Manjamur Baju di Awak

WAYAH lagi sakulah dahulu, Palui wan kakawalannya bila hari liburan katuju banar bapiknikan. Sabalum tulakan bubuhannya rami babagi tugas wan maurus sangu gasan sahari atawa dua hari.

= Salawas ini bila kita bapiknikan kada lain pasti ka gunung atawa ka guha, kaya apa kalu kita cuba ka pinggir laut untuk mambuktiakan bahwa dunia ini bulat, ujar Palui.

+ Di mana ikam mandangar Lui bahwa dunia ini bulat kawa dilihat matan laut, ujar Garbus.

= Aku mambaca dalam ilmu bumi bahwa laut itu kalihatan kada bapinggir dan bila dipandang dari hujung ka hujung pasti bulat malingkar, ujar Palui.

- Itu panyababnya kada karna laut kada bapinggir Lui ai, tapi karna mata kita tabatas kada sampai malihatnya karna kajajauhan, sahut Tulamak.

+ Aku nang bingung Lui ai, ujar Garbus bahwa laut itu banyunya masin tapi kanapa iwaknya kada masin malah hapuk nyaman-nyaman, ujarnya.

= Itu sudah hukum alam karna bila iwak laut taumpat masin maka uyah kada payu lagi, sahut Palui mangabuau.

+ Kita ini rami bahual laut, ayu lakasi kita tulakan supaya jangan kasiangan, ujar Garbus.

= Ikam nang kada bisa bakunyung, awak ganal bulat jangan tapi ka tangah kaina ditarik umbak, ujar Palui mamadahi Tulamak.

- Kalu di tivi sinetrun Ucil "Tuyul Mbak Yul" maka aku ini adalah si kentung-nya, ujar Tulamak manjawab kada hakun kalah.

+ Nah, pas banar jawaban ikam itu Mak-ai.

Kada lawas kadangaran suara Palui kukuriak minta tulung,

tuluunngg......tuluunngg...... ujarnya. Rupanya Palui nang hanyar mamadahi Tulamak, tagulung-gulung di pasir dihantam umbak.

- Nah Lui, ikam ini bapadah harat tarus sama ujar paribahasa kaya "upak mamadahi mayang", ujar Tulamak mahuhulut Palui.

= Aku minta maaf Mak ai, sakalinya di pinggir laut ini bujur bahantu kada bulih bahuhulutan, ujar Palui basah kuyup saikungan.

+ Ayu lakasi pacul baju salawar ikam supaya dijamur, ujar Garbus manyuruh Palui.

= Biar kujamur di awak haja, sahut Palui.

- Lakasi pacul kaina ikam masuk angin bisa garing katulahan wan laut, ujar Tumalak manggasak.

= Biarlah aku bajamur baju salawar diawak haja, sahut Palui.

+ Kanapa maka kada hakun Lui, ujar Garbus mambujuki.

= Sambil babisik Palui baucap: Aku kada babaju singlit wan kada basalawar dalam, jadi amun kupacul cagar basupanan dan cagar banyak nang takisir malihat barangku, apalagi bibinian nang bungas-bungas itu, ujar Palui.

- Ampun ikam itu kaya burung patuk suitan, kadada urang nang manaksir malihatnya, ujar Tulamak mambalas. emhati/aleks