Digaji Baras

+ Wayah zaman sakit ini, aku kada lagi mamilih gawian.Gawian napa haja kusanggupi asal jadi duit ujar Garbus.

= Kita ini biar sakit, kaya apa haja sakitnya kada cagar mati kalaparan karna banyak haja makanan pangganti baras ujar Palui manyahuti.

+ Bujur Lui ai, kada kawa makan nasi karna kahabisan baras kawa diganti wan gumbili, kalu habis gumbili kawa diganti wan jagung atawa pisang bajarang ujar Garbus.

= Habis jagung wan pisang bajarang lalu bulikan ka rumah mintuha atawa kawa bahutang ka kuperasi sahut Palui.

+ Aku hiran banar Lui ai, biarpun wayahini zaman sakit tapi si Tulamak makin balamak tarus ujar Garbus manyindir Tulamak.

= Si Tulamak itu awaknya lamak kada karna makanan tapi inya banyak nginum jadi lamaknya itu adalah bantat sahut Palui.

- Jangan manyindir sahut Tulamak.Biar wayahini zaman sakit, banyak PHK tapi aku malah dapat gawian ujar Tulamak mambalas.

+ Dapat gawian dimana Mak ?

- Aku bagawi di palabuhan, umpat maurus kapal-kapal nang datang matan luar nageri mambawa baras ujar Tulamak ba-agak.

= Harat banar ikam Mak ai dapat gawian, cucuk wan awak ikam nang ganal maurus kapal-kapal baras ujar Palui.

- Makanya, aku tamasuk nang katuju haja zaman karisis baras ini karna makin barami gawianku ujar Tulamak.

+ Ikam dapat bagian napa Mak, maka pina panting banar ujar Garbus batakun.

- Bagian tukang parintah sahut Tulamak.

= Ujar habar ikam bagawi di palabuhan itu gajinya kada duit tapi digaji wan baras, bujurlah Mak ujar Palui.

- Dimana ikam mandangar Lui bahwa aku digaji baras ujar Tulamak balik batakun.

= Nang bakisah ini bini ikam saurang, bahwa saban hari ikam mambawa bulik talu sampai ampat liter baras impor ujar Palui.

+ Bubuhan kakawalan jangan parcaya kisah Tulamak bahwa inya jadi pagawai palabuhan ujar Tuhirang nang hanyar datang.

= Napa gawiannya nang sabujurnya ujar Palui.

+ Tulamak itu bujur haja bagawi di palabuhan, tapi urusan tukang angkut karung baras.Imbah tuntung maangkut karung baras lalu mulai mangariki baras-baras nang bahamburan gugur di tanah ujar Tuhirang.

= Oooo........kukira tadi ikam Mak ai jadi pagawai tapi nyatanya jadi tukang angkut barang alias buruh alias kuli ujar Palui wan Garbus mngalakak tatawaan.

- Nang panting jangan dipandang gawiannya tapi adalah hasilnya kawa dimakan kada kalaparan dizaman karisis ini ujar Tulamak manjawab kada hakun kalah.