KAMUS SI-PALUI

Pak Mantri

PULUHAN tahun Palui madam ka banua urang, hanya sakali dua kali haja bulik ka kampung ziarah ka kubur abah umanya.Inya talawasi madam karna baangkut sarumahan wan anak bini jadi tangalih sadikit bulikan. Tapi walaupun jarang banar bulik tatap haja satiap hari mangirimi kul wan aruwah abah umanya.Kul itu samalam dikira kul gasan ganganan sakalinya sadakah kulhuallah.
- Aku katuju haja ikam madam ka banua urang gasan mancari pangalaman apalagi awak masih anum.Di pamadaman biasanya kita tacangkal bausaha karna bila kada bausaha baarti kada kawa makan.Kalu di banua bacari atawa kada bacari tatap haja makan kada cagar kalaparan karna ada nang diumpati ujar mintuhanya.
= Salain kita bacangkal bacari dibanua urang itu, sakit atawa sanang kada kalihatan kaluarga jadi kita kada supan. Kaya aku ini bamacam-macam gawian nang sudah bisa kugawi.Banyak pangalaman ba arti banyak kaahlian ujar Palui baagak wan Garbus.
+ Kalu kaya itu kami umpatai balajar wan ikam napa nang bisa kami gawi nang kawa mandatangakan duit gasan baruku ujar Garbus.
= Gawian di kuta itu macam-macam kada kawa ditiru disini, jadi makelar atawa manangkulak. Karna kita disini musti kada sampai hati manangkulaki papadaan sahut Palui.
IMBAH Palui badadapatan wan kakawalannya di banua,lalu babulan-bulan kada muncul lagi di warung.Rupanya inya bapatak di rumah baulah kandang, mambarasihi halaman wan mambaiki palatar.
+ Kamana kawal kita si Palui nang bunyi harat banyak pangalaman bagawi di kuta ujar Garbus.
- Aku kada tapi parcaya panderannya karna jaka hidup di kuta itu nyaman musti inya kada bulik ka banua sahut Tulamak.
+ Nah...... itu anaknya, cuba takuni kanapa maka abahnya kada cangul-cangul mangawan kasini ujar Garbus.
- Ooooo si Anang kamana abah ikam pina bapatak dirumah tarus, handak jadi habib kalu bahalwat siang malam ujar Tulamak.
= Abah lagi sibuk wan gawian manarima pasin, wayah ini sidin rami basusuntikan sahut anak Palui.
+ Wah pantas haja tadi banyak urang lalu disini, lalu kutakuni handak kamana.Lalu dijawabnya handak rumah mantri ujar Garbus.Tapi aku kada manakuni handak karumah mantri siapa ?
Eeeee.......sakalinya ka rumah mantri Palui.Rupanya Palui di banua urang itu umpat balajar basusuntikan lalu mambuka praktik diwadah kita sini ujar Garbus. Ayu kita ilangi, kabalujuran kapalaku asa ngalu-ngalu, mungkin inya bisa mambari ubat atawa manyutik ujarnya pulang.
Lalu Garbus Tulamak wan Tuhirang tulakan karumah Palui handak mambuktiakan apakah bujur inya jadi mantri.
+ Lui ujar Garbus, tulung ubatiakan aku makin barancak batuk apalagi bila malam dingin-dingin ujarnya.
= Aku kada bisa maubati, gawianku basusuntikan jawab Palui.
- Kami disuntik hakun haja asal waras pak mantri ai sahut Tulamak wan Garbus.
= Nang kusuntik kada manusia tapi hayam, hayam garing nang kada balawa, panyakit lamah atawa mencret ujar mantri Palui.
+ Oooooo, sakalinya ikam “mantri hayam”, pantas haja di palatar banyak urang mahadang baragapan hayam.Kukira handak manjuali ikam sakalinya handak manyuntik hayamnya ujar Garbus kakalahan lalu tunggal ikungan bulikan.[emhati/tamaz]KAMUS SI-PALUI