Manjapai Kapala Pambakal

+ Sudah tahabar banar ikam Lui ai bahwa ikam wayahini jadi tukang gunting, ujar Garbus.

= Gawianku ini sabujurnya gawian tapaksa karna kadada gawian lain lagi. Dahulu sudah biasa jadi karnit tapi diampihi bos karna wayah mamarkir mutur tarampak pagar urang, sudah biasa jua bajual es tapi rugi karna musim hujan dan nang paampihan tadi bajual jaring, tapi kana sariki bini urang karna jamban wan kamar mandi amingu-minggu malingut babau jaring, ujar Palui.

- Napa nang paling rami pangalaman manggunting Lui, ujar Tulamak batakun.

= Pangalaman nang paling kukatujui adalah manggunting bibinian, apalagi bila bibinian itu langkar maka bisa kugunting sampai bajam-jam hanyar tuntung, ujar Palui.

+ Nah Lui, itu pambakal pina ampah kasini mungkin sidin handak bagunting, ujar Garbus.

- Lui, tulung aku handak marasani guntingan ikam ujar habar guntingan ikam baik banar putungannya, ucap pambakal.

= Sambil bapikir Palui manjawab, kalu sual putungan macam-macam. Gasan sampiyan ini putungan nang paling pas adalah dipapas habis alias bagundul, ujar Palui manggayai pambakal.

- Aku minta putungan kaya bintang pilem, sahut pambakal.

= Sabujurnya ulun kada wani mnggunting sampiyan takutan katulahan karna sampiyan dihurmati urang sa kampungan, ujar Palui.

- Kada apa-apa, asal jangan digaluakan bahwa ikam mangguliming kapalaku, ujar pambakal tatawa.

= Kalu piyan basarah maka tapaksa ai ulun tarima, ujar Palui. Makanya, maaflah pambakal kalu kapala sampiyan ulun suruh bahiring, ulun suruh batunduk kabawah atawa ulun suruh batangadah ka atas, ujar Palui sambil manyalimputakan kain panutup awak.

- Aku hakun haja ikam suruh kaya itu karna sasuai wan gawian ikam, tapi sabaliknya ikampun harus jua manuruti nang kusuruh karna aku sabagai pambakal, ujar pambakal mambalas.

= Napa suruhan sampiyan, ujar Palui.

- Ikam Lui ai balum baisian KTP wan Kartu Kaluarga makanya lakas-lakaslah baulah, ujar pambakal.

= Inggih, ujar Palui, ulun salakasnya baulah KTP.

- Ininah aku bayar ungkus bagunting ambil samunyaan, ujar pambakal manjulung duit Rp. 5.000.

= Tarima kasih pambakal ai, kada usah babayaran sahut Palui ambil mambulikakan duitnya.

- Kalu kaya itu lakasilah baulah KTP, kaina kada usah bayar jua ujar pambakal langsung bulik.

+ Dasar pintar ikam Lui ai, kalah diacan manang di asam. Apalagi ikam urang nang bauntung banar karna ikamlah urang nang wani manjapai kapala sidin, ujar Garbus mangalakak tatawa malihatakan akal Palui. emhati/aan