Kisah Bahasa Banjar:

KAMUS SI-PALUI

Mandulang di Kuburan


BIARPUN sudah disariki bini wan ditumpalak kakawalannya Palui tatap haja kada hakun baampih jadi tukang tabuk kuburan.Banyak alasannya kanapa inya wan kakawalannya tatap handak manarusakan gawian itu.Kalu samalam manabuk kuburan kadada upahnya karna gasan mintuha lambung Palui, maka pangalaman lainnya bubuhannya bauntung banar.Yaitu wayah manabukakan kubur kaluarga Haji Duraup, disamping dibari upah ganal cukup gasan baminggu-minggu juga dapat hadiah waris baju salawar wan tapih nang masih hanyar-hanyar.
+ Nang kaya kusambat samalam bahwa kita maambil upah manabuk kubur ini gasan gawian antara haja, karna siapa tahu razaki kita maka sutu saat kaina wayah kita manabuk tanah mandapat gumpalan amas sampai satangah kilu, ujar Garbus maulangi panderannya.
= Aku katuju haja tujuan kita itu tapi kita harus sanggup bamuha rinjing, tahan supan jadi huhulutan urang sahut Palui.
- Nang panting kada cuma tahan bamuha rinjing tapi jua tahan batalinga lilin, jawab Tulamak.
+ Tapi gawian kita ini tamasuk kreatif, kawa bawiraswasta sahut Garbus mahimungi diri saurang.
Imbah urang tahuan gawian bubuhannya manabuk kubur, maka kada urang kampungnnya haja nang mangiyau tapi urang kampung lainpun minta tulung jua.Apalagi gawiannya ini sudah diatur baik, disamping baisian alat-alat cangkul, sakrup, linggis, gargaji juga bubuhannya sudah baisian masin kompa gasan manyedot banyu.
= Bus ujar Palui, malam tadi aku disuruh urang manabukakan kubur kaluarga Haji Duraba.Kaluarga sidin itu sugih banar lalu minta tabukakan kuburan diparak rumah sidin haja, ujar Palui.
+ Nah, ini kasampatan kita, kalu kaina di daerah situ ada tambang amasnya kita bisa sugih bakajut, apalagi tanahnya karas kada parlu mamakai kumpa banyu lagi, ujar Garbus.
Isuknya tulakan bubuhannya ka rumah Haji Duraba, lalu ditunjukkakan tanah gasan kuburan kaluarganya di balakang rumah. Sampai tapaluh lihir bubuhannya mancangkul, manyakrup, manyundak karna tanahnya karas banar.
+ Tanah karas ini banyak lapisannya, biasanya musti ada banda baharaga kaya barang antik, wasi tuha atawa kadut amasnya. Ayu Lui, ayu Mak tabuk tarus dalami lagi satangah meter, ujar Garbus bakuriak matan atas.
Palui, Garbus, Tulamak makin bahimat manyundak, lalu..... kadangaran bunyi malitak, tak.....tak....
+ Jangan talalu gancang manyundaknya kaina bisa rusak atawa patah karna kadangaran bunyi garincing malitak, pasti itu bunyi tambaga atawa amas, ujar Garbus.
= Kalu kaya itu kita cagar sugih bakajut, sahut Palui.
+ Ayu ikam badua Palui wan Tulamak hahar bagamat, imbah dapat langsung haja tarik ka atas ujar Garbus manyuruh.
= Naaahhhh......ini pasti tampurung amas ujar Palui,sambil bahimat manarik wan Tulamak.
= Astaga, sakalinya lain tampurung amas tapi tangkurak kapala manusia, tangkurak kapala.....ujar Palui bakuriak katakutanan sambil maluncat kaatas malapas tangkurak nang sawat diragapnya.

+ Basabarlah Lui....... nang ngaran gawian macam-macamlah gudaannya.Memang kita tasalah, amun handak mandulang mustinya di gunung atawa di guntung kadanya di kuburan, ujar Garbus mahimungi mangganalakan hati kakawalannya. emhati/alex KAMUS SI-PALUI