KAMUS SI-PALUI

Manjapai Muha Mintuha


BILA bubuhannya batamuan baik di gardu maupun di warung pasti banyak nang dipanderakannya, apalagi bila sampai baminggu-minggu kada badapatan.Memang salawas sudah babinian ini bubuhannya kada sama kaya masih bujangan.Kalu dahulu kawa haja bagadang sampai subuh maka wayah ini imbah isya sudah harus bulikan karumah masing-masing kacuali bila ada urang basaruan.
Malam itu bubuhannya bapander kahulu kahilir sampai bahaharatan mangalahakan mintuha.Banyak banar bahan panderannya baik nang lucu, nang pamalar wan nang baik hati.
+ Aku ujar Garbus, balum satahun balaki babini sudah ditukarakan mintuha sapida mutur gasan maujek.
= Bujur haja ikam ditukarakan sapida mutur tapi nyatanya saban bulan mambayar keriditannya.Kalu urusan mangaridit kada usah mintuha nang maurusnya, urus saurang bisa haja sahut Palui.
- Kalu aku salawas balaki babini ini tanyaman sadikit karna anak mintuha saurangan haja, anak tunggal makanya rumah sidin aku nang manguasainya sahut Tulamak.
= Aku akur wan Tulamak.Cuma aku kada katuju doa ikam Mak ai nang manyuruh mintuha lakas mati supaya kawa mawaris harta sidin.
+ Sual nasib kada sama Lui i, baik aku maupun Tulamak tamasuk ikam saurang kulihat pina rancak banar disariki mintuha karna pangulir wan landung bangun, ujar Garbus.
= Sual disariki kadada masaalah karna aku sudah dianggap sidin paling pamintarnya di rumah atawa di kaluarga, ujar Palui.
- Karna ikam dianggap pamintarnya maka ikam jua nang rancak mamintari sidin.Kaya maurus segel tanah nang ungkusnya saratus lalu ikam padahaakan lima ratus, kaya jua ungkus mahidupi SIM atawa STNK nang sudah ada tarifnya tatap mintuha ikam bunguli.
= Maklumlah sidin buta huruf kada bisa mambaca maka sakahandakku mangaramputi sahut Palui.
+ Kalu sidin panyarikan kawalah ikam mambalas, umpamanya manjapai muha sidin ujar Garbus mamanasi.
= Wah gampang, sudah biasa kugawi sahut Palui baagak.
+ Kaya apa Lui caranya Garbus batakun.
= Wayah itu aku baminggu-minggu garing.Rupaya malihat aku garing, mintuhaku saban hari mandatangi mambawaakan macam-macam makanan.Nang ngaran liur garing maka biar makanan nyaman kada kawa jua managuknya ujar Palui.Lalu manakuni macam-macam napa nang kuhandaki pasti dikabulakan sidin.Jadi wayah itu aku tahu bahwa sidin sayang banar wan aku, takutan kalu aku mati lalu anaknya jadi janda.Wayah itulah aku manggawi sidin.
- Kaya apa cara manggawinya Lui ujar Tulamak.
= Lalu aku pura-pura garing banar, baarunuhan minta uruti, biniku manyuruh aku bazikir. Wayah kakaknya si Bainah bailang lalu manakuni pinandu hajalah wan inya ujar bininya.Lalu kujawab kaaada pinannnduuu..... ujarku. Imbah itu biniku bakiyauan abah umanya mamadahakan aku garing bangat,lalu batakun pulang siapa nang ada dihiga ini ujarnya.
Imbah bagamat kuhahar muha sidin, kaning, kupicik-picik hidung sampai kajanggutnya, lalu biniku batakun pulang :
= Pinandulah, siapa nang ikam japai tadi ujar biniku batakun.Lalu kujawab sambil manggitir, kalu kaadaaa salaaaahhh itu tadi tuan guru ujarku.
- Salah.... nang sampiyan japai tadi lain tuan guru tapi abahku, mintuha sampiyan jua ujar biniku.
= Maafakanlah bah, ulun minta rila karna banyak kasalahan wan sampiyan tamasuk manjapai muha sampiyan, ujarku minta maaf.
+ Dasar harat ikam Lui ai banyak akal kawa mamusut muha mintuha, ujar Garbus wan Tulamak maambung Palui nang kada hakun kalah bila bapapanderan. emhati KAMUS SI-PALUI