Disangat Tabuan

WAYAH masih sama-sama kakanakan Palui wan kakawalannya bila mandian pasti bakunyungan di sungai. Ada nang batilasan salawar tapi ada jua nang batilanjang. Imbah dipaculnya salawar lalu disangkutakannya di batang puhun atawa digantungnya di jamban langsung bacaburan ka banyu.

+ Kanapa ikam wani banar mandi batilanjang, ujar Garbus manakuni Palui.

= Aku kada banyak baisian salawar jadi kawa dipakai gasan dua talu hari, sahut Palui.

+ Kalu kaina burung ikam dipatuk buntal, lalu kada kawa babini, ujar Garbus.

= Kukira buntal kada wani karna taharat ampunku, ujar Palui.

- Ada buntal nang wani mamatuk ampun ikam itu, ujar Tulamak.

= Buntal apa, ujar Palui manantang. Buntal pasti kada wani mamaraki barangku, ujar Palui.

+ Kanapa Lui maka buntal kada wani, ujar Garbus.

= Karna burungku sudah kukulai wan timbaku, sahut Palui.

- Pasti ada buntal nang wani, ujar Tulamak.

= Ayu sambat buntal napa, sahut Palui.

- Ada, buntal bini pasti wani mamatuknya, ujar Tulamak.

= Waahhh, kalu kaya itu cucuk ada lalawanannya, ujar Palui. + Kanapa maka dipadahakan ada lalawanannya Lui, ujar Garbus.

= Karna, burungku wan buntal bini itu sama-sama lanjinya, ujar Palui mangalakak tatawa.

IMBAH rami bapapanderan di sungai, lalu ampihan mandian, naikan ka tabing masing-masing mamuruk salawarnya. Kada lawas kadangaran Palui kukuriak kasakitan.

= Tuluunnggg.......tuluunngg..... sakit banar, ujar Palui.

- Lui, ada apa Lui maka kasakitan, ujar Tulamak.

+ Mungkin buntal bini tadi mamatuk burung Palui, ujar Garbus.

= Ininah bangsatnya maigut barangku, ujar Palui sambil malihatakan binatang tabuan-nya.

+ Makanya jangan bapadah harat bahwa kadada nang waninya mamatuk burung ikam, tanyata tabuan nang halus pada buntal wani mamangsa barang ikam, ujar Garbus.

= Untung tabuan nang manyangatnya jadi masih langkap haja barangku, jaka buntal tadi nang mamatuknya pasti aku cagar mangguliming haja kada kawa apa-apa wan biniku, ujar Palui marista.

+ Maka itulah Lui ai, kalu mandi baiknya jangan batilanjang karna salawar ikam nang digantung dibatang puhun itu tadi malah dimasuki tabuan karna dikiranya kawa diulah sarangnya, ujar Garbus mangalahakan Palui. emhati/aleks