Malaki ang maitutulong nag may ka-loveteam para sa ikasisikat ng isang young star. Halos lahat naman ng mga malalaking artista natin sa ngayon ay dumaan sa pa-loveteam-loveteam sa mga pelikula nila.
Aminado naman si Jolina na kung wala sana ang loveteam nila ni Marvin Agustin ay wala pa rin daw siya ngayon sa kinalalagyan niya.
Kahit papaano raw ay nakilala na rin siya at malaki raw ang naitulong noon sa pagkakaroon niya ng ka-lvoeteam. Kaya kung si Jolina ang masusunod ay ayaw niyang basta na lang kumawala sa tambalan nila ni Marvin.
"Honestly, kung ako lang talaga ang masusunod, mas gusto ko pa rin ang merong ka-loveteam. Hindi naman 'yung dahil napatunayan na naming pareho ni Marvin na kayang-kaya na naming tumayong mag-isa. Ang sa akin lang, eh, nanghihinayang naman ako sa samahang pareho naming pinaghirapan ni Marvin. Kumbaga, nagtanim at pareho kaming naghirap para sa loveteam namin, tapos biglang mauuwi na lang sa wala. Ayoko naman yata niyan. Pareho naming inalagaan ni Marvin ang loveteam namin. At dahil nga doon at sa tulong siyempre ninyo at sa lahat ng mga taong nasa paligid namin, eh, natanggap kami ng mga tao, 'di ba? Kaya kahit sino naman sigurong nasa poder namin, eh, malaki talagang manghihinayang kung basta na lang ito mabubuwag. Kahit na siguro naintriga kami ni Marvin at sinasabi nilang malapit na raw mawasak ang tambalan namin, eh, pinagpipilitan at talagang ipinagtutulungan pa rin naming huwag basta-basta mauwi sa wala ang tambalan naming ito."
Kahit papaano ay unti-unti na raw nilang naayos ni Marvin ang mga gusot na naging dahilan ng intrigahan nila noon. Pero aminado naman si Jolina na hindi pa raw talaga naibalik ang dating closeness nila ni Marvin.
"Hindi ko pa naman talaga masasabing ayos na ayos na kami ni Marvin pero kahit papaano, eh, pinipilit talaga naming maayos 'yun. Hindi ko pa rin masasabing maliwanag na maliwanag na ang lahat sa amin at wala na talaga 'yung gusot. Sa totoo lang kasi, eh, hindi pa rin talaga kami nakakapag-usap nang kami lang. Pero I'm sure na alam ni Marvin kung ano talaga ang ipinagtatampo ko. Kilala na rin naman niya ako, eh. Sa akin kasi, kung ako ang mali, eh, tanggap ko naman kung magtampo siya sa akin. At marunong din naman ako humingi ng sorry. Pero kung wala naman akong kasalanan, eh, there is no reason para birahin ako. Hindi ako basta makapapayag niyan. So, I know na alam ni Marvin kung ano talaga ang ikinasasama ko ng loob," sambit pa rin sa amin ni Jolens.
Ang tambalan nilang dalawa ni Marvin ang sinasabing numero unong kakumpetensiya ng Juday-Wowie loveteam. Hindi kaya napapanahon nang plantsahin na nilang dalawa ang anumang gusot pang natitira para tuluyan nang mapataob ng tambalan nila ang kalaban?
"Well, as I have said, binuo namin ang loveteam at pinilit naming huwag basta mabuwag ito dahil sa naitanim na rin naming friendship sa isa't isa. Hindi rin naman siguro 'yung dahil sa kailangan naming makipagkumpetensiya sa iba. I know namang darating din ang time na basta na lang maayos na maayos na ang lahat. Mabait naman si Marvin, he understands naman sa kung anumang naging problema, di ba? Kaya, malay natin, isang araw, eh, makapag-usap kami nang husto na wala na 'yung kung anumang gusot na naiwan sa amin, di ba?" balik tanong pang pagtatapos ni Jolina.