Kisah Bahasa Banjar:

Bapintaan


+ Kanapa kawan kita si Palui imbah datang matan madam di banua urang pina makin basandu uja Garbus.
- Aku taumpat jua bingung, samalam wayah pamulaan badapatan di rumahnya pina rami haja panderannya.Tapi imbah samingguan ini banyak banar parubahannya, banyak bakurung di rumah hanya sakali-sakali haja umpat bakarubut kita di warung ujar Tulamak.
+ Mungkin ada hal-hal nang jadi pikirannya, mungkin jua imbah inya bulik ka banua ini kada dibulihakan lagi tulak ka kuta sahut Garbus.
- Baiknya kita ilangi baimbai-imbai gasan mahibur hatinya sambil umpat batakun napa nang jadi pikirannya ujar Garbus. Lalu bubuhannya tulakan bailang ka rumah Palui, ada nang mambawa gumbili, mambawa kuini wan ada jua nang babawaan manisan.
+ Ui Lui, kanapa maka ikam pina basandu mustinya malah bagambira tatamuan dangsanak-dangsanak wan kaluarga lainnya, tamasuk kami kawan bahari ujar Garbus.
= Aku ada masaalah ganal Bus ai, jadi pikiran siang malam nang mulanya kada kukira sama sakali ujar Palui.
- Kami sabarataan ini kawan bahari jua nang samuak saliur makanya bila ikam ada masaalah cuba pang ungkai, kaina kita garumuti manuntungakannya ujar Tulamak.
= Aku bulik ka banua ini sabujurnya handak ziarah haja tapi sakalinya bubuhan kaluarga Zaleha nang di hulu sana mamaksa manyuruh lakas badatang, ujar Palui.
+ Itu artinya habar baik makanya ikam jangan basadih mustinya harus bagambira sahut Garbus.
= Aku balum siap kacuali manyiapakan awak haja ujar Palui
+ Jangan hawatir Lui ai, kaina kami barunding wan kakawalan mambantu ikam sapanuhnya sahut bubuhannya.
IMBAH bubuhannya bamufakat, lalu babagi tugas ada nang manukar bakul, ember, ada nang manulis papan supaya jalan bagamat lalu ada jua nang mainjam mik langgar.
+ Ikam Mak ai tukang umumakan supaya mutur-mutur nang lalu disini bisa manyumbang,Tuhirang wan Tukacut batupi purun sambil mahantai pambarian urang ujar Garbus.Barapa haja urang mambari ikam harus maucapakan tarimakasih wan langsung doa-akan supaya lakas naik haji, baiman wan parazakian mudahan masuk sorga..... ujar Palui mambari patunjuk.
- Hallo, hallo.....mohon sumbangan sukarela gasan kasajahteraan anak yatim piatu, bapahala sampiyan manulung sasama ummat ujar Tulamak kukuriak.
+ Alhamdulillah, samingguan bapintaan takumpul duit ratusan ribu rupiah.Aku kada tasalah kalu Mak bapintaan manyambat gasan anak yatim piatu, karna si Palui itu sudah kada ba abah uma lagi ujar Garbus.Ayu kita tulakan karumah Palui manjulung hasil bapintaan ini gasan jujuran wan basalamatannya ujar Garbus mambawai kakawalannya.
= Tarimakasihlah....... bubuhan ikam baik hati sabarataan kawa mancariakan duit tambahan gasan aku kawin ujar Palui sambil maragapi kakawalannya tunggal ikungan karna kasusukaan. emhati