Tatinggal Saraka'at

PALUI di kalangan kakawalannya digalari santri hanyar karna sabalumnya inya tamasuk bambung kaya nang lainnya jua. Tapi barakat bimbingan mamarina wan pangalaman hidupnya nang tabanyak sakitnya daripada sanangnya maka inya batubat banar bausaha maubah kabiasaan jahilnya.

+ Kami Lui ai basyukur karna ikam wayahini pina alim banar imbah datang matan kuta, ujar Garbus.

= Aku kada tahan uji Bus ai, sakalinya hidup di kuta itu harus bahaharatan, harus wani basaing apalagi nang manyangkut duit dan harta gasan hidup, sahut Palui.

+ Makanya sudah kupadahakan bahwa harta itu adalah gala-gala iman, bila kada kuat bisa tacabur ka jalan nang salah kaya manipu, mancopet, malahung dan bahianat nang bisa manimbulakan parkalahian, ujar Garbus. Makanya kami syukur ikam bulik ka banua hakun balajar mangaji dan mandarasi kajian sambahyang.

= Tapi...... dasar utak sudah tuha, tagah jua hafalannya, bahanu tasalah, rancak jua kada ingat dan tapuntal-puntal bacaannya, ujar Palui pina sadih.

HARI ITU wayah magrib Palui kada kawa umpat sambahyang bajamaah karna kadatangan sapupunya, maka wayah Isya inya bausaha banar supaya kawa tulak ka langgar. Itupun inya datang talambat sampai bapuluh manit, bahkan wayah inya sampai ka langgar urang sudah masuk rakaat kadua, tapi inya tatap umpat bajamaah. Imbah para jamaah salam, Palui umpat jua salam.

+ Ai Lui, kanapa maka ikam umpat jua salam manuruti kami, ujar Garbus managur.

= Pukuknya aku umpat ba-imaman kaya ikam jua, sahut Palui.

- Ikam tadi kami lihat tadudi datang, talambat saraka'at umpat sambahyang isya, ujar Tulamak. Mustinya bila ikam talambat saraka'at maka imbah Imam salam maka ikam badiri pulang manambah raka'at kakurangannya.

= Tapi tadi niatku sambahyang isya ini ampat raka'at jua, sahut Palui manjawab.

+ Bujur haja niat usalinya ampat raka'at, tapi nyatanya ikam cuma manggawi tiga raka'at haja. Maka itu sambahyang ikam kada sah, ujar Garbus.

= Sah atawa kada, ditarima Tuhan atawa kada, itu tagantung Tuhan jua, sahut Palui.

- Kami ini mamander supaya ikam tahu kaya apa saharusnya sambahyang nang sasuai rukunnya, ujar Tulamak.

= Aku tarima kasih banar dinasihati, tapi baiknya jangan jadi hual karna manyupanakan banar bila kadangaran urang, ujar Palui. Aku nang tatinggal saraka'at haja digaluakan ka hulu ka hilir tapi urang nang kada saling sambahyangan itu pang kaya apa? ujar Palui mambalas.

+ Sual baibadat, ba-amal, basadakah itu tagantung iman wan taqwa masing-masing, makanya kita jangan mamander urang nang balapas sama sakali. Kami managur ikam Lui ai karna kami marasa badangsanak dan ikam sudah manyatakan batubat, ujar Garbus wan Tulamak. emhati/fulah