Kisah Dalam Bas  Carita Hanto!!   Kisah Si Cakah      Ijol dan Bidah

   KISAH DALAM BAS
     Thu Jul 26 19:02:53 2001
     Banjarharat
 

     Wayah tu sabalah patang. Wayah urang bulikan bagawi pang. Bas mini nih pajalanan nya tumatan
     Cukit maampah ka tmn Kayu Hijau. Ada saikung diang nang tangah duduk di karusi dlm bas tuh
     nampak gaya nya macam galisah ha. Kabatulan pulang ada saikung utuh tangah badiri bahadapan
     awan sidiang tadi, bahimpit-himpit awan panumpang bas nang lain. Kabiasaan nya wayah tu pang jalan
     jim, panumpang bas basumpal, bas bajalan bilang bakukot. Si diang nang galisah tadi tuh rupa nya
     handak bakamih. Handak turun asa kulir pasal bas padat, rumah gin kada jauh lagi handak sampai.
     Manahani ai hulu handak bakamih. Tahan punya tahan takamih jua ai sadikit. Sidiang gin bapura-pura
     sibuk manggulagai beg tangan macam mancari ei barang hilang. Siutuh nang badiri bahadapan tadi
     lawas dah maitihi galagat sidiang nih. Bas magun ai lagi kada hingkat bajalan laju. Panumpang nang
     duduk di subalah sidiang mamicik lucing lalu barangkat ha handak turun sebab hudah sampai. Sidiang
     ancap-ancap ba'alih tampat kadudukan. Siutuh nang hudah lawas badiri tadi duduk ai ia di kadudukan
     bakas sidiang tadi. Tadiam satumat siutuh mamikirkan kanapa pulang maka baal tampat duduk nih. 'Ai
     ikam karasaan lah tampat duduk ni baal?'. Utuh nakuni sidiang. 'Ohhh.... butul minyak arom ku
     tatumpah tadi, panutup nya takipai, kamanakah hilang nya, dalam beg tangan ni gin kadada jua
     tajumpa'. Siutuh mangaluarkan ha ka saputangan, badiri satumat manyapui tampat duduk awan
     saputangan. Imbah tu duduk ai ia pulang. Sambil duduk siutuh mamarakakan ha saputangan tu
     kalubang hidung kaluko tabau arom nya. Cium punya cium hanyar siutuh parasan pada bau arom.
     Sambil takurihing siutuh manjawapi. 'Laaaa.... minyak arom cap nang naya, amun diang handak aku
     ada ai panutup nya'
 

          ....Magun haja lagik dalam bas......

     Tarasa banar siUtoh dalam hati basurah," Ceh cilakak Diang Macal nih, mahuluti ako haja, dah laa
     takamih dalam bas, badusta pulang...kina ikam diangngai mon handak taho sipa Abang Utoh nih
     hehehe,..." Dalam kapala Utoh ligat bacari akalan....

     Dalam basasakan to, tatireng si Utoh di hadapnyak ada hindu babini katianan tuhuk badiri, bapiruhut
     ka basi alang bas tuh. Lakas Utoh basurah, " Acii, banyak lama badiri, sini mari duduk Acii!" ujar Utoh,
     sambil manggawil Diang Macal nyuruh bangun mambagii hindu bunting tuh baduduk. " OO Diang,
     ikam bangun hulo, kasian ako ka hindu katianan tu, uyuh inya badiri, kina Diang duduk tamppat ko
     lah" ujar Utoh lamah lambuuutt....

     " Dahindak ako, tampat ikam tuh baal, kana minyak arom, kaina burit ku balancatan" ujar Diang
     takuriheng malok. " Kada apa, kina ako malapiki awan kartas surat habar ko nih Diangngai, hingkatkah
     " jar Utoh. Lakas sai Diang manjawab" OO mon kaya ito ako hakonnai" jar Diang.

     Diang gen bangun, hindu bunting baduduk tampat Diang tadih, Utoh gen bangun sambil maandak
     kartas sagan Diang baduduk. Bahh si Diang Macal ungahnyak, asa pintar banar tukuhnyak, hudahlah
     Utoh dustainyak, ni...Utoh baik banar mambagii tampat duduk pulang.Dalam hati Diang Macal
     basurah " Apos muha Utoh, ni kali kana bannnar ikammm!!"

     Biya baduduk haja Diang Macal, tarasa burit ganalnya iilah tacucuk pako payong, tarus malacong "
     ADDDOOOOIIII!!!!Adoiii yai, napanyak manyucuk burit ko??? Sakitnyak aiii..Ujar Diang Macal
     bahalulong, bahantak-hantak.Napa tia, gigir urang dalam bas sabarataan, daribal bas gen tarus baranti.
     Pabila DiangMacal mahahar buritnya nang ganal toh, nahh...tapagang wan paku tikin satangah inci,
     burit gen badarahan...hahahai..Diang,diang, takana ikam wan Utoh.

     DiangMacal malok banar, urang maka banyak pulak tuh, tarus Diang badadas turun bas, lalu bamamai"
     Heyyaii..ni musti gawian Utoh!!. Masa bas handak bajalan bakukot, Utoh badiri di higa lawang bas
     lalo bacukiak" AAii Diang, tahagakah panutup butulnyak??? Hahahaha...ya to, macal banar ya am, han
     napa, balom apa-apa hudah badarah burit, mon kana panutup butul Abang Utoh nih, kaluko rabbbiiitt!!!
     hahahai.

     Utoh, gen takuhireng surangan..
 
 
 
 
 
 

     Carita Hanto!!
     Thu Aug 23 18:49:21 2001
     UtohKidok
 

     Basurah pasal hanto awan jin ni kan, sumalam kami bapandiran pasal hanto dalam butul di Sabak
     Bernam macam dalam TV tuh.

     Jar kawan ko dahulo di tampatnya tu asal kawasan hutan, imbah tu handak dibangunkan wan
     parumahan. Taga masa gawian kontraktor manabas hutan, manunjul tanah dll. tu kan, banyak banar
     masalah mancungul. Macam-macam : Bullduzer rakai, rantai pagat, urang laip, bahh..macam-macam
     lagik. Jadi bila ditakoni ka bumo, jarnya tampat tu kawasan ada panunggu, bahanto jarnya.Jadi, mon
     handak nyaman bagawian jarnyak musti di pindahkan hanto-hanto tuh.

     Imbah taparukoian barataan, tukeh kontrek gen katuju maupahakan bumo tadi ulah kertas kerja kayapa
     handak mamindahkan bubuhan hanto tuh.Bumo ni...kira ungah la inya..napa iilah konsultan cagar
     mamindahkan hanto hehehe.Upahnya gen banyak jarr. Jadi imbah samingguan maulah kajian pelan
     tapak tuh, bumo tadi bapadah ka kontrek, jarnya " amon handak jua mamindahkan bubuhan hanto nih,
     kana siwa bas ganal 2 buah" Jar tukeh kontrek tu " ayo haja, kina ako manduiti"

     Isoknya papagian lagi, siap dua bigi bas sakulah warna ureng mahadangi, sagan maangkot hanto
     tadih.Daribalnya hindu pang,upah gen harat jua ya am.

     Imbah bumo manyuruh katuha hanto naik bas , si bumo tarus nyuroh daribal hindu mambawa hanto
     tuh. Hanto-hanto ni kada hingkat ditireng kada, jadi bas tu kaya kada baurang kada, taga tarasa barat
     banar!! Aiii....hanto ya am!!Kalinya tuhuk daribal nakan minyak, bas kada mau bajalan. Aiii napa
     pulang.....jar bumo, tadi dah ku barie hanto ni makan hintalo bajarang babakul-bakul, napa pulang kaya
     ini.Ni tanto ada hal lain nih!!

     Bumo gen naik ka bas, barunding awan katuha hanto. Imbah turun, tarus bapadah ka tukeh kontrek.
     Tukeh kontrek gen batakon" Aiii angah bumo, napaan bas ni kada hingkat bajalan?'

     Ujar bumo ka tukeh " Ujar hanto ni, bas nang andika siwa ni kadida air-cond.Bubuhannya
     kahangatan!! Hanto ni inta cari akan bas nang ba 'air-condition', adakah jar???"

     Hahaha manapok dahi tukeh!!!???
 
 

Kisah Si Cakah
ujik jabis
Mon Sep 3 13:15:41 2001

Cuti mardika ari tuh ako sawat mantuk ka kg. Ada urang basaruan aroh pangantin jah. Carita pasal aroh nih taganang kisah bahari. Wayahitu kabila aroh haja rami pang urang takumpulan , badapatan lawan kakawalan..kukulaan nang parak lawan nang jauh. Kabila takumpulan haja rami pulang bakisahan , bapandiran imbahtuh pulang bahulutan tarus bagayaan. Mun wayah bagawi pulang rami badarau. Kada aci catering2 ilah damini nih. Saja rami.
Jadi pada satu aroh tuh ilah rajin pang rami urang bakisahan. Kami sakumpulan duduk bapandiran dipinjung rumah. Kulir bagawi pa an. Ako nih nang paanomnya...kakanakan lagi wayahitu. Jadi duduk kacungkungan mahadapi lawan mandangarakan nang tatuha bakisah. Dalam banyak2 tuh ada saurang tuha nih ku hiyau angah Tulamak (ngaran incaan).Hidin baistilah handak mamugai pandir manyulam kisah. Hidin nih saja terkenal cakah lamun basurah. Mun basurah tuh inya haja nang pawaninya, nang pambungasnya...samuaan inya pang. Kada hakun kalah. Tu nang muyak urang mandangar tuh.
Hidin gin mula bakisah.." Ako wayah bahari saja hibat..ikam taholah. Mun kakanakan wahini kada talawani lawan ako. Ako halam suah masuk ka hutan cagaran handak mancari buah binjai. Bilang batuhukan mancari hanyar tahaga pokok binjai. Maka ganal pokok tuh kada hingkat madahkan ako. Ako gin mula manabang..tabang punya tabang kada karasanan bilang babulanan hudah kada jua mau rabah. Ku tabangi lagi..parak ma’anam bulan hanyar tadangar bungi marakut..kruk..krek..kruk ilah bungi pokok handak rabah. Ku hadangi tagal kada jua mau rabah. Imbah tuh parak manalu bulan pulang hanyar rabah ka bumi. Dummm...tumbur saalaman mandangar bunginya. Kabila rabah haja tarus ako mamilihi buahnya. Umaiii maka banyak. Parak malima gadur ada asaanko. Talah mamilihi ako gin basasadi handak mantuk. Kabila sampai dirumah haja ku julungi sapalih nu kakawalan nang parak. Andihku ku taruhi..ku wadi..imbah tuh parak malima tahun pulang hanyar talah mamakani. Bilang mauk lawan binjai pang. Nginto pang kisahku bahari ", ujar angah Tulamak kaungahan Bilang mancungit hidung hidin. Asa arai banar tukohnya. Asaannya kadaida lagi nang hingkat malawani kisahnya tuh.
Sakalinya angah Tuhirang (ngaran incaan jua) nang tumatan tadih ranai duduk dihigaku basurah. " Ikam talah ka hudah Tulamak ai. Nih ako pulang handak bakisah ". Angah Tuhirang mula manyulam kisah. " Ako ada ai jua baisi kisah tagal kada am hibat banar ilah kisah Tulamak tadih. Halam ako suah tulak manabas di kabunku nang di banat tuh. Wayahitu kabunku tuh bilang tagah banar. Rumput halalang bilang tinggi banar mun babuat langsung kada katampaian awak nih. Mun ada gin kapala ha nang cangulan. Kabun tuh lawas hudah kada di gawi’i ya am. Jadi wayah baisukan tuh ako gin tulak ka kabun tuh. Ancaman handak manabas tadih ti pang. Ako gin mula manabas. Tabas punya tabas kada karasanan hudah talah sakapingan ku tabas. Lingai hudah ku tireng. Ako gin bamandak tarus baampih manabas. Uyuh pa an. Wayah rahat handak basisimpun tuh babaya aku handak manaruhi parangku tuh ku i’itihi ada darah malikit.Banyak pulang tuh. Matan mana datangnya darah nih ujarko. Hiran jua taholah. Ako gin mula mamariksa kaluko ada tarawis apakah. Sakalinya saja banaran. Wayah aku tulak mai’tihi intang kabunku tuh ada tahaga batis kancil bahamburan. Banyak pulang tuh. Rupa-rupanya wayah rahat ako manabas tadih ako tarawis jua batis kancil..imbaham pagatan samuaan. Nah..kada ku hadang lagi..tarus ku pilihi batisnya. Umaiiii maka banyak..parak malima bakul taholah aku bulihi. Nginto batisnya haja..balum awaknya lagi ", ujar angah Tuhirang manalahakan kisah sambil mangilar ka angah Tulamak.
Imbahtu ku tireng angah Tulamak bilang habang muha. Marangut-rangut kakalahan tarus baisur. Napa pang lagi tarus tatawaan ai sabarataan ma’itihi angah Tulamak kakalahan surah.
 
 

rinjing
Ijol dan Bidah
Tue Nov 13 09:04:15 2001
 

Ijol mangawini Bidah masa Bidah hanyar naik darjah lima sakulah Agama di kampungnya. Sa bujurnya Bidah handak mahabiskan darjah 6 hulu hanyar kawin dangan niat handak jadi Ustazah dan mandalami Ilmu Agama, tagal uma ayah Bidah mamaksa Bidah kawin awan Ijol.

Parkahwinan ini mambuahkan hasil 5 ikung anak. Kalima lima anaknya hudah bagawian barataan kada badiam di kampung lagi.Tinggal Ijol dan BIdah jua lagi di kampung. Ijol ni gawian nya bajual ikan lawan sayur sayuran di babarapa buaah kampung niki biskar . Samasa bajualan ni lah Ijol bakanalan wan Ijah janda anom baanak 3 ddi kampung subarang.

Ijol inta ijin ka Bidah handak kawin saikung lagi sambil handak manulungi 3 anak yatim tadi. Niat sucinya itu kada di halang Bidah yang taho akan HAK lakinya dan demi taatnya akan parintah Allah s.a.t.

Malam partama parnikahan lakinya wan Ijah, mimang la Bidah marasakan pandaritaan jiwa yang kada tandingnya, ibarat mun mangganggam hintalo boleh masak hintalo itu dalam ganggaman nya, manunjukkan batapa panas dan resahnya Bidah, tapi itu lah Takdir hidupnya.

Babarapa bulan partama yang dilalui Bidah, lakinya Ijol masih adil mambahagikan hari. Bila Ijah mula batianan, muntah muntah Ijol tapaksa manggani'e Ijah yang kada tapi wagas tuh. Bila Ijah baranak Ijol batambah aur, bagawi mancari rajaki , anak pulang talalo uji ke Ijol. Bidah dah samakin tuha jadi Ijol mahabiskan hari hari nya imbah bagawi dirumah Ijah.

Ijol satiap hari mantar ikan dan sayur ka rumah Bidah dalam parjalanan bajualan. Itulah sakali sahari partamuan Ijol dan Bidah, kada lagi manggani'e Bidah yang kasunyian dimalam nang hawai. Bidah hanya manyimpan rasa, sasakali maingati jaman manis masa anak anak halus halam.

Hari ini Ijol datang lagi karumah Bidah handak maantar lauk, rumah kalihatan sunyi haja. Bakali kali Ijol mangiau ngaran bidah namun Bidah hinip haja. Ijol asa sarek lalo naik karumah nang kada bakunci. Takajut Ijol nireng Bidah nang kajung kadinginan, ada kuantan baisi baras tatumpaah dihiganya.

Bidah dah tulak jauh manamui Tuhan nya, tiap hari Ijol lalu hadapan rumah buruk nang kada taharagui lagi...sasakali sadih jua didalam hatinya maingatakan cara Bidah maninggal sauranagn itu, tagal satumat haja sadihnya, linggok dan layanan masra Ijah manutup sagala kasadihan hatinya itu.

Itu lah kisah Ijol dan Bidah, satu diantara saribu carita yang santiasa di lakunakan urang dipentas dunia.