Maling Mutur

= WAYAHINI ngalih banar mancari kaadilan, ujar Palui.

+ Biarpun ngalih tapi zaman refurmasi ini kaadilan harus ditegakkan, sahut Garbus.

= Cuntuhnya, bubuhan konglumerat wan birukrat nang nyata-nyata KKKN alias korupsi kolusi koncoisme wan nepotisme balum tadangar ada tuntutan, pamariksaan apalagi hukumannya, ujar Palui

+ Kita kada usah khawatir, Insya Allah kada lawas lagi pasti cagar ada pangadilannya, ujar Garbus.

= Mulai matan bahari, matan dahulu sampai wayahini nang rancak tadangar adalah ucapan bubuhan pajabat bahwa akan, akan dan akan........ tapi nyatanya taharap buah bungur, ujar Palui.

+ Kada gampang mausut adanya panyalewengan wan KKKN itu karna........., ujar Garbus.

= Karna....... karna tapintar maling pada patugas, ujar Palui manarusakan panderan Garbus.

+ Dunia ini bujur-bujur cagar adil bila kaina sudah datang ratu adil, balas Garbus.

= Aku rancak banar malihat urang manangkap wan mamukuli maling hayam atawa maling sipatu, sampai siup, ripu digarumuti urang sa RT-an, kasihan banar, ujar Palui.

+ Kalu malingnya dipukuli sampai siup sampai ripu dasar talanjur banar kada ingat HAM, ujar Garbus.

= Tapi itu bubuhan panyaleweng baras dolog baik sipanimbun, sipambari DO atawa nang manjual ka luar nagari aman-aman haja bahkan dilindungi dami HAM jua, sahut Palui.

+ Itulah..... dunia sudah tabalik, sahut Garbus.

= Tapi ada nang labih anih lagi Bus ai, ujar Palui. Aku rancak malihat di kuta banyak urang maling mutur tapi aman-aman haja kadada nang sariknya apalagi sampai mamukuli, ujar Palui.

+ Waahhhh...... itu pasti ada main antara si supir wan patugas, pasti ada sogok dan ganal hitungannya, sahut Garbus sambil giginya manggarigit kasasarikan. Maling mutur itulah nang harus dipukuli, diadili wan dihukum barat-barat, ujar Garbus.

= Demi HAM jua, ujar Palui, janganlah ikam talalu lakas sarik wan maling mutur, taliti wan palajarilah masalahnya, ujarnya.

+ Maling mutur harus dihumum barat kalu parlu saumur hidup, ujar Garbus mahahing.

= Kalo manurut pandapatku biarakan haja urang maling mutur itu asal inya manuruti aturan lalulintas, ujar Palui.

+ Hau.. kanapa maka dikaitakan wan lalulintas? ujar Garbus.

= Karna mamaling mutur itu sudah gawian supir, mungkin handak babulik atawa handak babiluk ka jalan lain, ujar Palui.

+ Oooo........ maksud ikam Lui, maling mutur itu adalah mamaling mutur, kukira tadi urang mancuntan mutur kaya urang mancuntan hayam alias maling hayam, ujar Garbus kakalahan dimainakan Palui. emhati/hab