鐘懷山

我

我姓鐘名懷山, 今年四十三歲, 係一間日本公司做 Messenger, 俗稱馬臣蓆
英文名叫Mountain, 有人叫我Mountain Chung, 也有人叫我做Mount Chung
我有好多花名: 盲忠, 盲忠忠, 忠溫雞, 中山, 珠海 , 懷山

我女友

我的女朋友叫Eliane, 中文名叫容綺玲( 容易拎 ),
她嬌小玲瓏, 是我剛進入此公司時認識的
佢話佢個英文名係佢讀小一時Miss幫佢改既, 因為佢生得細粒, 我有D朋友叫她做紀子, 因為紀子同懷山通常一齊用來煲湯
響我加入左呢間公司半年, Eliane轉左去一間銀行做出納員, 因為可以低息供樓
佢成日要求我買番層樓, 同佢組織二人小家庭
講到首期我有強大後盾, 就係我亞媽
但要組織二人小家庭, 就先要撇甩個強大後盾 !?
我女朋友雖然人仔細細, 但有時都好番蠻,我夾係亞媽同佢中間, 左右做人難
例如我亞媽鐘意食榴槤,Eliane就唔鍾意
每次亞媽食榴槤, Eliane 就通屋噴殺蟲劑
但Eliane最近就冇精神同亞媽佢鬥氣, 因為佢公司要迫佢向人客hard sell信用卡, 理財戶口
連禮拜日都要做埋義工,日日都俾上司照肺

裁員 ?

我做緊個間公司最近請左很多新移民
公司內的中堅(不太堅)份子就有得震冇得訓
他們有部份雙炒, 有部份三炒(炒樓, 炒股, 炒外匯)
我雖然係偶像派, 唔係實力派, 但屬於極草根, 暫時無需太驚
公司D 女同事很喜歡我, 原因係....
我幫她們買雜誌, 買零食, 買六合彩, 入票
有時買馬
我更幫她們買日用品,日用的....夜用的....面霜

青春無價

班女仔有時坐埋一堆傾偈很開心
和她們玩埋一齊, 我人也變得年青,活力充沛,壞的影響: 我也變得很八卦
咪睇班女仔斯斯文文, 專講扮靚及講是非, 邊個整容邊個俾人包, 日日都有得講
佢地好鐘意聽咸濕野, 但又要扮矜持, 詐唔識聽, 目的係想你講入肉D ,講多D
考你幾個咸濕謎語, 答案應該係本頁找到
(1) 一個男人, 唔著褲躺在街上 ( 估蔬菜名 )
(2) 一個男人, 唔著褲伏在街上 ( 估行業名 )
(3) 一個男人, 唔著褲奔跑於街上 ( 估人名 )
(4) 一個男人, 唔著褲坐在一舊石上 ( 估成語一句 )
(5) 兩個男人, 唔著褲坐在一舊石上 ( 估成語一句 )
(6) 它的名字包括人體的三處部位 ( 估國家名 )

OA辛酸

做OA有時都好慘, 日晒雨淋, 近排日日34度, 成身臭汗,
內衣好似一塊大膠紙, 貼住背脊, 貼住心口, 肚腩
每一粒細胞都被限制, 不能活動, 不準透氣
搭九巴要坐三人座位冇人會讓位給你
九巴都縭線, 人的肩膊屁股又點會咁細
有D 人好鐘意關窗, 驚住吹亂秀髮
落大雨趕時間(冇遮)死衝啦 !
有一樣野係我地做OA最憎既, 就係憎有人行響自己前面慢吞吞咁行
行得辛苦唔緊要, 最嬲係白行, 金融風暴之後, 好多公司拖數, 詐諦話老細唔記得開票
一撻地方去兩三次, 俾Reception D 姐姐笑傻佬

蝸牛買殼

昨日, 我因為幫公司收票和取文件, 走了很多地方,所以很疲勞, 一番到屋企就上床訓覺
連飯都唔食, 連電視都唔睇
到左晚上9:30, Eliane 突然走上來我屋企話煮湯圓俾我同亞媽食
之後Eliane問我, 幾時我地生番個BB呀 ? 但我記得我們還未結婚
於是乎就答佢話婚都未結
之後Eliane問我, 咁我地幾時結婚呀 ?
於是乎就答佢話樓都未買
大鑊, Eliane即刻係個膠袋度拎左本售樓書出來
粉嶺 " 千錢居 "
( 註: 日本語千錢是解作男性的生殖器官)
My god ! 800呎三佰伍拾萬, 我話點供得起
Eliane 指住亞媽幅相, 最強後盾, 你可信賴
我話要同埋亞媽一齊住, Eliane話佢又要接埋佢亞媽過黎住
我話冇問題, 佢兩老一人一間房, 我地兩公婆( 到而家都未結婚 )訓廳
做乜野都唔可以, 最後我們吵鬧了一場, 跟住黑口黑面
Elaine要確認
(1) 我到底愛唔愛佢
(2) 我想唔想買樓,
(3) 我會唔會同佢結婚,
(4) 我會唔會同佢過二人世界
(5) 我會唔會同佢要BB
我既 answer係四個 Yes, 一個 No, 邊個至係 No ?
(1) 指天椒
(2) 貼街招
(3) 任劍輝
(4) 以卵擊石
(5) 一石二鳥
(6) 匈牙利
因為Elaine 既認真, 我決定向亞媽提議, 一起搬去新的居所, 買層約500呎二佰萬既樓
落湖居

亞媽要自殺

最近睇報紙, 好多忤逆仔忤逆新袍, 呃晒老豆老母D養老金, 呃埋層樓
跟住趕老豆老母出街
我老媽子朝朝同一班三姑六婆飲早茶, 刨報紙, 口沬橫飛
佢響班三姑六婆王面前讚到我幾咁孝順, 唔會掟佢出街
班三姑六婆幾咁羨慕佢
我一開聲同佢講借住六十萬首期, 佢拿拿聲問我層樓係未寫佢個名
佢意思淨係可以寫佢個名, 我冇所謂, 我有份住就可以
但Eliane 就話只會寫鐘懷山同容綺玲兩個名, 因為供俾銀行個筆供晒為成三佰萬
亞媽話我地想呃埋佢D老本, 話要自殺兼打電話俾安德尊
我對天發毒誓亞媽才肯和我討論點樣買樓
最後層樓寫亞媽同我個名, 我地個個月交租俾亞媽
直至亞媽百年歸老就轉名俾Eliane
Eliane冇得反對, 因為我地唔夠首期,(而且都冇話邊個著數蝕底)
但Eliane就成日拎呢件事黎串我, 話我地兩母子當佢係外人
事實到而家我地都未結婚,

我們要結婚

我上 Eliane 屋企, 同佢亞媽傾傾我同 Eliane 既婚事
未來岳母想知道我有幾愛佢個女, 問左我一個問題,
如果佢 / Eliane / 我亞媽三個一齊跌晒落水, 我會救邊個先
我話我會叫圍觀的人去救, 救起一個我願送出一萬元正做酬勞

講婚宴同禮金

禮金要六萬, 未來岳母話我救人都用左三萬啦
擺酒就十五圍, 多除小補, 連隨擇埋吉日, 進展順利

旅行結婚,澳門長州

我和 Eliane 決定擺酒唔請新舊同事, 於是印發了旅行結婚請帖

敬告各親友同事同學
我倆邂逅於1993年X月X日,由第一瞬間之四目交投, 電光火石, 已擦出愛的火花
火花四濺, 彼此即時深覺對方正為自己適當人選, 亦只唯一人選
非君不嫁, 非卿不聚, 別人不能代替
拍拖六年, 深入瞭解, 到了需要朝夕共處, 產子產孫的階段, 刻不容緩
現謹訂於公元2000年X月XX日上午X時XX分於XX婚姻註冊處註冊結婚
隨即蜜月旅行, 特此敬告

ICQ , I See Kyou

我係 ICQ 開左個 account , 我稱自己叫 Top tree
話自己得廿五歲, 5呎11吋高, 玩抽樣閒聊 ( random chat )
和一個臺灣的女孩子有個多次對話, 她說自己是高中生
放學後很無聊, 所以喜歡在 ICQ 聊天, 不久會來香港旅遊
她的網名叫小嬌, 性格文靜, 5呎5吋, 115磅
佢話自己個樣唔差, 有D 似彭丹, 驚俾人標參, 臺灣現時很流行
佢很留意香港新聞, 陳健康呀, B 嫂呀, 祥嫂呀
佢既偶像係劉德華, 黎明
很多次我叫小嬌 send 相給我, 她都話未 scan

亙聯網上臺灣小嬌

公司也有其它同事玩 ICQ , 今日 Micheal 話俾我聽 Amy 又學人玩 ICQ
先形容呀 Amy , 她外表OK, 約 5 呎 2 吋高, 小小肥, 但髮型和服裝很 leung
她貪玩, 說話大聲, 粗魯冇禮貌, 又喜歡和同事拗咀
我估她大概廿七八歲, 未有男朋友, 她成日話點差點差的男仔她唔會吼
所以公司的單身男仔都唔蘇佢
Micheal 話俾我聽, Amy 係 ICQ 度扮臺灣妹, 叫做小嬌
異國情鴛驚夢散, 空餘一點情淚濕青衫
一呀葉..................

我決定約埋 Micheal bomb 佢

靚表妹黎左

尋日姨媽打電話黎, 話表妹嘉碧係廣西落左黎香港, 想見一見我同亞媽
約我地今日一齊飲餐茶, 所以我今早一起身就沖涼洗頭, 重擦兩次牙
我記得細細個時我就愛上我表妹, 果時我九歲, 表妹四歲, 我成日帶住表妹行街街，玩男朋友女朋友拖手
表妹好靚, 皮膚很滑, 笑的時候右邊面頰有一個酒渦
我和表弟 ( 即係佢哥哥 ) 都用心愛的玩具討好她, 細路仔好簡單, 鐘意就鐘意
冇諗過亞哥唔可以鐘意細妹
我同亞媽出發去酒樓, 當然要帶埋 Eliane, 很快見到姨媽同嘉碧, 果然眼前一亮
表妹重係好似以前咁靚, 而且重給人一份壓迫感
貼身的白色 T 恤, 領口開得很低, 隱約見到坑的開端, 黑色牛仔褲也是貼身的, 很圓
Eliane 坐在我和嘉碧中間, 慌住我抽水, 表妹和 Eliane 不停講野, 間中講到我既童年
亞媽同姨媽亦都很多野講, 冇人理我, 我只好四處望
間中技術性地望住 Eliane, 繞過 Eliane, 望下表妹
表妹持雙程証黎香港觀光, 而家住係姨媽屋企, 呢一排會週圍逛，買一些真野返大陸
佢話大陸乜野都假，連安眠藥都假，所以自殺都要落黎香港
佢重話揀呢段時間黎香港係為左能夠報名選亞洲小姐, 落選都唔緊要
希望搵到份工, 做 model 或且做特約演員, 然後可能係香港度過期居留
雖然我好想成日見到表妹, 但我知道佢咁樣做係冇好結果既

螞蟻和蚱蜢故事一

最近睇電視, 講到螞蟻和蚱蜢的故事
螞蟻一早做好準備, 到了晚年, 仍舊有一個溫暖既窩, 三餐無憂
蚱蜢身無分文, 要繼續工作維持生活, 奈何年老力衰, 最後凍死街頭
覺得蚱蜢很可憐, 如果可以改一改的話....

螞蟻和蚱蜢故事二

螞蟻辛勤工作, 賺回來的錢, 捨不得花費, 全部存入銀行
螞蟻家中沒有安裝冷氣及風扇, 晚上睡覺就開窗和搖紙扇
家中的十四吋彩電保養得很好, 雖然間中有鬼影雪花, 變成黑白, 上下不停捲動
及自動選台自動關機, 但螞蟻一樣看得津津有味
螞蟻不會把吃剩的飯菜棄掉, 它會留待下一餐甚至再下一餐吃
螞蟻除了工作, 就是回家吃飯看電視, 沒有其它娛樂
因為太節儉, 捨不得花錢拍拖所以沒有女朋友, 性和情從沒試過向人宣洩
螞蟻不喜歡賭馬, 不喜歡買六合彩, 沒有豬朋狗友, 連酒食朋友也沒有
唯一令螞蟻有反應的是電視的新聞報告和城市追擊
但經過無儘的負面新聞洗禮, 螞蟻更變得驚恐, 不敢上街, 到了五十歲, 患上老人痴呆症
但它在銀行儲存了很多很多既錢
蚱蜢就唔同, 搵錢容易, 駛錢唔就住, 搵咁多就駛咁多
住既係高級屋苑, 無敵海景, 高級傢俬
食龍蝦, 石頭魚, 黃油蟹, 飽魚, 燕窩等珍羞
蚱蜢駕駛名貴私家車, 聽靚 HI FI, 追明星, 落大富豪做大富豪
朋友一大班, 夜夜笙歌, 不愁寂寞
蚱蜢很喜歡到澳門賭博, 賭得很大, 輸三數百萬面不改容
也是到了五十歲, 蚱蜢輸掉了所有金錢及資產, 一貧如洗, 它向政府申請援助, 每月有數百塊錢
自此, 家中不再安裝冷氣及風扇, 晚上睡覺就開窗和搖紙扇
家中的十四吋彩電雖然間中有鬼影雪花, 變成黑白, 上下不停捲動, 自動選台, 自動關機
蚱蜢一樣看得津津有味, 蚱蜢知道, 好景不再, 漫長歲月要平淡渡過, 直至老死
它早知道有呢一日, 處之泰然, 所以仍然能精神暢旺, 身體健康
幾年後, 兩個超級大國開戰, 雙方的按鈕員收到總統的直電拍示, 一齊按動導彈發射
地球三份一地方不能倖免, 香港的建築物, 包括銀行住宅化為烏有
性命財產, 損失不計其數, 螞蟻和蚱蜢在這一場戰役中, 雙雙死去
在升上天國的途中, 它們相遇
痴呆的螞蟻攬著一袋銀紙, 不懂得到達天國的路在那一方向, 企在路邊發呆
貧窮的蚱蜢看著別的亡魂, 乘坐單車或跑車風馳電掣向著天國進發
蚱蜢一步一步的行著, 終於撞見螞蟻, 蚱蜢知道螞蟻患了老人痴呆症也深感悽酸
蚱蜢決定協助同螞蟻一齊上路到天國, 所以.....
蚱蜢用螞蟻的錢, 截了一輛計程車, 儘快的趕去天國

新來的男同事

公司今日新來了一位男同事, 是加入銷售部的, 名字叫 Johnny
剛剛大學畢業, 第一份工就來到這裡, 因為冇工作經驗, 所以人也很害羞, 說話陰聲細氣
他皮膚白皙, 載眼鏡, 瘦削而高, 因為說話細聲, 顯得很斯文似的
今早, 班女同事打扮得花枝招展咁番工, 難道早已收倒風!?
Johnny 成為她們今早的話題, 有幾多呎高, 幾重, 有女朋友未, 屋企有冇錢, 鐘意乜
響十一點左右, Mary 靜靜雞問我有冇人約新同事食飯, 叫我攪歡迎宴
我約了 Johnny 及其它很多很多女同事
我驚第日D女同事和 Johnny 熟落左之後, 我冇利用價值, 冇人睬我
到時我會很寂寞, 因為 Johnny 真係正過我很多
講番 Johnny , 佢今日第一日上班, 亞 ger 都唔知俾乜野佢做好
叫好自己響位睇公司 file , 睇產品簡介, 我見倒 Johnny 好悶好無聊
又唔敢望女仔, 但豎起耳朵偷聽人地傾偈, 好不容易捱到食 lunch
班女同事當堂興奮晒, 有D雞啄唔斷咁不停講野
有D食兩籠點心就話飽 ( 平時食倒一大碗麵加雞脾加紅豆冰 )
我地輪流訪問 Johnny , 佢覺得冇咁悶
Johnny 響中大畢業, 讀 Social Society , 畢業後發過數十封求職信
都沒有理想收獲, 佢話最普通既 social worker 只須 form 5 程度, 約萬二蚊人工, 但很多人爭
大學出來的也沒把握申請倒
Johnny 有面試過, 但冇回音, 我相信可能係佢性格內向所致
佢話響我地呢間公司做住先, 遲下再作打算, 因為公司 offer 很低的人工給他
佢話佢有同班同學, 畢業後做採購文員, 得5800人工, 放勞工假
噫, 我人工可能高過大學生, 我應該開心定係......
唔駛驚, 大學生唔肯做 office boy 的, 其實, 我都唔 boy 咯, office man
但我都好驚有朝一日, 我會被速遞公司取締, 每有速遞公司的宣傳單張派來
我都立即毀屍滅跡, 連 reception 都幫埋我, 我們亙相幫忙嘛
Johnny 住響康山, 屋企算富有, 但他不想再問老豆支零用錢
所以乜野工都做住先
我覺得能夠做營業代表已經很好,有很多很多的機會待唔同既人, 處唔同既事
如果香港能經濟好轉, 人工是會慢慢增加的
香港好, 公司好, 公司好, 我好, 我好, 我屋企好, 我女朋友好, 我未來的兒子更好
香港, 你會幾時好 ?

有個同行冇得撈

有個馬臣蓆, 人稱關老三, 28歲, 提早退休, 原因係成功地....
幫老細個秘書 SEND 了一個電子郵件
老細個秘書做了一個 Excel file, save 左落一隻 1.44M floppy disk
叫關老三用 email send 俾人客, 隨手抄了 email address 在一張白紙上, 交給關老三
somebody@hknet.com
關老三早聽到人說發電子郵件是多麼的方便及快捷 , 果然 !
他把 floppy disk 放進信封, 信封面寫上 somebody@hknet.com
貼上一個 $1.40 既郵票, 然後把 [ 電子郵件 ] 送到郵筒裹

下一個冇得撈的行業

就係配藥護士
將來睇醫生可能不用親身到醫務所, 尤其是腳軟的病重的臥床的病患者
只要家中的電腦駁上 viewcam, microphone
另外 install 一些診斷用的 software, 醫生就可以向病人望聞問切
microphone 可幫助聆聽心跳 pulse 甚至電腦能即時繪出心電圖
醫生可將用藥 data transfer to 病患者, 由病患者 print out 去買藥
診金亦是由亙聯網上支付, 病歷則存放在彼此的 hard disk 裡
護士們小心小心

今日知聽日事

收倒風公司今年又凍薪, 各同事都在細細聲抱怨, 已經第三年啦
其實都唔知香港的惡運到左谷底未
我份糧已經係九成用係生活一成用響娛樂冇得儲蓄
我認為一個人唔搵少少娛樂調劑生活是白活的
如果只為生活掙錢, 不生不活不是已解決問題嗎? 何需再掙錢呢?
睇香港的就業及薪酬走勢, 今日唔知聽日事, 我擔心失業唔知點算
但政府已為香港下一代計劃將來, 換句話說你我的子孫會是得益者
計劃包括減低香港的污染, 推動環保意識
引入專材, 令香港人材濟濟, 從事高科技發展
發展旅遊業讓遊客來港消費
計劃中可謂今日想後日事
至於今日及明日仍想生活的新舊香港人
(今日的失業人仕,低收入人仕) (明日的畢業生, 新移民)
政府給你們兩句話:
金融風暴帶來既傷害已經復原, 經濟在慢慢復甦, 只要大家抱定決心, 一定可以渡過難關
讓我們攜手同心, 將香港建設成國際性大都會, 創造美好家園

馬騮樂園

閱讀新聞忽發遐想 :
政府不遺餘力引入外商投資迪士尼樂園
目的是希望能帶入職位空缺及帶旺旅遊業
還有, FACE上嬴了新加坡, 可惜是要付出很多
我個人覺得還有下列途徑:
交通人物樂園(與日本合資)
樂天世界(與韓國合資)
馬騮樂園(與中國合資或與港商合資)
講到名牌效應, 其實米奇已生存好幾十年了, 冒牌貨品隨處可見, 失去新鮮感
馬騮樂園即是以 "西遊記" 故事為題材同樣建一個很大很大的主題公園
人物之多與角色之鮮明與迪士尼樂園不遑多讓
唐三藏, 孫悟空, 沙僧, 豬八戒, 白馬, 玉皇大帝, 皇母娘娘, 觀音, 如來佛祖, 太上老君
月老, 土地公公, 二郎神, 仙女, 神將天兵, 哮天犬, 東海龍王, 南海龍王, 西海龍王
北海龍王, 牛魔王, 鐵扇公主, 紅孩兒, 蜘蛛精, 白骨精, 狐狸精
性格 : 唐三藏仁慈, 孫悟空本領大, 沙僧蠢頓, 豬八戒咸濕, 白馬怕死, 紅孩兒任性
牛魔王頑固, 數之不盡
地點有天宮, 南天門, 龍宮(水晶宮), 花果山, 水濂洞, 唐代文物村莊等
一樣可包裝上機動遊戲, 水底世界, 人造瀑布
而可以超越迪士尼樂園係: 建一個只有猴子和雀(自來雀)的動物園, 有樹有石有水
讓猴子爬樹跳水, 遊客可餵伺水果及花生
工作人員可以訓練猴子在觀眾面前表演, 如翻跟斗, 舞劍, 行鋼線, 踩單車
真老鼠就做不到了, 迪士尼樂園還有更差勁的地方是每晚放煙花一次, 與環保背道而馳
替米奇米尼加添中國特色, 倒不如讓外國人中國熱
來香港遊覽花果山馬騮樂園, 買西遊記布娃娃, 匙扣紀念品, 蟠桃, 火龍果, 五代同堂等
買英文版西遊記書籍, 更可建西遊記網頁
香港唔做, 可能美國會做, 日本會做
君不見花木蘭的故事已被迪士尼公司取材了

雙輸局面

每日約250名持單程証內地人仕來港定居
另每天不知多少名持雙程証人仕到期返內地但唔肯走
無它, 香港唔知邊個死蠢官員發明 " 行街紙 "
另每天又有不知多少名內地人仕冇申請而偷偷地來到香港
唔知為乜, 香港有乜好, 住得窄, 難搵食, 人又要醒, 壓力又大, 福利冇乜
內地人仕係都要花幾十萬人民幣走黎
又冇親人照, cheap cheap 走去做黑工, 搞到香港僱主有機打壓工資
失業率持續上升, 大家攬住死
還有最差最差勁的, 索性唔做野, 靠羅綜援養活一家幾口
亦不明香港 d 麻甩佬, 五六十歲人走番大陸聚老婆
一生就三四個, 全部申請落黎, 自己又養唔起,
交晒俾香港特區政府幫你養, 好似欠佢咁
再者, 自己兩腳一伸, 山唷拿拿
可憐香港的有限資源, 被重創至潰不成軍
無能既弱勢政府又如何可以扭轉墘坤

石Q叔叔

我終於被香港的失業大軍徵召入伍, 滿以為低薪僱員唔會被炒
點知僱主仍可以搵到更低薪的新僱員
我搵左好耐工, 後尾做左石Q叔叔
薪金唔算高, 放勞工假期, 有醫療福利及強積金, 每年簽一次合約;
每天工作十二小時, 加十五分鍾stand by, 交通每天來回一個鐘
剩番果 D時間要黎換衫沖涼食飯如廁訓覺
與愛妻聚小離多, 更遑論 family day ,因為難得休息
此份新工作當然冇以前份工咁好
但我好心足, 香港而家咁惡劣既環境, 你不做, 大把人爭住做
有份工自食其力已經好開心
其實石Q叔叔可以改三班制呀
早班07:00 - 15:30
中班15:00 - 23:30
夜班23:00 - 07:30
八小時半工作，兩更交替時有半小時可作緩衝接棒，令錯誤大大減少
呢個做法會令業主和管理公司花多了資源
但係值得，可以創造大量就業機會, 也較人道, 減少職員流失, 增添歸屬感
最後, 工作效率必定大大提高
因為有歸屬感和前景的工作才會令僱員珍惜, 全力以赴, 避免出錯
如果將一份工作只作為踏腳石, 責任感必定大打拆扣
因為工種不同, 最低工資難設定,最低工資可能被僱主作為 " 標準工資 "
或成為了冗員的必然工資
但最高工時可設定, 很多香港人為了生活已不可能細心照顧家庭成員
令社會衍生了不少悲劇
理智的管理公司眼光應放長遠點, 留住好的員工, 人材是一間公司的重要資產嘛

鐘艷蓉

經我默默耕耘，綺玲有孕了，去政府醫院生她出來，是個女的
全家老嫩也開心，我們都不是重男輕女的，岳母替外孫女改了名字，叫艷蓉
家中多一女兒，支出大為增加，幸好綺玲升了職，有少少人工加
艷蓉十分趣緻可愛，逗人歡喜，我每日放工返屋企就第一時間抱她
連涼都唔沖住，食完飯先沖，
日日抱艷蓉，不會展愁容，日日抱艷蓉，只會有笑容

艷蓉四歲

艷蓉返學很細膽怕事，怕老師，怕同學，說話細聲，一 D 都唔似我
老師問她問題，她企係度一舊飯咁，唔識回答
淨係左手數右手手指，然後右手數左手手指，唉
艷蓉睇電視時係又笑唔係又笑，唔好笑都笑
重笑到卡卡聲，吵耳

光陰似箭，日月如梭

我過左六十歲啦，重有兩年就退休，眨下眼 Joyce (艷蓉之洋名)已經17歲，考完會考，預備搵份 summer job，稍後繼續升讀中六，不過，未搵錢之前，要問我取四佰蚊交謝師宴費，重要買衫買鞋，

待續..........

回到起始頁