Kisah Bahasa Banjar:

Nasi Tambah

SUDAH jadi kabiasaan bubuhannya bila malam jumahat pasti badadangar dimana ada urang basalamatan, lalu masing-masing bahabar supaya jangan katinggalan.Tapi dibalik itu urang kampung katuju jua manyaru bubuhannya karna disamping mambanyaki urang juga gasan maramiakan.

Wayah saruan di rumah Haji Zakaria, si Palui talambat datang makanya inya tapaksa bajalan saurangan haja. Wayah inya masuk ka rumah haji Izak urang sudah hibak, lalu inya papalingau mancari wadah duduk.Karna kadada lagi wadah puang maka Palui tapaksa duduk dihiga Garbus.

= Umai Bus, panyaruan banar ikamlah.Mana anak-anak ikam pina manyaurangan haja karna biasanya bila ada urang baaruhan ikam pasti maangkut anak buah, ujar Palui manyindir.

+ Kalu sama haja kada usah basisindiran Lui ai, ikam pang samalam manyupanakan banar sampai katahuan mambarakat kalalepon di kupiah balelehan gulanya dihiga talinga ujar Garbus mambalas.

= Kira-kira kita sama haja amalannya bila malamnya ada nang basaruan pasti siangnya baastilah balapar supaya kawa gancang makan, ujar Palui lihum.

+ Alhamdulillah, itu ngarannya razaki jangan ditulak makanya dipapalaakan supaya urang nang manyaru himung karna hidangannya dimakani sahut Garbus.

IMBAH tuan guru tuntung mambaca doa Garbus baucap : Ayu Lui tangguh napa makanannya ujar Garbus.

= Aku yakin makanannya pasti bamacam-macam masakannya karna sidin urang sugih pamburung batubara di Paringin sahut Palui.

- Silakan makani, ada kareh kambing, hayam masak habang, daging, sambal gureng hati, capcai, sup, acar, ujar tuan rumah.

= Ayu Bus bahimat makan ujar Palui manyuruh Garbus sambil muntungnya kiyap-kiyap mamamah nasi.

+ Aku sudah dua kali batambah, sudah rasa buntau parutku sahut Garbus.

= Lakasi batambah pulang kawani aku karna aku masih asa hihilapan kanyamanan ujar Palui.

Tuan rumah maklum banar bahwa kakawalan Palui ini tamasuk raja-raja makan maka disurungnya pulang babarapa piring iwak tambahan.Ayu Lui, Bus,Mak kada usah basusupanan ujar Haji Izak.

+ Ulun sudah kanyang banar kada kawa lagi manambah ujar Garbus sambil cangang ka anu Palui nang pina masih lahap banar.Garbus paham bahwa Palui handak haja batambah lagi karna pina sasirit-sirit ka nasi tambah disubalahnya.

= Palui manggamit Garbus sambil bakijip mambari tanda wan muntungnya nang masih kiyap-kiyap supaya minta ambilakan nasi tambah nang ada disubalahnya.

+ Sakali ini ikam kubalas Lui ai karna tadi ikam mamadahakan aku katuju bila saruan saparanakan.Napa Lui ujar Garbus batakun.

= Uuuu.....uuuuu.....ujar Palui manunjuk manyuruh ambilakan nasi tambah.

+ Garbus paham haja tapi inya handak mangalahakan Palui lalu diambilakannya kobokan pambasuhan tangan nang parak nasi tambah tadi langsung manjulung ka anu Palui.

Palui bakuling mamadahkan lain tapi langsung disahuti Garbus Nah.....Lui ininah pambasuhan tangan nang ikam minta, ayu ja basuh barasih-barasih supaya kada babau kambing ujar Garbus.

Palui kada kada bakutik lagi, supan dicangangi urang sabarataan karna inyalah nang palalawasnya makan.Imbah babasuh tangan Palui langsung manarik tapih Garbus bahimat manyapuakan tangannya nng basah.

= Biar aku kalah tasupani tapi parutku kanyang tahan dua hari kada makan ujar Palui. emhati/judin