KAMUS SI-PALUI

Mahitung Cacak Burung

Wayah lagi anum, walaupun Palui tamasuk pamuda nang pandiam tapi ulih kakawalannya kada kawa dianggap remeh karna apa haja nang diungkaraakannya pasti bisa ditarima.Jadi di kalumpuknya Palui ini dianggap sabagai tukang kunsep, tukang rancang apa haja nang cagar digawi. Jadi tabiatnya babida lawan Garbus atawa Tuhirang Tulamak nang dianggap ulih bubuhan kakawalannya tukang kabuau alias luhau. Urang luhau biasanya banyak pandir haja tapi kada bisa manggawinya, paling katuju manyalahakan urang lain, maniwas atawa cari muha samalah lawan pahlawan kasiangan.Urang-urang nang kaya ini lakas dipatuhi, tapi lakas jua dijauhi karna rancak katahuan pangaramputnya.
Bubuhan kakawalan Palui kahulu kahilir bahabar ada baisian gandak lalu handak kawin bulan kaina, tapi nyatanya ampat lima bulan kadada jua tadangar handak batajak sarubung.Kada kaya Palui, kada saling bunyian lalu babagi undangan salamatan nikah lawan Zaleha.
+ Umai Lui ikam itu ujar urang sama lawan manggunting dalam lipatan.Bibinian nang kukahandaki itu nyatanya sudah baikatan lawan ikam, ujar Garbus marasa kalah saingan lawan Palui.
= Kita jangan talalu banyak pander,baiknya basusunyian haja sahut Palui.
Imbah kawin satahun bini Palui baranakan, anaknya lalakian pas banar hidungnya, matanya samunyaan kaya Palui.
= Nah....bujur-bujur lalaki satria aku, ujar Palui baagak lawan bininya karna dahulu Palui dipadahaakan urang bancir.
- Bujurai kakak ai, sampiyan itu tamasuk urang nang rakus, parak kada kawa manahan aku sahut bininya sambil manciumi anaknya.
= Asa himung banar sudah baisian anak, kalu kawa kita jangan tagasak-gasak ba KB, tuntungakan layapnya sampai layu ujar Palui.
Sudah barapa hari anak kita ini umanya, jangan kada ingatlah mancurit tanda cacak burung di tihang supaya katahuan ganap ampat puluh hari ujar Palui batakun.
- Aku ingat haja, tapi sampiyan pang bila kusuruh mancurit kada kalumpananlah, ujar bininya.
= Kalu aku pasti ingat, maklumlah jangan talalu lawas mahadang kasihan si kacil nang saikung ini ujarnya.Kalu kaya itu kuhitunglah barapa sudah curitannya, satu....dua....tiga.... dan...dan...nah sudah ampat puluh hari umanya ai ikam baranak ujar Palui pulang.Kalu kaya itu...........ehem, ehem sambungnya.
Imbah isuknya, Palui galu banar kanapa rasanya babida lawan nang dahulunya.
- Musti haja babida, maklumlah bakas baranakan.Hanyar saikung balum lagi kaina sampai satangah lusin jawab bininya.
= Kadanya babida itunya pang, tapi asa kabasahan banar kaya banyu ba’ah, umanya ai.
- Cuba pang hitung lagi cacak burungnya, kalu sampiyan tasalah hitung, bininya manyuruh.
= Sudah dua talu kali kuhitung, kubuliki matan atas kabawah, matan bawah kaatas, tatap jumlah curitannya ampat puluh sahut Palui.
- Samalam kulihat wayah Garbus lawan Tuhirang baelang kasini ada inya kahiga lawang itu lalu kalihatan tangannya pina putih bakas kana kapur panginangan ujar bininya curiga.
= Nah....... ini pasti gawian nang badua itu handak mangalahakan aku, lalu ditambahinya sampai lima atawa anam curitan, sahut Palui sambil maingatakan hitungan harinya. Kalu hitungan harinya bujur lima minggu artinya balum ganap, balum barasih ikam umanya ai, ujar Palui manggalagak tatawa talanggar pamantang bahubungan lawan bini.KAMUS SI-PALUI(emhati)