Takutan Kada Sah

+ Pina makin babarasih Palui imbah kawin ini, ujar Garbus.

- Musti barasih haja ah karna baisukan kamarian mandi, ujar Tulamak manyindir.

= Kalu kada mandi cagar babau awak, ujar Palui.

+ Kalu kami biar dua talu hari batampungas haja kadada nang sariknya, balas Garbus.

- Maksud kami, ikam mandi itu adalah mandi basah, ujar Tulamak mahimati.

= Musti haja kalu mandi pasti basah, ujar Palui balum paham jua sindiran kakawalannya.

+ Ikam mandi basah itu artinya mandi bakubui banyu sampai ka kapala, mandi jimus karna bakas tapakai, ujar Garbus banahap baucap karna Palui balum paham jua.

= Aku sadih, ujar Palui manyahut bagamat.

+ Urang hanyar kawin itu mustinya gambira kada mungkin sadih Lui ai ,ujar Garbus.

- Kanapa ada masaalahkah,Tulamak batakun.

= Balum apa-apa, balum tamakani Mak ai, sahut Palui.

+ Kalu balum bisa apa-apa, baiknya ikam balajar wan Tulamak, ujar Garbus karna inya itu harat ka babinian.

- Nang samacam itu kada usah balalajaran, pasti cagar bisa saurang haja, balas Tulamak.

= Kadanya sual bisa atawa kada bisa Bus ai, aku jadi takutan banar, ujar Palui.

+ Si Zaleha itu sudah jadi bini ikam karna sudah ikam nikahi, ujar Garbus.

= Nah, itulah nang kutakutani.Aku takutan banar kalu kaina dipadahakan bazinah, ujar Palui.

- Palui, Palui..... sudah jadi hak saurang maka takutan, dasar pamburisit wan babinian, ujar Tulamak mahuhulut.

+ Napa sualnya maka takutan dipadahakan bazinah, ujar Garbus.

= Aku takutan kalu nikahku samalam itu kada syah, karna kada sah maka Zaleha balum rasmi jadi biniku, ujar Palui pina sadih.

- Jadi sudah talu malam balum diapa-apakanlah, ujar Tulamak.

+ Cuba kisahakan napa sualnya, mungkin kami kawa manakunakan wan tuan guru, ujar Garbus.

= Wayah nikah dihadapan Pangulu samalam itu ucapan pangulu sudah kusahuti walaupun sampai talu kali hanyar pas tapi aku katinggalan manyahut maharnya dibayar tunai jadi artinya aku masih tahutang maharnya.Kalu tahutang artinya balum punah makanya anggapanku balum sah, ujar Palui bakisah.

+ Tapi pangulu wan saksi-saksi sudah manyatakan syah, makanya ikam kada usah takutan, ujar Garbus.

= Naahhh...... kalu sudah dianggap sah, aku parmisi bulik, ujar Palui pina basumangat.

- Kanapa maka bagagasakan, ujar Tulamak.

= Aku handak manabas lalu langsung mananam, ujar Palui sambil takekeh-kekeh tatawa.

emhati