Kisah Bahasa Banjar:

Mauyahi Hayam

BAISUKAN itu wayah bubuhan Garbus, Tulamak wan Tuhirang dudukan diwarung marasa ada nang kurang karna sampai bajam-jam bapapanderan kadarat kalaut balum kalihatan jua si Palui. - Biasanya bila ada si Palui pasti banyak kisah lucunya, karna inya pina piragah pamintarnya bila bahaharatan kisah ujar Tulamak mamulai pander, + Oooo ya aku hanyar ingat, malam kaina Palui dapat giliran arisan yasinan, jadi mungkin inya lagi sibuk tulakan ka pasar wan bininya bututukar gasan makanan malam kaina ujar Garbus. - Kada biasa tahabar Palui bagaganalan baaruhan, paling-paling gabin barandam atawa kulak pisang sahut Tulamak. + Baarisan apalagi babacaan yasin kada harus bahaharatan makanannya tapi nang panting kita husyu malaksanakannya sambil basilaturahmi sa RT-an sambung Garbus.Karna kalu bahaharatan cagar takur nang jadi tuan rumah ujarnya pulang. - Tapi amun ada jua nang manyadiaakan makanan nyaman, syukur jualah nyaman rakungan sahut Tulamak. KADA lawas inya bapapanderan, cungullah si Palui bapuntalan tapih di pinggang sambil hingak-hingak kauyuhan. + Kanapa Lui pina bahingal, apakah ikam kauyuhan manggani’i bini ka pasar batutukar makanan gasan malam kaina ujar Garbus. Palui kada langsung manjawab tapi inya langsung mamasan teh es, lalu manginum dua talu hirupan sambil baucap : = Aku kauuyhan kada karna manggani’i bini ka pasar tapi kauyuhan handak manangkap hayam gasan kada sing dapatan.Ujar biniku gasan mahimat karna tamasuk pengketatan, baiknya malam ini makanannya sup hayam haja.Jadi aku sudah batuhuk manyasahinya tapi kada dapat jua, rupanya tamasuk hayam liar karna saban malam guringnya kada di kandang tapi di puhun nangka, ujar Palui. - Gampang Lui, ujar urang bahari kalu handak manangkap hayam supaya diunjai wan bawang habang bakuyak, lalu imbah mancium inya langsung mauk ujar Tulamak manyaranakan. = Sudah jua kucubai bapuluh-puluh bigi bawang habang tapi kada kawa manangkapnya, bahkan hayamnya makin liar sahut Palui. + Aku ada pandapat ujar Garbus handak manggawi Palui.Kalu nang nyaman manangkap hayam jangan wan bawang tapi wan uyah.Ikam sadiakan uyah saganggam lalu langsung ikam andaki uyah itu di kapalanya, imbah itu langsung haja tangkap batisnya, ujar Garbus. = Ooooo..... jadi hayam itu diuyahi sabalum disumbalih ujar Palui kada hakun kalah sambil tatawa lalu langsung bulik handak manggawi apa nang disaranakan Garbus. KADA lawas..... datang pulang Palui ka warung, muhanya pucat hinaknya makin hingak-hingak pina handak siup kauyuhan. + Kanapa Lui, sudah dapatlah hayamnya ? ujar Garbus. = Sudah jua kucuba, uyahnya kada cuma saganggam tapi bakilu- kilu kada kawa jua manjujup apalagi manangkapnya sahut Palui. - Waahhhh...... ikam digawi bubuhannya Lui ai ujar Tulamak, biar sabakul uyahnya ikam hawarakan ka hayam kada cagar kawa manangkapnya.Karna amun ikam kawa ma-andak uyah di kapala hayam ba-arti ikam kawa manangkapnya ujar Tulamak. = Aduh....aku digawinya ujar Palui sambil bamamai, talanjur purun kakawalan, kawan sudah sakit tambah disakiti ujarnya.Kaina cagar ada haja babalasannya ujar Palui mahalunyur bulik kada saling padahan....... emhati/rania