KAMUS SI-PALUI..

Nang Paling Manunjul

GAWIAN jadi katua RT tanyata macam-macam, tuntung sahuwaran datang pulang parintah atawa parmintaan lainnya matan pambakal wan camat.Padahal dahulu kukira jadi katua RT itu gawaiannya paling-paling manyuruh warga barunda malam atawa urusan kartu panduduk, ujar Palui dalam hati.
+ Ikam bauntung banar tapilih jadi katua RT sampai dua kali lalu dapat panghargaan sabagai katua RT taladan, ujar Garbus.
= Aku jaka tahu kaya ini ngalihnya gawian, mulai matan dahulu sudah manulak jadi huhulu agah kampung ini, ujar Palui.
+ Tapi ujar ikam jua banyak kauntungannya, kawa umpat kuliling jawa, banyak kapatuhan di kabupaten, balas Garbus.
= Aku ini ibarat sudah takacak bara kada kawa baindah lagi, supan baundur karna rasa tanggung jawab jawab Palui.
- Nah....artinya ikam sudah manghayati wan maamalakan P4 ujar Tulamak umpat bapander.
+ Disamping tanggung jawab ujar ikam dahulu gawian jadi katua RT ini adalah gawian baamal dapat pahala ujar Garbus.
= Kita sudah tuntung cacah jiwa kaluarga miskin gasan IDT maka ada pulang parmintaan Camat, ujar Palui.
+ Parintah napa pulang Lui, sahut Garbus.Kalu cagar jadi duit sanggupi haja kaina kami nang manggawinya ujarnya.
= Gawiannya nyaman haja, kita disuruh mancatat tiap warga miskin itu apa nang paling manunjul gasan dibantu, ujar Palui.
+ Kalu kaya itu kita sanggupi, kita babagi tugas.Palui di subarang, Tulamak di pasar, aku di hilr ujar Garbus.
IMBAH babagi tugas wan mandapat bimbingan matan camat lalu masing-masing tulakan.Palui imbah sampai kasubarang lalu mangiyaui bubuhan warga disana, mambari panjalasan bahwa cagar ada bantuan matan pamarintah.
= Bapak-bapak wan ibu-ibu, kita disuruh mamajuakan napa nang paling bisa kita gawi supaya dapat bantuan IDT.Maka kita harus mambantuk kalumpuk nang disambat Pokmas, ujar Palui.
- Kami saratus parsen satuju.Kalu kami bahasil dapat bantuan maka Palui kami usulakan jadi katua RT saumur hidup, ujarnya.
= Gawian nang dipilih itu harus kawa digawi,umpamanya kaya urang Martapura baulah kalalepon, di Barabai baulah apam, Amuntai wan itiknya, Kandangan bajual dudul aslinya, ujar Palui.Naahhh... sakarang ulun takunakan wan sampiyan-sampiyan “napa nang paling manunjul” disini, ujar Palui.
+ Sambil tadarau bubuhan bibiniannya manjawab, di kampung kami ini nang paling manunjul adalah ini....nah, sambil manunjuk kadada masing-masing.
= Ooooo.....jadi disini nang manunjul usaha parahan sapi susu, ujar Palui batakun karna inya balum paham.
+ Kada parahan sapi susu, tapi nang manunjul susunya, ujar bubuhan bibiniannya.Karna di kampung kami ini banyak jandanya, makanya manunjulnya ganal-ganal, ada janda kambang wan ada jua janda baranak saikung atawa dua ikung, ujarnya.
+ Kalu bubuhan Palui sapakawanan baliur kami siap haja dipara’i, biar kada bajujuran baakuran haja, ujarnya.
Palui kasisipuan kada kawa bakutik lagi gara-gara salah tafsir batakun nang manunjul maka panderan jadi layau.[emhati/aan] KAMUS SI-PALUI..