Kisah Bahasa Banjar:

Sambahyang Hajalah ?

SALAWAS jadi Katua RT maka Palui rancak banar umpat panataran atawa paninjauan baik di propinsi maupun kaluar daerah. Panataran atawa paninjauan itu paling lawas lima hari sampai saminggu jadi kada tapi mamuyaki karna tabanyak bararamian dari pada balajarnya.

Kalu sual balajar aku tabanyak angkat tangan maklumlah sudah tuha, utak kada kawa manarima lagi ujar Palui. Tapi karna tugas disuruh pambakal atawa camat maka sakakawanya tapaksa jua digawinya karna supan manulak dipadahakan urang kada sanggup jadi katua RT.

+ Lui ujar Pambakal, ikam ditugasakan pulang maumpati kursus katarampilan di Jawa.Kursus ini babida wan panataran karna waktunya talawas sadikit kurang labih talu bulan, ujar Pambakal.

= Kalu ditugasakan ulun siap manarimanya sahut Palui.Tapi kalu sampai talu bulan itu ngarannya kada kursus tapi sakulah pambakal ai sahut Palui.

+ Kursus ini panting Lui ai, kalu kaina ikam kawa jadi pambakal manggantiakan aku ujar Pambakal.

IMBAH basiap-siap Palui mangiyau bininya lalu bapadah handak tulak sambil bapasan jagalah diri baik-baik, kaya itu jua kakanakan jangan sampai taganggu sakulahnya.Di wadah kursus Palui tamasuk nang disanangi urang sampai inya diparcaya jadi katua kalumpuk.Walaupun di kursus itu saraba nyaman tapi Palui tatap kaingatan wan anak bini di banua karna sama sakali balum biasa tapisah salawas itu.Wayah kursus tuntung imbah malam panutupan

Palui paling pandahulan bulik karna sudah dandaman banar. Imbah sampai di rumah Palui langsung mangatuk rumah dan dibukai ulih anaknya nang pahalusnya.

= Nak, ujar Palui.Mana mama ikam ?

+ Mama ada dibalakang rumah lagi manampi baras, sahut anaknya sambil manarik tangan Palui mambawai kabakalang.

= Mama sihat-sihat hajalah ujar Palui batakun.

+ Inggih bah ai, sidin sihat banar sahut anaknya.

= Tapi dalam sahari dua ini mama ikam sambahyang hajalah ujar Palui ma anyaki batakun.

+ Inggih bah ai, mama rajin banar sambahyang jawab anaknya.

= Alhamdulillah........ masuk sorga jua mama ikam itu nak ai ujar Palui.Sambil dalam hatinya baucap syukur......syukur...... karna talu bulan tapisah sudah dandaman banar, artinya aku kawa malabuh jangkar, ujarnya.Jaka biniku kada sambahyang artinya naik bandira habang makanya kapal kada kawa marapat.

= Uuiiii...... umanya ujar Palui mangiyau.Siang ini sudahlah ikam sambahyang zuhur ujar Palui.

- Sudah abahnya ai, sahut bininya sambil maragap Palui.

= Kalu kaya itu, suruh pang kakanakan kita manukarakan unjun ka pasar Kartak Hanyar sana, aku handak banar maunjun ujar Palui.

- Kanapa maka kajajauhan manyuruhnya ujar nang bini.

= Supaya inya lawas bajalanan jadi kita talawas jua badandam dandam di kalambu ujar Palui.

- Haannnnn......abahnya kada kawa manahan talu bulan tapisah ujar bininya sambil basandar ka bahu Palui. emhati/fulah