= Tapi biar basakit nyatanya pina banyak haja urang bararamian, bakarasmin, baulang tahun, mutur-mutur wan baju salawar pina bahanyar tarus, ujar Palui.
+ Ikam jangan talihat urang kuta haja Lui ai, tapi cubalah ikam ilangi warga kita di kampung-kampung, di dusun wan di unjut gunung sana. Kasihan, sudah ba-arit banar makannya bahkan ada nang cuma makan sakali sahari haja, ujar Garbus.
= Aku parcaya haja dan pamarintah kita sudah bahimat jua bausaha maatasinya. Ada pambagian sembako, ada sembako murah dan jua haraga baras nang diturunakan haraganya supaya masyarakat kawa manukar ,ujar Palui.
+ Biar murah haraganya tapi masyarakat kada baduit karna pancarian sakit, pahumaan rusak, mamantat gatah kada kawa lagi, makanya kada kawa manukar baras lagi, ujar Garbus. Aku ada jua mandangar habar di gunung di pahuluan sana di samping makan sakali sahari tadi ada jua nang sampai mancuntan pisang di batangnya atawa manyungkal gumbili di kabun urang. Inilah bukti bahwa hidup masyarakat kita makin basakit , ujar Garbus.
= Tapi...... aku ampun maaf, aku kada ba-agak, ujar Palui, biar pun wayahini zaman sakit, zaman karisis tapi nyatanya pamakanku tarus tarang haja makin baganal, ujar Palui.
- Kada usah ba-agak, kada usah cakah Lui -ai karna kami tahu haja pancarian ikam kaya kami jua sapamatuk sapangikih, ujar Tulamak pina sarik mandangar Palui baucap bahwa zaman karisis ini pamakanannya makin baganal.
= Makanya tadi kupadahakan ampun maaf supaya bubuhan ikam jangan tasinggung, sahut Palui.
+ Lalu napa maksud ikam pamakan makin baganal, ujar Garbus.
= Nah, dangarakan baik-baik, pamakanku makin baganal karna lihatinah gigiku sudah habis samunyaan, sudah kilum, ujar Palui sambil banganga. Makanya aku kada kawa mamamah makanan nang kumakan, makanan nang ganal-ganal tapaksa kutaguk bulat-bulat. Jadi pamakanku bujur-bujur baganal, sahut Palui sambil mangalangkang tatawa.
+ Kalu kaya itu kami ampun maaf jua Lui -ai karna kami kada paham maksud sampiyan, ujar Garbus wan Tulamak.
= Tapi biar kilum ini biniku makin katuju dan makin basayang, ujar Palui.
+ Kanapa maka makin katuju, Lui ?
= Karna biniku kada takutan lagi, kalu dahulu rancak kuigut-igut tapi wayahini inya katuju banar dilumu-lumu wan dikulum, ujar Palui kada hakun kalah. emhati/fulah
updated: 08/27/98 09:09:24 PM