Kisah Bahasa Banjar:

Wadai Bagincu

MULANYA Palui sama sakali kadada niat handak umpat bajalanan ka pasar wadai ramadhan tapi karna dipaksa kakawalannya maka ahirnya inya tapaksa jua mairingi.Walaupun dalam hatinya inya katuju haja bajalanan ka pasar wadai itu tapi inya handak tulak saurangan haja supaya nyaman balilihat atawa mamilih wadai nang dikahandakinya.

+ Kanapa Lui ikam pina kulir dibawai, apakah karna kada baduit.Kalu sual duit gampang kaina kuhutangi bila ikam handak baulanja ujar Garbus.

- Palui takutan disaingi, kalu taparabut langganan ujar Tulamak manyahut.

= Aku kada bapadah sugih tapi kalu cuma baulanja di pasar wadai ramadhan ini aku sanggup mamburung babarapa macam wadai gasan pambukaan puasa di langgar sahut Palui.

+ Nang panting kita ka pasar wadai ini sebagai tanda umpat maharagai panitia nang bausaha mangumpul bubuhan padagang wadai khas banjar ujar Garbus.

= Nah, kalu itu alasannya aku katuju banget, karna siapa lagi nang mahargai wadai-wadai banjar ini kalu kada kita saurang nang manukarinya sahut Palui.

IMBAH sampai di pasar wadai rupanya bubuhannya tapisahan karna kabanyakan pangunjungnya.Lalu masing-masing mancari wadai kasukaannya, ada nang mamilih bingka, ada nang manukar pais, ada jua nang manukar iwak haruan baubar dan ada jua nang mamburung tapai gambut.

Palui sudah dua talu kali bulang bulik tapi balum tatukar apa-apa karna bingung kabanyakan nang dikahandaki.Sambil badiri inya manyirit urang bajual wadai amparan tatak bapisang. Kabalujuran nang bajualan itu urangnya lamak mungkal langkar banar, lalu Palui mulai baparak .

+ Ayu kak,pilihlah mana nang sampiyan handak, ujar nang bajualan manawari Palui.Ada nang bapisang, ada nang baantah wan ada jua nang balapis.Jaka kada bulan puasa bulih haja dirasai ujarnya sambil lihum.

= Amun dipandang haja sudah rasa nyaman apalagi dimakan. Aju ja bungkusakan talu hiris ujar Palui.Imbah manukar wadai wan iwak Palui langsung bulik lalu manjulung ka-anu bininya supaya dibuatakan ka piring mahadang bukaan puasa.

Imbah babunyi dauh, Palui langsung manyuruh bininya marasai wadai nang ditukarnya.

+ Aduh.....aduh....wadai nangapa ini abahnya ujar nang bini.

= Wadai amparan tatak bapisang talas, nyaman kalu wadai tukaranku ujar Palui ba-agak karna dikiranya nang bini mamuji.

+ Rasanya.....rasanya....? Kalu kada salah wadai ini pasti wadai bagincu ujar bininya.

= Mana gincunya, mana gincunya ujar Palui.Tadi sawaktu mambungkus sudah kulihati samunyaan barasih kadada gincunya ujar Palui umpat maitihi lagi kalu bujur-bujur ada gincunya.

+ Ininah.....cuba sampiyan rasai, hambar samasakali kadada rasanya, rasa hidung kucing. Aku tahu ini pasti wadai bagincu ujar bini Palui manyanyarik.

= Bagincu napa sahut Palui mulai curiga wan bininya.

+ Urang sakampungan tahu bahwa si Irus nang balu nang lanji itu bajualan wadai amparan tatak, tabal gincunya, kukurihing bila ada lalakian baparak, digudanya supaya manukari.Ayu abahnya..... mangakulah, jangan bakaramput, aku tahu ikam musti taguda wan lihumnya lalu manukari wadai ini ujar bini Palui.

= Mandangar bininya bamamai Palui kada saling bunyian lagi, imbah tuntung makan langsung tulak kalanggar. emhati/tamaz