KAMUS SI-PALUI
TUHUK sudah nang ngaran si Palui melamar bagawi ka mana-mana.
Tapi kada mau jua ditarima ulih perusahaan atawa kantur nang ditujunya.
= “Jangan muyak-muyak Lui-ai, amun handak mancari gawian. Apalagi amun
handak jadi pagawai nagari,” jar Garbus mamadahi.
+ “Cah Bus, aku kada handak lagi, muyak sudah maninting map ka sana
kamari. Babuang-buang duit haja,” sahut Palui pina pusang.
= “Napa garang nang handak cagar ikam gawi?” batkun Garbus.
+ “Kalu bahuma pahumaan aku kada baisi. Bagawi di bengkel aku kada
baisi kabiasaan. Maklum aku bahari tamat SD haja,” ujar Palui pina marista.
= “Amun damintu ikam bawarung hakunlah. Kaena aku sadikit mambari mudal,”
ujar Garbus mambari sumangat.
Palui mahakuni tawaran Garbus, lalu inya mambuka warung nasi di halaman
rumah. Sampai sabulan inya bawarung, sakalinya kada sing payuan. Babasian
tarus dagangan Palui saban hari.
+ “Pusing aku umanya-ai, mamikirakan nasib kita ini. Nasi lawan gangan
dagangan kita babasian tarus,” jar Palui bapadah lawan bininya.
- “Kada kawa-ai abahnya amun balum sampai razaki kita. Basabarai dulu.
Cuba warung si Mayang payu banar inya. Sabalik sahari habis baras. Mudahan
kita kaya inya jua”, jar nang bini banasihat.
+ “Ikam hirikah umanya?” Palui manakuni bininya.
- “Kada pang amun hiri, mudahan kita kaya inya jua bapayuan,” bini
Palui manjalasakan.
Malihat warung Palui kada sing payuan, ada urang nang bapadah paranurmal,
handak manulungi Palui. Urang itu bapadah kawa mambari palaris nang datang
dari dairah pagunungan.
+ “Tulung bantu pa-ai, supaya warung kami bapayuan. Dimapa akalnya?”
ujar Palui wan paranurmal itu.
> “Sabar haja ikam Lui. Bila hakun manurut ujarku, ikam kada ngalih-ngalih
lagi mancari duit. Inya datang saurangan. Ikam sugih kaena,” ujar urang
itu basumangat.
+ “Akur banar. Apa pang syaratnya,” palui bahimat manakuni.
> “Ikam sadiakan kutak kusung. Kaena buati duit saratus ribu. Sampai
40 hari duit di dalam kutak tu tadi babanyak bisa sampai sajuta,” ujar
urang itu mamadahi Palui.
> “Adakah duit ikam?” batakun pulang urang tadi ka Palui.
+ “Duitnya kadada,” ujar Palui sambil manggaru kapala.
> “Bahutang kamanakah dahulu. Kaena amun sudah jadi banyak, dibayari,”
ujar urang itu pulang marayu Palui.
Bukah Palui ka wadah Garbus mainjam duit. Inya bapadah duitnya handak
gasan mambaiki usaha nang sawat macat. Mandangar Palui pina marista, Garbus
hakun haja mahutangi duit saratus ribu.
Duit nangitu diunjuk Palui ka paranurmal tadi. Limbah manarima duit,
urang itu masuk ka kamar saurangan sambil gagarunum. Pinanya mambaca jampi-jampi.
Tuntung bamamang, urang tadi manjulung kutak ka Palui, bapasan kutak jangan
dibuka sampai 40 hari, supaya duitnya batambah.
Kahimungan Palui mambayangakan duitnya cagar jadi balipat banyaknya,
kada tapi mahirani lagi waktu urang tadi bapadah bulik. Urang tadi pina
hancap maninggalakan rumah Palui.
Kada karuan rasa Palui mahadang 40 hari. Handak banar lakas mambuka
kutak lalu maraup duit nang jadi banyak.
Sampai ampat puluh hari, Palui hancap maambil kutak nang disimpan di
lamari. Dikiyaunya bininya supaya manyaksiakan inya mambuka kutak sambil
hati dag....dig....dug.
Sakalinya limbah dibuka, kutak isinya kadanya duit nang babanyak tapi
tatakan kartas nang diikati parcis kaya babatan duit nang hanyar diambil
matan bank. Manyumpah Palui sambil kada karuan rasa lagi bajajak. Hanyar
Palui marasa kana tipu urang nang mangaku paranurmal. Duit saratus ribu
nang asalnya bahutang lawan Garbus, sakalinya digantii lawan tatakan kartas.
Duitnya dibawa paranurmal palsu tadi.
+ “Astagfirullah ..........” Palui tadzikir manyasal kanapa inya hakun
ditipu urang.[aan]
KAMUS SI-PALUI