Isa si Jolina Magdangal sa pinakasikat na young actress na walang ka ere-ere sa katawan. Transparent ang dalaga, on and off screen. Mapupuri mo pa ang singer-actress na ito dahil wala itong kaplastikan sa katawan. Kung ano ang tanong, sasagutin kayo ng walang bahid na kasinungalinang sagot mula sa kanya.
Like, inaamin nitong mahal na mahal niya si Marvin Agustin. Totoo ding nanliligaw sa kanya si Marvin at nagdi-date sila paminsan-minsan kahit na walang tsaperon. Kaya lang, nabigla ang dalaga ng minsan maitanong namin sa kanya kung totoo nga bang minsa'y natulog sa kanilang bahay si Marvin? Inabot na raw ito ng madaling araw, saka lamang umuwi?
"Alam n'yo narinig ko na 'yang isyu na yan sa DWST. Si Marvin daw ay natutulog sa unit ko?" Ulit pang tanong sa amin ng batang aktres.
Inumpisahang ipaliwanag ni Jolina ang insidenteng 'yon nu'ng minsa'y umaga ng makatapos sila ni Marvin sa teyping ng isang show.
"Ang nangyayari kasi, bago kami magsiuwian at matulog, may ugali itong si Marvin na sa amin muna dumaan bago umuwi sa kanyang unit. Nagpapahain yan ng makakain habang nanonood ng cable. Kasi wala pang nagkakabit sa kanila ng Home Cable."
Minsan daw ay naglalaro ito ng Play Station pagkatapos kumakain.
"So doon kami sa bahay naglalaro. Eh, one time, sa sobrang pagod, nakatulog sa sofa sa sala. Pero kasama ko noon ang barkada ko at si Meryll.
"May kalaro ako noon kaya hinayaan ko nalang siyang humilata sa sala. E, natapos kami sa Play Station ng 3 o'clock ng umaga. Kaya nu'ng pag-uwi ng mga barkada ko, nagpaalam na rin siya.
"Totoo iyon. Natulog siya sa amin minsan, pero may kasama kami noon." Kaswal pang lahat ni Jolina.
Kasi nga'y hindi naman malaking isyu pag si Marvin ay bumibisita sa kanila kahit na disoras pa ng gabi.
"Minsan pag gabing-gabi na 'yong daan niya sa bahay hinahayaan nalang ng mommy at daddy ko. Kasi nga, kung gagawa kami ng kasalanan ni Marvin, noon pa namin ginawa 'yun kung ginusto namin.
"Kasi nga, pinapayagan kaming lumabas kahit na anong araw at oras. 'Yon kasi ay dahil sa tiwalang ipinapakita kay Marvin ng mga magulang ko. In return ayaw niyang sirain ang tiwalang iyon. Kasi nga, 'pag sinira niya ang tiwalang iyon, tuluy-tuloy na yon.
"Kaya nga lubus-lubos ang paghanga ng mga magulang ko kay Marvin dahil naging napakamabuting tao nito sa mommy at daddy ko. If Marvin is a suitor or a lover for that matter, masasabi ko ring siya'y big brother na rin sa akin. Madalas yang nanenermon sa akin. Sinasabihan niya ako pag nagkakamali ako sa lahat ng bagay. Sa pananamit, sa kilos at pati na rin sa pananalita. Sa totoo lang, espesyal siya sa akin."
Kaya tuloy marami parin ang nagtataka kung bakit hanggang ngayon ay wala pang inaamin ang dalawa, kung sinagot na ba nito ang binata?
"Alam n'yo yon? 'Yung MU. Kayong dalawa pero wala kayong commitments sa isa't isa." More or less ganon daw sila ni Marvin.
"Hindi kami committed sa isa't isa, although mahal namin ang bawat isa sa amin," paliwanag pa ni Jolina sa amin.
"Kasi mahirap nagco-commit ka sa isang tao, sa isang boyfriend. Kumbaga hindi ka na malaya. Hindi ka na puwedeng tumanggap ng ibang suitors. Kasi free din si Marvin e. Puwede siyang manligaw ng iba at nagkakaintindihan kami sa parteng iyon. Siguro kaya naman kami nagkakasundo ni Marvin ay dahil sa gano'ng relasyon, na hindi kami nagkakasakalan pareho. He's free at libre din ako sa buhay ko ngayon. Ngayon pag nag-commit na kayo pareho sa isa't isa, wala kang way para i-entertain ang ibang guys diyan. Ngayon, e, ang dami daming cute dyan, diba?" Pabiro pang sabi ni Jolina.
Kung si Jolina nga lang ang masusunod, gusto nitong si Marvin na nga ang kanyang reel and real partner sa buhay.
"Natutunan ko na siyang mahalin. Kaya kung ako lang ang masusunod, wala ng iba kung 'di siya nga." Pagtatapos pa ni Jolina na si Marvin ang kanyang tinutukoy na "special someone" sa kanyang buhay.