Kada Basalawar

IMBAH tuntung salam sambahyang maghrib Si Palui langsung baundur, duduk basandar di tawing balakang.

+ Kanapa Lui maka pina bagagasakan duduk ka balakang? ujar Garbus marawa Palui.

= Aku kahumapan, kapanasan banar karna tadi bagagasakan jua tulak ka langgar, kamalaman banar bulik ka rumah datang di pahumaan manuntungakan gawian, sahut Palui.

- Kukira ikam handak badadas bulik kada kawa tapisah wan bini karna lawas maninggalakan, tulak ka kuta, ujar Tulamak.

= Kalu nang samacam itu kawa haja diundur sampai tangah malam atawa subuh, karna bila kasawatan bisa taganggu karna kakanakan balum guringan, ujar Palui sambil bagaya.

+ Kalu bakipas jangan talalu gancang Lui ai, karna mulai matan tadi kuhatiakan tapih ikam rancak takirap, ujar Garbus.

- Bujur Lui ai, aku mulai matan tadi jua handak managur ikam karna kulihat tapih ikam babarapa kali taungkap sampai kalihatan burung, ujar Tulamak.

+ Kanapa Lui maka sambahyang kada basalawar? ujar Garbus.

- Mungkin salawar Palui takana najis, ujar Tulamak, hingga tiap inya sambahyang salawar dalamnya salalu dipacul.

= Naahhhh........ bubuhan ikam ini katinggalan zaman karna jarang maumpati urang babacaan di masigit, ujar Palui.

+ Napa nang kami katinggalan zaman? ujar Garbus.

= Kaya ini nah, bahwa ujar tuan guru bila sambahyang haruslah batapih atawa basalawar panjang karna bila basalawar handap sambahyangnya kada sah, ujar Palui.

+ Jadi karna ajaran tuan guru itulah maka ikam bila sambahyang kada basalawar handap, ujar Garbus. Rupanya karna kada basalawar handap itulah maka kalihatan gual-gual burungnya.

= Kaya itulah tartib bapakaian bila sambahyang, sahut Palui.

+ Ikam itu salah tafsir Lui ai, ujar Tulamak. Maksud tuan guru itu bila sambahyang haruslah basalawar panjang atawa batapih supaya jangan kalihatan lintuhut. Bujur haja kada bulih basalawar handap atawa basalawar dalam karna cagar kalihatan lintuhut, ujar Garbus manjalasakan.

= Maka itulah aku kada basalawar dalam, kada basalawar handap, sahut Palui mangarasi.

+ Tapi ikam kan batapih, jadi sudah tatutup lintuhut ikam. Artinya ikam bulih haja bahkan harus basalawar handap karna lintuhut ikam sudah tatutup wan tapih, ujar Garbus.

= Oooooo..... jadi maksudnya kaya itulah Bus? Kukira tadi bila kita sambahyang, biar batapih atawa basalawar panjang kada bulih basalawar dalam makanya tapaksa kupacul, ujar Palui mangakui kasalahannya. Tapi Bus ai bila sambahyang basalawar dalam rasa kada nyaman karna sudah tabiasa bapacul, ujarnya.

- Bujur Bus ai, Palui kada kawa basalawar dalam karna inya basangkadis di pinggang wan di pipikangannya hingga rancak banar bagaru kagatalan, ujar Tulamak manyindir Palui. emhati/fulah.