Kisah Bahasa Banjar:

Batatangguhan

SUDAH biasa bubuhannya bila kadada gawian pasti takumpulan di warung, tapi baisukan itu bubuhannya taimbai dudukan dipinggir sungai handak mandian. + Aku ingat wayah di warung samalam ikam manyurung tatangguhan, manyuruh manangguh mana itik laki wan mana itik bini.Tapi jawaban kami samunyaan salah tarus, ujar Garbus. = Papacahan jawabannya nyatanya nyaman haja,nang diatas pasti itik laki wan nang takuciak dibawah pasti itik bini sahut Palui maulangi papacahannya. + Kalu kaya itu aku handak mambalas Lui ai ujar Garbus. = Ayu ja surung kaina aku manangguhnya sahut Palui. + Wadah apa,bila dibuati pasti mati urangnya ujar Garbus. - Aku umpat manjawab ujar Tuhirang, wadah nang dibuati pasti mati urangnya kada lain kawah jarangan banyu nang paharatan manggurak ujar Tuhirang. = Jawabanku parak sama wan Tuhirang ujar Palui.Wadah nang pasti mati urangnya bila dibuati adalah wadah urang mamasak aspal gasan jalanan ujar Palui. + Jawaban ikam salah samunyaan.Jawaban nang bujur adalah keranda urang mati, karna nang babuat disitu pasti urang mati ujar Garbus baampik sambil marasa kawa mambalas kakalahannya. = Ikam jangan talalu lakas ba-ampik karna handak kubalas pulang, sakali ini tataruhannya sabungkus ruku ujar Palui. + Tapi rukunya harus cap kapal api supaya kada mangantuk jaga kamling sahut Garbus. = Karna bubuhan ikam tamasuk katuju maunjun maka cuba tangguh mana iwak laki wan mana iwak bini ujar Palui. + Gampang sahut Garbus.Iwak laki itu bila diumpani cacing pasti inya mamilih cacing bini, dan sabaliknya iwak bini pasti mamakan cacing laki ujar Garbus. - Jawaban Garbus itu bujur saratus persen ujar Tulamak umpat malawanakan, karna itu hukum alam nang laki katuju kabibinian wan nang bibinian katuju lalakian ujarnya. = Tatangguhan ikam badua salah, biarpun sudah hukum alam tapi ada jua kada cucuknya.Kaya banua kita ininah manurut hukum alam mustinya dua bulan nang lalu sudah harus musim hujan tapi karna tapangaruh si El-Neno maka hujannya tatunda babarapa bulan sahut Palui. + Jadi napa jawaban nang bujur ujar Garbus. = Jawaban nang bujur masih dalam panalitian sahut Palui. - Wah.....kanapa maka kaya itu ujar Tulamak. = Karna para ilmuwan sampai wayah ni masih manyalidiki, ngalih banar manantuakan mana nang cacing laki wan mana cacing bininya.Aku masih balum parcaya apakah bujur iwak laki mamakan cacing bini wan iwak bini mamakan cacing laki.Karna iwak itu bila inya lapar napa haja dihantamnya kada bapandang cacing laki atawa cacing bini, apalagi iwak tapah di Kapuas itu jangankan cacing manusiapun dihantupnya, ujar Palui batandik karna marasa manang cagar dapat ruku cap kapal api. emhati/fulah