（just give me chance） 
我無法只是普通朋友　感情已那麼深　叫我怎麼能收手 
但你說 I only want to be your friend 做個朋友 
我猜妳心中只是 just a friend 不是情人 
我感激妳對我這樣的坦白　但我給你的愛暫時收不回來 
So I 我不能只是 be your friend
I just can't be your friend no,no,no
我不能只是做你的朋友 
不能只是做普通朋友

九月卅日　星期二　　　　傾偈　

今日都算叻仔，上成日堂都冇訓過。雖然話就話叻仔，但實際上上堂留心聽書唔訓癖係應該o架嘛... 又要講到好勁咁~.~ (哈哈~傻仔~) 不過可能今日上o既第一堂係我有興趣o架堂喇，而第二就係因為有得傾偈喇... 呵呵~ 其實同人傾偈傾得耐唔耐，真係好睇我同邊個喇。衰d講句，其實真係要睇天時、地利同人和喇。當然，有時d o野有共鳴又會更加容易傾埋喇。所以，今日就用o左成個下午去傾偈... =)
話明成個下午，就當然唔止上堂o既時候咁簡單喇！落堂之後諗住趁友人路經此地，於是乎咪諗住乘機搭架順風車出旺角。點知就係為o左慳o個$2.4，最後搞到要BB女等o左我成個鍾，而最大問題係搞到鄧生炒車。實際上只係被人撞到車尾，不過真係唔好意思，都係因為我，先會搞到你出事... 好彩我聽到你冇事o咋... sorry呀~！>.<
遲o左成個鍾先會合BB女，好彩佢都醒目識得坐低等。之後又去o左朋友o既朋友開的Cafe，始終覺得o個到傾偈吹水一流，o係呢d地方自自然然就會傾偈，完全唔會有dead air o既問題！咪走o既時候睇錶先知道原來只係傾o左個幾鍾，不過感覺上就好似傾過好幾個鍾，好充實！大家都好開心^^　係喎，妳重未'窩'返我一拳添...=P
講起傾偈，最想到o既傾偈地方當然... 當然係一路摸住杯底，一路傾偈。正所謂"No wine, no truth!" 唔知幾時先可以再同一班好傾o既朋友，一齊暢所欲言咁談天說地呢~.~
下午先教完大BB仔數學，轉個頭又收到消息話佢跌親隻手...=( 希望你快d好返喇~ 唔係就去唔到你o既生日會喇~
夜晚同康爺、納爺&佑哥哥走o左出街，大家都好似被Z Gundum吸引住咁。竟連對高達熱情減退o既康爺都蠢蠢欲動，希望玩玩這個新玩意。不過夜晚始終都係一個恐怖o既時段，怎的都是擠滿了人... 最後唯有選擇挑機~ 哈哈~贏o左之後我就有機會試玩一下喇~ 都唔錯喎，用MK-II我都有成1309分喎~呵呵~ 因可惜最後因我一次提早"發動爆氣攻勢"而輸o左... sorry~>.<~

九月廿九日　星期一　　　　　

諗返噚日先覺得原來香港人真係好鬼羊群心理。話說噚日我搭車行經地鐵o既時候，見到今期Marie Clarie 有十三個型男做封面，於是乎我咪去影o下佢地o係MTR o既大海報~ 由於光線問題令我影o左好一會兒。點知我一路影o既時候，出閘o既人就以為有d乜o野好o野喇... 起初就一、兩個，之後就越o黎越多，有d直情行o係到，拉住身旁o既朋友一齊望... 查實佢地係望住張海報係望咩o野呢？之後d人一個跟一個咁望... 感覺就好似o係旺角，見有人向天望就死唔"輸蝕"咁望埋一份，基本無目標都要死跟去望... 唉~ 都唔知八乜都要去睇埋一份，咁都有o架...~.~

九月廿八日　星期日　　　　　

今日下午行經又一城見到有fashion show睇。不過由於我見到下面已經插晒人同攝影師，加上佢地拎親都係d大機，而我手上只有細機o係手，相形見拙下唯有走o左上一層影... 不過都唔係太好睇喇... 我係話d 時裝款式喇~
夜晚出街食飯去o左意粉屋。終於都有機會用o左張coupon... =) 今次都係有食pizza，唔知係咪太耐無食過pizza呢，覺得意粉屋d pizza都唔錯喇~ 佢地d pizza 邊做到鬆化得o黎又唔太硬。食得開心~
夜晚o係納爺o既苦苦相逼之下留低，睇o左佢同佑哥哥o既Z Gundum挑機。原來今輯Gundum挑機係有分數o架。而本先諗住自己狀態大勇o既佢最後竟然只得二百幾至九百幾o既分數。反之佑哥哥就保持住1500以上o既分數。今晚最高挑機分數係1708，並由佑哥哥做出~ 不過問題係以後挑機只會演變成四部Mk-II 圍毆... 無癮~.~
凌晨睇返一個旅遊特輯。今輯介紹o既係澳門，雖然主持林保怡話未去晒成個澳門，但係所介紹o既地方已經多不勝數，有充滿歐陸風情o既街道、合歐萄式o既酒店、中世紀o既古堡等等... 真係好想搵日去澳門玩喇~！(兩日一夜都好呀~)
旅遊特輯講到澳門o既觀光塔，原來全世界只得澳門o既觀光塔係俾人爬咋。原來係因為其他觀光塔已經一早鋪設o左微波接收系統。所以重未鋪設微波輸出o既澳門觀光塔，就變成唯一一個可以爬o既塔，所以若果真係去澳門，係咪要趁未鋪設微波去試下爬o下呢個高過六十層樓o既觀光塔呢？^^
見到主持林保怡爬觀光塔時講o左句說話：「當我向上爬，每爬到一個level(階段)o既時候，我就需要休息一下。當我儲夠信心同氣力能量，咁就可以向上再爬喇。」聽到佢講呢番說話o黎比喻對人生目標o既追求，就好似做人o既道理咁，覺得佢講得好o岩~

九月廿七日　星期六　　　　　

近日睇到數碼通出o左一個新廣告。吸引我o既除o左係新產品外，最重要係o個廣告入面個女仔表情，尤其係最後一個shot~ 超掂~！
source: ~Smartone HK~
今日下午出街拎書，點知見到有地方已經出o左Z Gundum喇。由於係新機菅場，場面之壯觀實在好耐都未睇過喇~ 雖然係新機，有新機體用係有新鮮感。不過對我呢個重未認識晒高達機體o既我而言，始終覺得DX 有親切感d... =) 況且要成$7~8 per credit，我實在唔想玩咁貴o既遊戲...~.~
經過一整天的整理及修改，直至凌晨四時卅分，終於完成今個月我想寫o既o野喇。文章題目為：我這刻的興趣

九月廿六日　星期五　　　　代價　

由於噚日先知道今日上tutorial要睇勁多data，於是就決定同組員分工，各睇兩份資料，希望今日可以互補不足，免受阿sir 責罵~ 不過始終我地都睇唔晒，各自只係睇得一份．不過都好彩，冇被人鬧~~ 但係冇被鬧o既代價都好大，就係我成晚都訓得唔好，噚晚已經搞到成凌晨三點先訓，而今日又要成七點起身喎．得返四個鍾頭時間訓教o既我，竟然訓訓o下醒o左，原來係我訓住自己隻手，搞到隻手痺晒... (正傻仔~.~)
正午同納爺去o左荔枝角，會合埋佑哥哥就去o左今日我發起o既征戰喇~！嘩...好恐怖喇，高達原來已跌價到得返一蚊鋪呢~ 哈哈，就係咁，我地今日用一蚊o既代價，咁就玩足成個鍾有多喇．搞到連納爺佑哥哥佢地都冇時間食飯添... ~.~ 不過我地都唔想o架，鬼叫連續10 win 咩~(好勁喔~！) 最後我只有奶香咖啡做午餐，呵呵~~LOL~~
呢排好似過得好忙咁，但實際上我只係忙d唔應該忙o既事... >.< 不過今日同組員一齊約時間先知道，原來我地之後每個禮拜都要交功課喇．而且重要開會預備測驗等等呢... 可能呢d就係呢三個星期安逸o既代價喇~ 好，以後冇得玩喇．抵~你~死~！

九月廿五日　星期四　　　　唔知...　

今日返早堂，先發覺原來大家都有準備到中文錯別字報告．雖然我噚晚最後都有去準備到，不過猶記得噚日問所有人都話唔為呢個報告而準備，反見今日所有人都有晒預備，而且一眼就睇得出唔係只用一晚去準備... 心裏不禁憶起小學時的爾虞我詐，唔計分o既都要互呃？唉~.~
見有成三個鍾頭空堂，諗住搵友人食飯喇，點知佢搵埋另一班朋友一齊食．不過都好，一路吹水一路食飯，大家都叫做有傾有講，幾好~~
唔知係咪呢期興病呢？身邊朋友都差唔多病晒(冇病到唔好打我，我唔係特登咒你地喇~=P)，就連今日要present o既同學都病o左冇出現．當然，咁就一定會對個presentation有影響喇... ~.~ 夜晚我都有d傷風同咳．哎呀，大家都係要小心身體為上喇~！遲d換季o既時候將會更加危險呢... 講返個presentation先，本來諗住呢科會好輕鬆、'求求其其'就會過關無事．點知今日一見到阿sir 連presentation o既準備功夫都要知道就勁驚，覺得佢超認真對代我地d 報告．今次真係有排煩喇~~~
唔知呢期係咪與"中途放棄"結緣呢？樣樣事情都好似會演變成呢個局面呢...T_T 就好似我搵資料咁，前排衰多口講o左句："我自己(一個人)會搞掂．" 咁就搞到自己要到圖書館狂搵昔日o既報紙．但係原來又冇咁舊o既報紙，唯有睇micro film，咁就睇到我眼仔都模埋... (加上前排影相又係要勁用單眼，睇怕我o既視力已經有一定程度上o既損害喇~.~) 由於要仔細睇足四盒36mm帶．所以當我睇到第三盒o既時候我真係覺得好辛苦，放棄o左~~；
之後諗住又o係時候寫多一遍廢話紓紓懷，點知執筆矢志寫o野o既時候，偏偏寫到一半又被因有o野做而被迫中途放棄．靈感散去，之後又無乜心情再寫喇．起初重諗住九月內要刊登添... (希望得喇~ 大家呢兩日睇o下喇~)；
下午放學後原定想為另一份功課搵資料，點知去到圖書館又搵唔到電腦用，只得返d 內聯網．本來興致勃勃、一心諗住做好論文功課o既我，最後又無功而還．皆因我選舉了... 中途放棄．到底係我無耐性，定抑或係我唔好彩呢？！

九月廿四日　星期三　　　　　

上面就係前日我所講o既MOISELLE靚相喇．睇落都唔錯呀~ 原來o係地鐵用閃燈同無閃燈係差幾遠o架．呢張係有用閃燈，腳部d色明顯唔同好多~~
今日上psycho.堂玩遊戲．講緊遊戲規則時我已經開始計劃... 最後我地好快就借到d書，雖然最後都贏得有驚無險，但忽然間覺得自己好有領導才能，而且又識得organise~呵呵~~ 咁當然，大家o既team work合作亦都係致勝因素．我就係享受呢d合作性... =)

大家睇唔睇到呀？上面呢張就係o岩o岩收到o既KFC卡喇~ 好靚好正呀~！！忽然間愛上o左呢d卡添... =P

九月廿三日　星期二　　　　　

<~~ 似唔似廣告相呀？^^
今日下午同Ian哥出旺角，途中就有友人打電話叫我搵鞋兼買鞋．跟住就展開o左掃貨行動... 話說友人說想買的波鞋將要斷市，蛄我幫手趕去買返對．點知行o左成條沒鞋街，最後先搵到一間有，'拿拿聲'買o左之後另一友人又致電叫我幫手買鞋．如是者，我今日就一口氣入o左三對鞋喇... 感覺就好似買樓買股票咁，一口氣入幾手咁．豪呀... 呵呵~

今晚幫手買鞋o既收獲係... 一鋪高達+ 雀巢咖啡Latte味，不過我始終都鍾意奶香味多d~~anywayz, thx for bringing me the coffee~!^^
今日繼續去圖書館睇micro film，終於都俾我搵到昔日維他奶出現變酸情況．不過原來報導當年事件的記者卻每日不同，亦即是我重要搜集多d資料先可以寄信... 要加油呀~！
凌晨返屋企，行經附近地鐵站o既時候，竟然被我撞到Ian哥．一日見佢兩次，佢o既反應係"邪~！" 今次真係最後一次見到佢喇，下次又要等到下年喇... Well, really thanks for supporting me~ 所以話呢，點解我鍾意身邊友人住得近我呢？就係正正因為呢個原因--可以撞到呀嘛~ 即使未必成日撞到，仍可以好方便咁約出o黎呀嘛~！係咪^^
有d問題真係要得到解決，唔係就會留o係個心到，成日纏繞住自己... 咁會搞到自己無精神理會其他事情~.~

九月廿二日　星期一　　　　　

今日落堂之後終於'的起心肝'去o左圖書館搵資料．去到先知道原來我所搵o既資料太舊... 當時網上係無記存呢~ 之後唯有去睇一種叫做micro film o既o野．其實micro film即係35mm影片．當我一手播片，另一隻手就手動調較... 感覺除o左好新穎之外，亦都好興奮．就好似以前d人睇8mm 片帶咁，好搞o野~~

快d玩玩呢個成語小測驗，睇o下大家o既中文係幾叻先~~=P
噚日搭地鐵已經見到我心目中o既設計已經有人整o左出o黎喇．雖然唔係同地鐵MOISELLE廣告一模一樣，不過我想要o既係白色十字架，而Moiselle今輯o既廣告係鑽石(定係鐵~唔記得o左~)十字架．睇睇o下若然真係搵唔到白色十字架，亦都可以搵鐵十字架用完先，我諗用DC影出o黎o既效果應該都ok喇... 不過最好都係被我搵到個白色十字架，再襯多一套黑色one piece (evening) dress 或 tube top，咁就真係掂喇~！
(PS:今次MOISELLE d相幾好喇，有機會影返張相opst上o黎先~^^~)
近似我想要o既十字架款式：

from Guess

九月廿一日　星期日　　　　原來...　

今日同康爺膽粗粗走去挑機．(有史以o黎第一次) 雖然係失敗收場，不過我今次玩得好叻喇，冇死過o架~~ 而且重剋制到對手呢~ 唔知點解今日好有呢個'挑機慾'，如果納爺o係到就好喇~~ 我信我今日會贏o架嘛... 點知原來會係輸得咁唔抵~
下午為o左等人唯有到處溜連，加上今日又落雨，唯有留o係機鋪到．入到"彩龍"見到Ez2Dj platinum，真係估唔到原來Ez2Dj已經無聲無色咁出到5th Mix喇．玩返隻Confete(Jazz)真係好開心~ 可能係full combo o既關係喇~呵呵~ Eric，如果你重記得呢首係乜東東，你一返o黎我地就去玩喇~^^~
原來我都有"肴底"o既時候．呢句唔係乜乜狂妄o既說話，其實"肴底"可能會成日發生o係我身上，不過今日o既性質絕對唔同．我終於明白到何謂"壓力"喇...換句話講，又晒o左一日喇... >.< (可能係頭先打機o既時候太過aggressive喇，所以用晒d膽量最後變成隻膽小鬼呢~...T_T)

大家覺得上面張相點喇？係小弟我攝於今晚用膳o既地方喇．由於我被派遣到茶樓搵位先，所以就有時間影相．本來我只係想影一隻斟o左茶同無斟o野o既杯，o黎一張淺景深對比．點知返到屋企睇相o既時候，俾我聯想到用呢張淺景深相去比喻想"一大班人一齊"定係"獨自一人"呢？？雖然只係一時興起，不過呢個絕對係一個影響將來o既長遠問題呢... [其實張相唔係影得好好，若果可以影到對面有多d人咁就正喇...=)]
原來呢期身邊有好多人都唔舒服或病o左喇~.~ 遲d冬天o黎o既時候，大家要更加小心喇，尤其流感！

九月廿日　星期六　　　　　

下午同BB女去髮型屋，點知今日竟然有好多人，要等好耐．不過我地就趁住呢段時間一路睇雜誌一路傾偈．不停咁o係到細聲講大聱笑，完全冇理到o個到係一間髮型屋，只當o個到係一間Cafe．第一次o係髮型屋傾偈傾得咁開心 ~真係搞o野~ 臨走前忽然有一個念頭，如果可以用髮型屋去做studio影相都唔錯喎，大家點睇喇？^^
人就係咁"賤格"o架喇~ 當你想知一樣o野o既時候，我就偏唔講你知．相反，當你唔想知或對某事不感興趣時，我又偏偏走o黎話你知．我當然都係"賤格"o既人喇(而且可能重係超賤添~~)，其實我自己唔太鍾意將所有o野都講得太白．當然，我都會慢慢講d講d咁講出o黎，有時用o下個腦去諗o下都好喇~！況且我覺得估估o下呢個心情實在太好玩喇~
~~~~~呵呵~~~~~ 總之就多謝各位呢兩日o既"關心"喇~
夜晚因活動臨時改變，搞到有d悶局出現．加上又要等齊人先食飯，大家都等到有d灰... 點知就o係最後關頭，最後一位友人終於出現喇，只不過佢係帶住傷出現喇．何以受傷？只因從地圖上搵唔到我地所在之處，一時之氣打爛o左地鐵個水牌．(點解要咁激動呢？~驚驚~) 話說回頭，友人及後講返破壞實況．當時摧毀水牌的一剎那，有好多人都嚇親同睇到實喇．最後我地一行人走返去個'案發現場'，依然重見到個毀壞行跡．若然聽日有機會經過，我睇o下可唔可以影相俾大家睇喇... 呵呵~~

九月十九日　星期五　　　　與　　競賽

與體力競賽．今日終於去o左我好耐都冇去過o既地方-- 石硤尾公園．足足有超過十年冇再踏足呢個地方喇．記得細細過，屋企人成日都帶我去呢個地方玩，由於地方大，以前曾經係一般市民假日周末必到o既地方．及後因為新商場出現，加上公園o既位置又較荒蕪，所以已經變得人煙稀少了．今日去呢個地方其實係為o左影相，因為近期受Felix哥哥o既薰陶影響之下，勁想試下影人(model) o既滋味．於是就搵o左友人去做模特兒，o黎一輯靚靚o既相．順便將我多年研究o既有關"藝術知識"一次過用晒去，睇o下出o黎o既效果好唔好... =) 不過講真，要o係酷熱o既天氣下，拎住一大袋o野實在好辛苦，加上又要走o黎走去同又上又落，加上左手成日拎住d重o野，事後重有d麻痺feel... 真係有d想死~.~ 唯有希望今次影得更好喇，唔好晒o左我一番心血．不過已經有一個遺憾喇，我今日全影人，只係影o左兩張景，白白晒o左一個好靚o既影景機會．

兩日影相之小統計：模特兒：一個使用服飾：四套 (有一套勁鍾意*o*) 所影相片：約380張(即相約11筒36張杷片的菲林)，用o左成690MB~！超靚的相片：暫時發現有近10張的"沙龍照"~^o^~ 合格的相片：約一半/接近一半 Out-Focus的相片：約廿張，因為機主lock死了中間focus，但因為我想人像o既頭同張相o既相頂相差成一半，所以搞成咁...~.~ 爆光的相片：約十五張，有一輯個角度係由下面斜影向天，可能係太光o既關係而令到d相衰o左．

與時間競賽！其實今日有d拼命，明知今日係交功課o既deadline，不過我一直"捱"到三點先開工，慌死兩個鍾頭內先做得晒咁~.~ 實際上我本來重癲喇，預四點先開始做喇，完全唔理(計算)學校公(共)用o既printer 電腦等等工具係輪流用呢回事．不過話說回頭，真正版本只係我一早已經做完，今日返學校只係要打返落電腦，之後print埋就交得喇... =) 所以最後四點都唔夠我已經走o左... ^^
與感覺競賽．就單憑一句：「我而家好想見到你呀嘛．」　令剛抑壓了的心再次泛起漣漪．
與精神競賽？今日可能一早去o左影相．重要係正午前後一個鍾，足足成三個鍾暴曬於陽光下．返到CityU 已經冇晒胃口．起初以為呢個哄係短暫現象喇，點知後來到o左下午陪康爺食tea o既時候亦都係．夜晚想小睡一陣又訓唔到... 搞到身體極有問題咁．不過又唔係發燒有病喎，最驚就係呢d 明知自己唔舒服，但又講唔出邊到唔舒服o既情況... >.< 本來聽日重想去游水喇，不過慶幸佐治因功課繁忙而取消喇，希望聽日會好返喇...
講返噚日o既風水先．由於風水學上，水係克(剋)火喇．所以阿sir就講因為皇帝係姓朱，即係屬火，所以當代官服係紅色喇．但明朝被闖王李先成攻破，實際上與色相關．因為闖王手下是以藍字為服飾，而藍色代表水性一說淺易明白．但為什麼清朝才是最後統治者呢？阿sir解釋謂原來黑色先係火性o既真正顏色，藍色只係水性o既偏色，而唔係正宗．
同樣地，城大其中一個面向獅子山的出口為何擺放一對"四不像"呢？其實這並不是什麼"四不像"，而是一對麒麟．用的目的是為了化解從獅子山衝過來的殺氣．只可惜已被破了...~.~
夜晚因為要還o野俾Felix哥哥，所以又要出街喇．今次去佢到除o左學多少少影相o既知識外，重學到人生一大課題喇~！勁呀~~ 多謝Felix哥哥o既鼓勵同信任 ~~

九月十八日　星期四　　　　掂呀~有驚無險~

今日上中文堂，感覺就好似上o左堂風水堂咁．阿sir由明代(紅初)衰落至闖王(藍衫)，及後至清朝(深衫)入關... 今日因為趕時間，所以冇心機寫... 聽日再寫返~
由於阿sir前排話要開始'約見'佢傾project presentation，所以就約o左今日見喇．不過問題係我地由約佢到成功接見我地呢兩日內，我地成組人都冇乜準備過... 實在有點兒過份~！今日唯有臨見之前，趁有空堂快快睇一睇d資料喇．得喎，咁又冇被阿sir鬧喇... 而且阿sir重幫我地研究點做，同之前聽到被人鬧o既版本完全係兩回事．真係有驚無險~.~
今日終於帶o左"小白"返去，第一次拎d 咁o既o野返去我都有d驚，因為始終都唔係我，所以我都顯得有d顧忌同小心翼翼... 幸好都未事~~^^~~
原來要做好一件事，人與人之間o既協調合作同默契係好重要喇，否則就會事倍功半o架喇~ 不過當合作得越耐，有了默契就會慢慢就互相配合，咁就會有d "好東西"出現o架喇~！今日已經有收獲喇~~~呵．呵~~~

九月十七日　星期三　　　　

今日係開學之後首個presentation．由於之前都做叫"信心爆膨"，所以都諗住一般水準就會有好好o既效果．點知噚晚就開始出事喇... 半夜無喇喇醒o左，之後就斷斷續續咁訓，搞到訓得唔好，唔太夠精神．返到去又有d 傷風咁喎... 唉~ 不過最後個present都總算係平平穩穩咁過o左... ~.~
從今日上o既堂先知道原來我都算做幾幸福喇！今日聽日講返人地o既經歷，先知道我過o既生活都唔係好崎嶇．可能係我自己見得開，冇將d特別唔開心o既o野(或小事)放o既心到喇... 所以覺得原來其他人o既日常生活中有更加恐怖o既事情發生．
好唔掂呀~！原來每逢星期三我都捱唔住... >.< 我所指o既捱唔住係一來要連續上五個鍾頭堂，最慘係頭三個鍾我係有興趣，集中精力上完之後再聽悶悶地o既堂，就會好容易打瞌睡...=P 不過其實我真正所指o既"捱唔到"係指捱餓．因為多數都要一早返去，所以我十一點前就食o野，之後就要一直捱到夜晚返到屋企先有得食...(通常都要成20:00喇~) 我真係捱唔到咁長時候冇o野食．你話有其他o野分散我o既注意/意志都好呀，不過事實上係冇喎~.~ 今日就係因為咁我四出搵我d City frds，點知個個都唔o係campus... 真係激死我~！最後好彩有Kennix幫我一把，咁先有份三文治食咋~ 謝呀~^^~ 聽怕以後逢星期三都要帶定d 食物先得喇~
開心~！夜晚好開心... 因為... SHHhuuuuu~！唔講得住~ 過兩日先再話俾大家知喇... =)
不過事實上開心之前我亦都唔開心... 因為... "粒粒"問題<~@_@~>

九月十六日　星期二　　　　

今日返屋企o既時候，o係九龍塘到見到有人賣紙，今次重賣成$25都有大把人搶購．比起上次CityU o既$20足足貴o左成25%呀！！點解，點解呀... 唔通d人係唔知道d紙係有更平o既價o架咩？唔通information cost真係好高？？早知係咁我都賣埋一份喇... 咁都有排我賺喇~~
下午多得邪邪幫我地搵定位，唔係我地今日真係唔洗旨意食到飯喇...thz~ =) 不過講起食飯，今年好快就已經搵到一班一齊食飯o既朋友喇~~呵~~
今日上堂又熱又悶，見到友人有部MP3機，即刻拎o左o黎聽... 又覺得MP3機細得o黎又幾好喎，雖然對佢o既音質重係有d保留．加上前排陪康爺買o左部平價機，搞到我開始對堅決唔買MP3機呢個決定有d動搖．點好呢？~.~
下午因細路女唔得閒，搞到我又打亂o左我o既如意算盤喇．返屋企之後大BB首次打o黎問我功課，對於打電話問功課真係有d猶豫，始終對於聆聽獲取'極高評級'o既我真係有d障礙．加上大BB又講得唔太清楚，搞到我幫佢都幫得有d困難，幸好最後都順利幫佢解決晒所有問題~~ 當大BB打最後一個電話o黎o既時候，細BB又o岩o岩返o左o黎．細BB問我幾時去探佢... 見到佢咁天真瀾漫兼可愛，又真係好難拒絕喇．只可惜我今個學期真係好忙，未能即時抽空去搵佢．最後應承o左下個月去探佢，唔知到時要買咩o野禮物俾佢大佬賀佢生日呢... 大家有冇好提議喇？？

拍攝人像時所擺的姿勢

九月十五日　星期一　　　　

呢幾日成日都有發夢，發夢唔係指平日發白日夢o個隻(雖則我都有發白日夢~~=P)，而係指夜晚發夢．係... 夜夢發夢係正常喇．只不過今次我講o既發夢太過真切實在喇~！記得以前亦都有一段時間係有呢個情況．雖然明知道發夢o既情節永遠都唔會成真，不過就有好強烈o既真實感．因為大部份o既記憶都好深刻，幾乎全無模糊景象．加上夢中出現o既人物都係我所重視o既人，所以好有震撼感．有時真係唔知"到底我係發夢定係醒o左呢？" 更加恐怖o既究竟我係醒來生活只係生活於另一夢中，定係根本我就冇醒過，全部都係發夢中，只有凌晨訓o左做夢後先活現、見到及做返"真正o既我"呢？~.~
噚晚睇完有關港府邀請外國歌星o既報導就諗住即刻上學科討論區到留言．不過後尾諗住搵(睇)埋英文報紙，等搵多d資料先留言．點知今日上堂o既時候阿sir又提及呢件事，搞到我而家(事後)先post 呢個討論上網就好似跟佢尾咁... 唉~ 不過最可惜係到而家o既我都重未睇(搵)有關o既報導...=P
夜晚觀看<新聞透視>看到上年度英文會考獲取A、B及C級的學生，試做回四十年前的公開考試卷，再由楊鐵樑義務批閱．經楊批閱後認為"一蟹不如一蟹"．這是無可厚非的事實，但從電視上有些例子是幫不過的，如有遍作文竟出現廿多次同一個字眼，就連一句句子亦出現成四次這個字眼之多呢！最諷刺是最後旁白說："其實近年摘A的會考生，有近一半考生的作文亦是看不明白的．基本上大家只要把文章寫得明白，你/妳亦有機會成為A級的一份子呢！"
一直逃避拎筆寫o野o既我，噚晚終於避無可避，因為我要交中文作文．數數手指，已經成兩年多冇作過一遍文喇！諗返都有d恐怖~ 不過我都總算選擇o岩時候做呢份功課，若果我揀一早或下午做呢份功課，一定只會白白咁浪費時間．反之寧靜o既凌晨可以充份給予我時間與空間，既沒有人也沒多餘的聲音(更加無嘈雜o既電視聲)，所以起稿都特別有心機．
講返起d功課，總覺得今年將會係最辛苦、最多o野做o野一個semester．d功課好似洪水猛獸咁湧埋o黎，簡直接都接唔住咁滯... 而家都重叫做勉強接住，真係唔知遲d有日擋唔切會點...

九月十四日　星期日　　　　

今日經過西九龍中心，見到有臺灣旅遊宣傳活動，見到有臺灣敲擊表現，好好睇、亦都好有節奏感，而且又有一批臺灣小食攤檔俾人試食．心諗臺灣有如此的宣傳；地下鐵列車又有宣傳新加坡的廣告，唔知其他國家地方又究竟有冇香港o既宣傳刊物呢？香港政府又有冇好似新加坡同臺灣咁，o係其他國家搞宣傳，宣傳香港呢？？何以忽然我有感而發呢... 因為噚晚睇電視廣告話新一輯o既宣傳香港旅遊廣告將於聽晚21:45 o係無記播出，我諗緊政府唔會咁'聰明'，將宣傳香港o既廣告淨係放o係香港到播，而唔o係其他地方國家播...~.~
我自己一向鍾意穿梭於光與暗、黑與白、正與邪之間，所以自己一向都享受去唔同o既地方，既可見識高尚名貴o既地方；亦鍾意出入龍蛇雲集(正確o既係'龍蛇混雜')o既地區．話說星期四因要幫屋企人買返隻老鼠o既關係，於是到深水'土步'走o左一趟，點知同友人去就出事喇．當友人獨個兒玩緊o既時候，竟有人明拎佢部手提電話，之後重話佢得罪乜乜大佬o既女朋友，硬留住我朋友話要等認人... 搞o左一陣，那人拎住我友人o既電話話而家要出去接佢大佬個女朋友o黎認人，叫我友人o係到等佢... 友人見勢色不對，立即搶返部電話．點知那人又反說返友人，叩友人將手提留予他，好讓他出去接大佬個女朋友返o黎．友人識破他原只是呃手提電話o既小嘍囉，即時o黎返個反客為主，要求跟他接他大佬o既女友，o黎個當面對質．其後友人又嚷著還他一個公道．當然，嘍囉知道事敗便叫友人離去... 哈哈~呢個真係一個緊張刺激o既體驗，不過真係差d嚇破膽喇~
呢幾日真係有口福，既可品嚐蠔仔粥，又可以食到老媽親手整o既酸辣炒聖子，今晚又食到好多美食~~ 開心~~
諗起噚日有一件怪事．噚日係我同業仔去買DC，而我亦帶o左DC出街喎．不過明知噚日係我地短期內最後一次見面，我地都無意欲去合照喎．兩部DC都冇人提出去影相(就連腳架都齊o架喎~)，真係搞o野~~ 可能係好快又將會見面先至會有呢個情況喇... ^^
PS:業仔，多謝你張保護貼喇~ 以後我再唔驚個CCD有手指模喇~
今日睇報紙知道十月十八日Craiq David將會o黎港獻唱．開心~~ 不過要去睇live o既代價好似高得恐怖... 若果遲d有得播咁就好喇~~ 希望都有喇~~

九月十三日　星期六　　　　

今日帶o左個讀CityU但又唔係CityU o既人入o黎print o野，好搞o野~
今日又同業仔買DC，已經俾BB女問點解成日都可以有人買DC喇？心諗如果我開DC鋪咪好喇... 呵呵~j/k~ 今日買DC先知道原來CANON IXUS系個manual mode原來先等於我地平時o既auto，只係可以較ISO同EV，完全無Pv或者Av功能．可惜~可惜~
夜晚睇到林志鉉(唔知係咪即係'休客李林'o既'林'呢？)、庾澄慶及伍思凱一齊合唱BeeGees d歌，好勁！亦都好正... 就算之前佢地各自各唱返自己o既舊歌都超正，就連訓著o左o既我都被佢地o既歌整醒，聽完先再訓~
凌晨應約出去宵夜，雖然最後我冇食到．不過我又學o左o野，上o左堂... 最重要係借到機，咁我下個禮拜就可以影得更有信心喇~ 臨走o既時候突然落o左場驟雨，唔好彩... 不過我最擔心o既反而係d攝影器材，點知原來專用袋係有佢o既好處喇~抵個袋賣得貴d~
緊張，緊張~~ 近日為o左影相成日諗緊衣服以至飾物上o既配搭，又不停咁留意姿勢、姿態及角度，為求可以俾我影到一輯靚靚o既相．點知今晚又突然落o左場驟雨，開始驚緊若果下星期影相o個日都落雨點算呢？若果整濕我部DC都已經好慘，若然整濕o左人地o既就敝喇... 到時都唔知點賠~天呀，下星期千其唔好落雨喇~~~~
開心，我一直期待o既樓盤終於開售喇~ 雖然而家只開售頂層單位，不過要入去參觀呢個空中巨無霸都有條件喇，好似要成300萬'入場卷'先可以去睇．縱使好...好想睇都冇法，唯有等第日睇返d中高層喇~~

九月十二日　星期五　　　　

下午去阿魚屋企幫手整DC o既USB連接埠，點知無功而還．唯一好處就係見到阿魚佢一個人有間房，而且重可以擺一張雙人床，有張書桌同埋電視機．簡直係我想要o既"dream room"喇~(如果裝埋7.1喇叭就重正~ 5.1都好呀...=P) 臨走前玩o左PS2一隻一直好想試玩而未玩過o既舊game--三國無雙2．好好玩，終於明白點解有咁多人都玩呢隻game喇... 太好玩、過癮~~ 加上易玩，就算今次係我第一次玩，玩o黎玩去都玩唔死就知唔難... 加上三國呢個咁吸引人o既歷史背景，掂呀~！
夜晚同業仔出街，見到佢要飲椰子汁．本來都唔係一件大事，不過佢又堅持要搵賣$8 o既椰汁先飲喎．咁就令我諗起一個人-- PY．記得三年前你返o黎亦都係話要飲一樣特別o既o野喇... (重記唔記得喇？？) 哈哈~ 唔知係咪去完美國o既人都會係咁呢... =P
行完旺角無o野做，唯有去"超群"玩，太多人走去隔離"天天"，先發現原來高達已經減到$2鋪喇... 正~！可惜唔到我玩．之後去o左橋底"德樂"，同B嗲第一次玩，打陸地三連星o既時候(即三隻大魔o個關)估唔到竟然要我呢部細機去屈機喇... ~.~ 不過最後都係去到第十一關就死o係魔霸o既砲到...

九月十一日　星期四　　　　想．唔想

大獲，分組又出現問題！事緣今日上中文堂o既時候，老師突然話由於上呢班o既人太少，於是就要拆散晒d人，要分散d．就係咁我就被編o左同一個唔識o既人一組喇．而家只知道個名，乜o野樣都唔記得．呢個都冇所謂，因為我都只係當做新嘗試喇... 問題係我驚萬一那位'新組員'原來係退o左學o既話，咁我就敝喇．我將要同我唔鍾意o既人一組喇．天呀，千其唔好玩到咁大呀... 唔係我今年GPA唔洗升喇~>.<~"
本來一個禮拜之前已經問友人今晚d節目如何，點知眾人一直遲遲仍沒有決定．點知今晚出o黎o既節目除o左打機之外，就係'百萬行'--由觀塘行到淘大搵重未收o既機鋪．知道成個觀塘區o既機鋪都收晒之後，我地就決定搵o野食．原來我地只係諗住只係食碗麵醫肚，點知最後竟然娛成打冷．不過有一樣o野好怪，就係食唔到蠔餅，反而有蠔仔粥食？！點都好，又要再一次多謝我地o既善長人翁楷哥哥喇~^o^~ 食完宵夜已經成三點幾，之後就決定返歸喇．咁就不經不覺咁通o左半晚夜喇...
回程o既時候已經係接近凌晨四點，不過地鐵車箱每一卡每一座都有一，單以人數o黎睇完全唔似凌晨時份．不過若果睇埋各人o既臉容，就會知道盡興而歸，滿面倦容，大多數人都利用搭車呢段時間養神、叉電．反觀自己重係精神奕奕，連我自己都唔知點解... 可能我真係到o左夜晚會精神d喇，漸漸融入黑暗中~呵呵~
不過話說返轉頭，為o左想玩得盡興d，就要搞到個個都o係地鐵到訓，咁又何苦呢？若果玩到咁夜而又要一個人返屋企，咁咪好危險o羅？所以我一向都唔會俾自己玩(去)到盡，留有少少保留好d~

晚上打電話俾友人："XXX，中秋節快樂呀！" 友人："係呀，中秋節快樂呀~ 你而家o係邊喇？" 我："我？我而家去緊妳屋企喇．" 友人："係... 不過我唔係o係屋企喎．" 我："咁妳o係邊喇？" 友人："我而家o係九龍塘o羅．" 我："係？我都係o係九龍塘喎．" 我："妳o係邊到喇？" 友人："我而家o係地鐵站喇．" 我："我都係，不過而家去緊樂富喇..." 友人："係呀... 咁我諗我同你係o係同一班車到喇~"(興奮地~) 我："妳o係車卡邊到喇？車頭？定車尾喇？？" 友人："我o係車尾．" 我："我o係車頭喇．要唔要見呀...?" ．．．
以上就係我同友人由同車至最後見面o既對話，情況完全同戲劇中o既情節一模一樣．感覺極搞o野~~ 可能佢唔係我想遇到o既人．如果可以同一時間(其實時間唔太重要)、同一地點、同一情節，不過人物係我想遇到o既人就好喇... 咁就好完美喇~~呵~~ 不過應該冇可能．因為事實往往唔會俾你想o既o野實現到喇．~.~

九月十日　星期三　　　　

今日落堂後被先生讚，哈哈~~ 勁呀~~ 只要我今次presentation 搞得好好睇睇~ 咁我就好有信心呢科會有一靚grade o架喇~~^o^~~
六點幾放學終於都忍唔住再冇notes上堂，一於拎晒所有紙去CSC print o野．真係唔去唔去，原來六點後情況真係好好多，而且重有雙面printer用，唔洗o下o下手動咁麻煩... 不過print o野o既時候亦發現今年有科好恐怖，份份lecture notes都成20頁咁多，真係慌讀唔死人咁，都唔知到時讀唔讀得切喇... ~.~

九月九日　星期二　　　　~組合落實~

今日終於組成最後一科tutorial o既小組．今個semester所組成o既組合都好新鮮~~ 大部份都係新組合，而且亦都有d意想不到．不過我就係鍾意呢d新嘗試，希望呢d 訣嘗試會帶出刺激o既火花喇~~呵~！
話說今日落實最後一組o既時候，由於又撞上大家都選擇同一題presentation題目，大家又要以'包剪搥'決定勝負．誰知我地要玩(猜)到第五鋪次決到勝負，得意o既係大家竟然連續(頭)四鋪都係出埋同一樣o野~~ 太勁喇~~ 不過，我最後都贏得好險，因為我自問自己都係出剪喇，(情況係出o左半隻食指)之後我o係神推鬼撞o既情況下就出o左另一樣o野，之後就贏o左，贏完之後都猶有餘悸...=P
放學後，將前日影到o既MACRO石頭(珊瑚？！)送了友人．友人看後即說："咦... 好核突呀！前晚睇相o既時候好靚o架......" 其實咪即係我攝影技術勁o羅~！可以將唔靚o既o野影成靚靚的...=P 講返先，其實呢件事正正反映出有d事其實外表有多好，實際上內裏是另一回事．反之亦然．所以呢，縱然第一個印象係好重要，不過凡事都唔好一看到便立即下定論，這樣未必令自己有好處呢．
夜晚一大家族提早到銅鑼灣食飯做節，點知被我見到一個好似林曉峰o既人(後來先知係真係佢)．之後重見到EO2、Tiffany、志偉、阿叻、黃百嗚、盧巧音、陳小春等人．後尾先知原來係為新戲<大丈夫>首影做宣傳．可惜冇帶相機，唔係一定會影到新鮮靚相同post上o黎，而且重可以練o下影明星添 ~.~
今晚食o左幾款好菜，一係蒜溶粉絲蒸大元貝，超大粒元貝，好好味~！第二樣係龍蝦，其實呢個都唔知好味定係唔好味．只知道我已有好多年冇食呢個龍蝦喇，附久重食o既滋味實在令人興奮~~^^~~
夜晚返屋企竟然被我撞到今日o岩o岩先上完堂o既張楚勇教師．其實都唔係撞到喇，因為如果真係撞到我就已經訓緊醫院喇...=P 我'撞'到佢o既時候係o係一彌敦道街口，佢正坐o係朋友o架車入面傾緊電話．只不過係我見到佢側面認得係佢，一個點頭招乎就交代晒大家耍講o既o野喇~快~
今日BB女生日，冇送禮物俾妳，唯有o係到同妳講句："生日快樂！"喇~^^~
不過其實妳都唔洗收其他禮物喇~ 妳已經收到一份最好o既禮物，而且重係好似愛情小說中o既橋段方式咁收到添．真係?死、羨慕死人喇~~~~~hehee~~~~~

九月八日　星期一　　　　

今日返學見到自己'平時'上堂o既陣型喇，哈哈~~ 起初重以為由於大家分o左唔同科而分散各地，不過原來大家都係o係一切喇~~^^~~
放學因技術問題而令行動告吹，麻煩了一眾友人．罪過罪過~~
下午同業仔行街，一句說話竟然令我誤解o左~哈哈~~ 原來係去睇DC，我當然冇所謂喇... 睇DC o既同時見到CANON 300D正式接受預訂喇．不過如果我有咁多錢都寧願儲起去先喇... 始終都唔係時候，我暫時都係屬於睇o既一群o架喇 ~.~

遊歷學會'策劃人'遍--半月灣之旅

九月七日　星期日　　　　遊歷學會之'策劃人'遍

本來噚晚因出唔成街，心諗今日都係留o係屋企渡過o架喇... 點知今日正午友人打o黎，話去半月灣．如果話去睇戲唱K o個d我就一定唔去o架喇．不過去半月灣游水，正正開正我想要o既o野，咁就當然"衝呀~！"
以前去到西貢碼頭只會見到有人兜搭賣船飛，不過從未試過搭呢d船，不過今日有機會喇...=) 由於今日天氣都唔係太好，我都係憑住有得游水呢鼓意志先陪友人"搏命"喇~ 不過入到去天色竟然係藍天白雲喇，簡直不可思議呢~！^^ 後尾因天氣反覆兼且尾班船就開，於是唯有回程．不過總括o黎講，今日又叫做了o左一個小心願，又遊歷多一個島嶼~呵呵~ 唯一唔好就係落水o既時候竟然係有大石塊，整親隻腳指公... =(
晚上介紹納爺去友人朋友的Cafe食o野，大家都有以下評語．味道質數唔錯，只不過對男孩子的我們來說，份量還差了點點~~
今日心情靚靚，除o左可以去半月灣游水，一次過嘗到遊歷同游水之外．今日心情靚靚o既另一原因就係因為業仔返o左o黎香港．都係呢句："有朋自遠方來，不亦樂乎！" 唔洗多講，盡在不言中~

九月六日　星期六　　　　

噚晚又要幫朋友臨時去燒碟，搞到今日一早起身勁辛苦．再加上噚晚打波打到最後o既時候有抽筋o既跡象~~ 今日游水都游得好避忌，勁驚抽筋... 好彩最後都冇事~~
返到行宮發現o左一樣好興奮o既o野-- 就係我發現有"冰"．放心，唔係毒品~！只係普普通通o既冰塊．因為上次有Baileys冇冰而錯過o左一個享受機會，所以今日知道有冰真係開心到死... 呵呵~ 今日發玩o左樣o野，原來一pack Baileys 加三粒(大正方)冰一齊飲，一路飲一路等佢溶冰，最後等到d冰差唔多溶晒o既時候，味道根本就好似飲緊三花淡奶咁，丁點兒酒味都冇，好得意~~~^o^~~~
黃昏出街會納爺同趙大爺．今次又呃到機打喇，哈~ 之後拍納爺第一次打自護號路線就順利爆機喇~~YEAH~~~ 勁呀，今日第一次就打爆~ 由於成日都落雨o既關係，搞掂一切鎖碎事就即刻返o左屋企喇．

新MARCO之錄音帶~

九月五日　星期五　　　　

今日返學叫做有d突破，突破係指識人方面．今日因組隊問題被我有機會識多好多人... 至少再唔會令我諗住我只可依靠或跟住某一班同學~
本來諗住下午去游水，夜晚去打波喇．不過返到屋企因為實在太tired喇，加上友人又唔得閒．心諗就算唔游水，夜晚重可以去打波，於是就利用下午去養精蓄銳--訓教~ 臨訓前見到落雨，諗住今日都係留o係屋企o架喇... 點知最後竟然係去花虛打波，不過個場好濕，有幾次差d撻低落地呢... ~^^~
返o左學成一個禮拜，我知道自己好心散喇... 可能個暑假過得太悠閒喇，呢幾日返學變得有點力不從心．雖則暑假游水都係一早九點鍾，不過平時我游完水可以去休息，甚至係去訓教．不過而家返學係要繼續上堂喇．咁就令我唔可以長時間集中同認真喇... >.< 要盡快培養返上堂o既心態喇~

九月四日　星期四　　　　

今日總於都賣o左本書出去喇~ 幸好最後都賣到一個正常o既價~
一早上中文堂又話要買書，心諗買書只會用得半個學期，買真係唔抵... 於是又係用腦o既時候喇．所以話呢，識得一多始終都係一件好事喇~ 話咁快我就班到一本書喇... 呵呵~ 慳返幾十蚊喇~^^
夜晚o既我有d狂妄，竟然約晒星期五六日呢三日做d乜o野，玩d乜o野~ 真係心散~ 不過其實我今日都已經好勤力o架喇~ 做o左兩樣o野，連tutor都話唔洗咁早做preparation喇~呵呵~ 做功課o既時候發現原來香港d報紙雜誌真係有好多諧音字喇... 唔知我會唔會搵返我睇過o既錯別字呢...=P
本來我已經盡量抑制自己，叫自己唔好再睇戲．不過今日同阿魚行又一城，大家入到CD 鋪又勁講，挑起我o既睇戲慾... 而家又想睇返我一直想睇o既戲喇... 希望可以睇到喇~ 唔該阿魚~不過咁睇法，GPA 想勁升都難喇... >.<"

九月三日　星期三　　　　

唔知係咪訓得多得滯呢，今日o既我竟然係好眼訓．除o左下午第一堂上o左三個鍾頭係好精神外，其餘d時間我都好似元神出竅咁... 耳係聽住課，手係拎住筆，眼卻是蓋著睡．上完堂返到屋企又即刻倒頭大睡，直至夜晚食飯先起身... 好彩食完o野先叫做冇咁眼訓，加上要上網整o野先勉強精神d~~ 真係犯賤喇我，訓得多就會訓唔醒，真係唔可以訓咁多呢...=P

九月二日　星期二　　　　

今日一早起身就趕返學校print o野，搞o左一大個鍾後就即刻趕去上堂．點知一上堂就... 昏迷不醒~！>.< 雖則我聽到lecturer講d乜，不過呢d半睡式聽書好辛苦，令我第一時間諗起納爺... o既咖啡~^^~
上o左兩個鍾頭堂後，咪諗住趁呢個鍾頭去食個飯，令自己清醒d，好等一陣上堂唔會再昏迷．點知呢個時候又偏偏傳出消息話將會縣掛八號風球，搞到冇得上堂．由於冇堂上，所有同學仔都即時鬆人，不過我呢份人又偏偏做埋d唔正常o既o野...=P o係康爺o既引誘下，我竟然走往回家的相反路線，直去東九龍．由於正式八號風號o既關係，亦即變相所有人有多一日假期(實際上係半日)．於是乎我地又有'聚會'喇... 哈哈~ 睇納爺以一敵二的精彩完結真係令人嘆為觀止~呢d誘敵自殺o既場面簡直可遇不可求呢~！XDXD
八號風球兼且冇帶蔗出街，重走到咁遠... 其實就真係有d癲~！不過基本上雨勢都唔係太大，而風亦都唔係特別強，而o係風雨交加(及冇蔗)o既情況下我依然可以全身而還(回家)呢(@~.~@) 間唔中?下雨都係一件好事喇~~ 至少可以令我清醒d~呵~
今日返學見返好多同學，發覺好多人都變o左... 我係指外觀喇~~ 不過我都有變o左喇~^.*

九月一日　星期一　　　　　

開學喇~ 一早就走返學校print notes．就係因為我去o左OA，我就feel到我係一個yr 2 o既學生喇~ 點解，好簡單，因為今日有太多人唔知點，實在見到有太多張猶豫不決o既面孔喇... 之後又有人問我應該點做點做．哈哈，大個仔呢~！唔係，見到班yr.1咁有幹勁，相反自己又... 哈哈~應該係話："老矣~！"先係...=P
今日開學，去canteen食o野有呢個免費贈飲，再加上我一些廢物利用的包裝，借花敬佛咁送晒俾康爺做生日禮物喇．諗起送禮物，其實我一直都唔興o架，既然我最好o既朋友都唔會送，我一向只會同佢地食餐飯就算~ 今次只係有feel先送，係精挑細選喇！重足足要我買o左成四日先買到呢... =)

噚晚無聊又練影MARCO，上面呢張係咪好靚呢？你知唔知呀，戒指上面粒石係多角型喇，影佢係好有難度喇，因為光o既節射可能會令部相機對蕉唔到喇... ^.* 本來重有影另一樣o野o架．可惜OF了(即out-focus >.<)，如果成功影到就真係超正o架... 唯有等下次影到先俾大家睇喇~^^

　　　　　　　　　<---back　我的資料　　簽個大名啦 !