Kisah Bahasa Banjar:

Babini Dua

MATAN lagi halus bubuhan lima sakawan Palui, Garbus, Tulamak, Tuhirang wan si Endek kada saling pisahan.Bubuhannya takumpul kada karna bakaluarga tapi hanya karna hidup sa kampung.Tapi walaupun demikian bila dicari-cari silsilahnya pasti ada jua kancur jarangaunya, paling kada matan datu padatuannya nang mula-mula mandiami kampungnnya itu.

Wayah parai bagawian di pahumaan karna musim kamarau panjang saban baisukan bubuhannya takumpulan diwarung pakacil Isul.

+ Sudah babulan-bulan ini kita asa ada nang kurang ujar Garbus baucap wan kawannya Tulamak,Tuhirang wan si Endek.

- I’ih sahut Tulamak karna sudah babulan-bulan ini jua si Palui kadada mangawan disini.

= Ujar habar Palui ka Gambut lalu ka Tamban mailangi kaluarganya sahut Tuhirang.

+ Apapun alasannya aku tatap kada parcaya wan Palui karna inya rancak banar mangaramputi kita.Bila inya wayah sakit lalu baadu-adu wan kita tapi bila wayah nyaman maka inya kada tahu-tahu lagi wan kita sahut Garbus.

- Aku ada jua mandangar habar angin bahwa sudah sabulan ini Palui kawin lagi ujar Tulamak.

= Kalu habar itu bujur artinya Palui ganal hampadal wani malawan bini, kada kaya bubuhan kita ini samunyaan takluk wan bini ujar Tuhirang.

+ Kalu aku kadanya wani atawa kada wani wan bini tapi nang kupikirakan kaya apa mambarimakaninya.Apalagi ujar urang bila babini dua itu banyak bakaramput, ka anu nang tuha bapadah lain wan ka anu nang anum kaya itu jua.Jadi saban hari bakaramput, saban hari baulah dosa sahut Garbus.

Kada lawas imbah bubuhannya mamander Palui, mancungul inya kaluar matan higa warung sambil baucap assalamu’alaukum......

+ Panjang umur ikam Lui ai, hanyar kami mamander ikam nang sudah babulan-bulan hinip kada saling kaluaran.Bujurkah Lui ikam hanyar kawin pulang, babini anum ujar Garbus batakun.

= Kabalujuran ada nang hakun dimadu wan biniku hakun haja karna inya handak mandapat anak, maklumlah biniku itu mandul sahut Palui.

- Nyaman ai baisi pahumaan mandua buting ujar Tulamak.

= Aku kada tahan jua karna inya sama-sama minta adil, makanya balum sabulan sudah asa pagat pinggangku sahut Palui.

+ Kalu kaya itu kami handak minta ilmunya supaya nyaman kaya ikam itu Lui ai ujar Tuhirang.

= Baiknya jangan ditiru wan jangan diumpati gawianku nang sudah talanjur ini, nyaman dilihat sakit manyandang ujar Palui.

- Napa sakitnya Lui, dua rasa, dua alam ujar Tulamak.

= Ini nah.... lihat kapalaku,lungur sabukuan sahut Palui sambil mambuka kupiahnya.

+ Kanapa maka lungur Lui, apakah bapusut wan kapala manggawinya ujar Garbus.

= Bini anumku katuju banar mancabutiakan hubanku, tapi bini tuha malah sabaliknya katuju banar mancabuti rambutku hirang, maka ahirnya lungur sakapalaan ujar Palui sambil takuringis kapadihan kada paluh.

+ Kalu kaya itu kami kada jadi manuruti ikam Lui ai, biar baisi bini saikung bila handak jua marasani dua pahumaan tapaksa ai bagamat manukar nang bakikiloan haja ujar Garbus sambil mangalangkang tatawaan. emhati/hiya