Batukang

+ Kita ini bujur haja tamasuk rakyat miskin, tapi syukur kada miskin iman ujar Garbus.

= Kanapa maka ikam bapander kaya itu Bus ujar Palui.

+ Karna aku malihat wayahini justru makin babanyak urang sugih tapi pina jarang umpat bajamaah atawa bagutung ruyung di RT-RT ujar Garbus.

= Ikam jangan buruk sangka wan warga kita ujar Palui, karna kutahu banar bubuhannya itu umpat jua tapi kita kada malihat karna bajamaahnya di masigit ganal dan gutung ruyungnya di kuta atawa di lapangan golof sahut Palui.

+ Kada usah dikaramputakan dan kada usah dibila Lui ai

karna nang ngaran gutung ruyung itu musti diparak rumah saurang atawa di RT masing-masing ujar Garbus.

= Wayahini zaman sibuk, zaman bisnis makanya urang kada sawat lagi bamasyarakat.Tulak kagawian baisukan dan buliknya parak sanja, imbah makan, mandi lalu guringan makanya kada sawat lag bapapatuhan wan tatangga kiri kanan ujar Palui.

+ Ooooo.... itulah nang dipadahakan urang hidup eguis.

Lalu kanapa maka ikam Lui parak baminggu-minggu kada kalihatan di RT, apakah ikam jua tamasuk urang eguis itu ujar Garbus pina banahap batakun.

= Aku ada haja di rumah batukan sahut Palui.

+ Batukang napa, rupanya ikam babaik rumah tarus di zaman karisis inilah ujar Garbus.Kalu kaya itu bujur haja ujar bini ikam wayah samalam aku batakun bahwa ikam batukang ujar Garbus.

= Biniku tahu bahwa aku kada saling kaluaran baminggu-minggu karna batukan, maklumlah awak sudah tuha jadi kada kawa bagawi gancang tapaksa ai mamakan apa nang ada haja ujar Palui

+ Tapi gawian batukang itu tamasuk ka ahlian nang wayahini larang upahnya.Kalu kaya itu imbah tuntung gawian ikam ini aku minta tulung baikiakan hatap rumahku karna musim hujan ini titikan banar.Garbus.Sual upahnya aku kada manawar sapanyambat ikam haja ujar Garbus.

= Upah nangapa Bus ? ujar Palui banyaring manyahut.

+ Upah batukang mambaiki rumahku ujar Garbus.

= Batukang nangapa ? sahut Palui bingung.Saumur-umur hidupku aku balum biasa mambaiki rumah, kanapa maka aku disuruh batukang ujar Palui.

+ Maka tadi ikam wan bini ikam bapadah baminggu-minggu batukang dirumah sahut Garbus mayakinakan.

= Ikam salah dangar Bus ai, ujarku tadi aku baminggu-minggu bagana di rumah karna batukan, karna awakku garing ujar Palui makin banyaring manyambat batukan.

+ Ooooo...... garing batukan, batuk kuhul-kuhul ujar Garbus.Tadi kukira ikam bapadah batukang makanya aku handak minta tulung mambaiki rumahku nang miris ujar Garbus baucap sambil mihiringakan talinganya handak mandangarakan jawaban Palui.

= Bus...... ininah ikam kuinjami bulu hayam gasan mangurik tahi talinga ikam nang pampan di talinga ujar Palui.

+ Hah.....haahhhh.....ujar Garbus pina supan. emhati/aleks