Papi Datang

KAMUS SI-PALUI

SALAWAS takawan bubuhan kalurahan wan kacamatan Palui makin dikanal urang, kada haja urang kampungnnya tapi bubuhan kabupaten umpat jua tahuan.Makanya bila inya bajalanan baik saurangan ataupun wan anak bininya pasti rancak dikiyau urang, kaya itu jua bila paharatan makan nginum di warung ada haja urang nang mambayariakannya.Kada cuma anak bininya haja nang taumpat nyaman tapi bubuhan kakawalannya Garbus, Tulamak wan Tuhirang taumpat jua sawabnya rancak dijamin urang sampai karuku-rukunya.
= Sabujurnya aku rasa ngalih jua kalu saban waktu ditraktir urang. Alasannya talalu banyak tamakan jasa urang ngalih mambalasnya, ujar Palui.
+ Itu ngarannya razaki, sahut Garbus.
= Kada karna razakinya haja Bus ai, sabab ada jua nang mambari jasa itu maharapakan wan kita, minta tulung atawa minta urusakan ini itu.Karna kita tamakan jasa lalu ngalih manulaknya, ujar Palui pulang.
- Tapi pabila lagi kalu kada wayah bakuasa jadi pajabat, kadada lagi kasampatan lainnya.Makanya ujar urang “lagi mumpung” gunakan kasampatan kalu parlu minta tukarakan radiu, tv atawa sapida mutur, ujar Garbus menuduhi Palui.
= Ikam itu salah kira Bus ai, bujur haja sanang wayah ini tapi imbah ampih maingkuti jabatan, kainanya ikam kada dihirani urang lagi, jawab Palui.
Karna kapintaran Palui bagawi sabagai katua RT, inya diutus urang umpat panataran pambangunan desa di jawa basama-sama wan utusan lainnya.Kada alang-alang, lawasnya sampai sabulanan maninggalakan anak bini wan kakawalannya.Saumur hidupnya hanyar wayah ini inya bisa bapisah babulan-bulan itu.Makanya hampir saban minggu inya bakirim surat kaanu bininya.
Wayah parak tuntung panatarannya, Palui bakirim surat pulang wan bininya nang isinya minta supaya kamar muka dibarasihi karna inya handak bulik.Jaga kamar itu baik-baik jangan sampai dimasuki urang, tanda dinda cinta wan kakanda ujar bunyi surat Palui.
Imbah manarima surat lalu mambaca, bini Palui bingung karna lakinya minta barasihiakan kamar dihadapan padahal rumahnya kada bakamar.Tuhuk bini Palui bapikir napa nang dimaksud kamar muka itu, ahirnya inya paham lalu langsung mambalas manulis surat ka alamat Palui di jawa.
+ Surat kakanda sudah ulun tarima, kamar muka aman haja ulun jaga baik-baik, sabulaman ini ulun kunci tarus jangan hawatir kakanda ujarnya.
Imbah tuntung panataran Palui, bulik ka banua turun matan kapal laut langsung bulik ka rumah karna sudah rindu banar.Sampai dirumah anak bininya sudah mahadang.Anaknya nang pamulaan malihat Palui langsung bakuriak :
- Papi datang, papiku datang ujar anaknya taimbai. Kada lawas kaluar bininya matan dalam rumah lalu umpat bakuriak :
+ Pipa datang, pipa datang......pipaku datang ujar bininya.

= Kalu kaya itu suruh kakanakan manukar kuwaci supaya inya mangitih sabarataan karna aku handak manyandarakan pipa di kamar muka, ujar Palui sambil maragap bininya. emhati KAMUS SI-PALUI