Bagawi di Bank

+ Aku bujur-bujur umpat prihatin wan ikam Lui karna sudah ampat lima tahun bagana di kuta, sudah dapat gawian nang nyaman tapi nyatanya tabulik kabanua jua gara-gara zaman krismon, ujar Garbus wayah batamuan wan Palui di warung julak Pipir.

= Aku tamasuk urang nang pasrah Bus ai karna manjalani hidup di dunia ini sudah ada garis tangannya, sahut Palui

+ Zaman kamajuan wayah ini bahanu kada tapakai garis tangan tapi nang bujur-bujur tapakai adalah tanda tangan, ujar Garbus.

= Nah karna ada tanda tangan di surat sakti itulah maka wayahini rami dipanderakan urang adanya nepotisme, ujar Palui.

+ Bujur jua ujar ikam itu Lui ai, mustinya kalu bagawi kada usah umpat dangsanak, mamarina atau kaluarga parak lainnya.Nang panting jangan umpat bagawinya tapi adalah uncuinya, sahut Garbus.

= Kalu maharap uncuinya itu tamasuk kolusi, balas Palui.

- Kita musti saraba salah saraba kalah bila bapander wan Palui karna tapintar inya manjawab, ujar Tulamak.

+ Biar pintar biar harat tapi bahira maucir kadada jua gunanya, ujar Garbus.

= Bubuhan ikam ini manyindir aku tarus tapi sindiran itu kuanggap hiburan haja, sahut Palui.

+ Aku sabujurnya hurmat wan ikam Lui ai, karna balum talu bulan ikam bulik ka banua sudah tahabar kawa bagawi di bank kacamatan, ujar Garbus.

- Kalu kaya itu tulung pang kami kaya apa caraya supaya kawa umpat ikam Lui, ujar Tulamak karna sudah muyak jua manganggur.

= Sabujurnya aku kulir bapadah wan bubuhan ikam karna kaina dipadahakan ba-agak bagawi di bank, ujar Palui.

- Kalu bagawi di bank itu musti ganal gajinya, banyak tunjangannya, balas Tulamak.

= Alhamdulillah, sahut Palui, sual gaji dan tunjangan kada jadi pikiraku tapi nang panting saban hari kada lagi baungut di warung mangganali hutang, ujarnya.

+ Di bank mana Lui ikam bagawi karna wayahini ujar habar banyak bank nang ditutup, balas Garbus.

= Supan aku manyambatnya, kaina ditatawa-akan bubuhan ikam, ujar Plaui.

- Aneh jua si Palui ini, bagawi di bank maka supan, ujar Tulamak.Di bagian napa ikam diandak Lui, ujarnya manggasak.

= Aku manggawi bagian partamanan kantur, ujar Palui.

+ Itu musti banyak duitnya, kalu kaya itu kawa kita saban hari Sabtu santai di warung julak Pipir, ujar Garbus.

= Naahhhhh..... bubuhan ikam samunyaan salah kita, gawianku sabujurnya adalah tukang rumput, tukang kabun, balas Palui.

+ Di bank mana Lui ?

= Itu di kantur bank kacamatan, sahut Palui

- Bank napa gasak Tulamak handak tahu.

+ Itu kantur bank.......bangdes, sahut Palui lihum, lalu laju maninggalakan bubuhannya. emhati/fulah